2012/06/17

[日劇]《深夜食堂》~滿載人情味的味覺回憶

我記得n年前有本書係講味覺回憶的(但我search唔番個名…竟然search到這本鮮奶的書《成長中的人情味》喎﹗)um…anyway…其實看這部劇是源於偶然在商務揭了一輪原作漫畫,好像滿有趣喎﹗

重點是,淡淡然但有人情味,看完會有點反思,這種劇我喜歡啊﹗更正的是…一集才廿多分鐘,難怪見到有博文說可以睡前看一集,然後快快樂樂入睡(呃…但有啲菜會看得人很肚餓的說…)

30/6/12後按:完成了~

如果我到這店的話…我諗我會點…

草菇煮豆腐…哈﹗最有味覺回憶(aka…這是我娘煮的餸菜中最喜歡的一道…呵)嘛…

um,每集就係從繁華的新宿慢慢pan入master位於小巷的小店,呢家店每日凌晨12時營業至早上7時,menu只有圖中這些,但只要有材料客人點的菜都master都會做的說。

而呢家店聚著五湖四海的人,有黑社會(流星會?我講緊小虎…哈哈哈)、脫衣舞娘、av男優、演歌歌手、未出道的偶像、食評家、OL三人組等,大家聚在這裡其實都唔會叫豚汁定食,都有自己喜歡的菜…呃,集集master都會煮定一堆豚汁定食架喎…咪好浪費?

講起master和家店獨特的經營手法我就諗起《溫柔時光》的咖啡店(《白熊咖啡廳》也如是?),也是很獨特的讓客人親手磨咖啡粉,之後master才去沖成咖啡,then家店也是客人聚腳的地方,從傾談中解了客人心結外店主的也解埋,幾神奇﹗暫時《深夜食堂》都係以客人很有味覺回憶的食物去解佢地既心結,master的過去反而無乜講喎﹗

(阿master…小林薰…硬覺得薰係女仔名…估唔到原來是大叔…囧)

um…雖然話係家常小菜,不過牛油拌飯和八瓜魚腸仔又簡單得過份吧…那個薯仔沙律或蛋治都要先處理一吓薯仔和蛋先丫…(咦…我又講故駁故?)

暫時看到第一輯的尾,最複雜的應該是豬扒蛋飯吧?(笑),那集拳手愛上單親媽媽的感情線好似無乜舖排的(咁廿分鐘你想人地舖得幾多呢?)…拳手說只要嬴咗就會去master的店度食呢個豬扒飯,今次的比賽佢仲諗住嬴咗就向媽媽求婚(﹗),只是最後無嬴出,咁佢帶住失望的心情去店度多謝各人的支持時,master竟然弄了碗親子丼,媽媽、阿女和拳手就咁排排住的放著一人一碗親子丼,好溫心啊﹗

um,master就係咁唔聲唔聲好似滿不在乎咁,但又關心住食客們的事喎,有時見佢地心情低落就會特別整啲special edition出來…得閒又唔收人錢(咁佢點維皮呢?)…據說,哀而不傷是這部漫畫的得色,咁劇集因為只有20多分鐘長度,既要講食客的故事,又要講主題食物的味覺回憶,跟住又穿插食客們的互動,基本上啲往事都係簡單帶過,簡而精的,沒有半點煽情但又扼要的點出重點,完。完咗就有食客介紹個食物點整…弄得我睇完都想試吓﹗

可快手完成的長度和頗有心思和餘韻的劇情,呢個combination是幾詭異的。

但係…那個牛油拌飯真係太誇張了﹗咁簡單都得?下次我都整道豉油撈飯好了﹗

簡單扼要但又言簡意賅,最重要是淡淡然得來透出濃濃人情味,初看頭一兩集時覺得不甚了了,但睇睇吓被吸引了一集一集的看…呀﹗有這種小店真好啊﹗

btw,看《日本進化》提到酒井順子在她的書裡講過香港是對單獨一人的食客不甚user-friendly,因為香港很多食店最少都要二人枱,見你一個人但霸兩個人位會miu咀的說…呀…諗起上嚟又係喎…呀﹗下次去壽司國時都好想幫襯吓呢種小店呢…(我都係唔好做菜了…沒天份…哈)

