我cheap故我在

貫徹本人雙子加巨蟹「終極矛盾」性格，一邊愛行街買衫，但一邊悔恨自己亂使錢；一邊想sterotype心儀品牌的素質，但一邊覺得滿身名牌很沒性格；牌子這東東會令人為之瘋狂，但以cheap的價錢享受到用名牌的滿足感就更令人著迷…

本人算不上死慳的一群，我相信辛苦搵嚟自在食，錢放在銀包等著在cashier出現的一刻，光芒總比銀行存摺簿內的數字來得耀眼。一直以來我相信應駛則駛，前提，是要使得有品味。若然出手俾人低但享受到的和別人差不多，我毫不猶豫選較cheap的一樣，cheap，不打緊。

不知這算不算怪癖？

本人穿衣品味趨向保守，一定要穩陣，著上身覺得唔自在的話寧願遲到都要換過佢，最飛佛的T-shirt牛仔褲至今亦然，對女生最愛的行街買衫化妝扮靚本人是非常後知後覺，甚至沒甚需求，相對而言，本人更捨得將錢用在其他方面。到中學時覺得有需要扮型(緊記是「型」唔係「靚」)，身邊友儕教路的入貨地點是-- 「踢死活」、「堡獅龍」、「佐丹佬」和花園街﹗﹗(這就是女校學生了﹗天呀﹗咩野學校呢架呢間)，加上當年常煲的《No﹗》雜誌有一欄街頭 snapshot，將被訪者身上的衣物價格登出來，有一水還有打星星俾分制；而本人覺得「幾型」、「唔錯」的造型均是cheap貢貢(成身都係幾千蚊那種)，cheap cheap的mix & match觀念深入本人腦海…

當然，cheap衫手工和質料質素參差，通常只預佢著得一季，著得多一季就係bonus。貪平而吃苦頭本人試得多，所以本人著眼的cheap，是價格相宜(有比較之下)，款式襟興，符合本人穿上身覺得型和舒適為原則。最經典，是當年唔捨得買「愛搭的士」外套(好似五百幾蚊)，退而求其次下買了「三史必-- 依啲斯」的外套(三百幾)，唔覺唔覺，著到而家足足八年…(好驚)

買衫時本人總覺得一定會有差唔多而又更平，當行完一輪搵到合心意(即又平又靚)的替代品，滿足感絕對大於就咁照跟雜誌shop list照買的說。想起來，連埋當年present買下的套裝，衣櫃內最貴的都係幾百蚊，未有過千的。

最鬼上身的經歷，是看雜誌後跟住到「c+cd」買了件乾濕褸，盛惠七百幾，只著過一次。說實在件衫好靚，但唔合本人品味，穿上身總覺格格不入，左襯到搭都唔合心意…唯有放棄。現在衣服在衣櫃中成了雞肋--食之無味棄之可惜…

想當年便服最愛到各地口店和outlet出手，得意之作是$49的uniqlo橫間tee，仲要係長袖嗰隻，一流。而最近執正大行動進行得如火如荼，某日身上的西褲和皮鞋(但著到我腳痛﹗)竟同時獲同事稱讚和問喺邊度買﹗買衫之最大滿足感莫過於此也﹗條褲，二百幾蚊而已；對鞋雖然著到腳痛，$499未到半百(究竟仲應唔應該著呢仲…)。嘻嘻，容我自滿地笑一下…嘿嘿…

都說，身上又平又靚的東東受人讚賞，又著得自己舒服，那種滿足感是很令人沉迷的說。

望著十蚊本雜誌內裡介紹的盡是千千聲的衣服，心裡疑惑究竟這是shopping guide還是崇拜名牌手冊？﹗雜誌的讀者是一個月搵一萬幾千的OL甚至沒收入的學生，但當中介紹的無不貴到嚇死人…

相比衣服，本人較捨得買鞋、錶和袋。無計，本人天生怪腳，高的低的平的貴的都可以著到痛腳收場，只要試到一對舒服的唔服氣都要買。錶和袋，買些好質素的用得耐，本人又不嗜好每天轉錶/袋，同一個可以用上幾個月甚至一年，買時覺得貴，但用上幾年除番，抵。

呢篇水靈感來源：紫熊大大的買不起名牌衣服

另外的：
地獄式慳家~《攢錢羅曼史》
我是…濕平魔…嗎？
我cheap故我在二之入會狂迷 
行街買衫買鞋…慘

延伸閱讀：
百物騰貴的證據…
百萬富翁的頭腦

另一篇：如何變得更慳家