電影台

自從本人和無記劇集口味越來越不協調後，我的看電視quota就經常奉獻給有記電影台。

朋友將之戲稱為「爛片」台，除了星期六日晚黃金時間外，兩條頻道大部份的戲都是：

• 經典系列，從小到大睇咗幾百次，但次次見到都忍唔住坐低睇…
• 上正場你唔會有興趣入戲院睇，甚至上咗都唔知
• 上正場無入戲院睇，諗住之後出碟買番呢睇不過唔記得咗
• 好耐以前睇過，但極少/唔會再翻睇
• 完全唔知有呢套戲(可能係迴響太少，或是自己根本未出世)

影片爛唔爛就見人見智；以身為超級電視精的本人來說，電影台每每能帶給我無限驚喜，每每從不知名片中認出熟悉藝人其趣味可謂娛樂無窮，爛唔爛的戲我都甘之如飴看個飽。

無記奶水大的本人，每天的三線劇集可說是每天必看的節目，追少一集都周身唔聚財，當年本人能乖乖的每晚坐在電視機前追晒六十五集的《天地男兒》。現在自己私人時間少了，連坐定一小時的耐性都沒有，再有興趣看的劇集完整睇完機會不多；不幸卻因為撞正食飯時間而睇咗好多晚《硫磺四重奏》，好恐怖真係好恐怖，每逢媽媽唔覺得就轉台。與其投資時間睇二十集爛劇，倒不如看兩個小時爛戲了，而且，好多表面爛的戲其實都好好睇仲好有驚喜添…

本人熱愛的周星星，十居其九是當年從「快圖X」或「X獅」樹租回家睇，《賭聖》、《逃學威龍》、《國產零零漆》等星星經典對白都背誦如流(都說讀書又唔見我咁叻)，雖然後來買番VCD珍藏不過好少無啦啦拎出呢重溫。多得電影台不停重播(舊到無倫到新如《功夫》都有你唔死)，令本人keep住星星經典對白的熟悉程度(須知《唐伯虎》的詩詞鬼咁長好難記)，連未租帶看過的《西遊記》(新的《西遊．降魔篇》)、《回魂夜》等都煲熟埋(14/02/13後按：咦…乜我有睇過《回魂夜》？典解我無印象既？)。當新年睇唔到無記播新年一定要睇的《家有喜事》時一定有有記補位，多謝，有呢套戲我的新年才過得完滿，好野﹗(此外《嚦咕嚦咕新年財》都係新年必睇)

重播極都睇不能不提劉華經典《雷洛傳》，有記劉華存貨看來唔多，撞到重播的來來去去都係《賭俠》、《整蠱專家》、《91神鵰》等，耐不耐撞到《藍血人》(唔覺唔覺都睇咗幾次)和上述的《嚦咕嚦咕新年財》(睇咗幾百次)。呢兩個星期紀念蝦叔關係又重播《雷洛傳》，次次見到都坐低睇，睇完都係有同一個疑問：何解「luck哥」明明後生過顏同和豬油仔等人，但結尾佢好似有咗衰老症咁變咗最老嗰個？﹗

有一期不知何解狂播80年代舊片，看完陳曉東的《停不了的愛》，有記就播劉華的舊版，當年他和溫碧霞的臉…差點就迫爆螢幕。有次一開電視見做緊《烈火青春》，慕哥哥的名就坐下來看，誰不知一來就一堆日本軍走出來拎住把長劍你殺我我殺你，睇到一頭霧水，後來才知原來呢個係結尾，我只看了全片最後十分鐘﹗唔怪得我唔明。仲有一套梅姐和哥哥的《偶然》，顧名思義係講人生的偶然，哥哥首先遇到梅姐，再無啦啦遇到王祖賢，無啦啦又發現王係阿爸朱江(ohhhh…朱江呀﹗)既未婚妻，一氣之下走到法國偶遇葉童…鏡頭拍得好唯美(成日濛鏡)，故事好多「偶然」，在猶豫好唔好轉台時睇吓睇吓又成套睇晒。

不枉我fixed死電影台，本人有幸睇咗唔少應該唔會買碟睇的戲：

• 夜晚瞓唔著無聊搵野睇時睇到《強姦系列》，本人基本上對呢類情色片無咩興趣，唔覺意睇咗唔知第幾集的《原始武器》(由某位跳舞減肥性感女神主演)竟然一路睇一路笑(個劇情真係幾好笑﹗﹗)；基於上一次睇得咁開心見《制服誘惑》(由某搖滾歌手女友主演)又睇埋，次次見阿男主角(唔…《硫磺》男主腳)無論係拍劇還是拍廣告都不禁諗起佢個變態樣…都係會笑。
• 已忘了係睇《無間道》還是睇《豪情蓋天》先，《豪》片都係講臥底，仲要係一個被警察懷疑的臥底。睇得劇集太多原來張智霖係可以爛撻撻的，登時叮一聲，劇情略嫌兒戲，阿頭與臥底的信任話變就變，好恐怖；運軍火由蒙古落香港都未夠誇，最後大爆炸主角都死唔去先最勁。不過整體唔錯仲有野學，斯德哥爾摩候群就係睇呢套野學返呢架啦﹗蘇老闆做阿頭唔驚，吳鎮宇做心理專家同人講term都唔驚，最驚係麥潔文做的madam，不知何解我只諗起兩個人：查小欣和盧婉茵…
• 唔睇韓戲(我只入場睇過一套《向左愛向左愛》，仲要係因為到場先知記錯時間睇唔到本來想睇的戲)的本人無聊睇了套--登登登登--《挑情寶鑑》﹗救命﹗坐低睇純粹係想望吓唔戴眼鏡的裴勇俊，但睇咗一輪都係一個鬍鬚佬行來行去，呀﹗佢咪係個鬍鬚佬﹗唔該晒，請著返時裝做返現代人吧，古裝留番比閔大人。
• 《假男假女》 ，前日睇的，唔係都唔知有呢套戲。一開電視見到陳國邦扮女人梁漢文面上流露著一股傾慕之情初頭以為係笑片，再見鄭嘉穎、邵國華…看下去才知關於同性戀。不過呢套野我忙住認人無咩留意劇情，除上述人士以外仲有袁潔螢、唐文龍、黃德Ben，還有曹永廉…最後仲有係95《神鵰》中做大武的哥哥(佢個樣好熟，我諗咗好耐先諗到﹗)好無記呀﹗認吓認吓又睇成套晒。不過媽媽有試圖轉台，因為她欣賞的鄭嘉穎係演個食煙又蒲的同性戀者，唔係佢心目中乖仔斯文的傲翔坊沈朗…。但最令我印象刻深的係陳寶蓮，話說戲中她暗戀鄭嘉穎仲唔介意同佢一齊幫佢扮直，暗啞底等一日真係變直，佢對住袁潔螢講呢段對白時個眼神好唏噓，令人感慨。有機會想睇番個前面，或者去搵吓vcd先…
• 仲有套《現代古惑仔》，不停有個唔識的哥哥係茶餐廳同何超儀講野，跟住有陳惠敏做大佬和翁虹他的老婆，基於個名太突出(how about古代古惑仔？﹗)忍唔住睇咗陣，太唔明佢想做咩之下決定轉台。

不能不提，啱啱睇完的《六壯士》，佢上的時候我想入戲院睇但唔知點解無入到。今次終於成套睇晒(唔似《半支煙》我睇極都睇唔晒，次次重播都睇得下半套)，嘻嘻哈哈的又兩個鐘。我真係好buy呢啲奇怪港產片…