*************************************************************
30/6/12後按:花了13日,前後兩輯都看完了,個人覺得第一輯故事比較溫心和有印象(雖然啲餸有啲好HEA…哈﹗係呀﹗我講緊牛油拌飯呀﹗),第二輯就有啲…呃…牽強(或者有咁啱得咁Q…?咁啱喜歡食冷麵就係刑警追查了十幾廿年的犯人…之後阿妹出城做野搵家姐,又咁啱喺呢家店度撞到,仲神奇過叮噹個百寶袋喎﹗呃,雖然有市川實和子、酒井若菜好些以前睇日劇成日見的熟悉面孔,但故事推銀度頗高…呃…

《深夜食堂》@日本偶像劇場
劇評:微時代觀劇新體驗 20分鐘看一部泡麵劇
食堂菜色實驗:深夜(自制)食堂~牛油拌飯& 八爪魚腸

8 則留言:

  1. 我琴日係J2台第一次睇呀~~都覺得唔錯~~我一路都諗如果香港開間咁既食店就好,好過麥當奴先吖~~雖然香港都有好多茶餐廳開通宵,但好似劇入面間店咁優雅既就冇乜啦,就算有都好貴啦~~~

    酒井法子又幾o岩喎,香港一個人食飯真係麻麻地,除非個間舖冇乜人啦。如果唔係你坐2人枱,d侍應實塞多個人坐你對面39唔識7咁一齊食飯... 所以我有時一個人食都係去壽司舖坐徊轉,感覺自助d呢~

    回覆刪除
    回覆
    1. RE:Alika

      係囉,香港啲老式麵店、快餐、茶餐廳越來越少了,就算有都唔會做晚市,有時上完堂十點幾餓到暈時都唔知食乜好…囧﹗食茶餐廳的話又太HEAVY…卒之都係去便利店買少少野過吓口癮就算…

      (小聲說:是酒井順子啊~)…搭枱的感覺真係幾囧,又驚阻到人又覺得被人阻住,通常我一丁友食飯就會等過咗LUNCH TIME先,或者好似你咁去食迴轉壽司呢啲有BAR枱擺明可以一丁友去的地方…感覺無咁ODD囉…

      刪除
    2. HAHA .. 其實我打個時都覺得奇...乜酒井法子會做d咁既野 XD

      by alika

      刪除
    3. re:alika

      法子姐都出咗本《贖罪》呀…
      話時話,順子姐本《京與都》幾有趣,佢以自己東京人的身份去睇京都,甚至有點愛上京都添…

      我覺得我可以試吓以港島島民的身份去寫對九龍/新界的看法…哈哈哈…

      刪除
  2. 牛油飯真係爆hea ,只係背負一個 那些年的感情故事,而姐姐最終都等到個個人! 呢下都幾窩心架! 同埋 弄傷手係可惜

    回覆刪除
    回覆
    1. re:小勒

      係咪呀?﹗雖然結尾master示範時提到加啲海菭定唔知乜加多啲味俾碗飯,但我都係覺得呢道菜有啲…太簡單囉…

      刪除
  3. 我岩岩睇到第二個season,真係好喜歡呢種好岩一個人食飯既鋪頭
    而且好喜歡個開場個句,比一D夜媽媽但又唔係太想返屋企既人去飲返杯既地方
    有時夜媽媽真係會想再浪蕩下,搵個地方坐下HEA下,最好開枝啤酒飲下咁

    香港真係無咩地方岩一個人食飯,之前因為工作關係成日一丁人食飯都受唔小D冷眼
    好在而家個區比較多細公司,一個人食飯既人多左又冇咁多人歧視
    但有時人多既時候去轉轉壽司都好怪,一堆一PAIR PAIR既人之間zip自己入去,就會好人多眼望望

    至於無MENU呢單野,我其實一路睇一路諗緊佢地叫得咁疏爽,又知阿MASTER會收佢地幾錢既XD 係我會唔敢亂叫野架lor....

    回覆刪除
    回覆
    1. 我司在荒山野嶺,食LUNCH要出城,一出城就好難搵位…一丁友去食麵或者快餐反而快搵位﹗不過想坐得舒服啲的話一個人霸兩個位又好似會被人歧視咁…叫得野少就會俾人覺得阻住這生意囉…

      所以如果係放假有閒情,我會等過咗LUNCH HOUR先去食個LATE LUNCH,人家唔趕做生意咁我又可以坐耐啲…

      係喎,MASTER成日叫人唔使俾錢或下次先俾…又成日免費送野點維皮呢…不過啲食客通常都有叫啤酒呀咁,有飲品ORDER可能個PROFIT MARGIN高啲可以除番勻掛?(我認真咗?)

      但老實說,如果成日去的店,店家記得你的PREFERENCE(如,走蔥多汁呀咁)會好窩心,更想多去的…

      刪除

要講幾句嗎?﹗XD