華星同學會

每次搭車出香港仔隧道經過禮頓道一號(8/3/12後按：而家變咗SCMP了﹗)，都不其然懷念經幾何時掛著華星logo的廣告版，這搖籃搖出無數歌手陪著我成長。現在的人都愛download MP3，還有沒有人會留意歌手歌曲出自那寶號？

剛過去的星期六原來做了新秀，已由別家唱片公司主辦，節目依舊人面全非(最難頂還是三位唔唱歌走去做司儀的"人氣偶像"和那位跳得好勁但首歌唔多勁的天后， 去廚房時無意中聽到)。還是比較懷念華星辦的新秀，和有那支唔唱齋拎的金咪。自出娘胎(媽子說本人未讀幼稚園已識跟著梅姐唱why why tell me why)就建立的親切感，唔係咁易被取代的。

唔知多年來的新秀有無興趣學港姐咁整番個「慧妍」咁既組織呢？係的話真係好人強馬壯。話晒新秀咁多年除了提供無數新人給華星自己及各大唱片公司外，還為無記和電影界提供大量新血。

一直都覺得呢間係幾奇怪的唱片公司，旗下大部份歌手都係華星自家捧出來，可見其眼光和膽量。少數如哥哥是由別家轉投(應該還有70's的羅記等)，其餘的就是華星friend無記的藝人，和現在的《男人味》、《女兒雄》一樣，好睇未必好聽。(23/1/14後按：後來才知道，原來華星本來就係無記唱片部，難怪跟無記關係咁密切了﹗)

睇睇個CD櫃，原來本人都收埋好多華星出品。

梅艷芳

本人第一位偶像，除了《壞女孩》，小時候本人另一首首本名曲是《夢伴》，還要配合渣住煲茶油脂式指天篤地pose唱「今天今天星閃閃」，勁呢。不過 當時太細未識買唱片，第1隻梅姐唱片是98年的情歌精選，雙CD單碟價，一次過搜羅多年金曲﹗另一至愛是00年的《I'm so happy》，當中的《愛的教育》以及和陳奕迅合唱的《同哭一聲》最為本人欣賞；記得這碟出街前因為《Mui Mui》和某牌子名字相近而被迫換了碟名，幸好，《I'm so happy》只是一張貼紙，撕下後《Mui Mui》重見天日，順眼得多。
 
突然懷舊之梅姐篇

張國榮
小時候譚、張兩派鬥得熾熱，本人其實唔太知所為何事，不過見呢個哥哥的歌快夾型，人又靚仔(~)就迷上了。除了《Stand Up》，當中的《黑~色午夜》都是本人心頭好。不過本人無買過呢張碟，之所以印象深係因為鵬哥在歡樂今宵將此碟改了做《Stand 0翕》，仲影了個張惡榮的封面照，唔得你死，一樣咁型~

I miss you much

劉德華

真唔知劉華原來有簽過華星，直至某日在阿姨屋企摷到呢集碟(可惜係黑膠唔係實強搶…嘻嘻…我已強搶了姨姨的張國榮告別演唱會，可惜隻碟壞了聽唔到)，見到個封面簡直驚為天人--一個man著住件銀色衫作海棠春睡pose，想點呀﹗還有原來我以為《回到你身邊》、《情感的禁區》、《下雨晚上》已經夠舊，點知 一碟還有一碟舊，仲有一隻叫《只知道此刻愛你》，都幾好聽。

劉華最愛．經典10大5/03/07 (我的劉uncle飛佛啊﹗) 


郭富城
呢個名係本博出現率之高可見佢當年在本人心中地位之高之勁。本人由92年《太陽計劃》閉幕show(好記得﹗)睇完佢唱《對你愛不完》後瘋狂著迷到後來本人移情別戀，幾年來本人只買過兩餅帶，其他碟都係靠同學仔dub俾我，手頭上的CD都是後來在二手店掃回來。最欣賞呢隻《把所有的愛都留給你》因為難得有 一隻碟係Studio影相，又有啲styling膠縷皮褲咁(有點《91神鵰》中銀狐的味道)，和之前T恤牛仔褲大為不同，不過，內頁的那些pose現在睇就好攞膽…

