地下鐵嘆舊瓜…

"地下鐵碰著她 好比心中愛神進入夢 地下鐵再遇她 沉默對望車箱中…"

在非繁忙時間搭地鐵，我都不其然諗起呢首歌(雖然地鐵係唔比食野的…)，諗起Danny哥哥(雖然第一次聽呢隻歌唔係Danny的版本)，諗起《初戀無限touch》裡面無限清純的梁Gigi和陳東東(第一次聽就係睇戲中梁Gigi唱的版本啦)，諗起自己中學的時光…

話說家住港島的本人母校位處地鐵附近，搭巴士相對時間長而且行得遠，所以本人返學毫無疑問搭地鐵。多年來留下唔少腳毛呢…

想當年未有靚聲姐姐廣播系統，如果沿途(當年極大多數同學仔都係住港島沿線，基本上我地唔係在學校相見，係地鐵相逢)無同學仔相逢又眼瞓得半死就要死頂，因為嗰時無閃吓閃吓路線圖，人多睇唔到出面係咩站就靠車長廣播。但車長大哥唔係個個站都咁有心機字正腔圓的嗌咪，好多時我地會聽到奇怪的廣播：

• 正常的：下一站係鰂魚涌，the next station is Quarry Bay
• 鬼馬的：(輕佻地，差點就要yo住嚟)下一站…(停一停)係…(又停) 鰂魚涌呀…the next station…is Quarry Bay ye…
• 情深的：(鬼佬上身，有點顏聯武的感覺)下一站…(唔…)係鰂魚涌(重音停頓)。The next station is Quarry Bay, thank you(真係聽過有人講唔該…好似選港姐咁)
• 懶懶的：下一站係鰂魚涌…(無英文﹗)

這些騎呢讀法，絕對玩死遊客，難怪後來要搵過靚聲姐姐錄晒兩文三語，仲要講埋邊隻門出。不過機器既野始終偶有失蹄要人瞵操縱，於是我聽過：

• 下一站係金鐘，the next station is Kam Chung(？？？金鐘係Admiralty喎？？？)
• 請在左邊車門落車 (？？？但係個站要係右邊車門落車？？？)

又話說未有發達通之前係買儲值票，當年成人買一百蚊(唔記得有無五十蚊了)，而學生就係二十蚊或五十蚊，懶到死的本人當然買五十蚊，一張夠搭成個星期。話說當年地鐵飛背面一係有地鐵路線圖，一係有廣告，無聊的本人儲物成狂，當然唔放過見到有趣得意(其實無咩係得別得意的…)又儲一餐，用到剩番一兩毛時就連車飛套(當年在票務處有車飛套拎的，紙造同樣印有廣告一大堆，又係儲物item)拎返屋企儲，到無錢或要過海時就將double的拎呢用。點解？因為當年地鐵有尾程優惠，用剩幾多都可以搭多程，所以我地就好仲意將得番幾毫的地鐵飛儲起用呢過海，細路賺幾蚊，大人賺十幾蚊，開心死﹗自有咗發達通之後就無呢支歌仔唱了。

當年的地鐵飛係扁扁的一張卡(本人仲保有一張五十蚊學生飛~為轉用發達通前最後一張)，彈吓彈吓好彈手，於是搭車時無聊大人細路都用呢玩，有次本人同學就彈得太開心屈曲張飛屈到斷開兩張，下場就當然係到票務處換飛。有次同學仔語重心長叫我唔好張張飛擺喺磁石附近，說會吸走飛中餘額云云，低能的本人覺得神奇竟然走去試(真係好低能)，結果當然係唔用得又要走去票務處換飛。江湖傳言說lock了的門(只限學校課室門)用地鐵飛"zip"落去"卡刷"一聲就開到，話說某次班長仔忘了帶門匙出外小息，於是我等乖學生就試了生平第一次用地鐵飛開門…結果…唔得… 車車聲此起彼落，最後要去校務處拎鎖匙開門也。

雖然本人習慣性將地鐵飛和學生證(lunch出街食飯之通行證，因為學校唔俾中一生出街食飯~)一併放在裙袋，但總有遺漏或用盡之時，那時候就要幫襯單程飛。喺有十蚊、二十蚊都入得的售票機出現之前係要入散紙， 最大面額係五蚊咁大把(中學年代五蚊都係唔識找錢的)，無散紙？唔怕，去票務處唱散佢，當年有呢個服務，無聊的本人就經常搭巴士前都走入地鐵站唱散紙，唔使好似去七仔咁使幾蚊呢換散紙，無成本﹗嘻嘻。另外售票機隔離有個唱五毛錢銀仔的機，入個兩蚊/五蚊轉個頭就跌啲五毛子出呢；話說呢部野你只要大力拍幾拍就會跌多一兩個五毛子出呢，無聊的本人當然又去試試啦，結果應驗了﹗偶然賺番一、兩蚊咁。不過隨著售票機自己會找錢，唱五毛子機就變成了現在check發達通餘額機了。

在「多一點生活多一點時間」前地鐵的slogan是「搭地下鐵路，話咁快就到」。話說本人因為 小學和中學係同一個地點，所以對返學需時多少一早心裡有數，從來唔需要預時間(然而中學時唯一的遲到都是地鐵害的，列車卡在兩站中間成個幾兩個字，累到我想跑上地面飛的都唔得…嗚嗚)。後來同學仔告訴我地鐵係半個字一個站，返學要六個站即係三個字，加埋前前後後行路即係半個鐘—如此科學化的計算真係聽到我兩眼發亮﹗同時我地會計住邊卡邊隻門最近學校方向的出口，早在有「請在x邊車門落車」廣播前我們早已研究好那個站在那站等，車門一開不就用再走幾廿里路才能上大堂。回想起來都幾無聊，不過當年對我們來說是天大的發現啊。

不能不說現在地鐵的設施係幾為乘客著想，增加安全程度。但其實我比較懷念未有月台幕門的年代，列車駛入月台的一刻嗰陣清風送爽(不過吹到個頭癲婆咁)真係好正。雖然而家好多站都無呢支歌仔唱，但屋企附近的地鐵站因為係地面的未裝幕門，仲有得feel吓呢股涼快感覺。

以上數的東東不經不覺都是好耐之前的事了，現在十居其九都已更新，集體運輸系統不停改進總算讓我等小市民迫沙甸魚都迫得開心點。唯一不變可能是細路仍然愛挽著扶手玩體操/自轉，見到風景會興奮的坐起身望窗吧…

-----------------------------------------------------------------

幾分鐘的約會 陳百強
曲:陳德堅 詞:鄭國江

地下鐵碰著她 好比心中愛神進入夢 地下鐵再遇她 沉默對望車箱中
地下鐵邂逅她 車箱中的暢談最受用 地下鐵裡面與每日相見 愉快的心裡送
每天幾分鐘 共你相識已互通 旅程何美麗 如在愛情小說中
默默地等待她 等她天天降臨帶著夢 又沒有雨或風 何事杳然失芳蹤
日日地等待她 好比心中愛神要玩弄 地下鐵約會要是中斷 熱愛心裡送