形似神不似@叮叮食物

當市面越來越多叮叮食物，叮到整個Foodcourt可以係屋企攪掂時，本人口味越來越阿婆，腸胃Send msg說唔接受呢類食物了。從前日叮夜叮的本人對叮叮食物日益抗拒，如果公司有爐有火的話(無火煮食我都唔拘，因為我唔想幾百蚊買個保唔到溫的飯壺)我唔介意開鑊熱番啲飯，總覺得微波過後我兜飯難食咗。

叮叮對我等一眾唔識煮野食的為食鬼可說是天大喜訊，精美的包裝總不其然令人想起在茶樓、餐廳和他們的真身相逢的美妙時光，頓時食指大動，亦忘了老媽叮叮野唔好食的教訓。手起刀落拿起幾包飛了比錢返家叮，叮叮廚房，食咗先講。

可恨這些東施效顰的東西十居其九都達唔到packing上的指標，也不要說他們的真身了。不要說做得神似，基本上連形都唔似。

從前叮叮界老大哥點心是本人恩物，酷愛飲茶但家人甚少飲茶之下蝦餃燒賣奶皇飽一下子喺屋企都有得食，以前最愛在七仔叮點心當一餐，不知是否七仔的微波爐熱力較勁還是舍下的比較頹，自家叮的總是一股絕頂難受的雪味，落再多的蒸魚豉油都掩不住蝦餃燒賣本身的蒼白無力；毫不勻稱的熱力(空有一個轉盤…)令一個好地地的奶皇飽邊熱邊冷；至於飲茶必叫的炒粉麵，不要說了，無鑊氣的一堆濕粉麵而已。少了爐火，少了竹籠，最緊要是少了生鐵鑊(一定要生鐵﹗有咁黑得咁黑的)發功令熱力均勻的傳送，味道就是天壤之別。

深深熱愛白汁意粉的本人為了能一解相思之苦，不辭勞苦試盡超市中的各式即食意粉，結論是：不如自己買樽意粉汁炒好過。一包包通粉加包粉的種類無論是叮還是落煲煮出來都是"杰"成一pat，好核突，未食已食慾盡失。新世代的叮叮意粉，一包過放進微波爐就攪掂，如果叮得時間得宜的話意粉質感軟硬得宜感覺OK，不過咀叼叼的本人略嫌白汁太稀(質感直迫水的程度)，相比加水叮的版本，叫做好好多。

偶然想食吓粥清腸胃的日子，就試試叮叮粥。感覺比起叮叮意粉OK，味道和用料(都只是皮蛋和瘦肉罷了)比意粉版兄弟來得多，口感亦比較像真。唯一問題是…我的死人微波爐火力弱到不堪，叮極都唔熱，食到底的粥仍是凍的，好討厭。若然整落煲度煮熱咁不如自己洗米煲？反正皮蛋屋企永遠有，再整兩粒瑤柱加兩塊果皮…正﹗咦…做咩仲要買返呢叮？﹗

近期仲擴展到有叮叮豬扒通粉、糖水x湯丸，前者基於唔知塊豬扒叮完係咩樣所以遵從老媽勸告無試，而糖水x湯丸反而成了家中常客，呢個可算是最形神俱似的叮叮食物，起碼，芝麻糊叫做香和滑(但比起糖水舖的杰住嚟滑仍爭很很很很很遠)，湯丸皮的厚薄和餡料的比例算係OK(我已將貨就價，鬼叫屋企附近無糖水舖可以消夜咩)。可惜，本人至愛蕃薯糖水加蛋乙隻如果出叮叮版應該會幾恐怖，而老媽又唔多願整，怕且都係捱芝麻、杏仁糊算。

小弟極力推薦的X仔焗飯和美X快餐7仔即食版(以前叫龍鳳茶樓？)，話說年多前出外勤搵飯食全場只得七仔乙間，無奈之下就叮了個叉鵝飯，那兩片咁大把的叉燒和干柴一樣的燒鵝實在深深的嚇怕了我，早之叮個三文治無咁嬲，廿幾蚊…唉…呢個陰影之下本人一直未有再試叮叮飯盒，據小弟以身試飯報告，X仔的白汁雞皇飯幾唔錯。呢期係地鐵見到七仔又有新野：日式大碗叮叮飯，多謝啦。

當市面越來越多垂手可得的A貨叮叮野，心中越懷念由人手親自整出來的飯菜(雖然出街食的可能都係雪藏野…)，難怪現在私房菜越見興旺，說到底心思和人情味才是食物最佳的調味料，點叮都叮唔出來的。
**************************************

不怕死之即食地雷特工手記：
急凍得來又好食？ 14/10/07
叮叮Risotto試食記~ 28/12/07
叮叮Risotto試食記2~ 8/01/08
叮叮試食記：麵包布甸
叮叮試食記2：黑白心太軟蛋糕
即食甜品之~豆乳プリン黒蜜きなこ付

即(輕)食雜記：
懶人下廚之豆腐漢堡
懶人下廚2之咖哩
又來即食~一個人的關東煮