睇電視習慣

細個時的習慣係一返屋企開著電視機，之後先換衫、坐低乜乜物物的，而電視台梗係1台啦，而1台又永遠係TBB匪脆台，其他2(明輸台)、3(亞兜電視本趕台)、4(亞兜電視覺細台)就係廣告時間先轉過去的…(我細個係唔鐘意睇廣告架﹗哈哈…)


而家呢返屋企第一件事係開電腦囉…。但因為最近家裡換了可以看膠清台的新電視，突然很有興趣重拾看電視既興趣…

新屎坑三日香係固之然啦，另外一個原因係近期日劇很悶人，《魔女裁判》睇到想打爆電視…最近無記的劇集又幾精彩(但精彩唔代表無野鬧架喎﹗)，呢兩個月小的的煲番港劇…(這是港劇爭氣了嗎？﹗)

膠清台我都主打睇TBB的，首先當然係J2…年輕人oriented嘛(好了，我知我不年輕了﹗)，日劇、音樂、潮流資訊等，都頗合我心意。膠清匪脆台夜晚 都係播一貫的劇集，午間就有娛樂新聞報導(料接料的tag位比有記娛樂乜人台好得多了﹗與其講啲根本毫不相干但又硬係要linkup到兩單料的punch 位，不如唔好講啦﹗)、資訊節目(睇到有集講世界各地特式的屋﹗)和舊劇咁，有次唔覺意睇到《四葉草》(打沙灘排球的﹗)，嘩﹗耐到呢…仲有千億新抱演出 架﹗不過我家沒收費台嘛，無啦啦唔覺意睇到感覺又幾新鮮。

果然係有得揀咁先係老闆，登時有番睇電視的熱情。

前幾年有一水煲港劇煲得很兇，但TBB劇有樣衰就係劇情很拖拉(所以說《BIG血鹽HILL》好啦，除了馬小生的木口木面外，整體說真的很緊湊﹗)， 而且短極都座底20集，坐低喺度又做唔到其他野，睇一集劇集就無咗一晚感覺都幾浪費的，有時出咗街遲返屋企miss咗又心掛掛…

所以說而家有得網上睇番，簡直係TBB十萬樣惡行中讓人感動的德政﹗實在追開一套劇睇少一集半集會心掛掛的嘛，但有時又真係睇到把鬼火(如《豬肝補氣》)，網上睇就一流，眼冤可以飛走佢(如《烈火雄心3》的鄭視帝…哈哈哈)…突然間覺得人生好有希望…

喜歡睇電視的人唔只c9或老人家小朋友既，只係有一大班人唔prefer坐定定，同埋鐘意多啲選擇，唔係電視台播乜就睇乜，有了網上重溫和膠清台，登時有番細個時睇電視的熱情呢﹗(最開心的是…多咗野睇，cut咗有記都唔可惜囉﹗)

今晚開播的《絕代商驕》返唔切屋企睇都唔驚會miss了﹗yeah﹗ (嚟緊的blog很可能都係繼續講電視﹗哈哈)