2007/10/23

《Hero》~在戲院睇電視

如果你問我這《Hero》電影版好不好看,umum,故事一貫的緊湊而且是大型升級豪華版;卡士除了原班人班(齊莊嗰隻)還有強大陣容加入,最富話題性當然係韓國既憲哥和松隆子爸爸松本幸四郎粉墨登場,除查案仲剎有介事的話你知久利生(木村)和雨宮(松隆子)二人感情大進展(不是我爆劇情,電影海報都係咁寫的說);而且遠赴韓國(其實都唔係好遠…)拍外景…製作都算認真吧﹗

睇完,我唔會話唔好睇,只係覺得好似俾錢在戲院睇電視特別篇…。這算是讚定彈呢?

日本藝能界好像很喜歡電影電視劇互相改編,繼《太陽之歌》、《一公升眼淚》和《東京鐵塔》(14/3/14後按:仲有《電車男》呀﹗),也記不起是劇先還是戲先了。《大奧》和《Hero》兩套,均是隨劇集受歡迎而來個映畫化,電影上畫前可能怕大家忘了劇集是甚麼樣子,也來個先行電視特別篇,於是看《Hero》不禁會想起前陣子看過的電影版《大奧》…。啊,隨之而來還有下年於日本上畫的《欺詐獵人》、《壽司王子》和大口仔主演的《西遊記》的說。

之所以會望住木村主演的《Hero》會想著仲間由紀惠主演的《大奧》,乃因兩套電影均讓我有「我在看電視」的幻覺。人物舖排、述事手法和拍攝方法如出一徹,特別是剛睇完兩個小時的電視特別版,噢…究竟特別版和電影有乜分別呢?就係一個係免費從電視收看,而另一個要付錢到戲院看?若說電影版吸引之處係卡士和故事終極升級的話,喂,特別篇已做了呢件事啦,何以仲要我俾錢入戲院呢?

雖然有點被騙(入場)的感覺,不過《Hero》電影版還是保持一貫的流暢,起承轉合應有盡有,看這部總算賞心樂事。反而《大奧》電影版就令本人很不爽。

大奧》系列的看點就是大奧各女角權和愛之間的慾望,三部劇集都是圍繞這個點子出發。以「絵島生島事件」作藍本的電影版卻來個大逆轉,無啦啦變了個深宮女子追求真愛的故事…本來亦無不可,雖然和前作風格有異,但若然愛情故事能令人動容亦不失為一件美事。然而,電影一開首就懶係要承繼前作,將繪島夫人(仲間由紀惠)包裝成甚有能耐的女人,既助主子成為將軍之母,自己又爬上大奧總管之位,再加上一大班閒來無事終日惹事生非的側室夫人,不禁會期待這班女人如何鬥法;但鏡頭一轉,呢位大奧總管原來極水皮,被人家一招半式就扯下來,劇集最好看的看點完全被糟蹋了;更死的是,阿繪島夫人口口聲聲說自己要忠於主子,唔會和其他男子有兒女私情,一路都板起口面的她轉個頭(好像是一場火被該男子救出火海)無啦啦就陷入真愛之中,不能自拔,完全無起承轉合耶﹗天呀,係咁意俾少少轉折位好喎﹗

那班「閒來無事終日惹事生非的側室夫人」請來劇集中大鬥法過的高島禮子、松下由樹、淺野優子等壓陣,開首見到呢個金鑽陣容極高興,只是她們負責演閒人,行行企企食飯兩味無發揮,浪費﹗還有《大奧》套套劇都有份的北村一輝,他客串「衣櫃裡的男人」負責從衣櫃爬出來和偷情,又是一個異常浪費的卡士﹗

先行特別編《大奥スペシャル~もうひとつの物語~》(深田恭子主演)已不是特別好看,不過好歹沒埋沒前作的強項,接力的電影版,若說是承接前作的話完全失敗,做純愛電影又沒本事,兩頭唔到岸,作為系列的總結,好失敗﹗

對《大奧》這部戲的牢騷想發很久,估唔到是俾《Hero》激發本人寫下來的決心。基本上,《Hero》電影版是沒甚麼好挑剔,喜歡這部劇的相信都會喜歡這部戲,因為…除了人腳和篇幅多了之外,實在乜都係承接劇集的,仲有乜好講?(咪就係要俾錢睇囉…)

不是說木村演技甚麼,而是他演久利生公平這種有才華的怪人確係得心應手,比年初看《武士的一分》(我竟然一年內入場看兩部木村的片子…奇哉…)演失意武士順眼多…。而我能搵到劇集和電影最大的分別,就是電影版極多大頭,大頭鏡頭出賣木村桑…呀,佢應該向福山雅治請教吓保養之道啦,皮膚色澤有點暗而且…歲月不留人…魚尾紋呀,難怪被韓國的憲哥粉串佢年紀大了…講開憲哥,究竟佢既客串有乜意義呢?佢出咗幾分鐘都唔知有無,而那個場景你話係香港我都會信,點解要山長水遠走去韓國呢?真係有點無聊,唔怪得有口痕友話是次去韓國搵憲哥客串,全因Smap經理人係憲哥粉…

唔想爆太多劇情,就只爆一個,最後一幕久利生和雨宮的戲,很odd囉,趕收工咩而家﹗

總括而言,若閣下唔介意俾幾十蚊(我介意架其實…)睇個以電視特別篇而言是相當不俗的戲既話,這部《Hero》是值得一看既…

(本來很期待《欺詐獵人》、《壽司王子》電影版…而家…都係…算把啦…)

21/2/12後按:做乜成篇野講《大奧》多過《Hero》既?﹗Oh﹗另一篇:我最喜愛的十套日劇
8/7/14後後按:本年夏天出第二部喎竟然,可惜的是女主不是松隆子了…

8 則留言:

  1. 電視台都有份拍埋電視, 所以搞到呢d電影版好似電視special咁.
    我都係鍾意睇拍開電影的拍電影....

    23rd Oct 2007 08:37 AM

    回覆刪除
    回覆
    1. 呢次真係要唱歌:你說得對…
      感覺,這套野係將套電視劇放在戲院播,完全無睇電影既感覺…

      25th Oct 2007 15:48 PM

      刪除
  2. 呢齣戲來講, 入戲院同睇電視ge分別係戲院畫面高清d lor…其他?唔覺有乜分別 XD

    23rd Oct 2007 12:52 PM

    回覆刪除
    回覆
    1. 同埋唔可以隨時pause佢去廁所…XDDDDDD

      25th Oct 2007 15:49 PM

      刪除
  3. 最搞笑係同電視一樣,出一字排開人牆,仲打埋角色名稱出黎......

    23rd Oct 2007 20:43 PM

    回覆刪除
    回覆
    1. 所以咪覺佢係咪拎咗套劇集來放囉…

      25th Oct 2007 15:49 PM

      刪除
  4. 對HERO的感想, 跟你可說是英雄所見略同

    24th Oct 2007 09:45 AM

    回覆刪除
    回覆
    1. 哈,完全係啦…
      我諗都唔止我一個覺得在睇電視…

      25th Oct 2007 15:49 PM

      刪除

要講幾句嗎?﹗XD