我看穿屎

搭車返工時行經東區走廊，見穿屎有個《我們相愛六年》的甚麼展覽(因為行車太高速…我次次都睇唔清楚啲詳情)，真係唔經唔覺，穿屎已成立六年了…

(08後按：年初的事件令穿屎停工幾近半年，而家睇番這篇文，真係攞景到暈…)

六歲的人仔是入小學讀一年級的年紀了，K3幼稚園生賴尿的話老師嬸嬸仍會體諒(當然嬸嬸可能會喃喃幾句)，但做了小學生老師就會要求小學仔懂舉手請老師準他去洗手間。作為一個小學生，我們要求的不只懂舉手問去洗手間的事，正如作為一個歌手，如果唱了六年要求仍在唱歌萬萬不要走音上，悲乎？﹗

其實，本人自穿屎出道那首驚為天人的《明愛暗戀補習社》就有留意，當然本人係唔鐘意水著少女的說，係她們出道時穿屎曾號稱自己是港版「Morning娘」，身為Jpop之友的本人，點都要睇吓一隊Made In HK既組合如何玩日本概念﹗

話說讀書時某個project友儕選了穿屎來分析她們成功之處(竟然用明星來做功課…物以類聚啊﹗)，那幾個月鯨吞了很多穿屎成軍前的新聞資料，真係唔講唔知，原來她們出道之初是打著港版「Morning娘」的旗號，還打算到時到候招募新隊員(曾幾何時英記有新女生加入就被傳是穿屎新成員…) 不過，我諗呢諗去都唔明，那些水著泳裝就話係Hello Project慣用招式，但側手翻？﹗我真係未見過Morning娘打喎…呢招好明顯係抄Johnny啦…無論如何，揉合了Morning娘和KinKi Kids(我竟然用自己的偶像和她們比呀…天啊﹗)特色的穿屎，在女子組合從來不長壽的香港市場還是成功了…

少少題外話，這個Morning娘concept最後竟然用咗係Boyz度，由最初的Kenny和Steven，之後加吓人減吓人…變到而加三條友，跟住又整咗隻歌《3+1=1》(我識呀﹗嘩哈哈)，個一係邊個？咪Kenny囉﹗唔知第時會唔會有十人Boyz出現呢？(5/3/13後按：原來呢首歌係改篇Kat-tun《precious one》撞鬼﹗不過都無李彩rain的《你要記得我》得人驚…)

兩個年齡、身型(當時的)、外貌相若的女生以「雙生兒」為名，根本就是KinKi初出道時Johnny's的宣傳技倆，更離奇的是KinKi二人同年出生、同樣來自關西又同姓堂本，只是兩兄弟不可能相差三個月出生吧…(奇異…)。同一條橋用在穿屎身上同樣湊效，當年真的在坊間引為一時熱話，有 人真的以為她兩是姊妹，又有一期有人甚至分唔清邊個係阿嬌邊個係阿Sa(吓？)，單是這點以足以引來大堆話題。

還記得她們初出道是BMA有隊同樣是二人女子組合叫B2嗎？還記得她們那首很爆的《Shoot You Down》嗎？

印象中女子組合不是夢劇院，就是Echo或B2一類賣勁歌熱舞的，不過這類勁歌熱舞未算很大路。反看穿屎的歌曲，暑假的《明愛暗戀補習社》，02世界盃的《二人世界盃》，新年的《孖寶668》(之後年年都有首賀年歌)，大時大節總有她們，平常plug的是攻細路的校園情歌(如《女校男生》、《眼紅紅》)， 再加上一大堆兒歌英文，無孔不入得無時無刻都見到佢兩個。

可是，當拎走「校園」這攻細路的元素後…

望著穿屎攻台第一張國語碟走回頭路著番校服感覺很不是味兒，出道四年竟然無一樣野比起她們仍然清秀的面孔 x 校服來得吸引？算吧。在香港，年紀/資漸長的她們早就不得不捨校服穿背心短裙熱舞，當歌路和形象不得不轉得成熟點時，她們最大最殺食的賣點也就消失了，變成和千千萬萬女歌手一齊失戀我好慘…特別的，可能是人家一個人唱的歌她們兩個人唱吧？﹗

上年她們《一時無倆》演唱會前曾傳她倆會拆夥，阿嬌拍電影，阿Sa唱歌，和容天后一齊打天下…。當時我有諗，如斯傳聞係咪想係穿屎聲勢跌時Test the water，測試一下粉絲對她倆的支持度？

反觀東洋的KinKi，傳拆夥的新耐不耐就有，不過，我覺得就算兩個佬風格如何各走極端，Johnny's還是會以不變應萬變不拆。首先是KinKi還有個健力士世界紀錄在更新中，另外是保持組合之餘團員一樣可以單飛，單飛一段時間好讓粉絲餓團隊作品，很毒的一招啊﹗當以組合名義出碟時，再來甚麼 CD+DVD/特典/初回特別版，哼哼，仲唔保得住第一位…

總覺穿屎前程可以向KinKi借鏡，兩女生有條件單飛， 但穿屎招牌照保留，單飛久了就回團出碟(這是Johnny's慣用招)，先不說二人Solo功力如何(談了也只會令人痛心疾首)，若二人單飛成績不俗到可以殺上女歌手三甲，豈不是和師姐爭食？自己人打自己人那就漁人得利了(雖然我唔介意﹗)唱片公司又少了個組合獎在手…

睇番當年我們Project為她們下的Recommendations：提升技巧(指唱歌)、開新市場、多方面發展。幾年下來，新市場大中華地區算是發展過，她們的發展都算很多方面，可是技巧嘛…當年我們的提議行貨得來有幾有遠見的說…

不過，講呢講去都係嗰句，練歌先啦唔該﹗(2/3/12後按：到而家…卒之…仍然…呃…)

另外兩篇： 突然懷舊之癲士篇
《Concert YY 黃偉文作品展》~13XXX人集體唱K
(5/3/13又後按：雖然sa姐都係走音，不過佢啲solo歌係唔錯的…如《明明》和《年年》)