[港劇]我為甚麼唔睇《殭》咁唔進步？

基於我娘係鐘意開住電視令間屋有聲，而呢套劇又係9點半做，咁通常我都返咗屋企，所以行出行入時唔覺意睇咗啲既…

咦…即係我．有．進．步﹗

而我會留意吓是因為飛卜大家瘋傳鄭視帝比元華更似元華，之後我先坐低睇咗陣，喂真係似喎﹗忍不住影電視留個念…但不要問我係第幾集﹗我唔知喎﹗

而另一個飛卜瘋傳的topic就係張太扮天真，為了驗證所以我咪睇了一輪，喂又又真真係喎，張太事後回應說係劇本要求。then睇番IG張太貼的劇情．人物介紹我又明啦喎，藍夢南身世奇情到不能，然後某年某月遇到羅蘭姨飲下忘情水(係我改既，唔記得劇入面係乜名…)失咗憶，despite佢讀書叻做咗法醫，但記憶係停留喺十幾歲變成殭屍前…喎，所以係天真啲既。就咁睇佢既文字轉述我覺得個故仔幾豐富又幾奇情，不過好明顯(就我睇過的幾忽，利申咗先)劇情表達唔到，我只覺得肢離破碎，晚晚聽少少都係一頭霧水，問晚晚睇的阿娘佢唔明，到張太post文我先明…呃，是眼高手低問題了？

睇阿大監製的報導時說佢前作係《怒火街頭2》和《衝上雲霄2》時，我真係完全明白了(eat﹗)，前者沒看但後者我係追到中間的，沒動力看下去就因為不明所以，個個角色都有條線，即係都佔劇情的相當啦，不斷談情又不斷飛來飛去好似睇旅遊特輯咁，但主線呢？是愛情定機師的故事？唔知喎﹗我只記得馬明和黑絲…呃…不是張先生的cool魔爆紅的話，我對呢套劇真係零記憶…

今次套《殭》又係同一套路，網上博文說是好十一編劇一齊寫，然後先六神合體，咁我又明了，個plot本身複雜，一個人寫典顧前文後理又要舖伏線後段要顧幾時解謎都已經難，何況十一個人，淨係要夾番咁多人寫既野合唔合邏輯都眼盲，於是主線失焦又真係好正常…吧…

於是我次次唔覺意lap到剩係見陸永等人練拳，一係就係視帝嫂同啲同學去搵靈異野，刑活著的不死人之謎我唔覺意睇到一次…咁大把…《少年四大名捕》呀﹗哈哈哈…藍夢南的殭屍之謎…我係一次都不能唔覺意睇到，係睇張太IG。其實件事都幾可惜，先唔個故仔係咪左抄右抄《我和殭屍有個約會》，眼高手低的表達手法浪費了一個看似有趣的構想，浪費了budget唔使講啦…至於演員…我無意見。

再睇飛卜大家的回應，好似都對無記先入為主，覺得一定係c9劇所以唔想睇…呃，我其實都有既…哈哈哈。你問我最後一次完整成套睇晒的劇是邊套？我諗係《真相》、《怒火街頭》和《洪武三十二》了，之後就算覺得有趣都睇唔晒，多半是睇睇吓覺得無趣或…我沒可能每天坐著慢慢睇的呀﹗Mytv又有時限，無得之後慢慢睇，then睇唔到又唔覺可惜，咁咪算囉。then近期覺得好看的《鬼同你ot》和《刀下留人》都係食飯時坐低睇，雖然覺得唔錯但又無動力要由頭追番到尾，咁囉…

原因…千篇一律的故仔啦(所以只要稍稍有點起色是會感動，但不會熱追…因為估死無記轉頭又會走番formula路線)((古裝劇少少research都做吓啦，唔睇書求其wiki吓都好丫…我真係接受唔到啲古裝劇嚟咁嚟呢…我真係唔信清末蠛民會知八國聯軍是甚麼囉？﹗呀，我講緊《末代御醫》，呢套神劇劇情唔講啦，羅太又做萬年熱血青年，煩到我娘都忍不住轉台…))(((無記係咪好鐘意話人知自己識八國聯軍入北京呢單野？10年前《鳳凰四重奏》已經係咁，究竟係我有問題定…呃)))，同埋來來去去那班人…呃，當胡渭康等中生都要一晚出幾次場的時候，點能夠感受唔到無記幾無人(2011年已經寫過啦…而家仲衰…)，年青既令既實力既都係那班，你唔悶我都悶啦…

雖然，無記肯拍套稍稍不一樣既劇係可喜，但我收唔收貨係另一回事喎…始終唔係晚晚可以坐喺度睇，又無得事後一次過追番，然後一嚟就廿幾三十集，負擔好重架，有時為了某幾個喜歡的演員可以頂足一套…但…呢套無喎…仲要得閒無事攪啲核突植入式廣告…大佬呀，台慶食炸雞已經肉酸…而家仲要明朝食…大哥呀…我輸…我拜服…

<--我見證咗亞記收工一刻…

亞記摺埋，viuTV頭威就有啦，唔知有無尾陣，或許無記都係以舊招應對…同廿幾三十年前一樣你做乜我又做乜…真係…無野好講…天呀…誰會想睇亞米高打mma呢(或者有既…囧)…同repeat一千次的《xx愛作戰》…或者見人家的(偽)真人show做得成功所以又嚟過…

呀，viuTV我都無特別睇…因為啲節目不太合我口味(我係咪要hills地講《格鬥會》、《去旅行》和《晚吹》我全部無睇？﹗)…哈哈。最合心意的《民王》睇過啦嘛，但無論如何，有競爭先會進步，希望viu唔好好似亞記咁次次都係威得一陣，逼到無記認真啲應對…

雖然，我未必會睇，你唔使理我進唔進步架啦，你由得我啦~~~~(跳回去煲當季日劇…)

舊文
2011：[雜談]我為甚麼會睇番港劇？
2007：我為甚麼不看港劇？