郭富城陳年MV特集  6/11/06  (攞命滿分…)((仲有敗家實錄﹗))

陳奕迅
陳醫生出道正值本人買CD最狂的日子，從他第一張開始本人一直捧正版場直至他轉到那間我不太欣賞的唱片公司為止(同樣係出一隻買一隻的巨基就以隻數取勝了﹗)當年本人從收音機聽過《時代曲》就決意買呢隻碟，話說本人係和家人飲飲吓茶想閃開去買碟，動身時表妹一問知道本人想買一個叫陳奕迅的CD時她立刻不屑地拋下一句：「咁都買﹗」現在證明我有眼光(呵呵)，一張「華星大眾價$88」的唱片給我聽足十年，咩都抵。不過本人最愛卻是第三張專輯《我的快樂時代》--一曲《今天等我來》是當年的應援歌，《我甚麼都沒有》對照當時患得患失的心情，《新曲+精選》串盡歌名，還有一首越聽越有味的《反高潮》…一個字「正」﹗ 唔睇唔知，原來封套是在陳生小學取景，配合個碟名真係幾有意思。

賽後檢討，華星給歌手自由度大真係幾大，看陳生華星時代和EGG時代的歌就知，紅的有幾多首時玩野一點的傑作呢，還不是四平八穩情歌。

今天只做一件事~陳奕迅《H3M》+醫生10首

楊千嬅

千Fa初期的歌我無咩留意，硬覺得歌詞好唔知想點，睇極都睇唔明。後來不知何解買了張《私日記》，應該是為了派台歌《手信》吧(但我又覺得呢首詞其實都怪怪地，硬係唔多通順…)，如此就發現了有段純音樂hidden track極好聽的《數你》，之後就成了千Fa粉。論最喜愛的卻是99年的《冬天的故事》，一反之前《夏天的故事》跳脫輕快，碟中歌曲帶著股冬天肅穆的感覺，當然，唔係首首都慘既，起碼個booklet啲相唔係，仲好鬼有聖誕氣氛。

一年兩季楊千fa

何韻詩

買何韻詩的《First》係愛屋及烏，因為Hocc係梅姐徒弟，情況如同草蜢(《愛將》…)和許志安(《將冰山劈開》…)。聽完主打《千千萬萬個我》又真覺得唔錯，再聽埋碟中歌曲…即時愛上《光榮之家》…這blog的名，就是偷了這歌名來用，哈哈。

不得不提，兒歌之霸華星遠至梅姐年代的《IQ博士》，近至陳醫生的《超人的主題曲》，甚至何韻詩區倩兒的小丸子歌都係咁耳熟能詳，都咪話唔厲害﹗

突然懷舊之Hocc篇

古天樂

…差啲就出手買咗呢隻《樂天》…其實我覺得《尋秦記》首《天命最高》幾好聽，詞意又配合套劇，都唔錯呀，最緊要無《今期流行》呢隻石破天驚的歌…不過最後都係無出手…(23/1/14後按：總算小的迷偶像之餘仲有點點既理智﹗哈哈哈)


同場加映

文佩玲
一位我好記得的姐姐，極記得她一首叫《鬥氣》的歌：「你我卻要鬥氣，氣力合力浪費，鬥氣鬥氣鬥氣，永沒讓步姿勢…」(但個唱片封面係EMI，唔係華星的)，係咪好有今日梁漢文楊千Fa隻《滾》的味道呢﹗另外呢位姐姐仲好似同杜德偉有首合唱歌，不過唔記得了…唔知係咪《愛全為你》…無印象…

海俊傑
話說聽過許志安的《Heart》一碟中由海生和許生、梁生及張氏兄弟合唱的《朋友心》(如果我無記錯，這隻歌本身係《沒有家的女孩二》的主題曲來的…)，不自禁的深深欣賞~我覺得佢ok架。他的《微風中》和《永遠的偶像》：「天黑總等到黎明…」我又係好記得。不過後來他就轉去拍戲(深深記得《緝私群英》做小環前男友…)和做變態殺手了。