簽名

想問一吓，大家的簽名係點樣設計出嚟既呢？

話說某次search野時click咗入個很多popup的大陸網，驚嚇之下當然係啦啦聲「山」番晒佢啦，突然間見到一個popup係簽名設計…吓？簽名都要設計的嗎？(個site好認真的，話會設計出點樣有大老闆feel的簽名來﹗)

其實，應該要既…因為我當年係有認真地做過呢件事…哈。

基本上我的簽名係中三時先定型，之前都係無定的一時寫吓中文一時寫吓英文…又基本上…除了11歲拎身份證…其實細路仔好似無乜需要簽名呀呵？

我娘和爹的都打橫簽中文名的，三粒字用極撩的方法撩出嚟，撩到老師經常認錯和讀錯的，但又咁講…又幾難冒的說(咁我呢啲學生雖然唔叻…但又未至於差到唔敢俾 父母簽要自己冒既…)((又，我咁富挑戰高峰精神當然係有試過「練習」媽媽簽名…不過最後失敗了…))，咁最初就跟住練吓打橫寫中文名做簽名，不過我的名 字筆劃多，兼只有一粒字可以寫簡體字(中二時的中文老師十分開通，佢唔介意我們寫，但介意寫錯﹗多得佢我先識寫又識睇咋﹗)…吓吓咁撩法都幾係野…兼之次 次出嚟都唔一樣，咁明明係本人簽都被當冒簽啦…(說實在我手中文字寫出嚟相似度係可以差好遠，反而寫英文字就穩定啲…)

好了，向英文名埋手，初時都係Mary Chan咁樣成個名串晒出嚟，跟住寫吓寫吓就由打橫變咗M字喺上面N字喺下面，變咗打直兼得番頭尾兩粒字母…而呢個簽名又好奇怪地可以穩定地簽出來，就係咁一路簽到而家。

睇過啲關於簽名的心理分析，說如果打橫簽的話係有霸氣(我爹和娘一個處女座一個獅子座啊﹗)，打直的偏向順德人(我﹗係我﹗我好NICE架﹗)，又聽說多圓位和多角、勾位都有分別…就search番出嚟睇…睇到：

• 簽名豎寫的，表示書寫者本人自我感覺相當強烈，有表現自己的強烈欲望，也非常自尊、自信。
• 而有些人簽名如同鬼畫符，沒有人看得懂，這種人有潛在的自我毀滅傾向

哈哈哈﹗原來我有自我毀滅傾向的﹗的確無乜人睇得出我簽乜，鬼咩，成個名溶剩兩粒字…

好在我沒把簽名設計得太複雜，而家工作出文件時幾乎都要簽名作實，簽到手都軟耶﹗

延伸閱讀：從簽名看性格