Believe in your dream~回歸前後15年

咦，原來呢首歌叫《難忘時刻》？我一路都淨係聽過副歌「Believe in your dreams~~~~~求你我夢想一一建立…」咁，仲係環球歌手限定咋？咪無咗莫華倫和尹飛燕囉？

正經的，搬文搬到5年前一篇《香港始終有你~回歸前後10年》，一晃眼又過5年，又是大肆慶祝的時候，又是整首懶溫情的主題曲(好似話由宇宙強band 搣示打創作？)…呃…但這5年好壞參半(是半嗎？)，聽住首咁歌舞昇平的歌是覺得有點諷刺既…呃…

anyway…生活是需要繼續既…
 (灰色是07舊文)

十年前，我是個學生；十年後，我是個打工仔。

um，咁我而家都係打工仔，希望下年可以回歸做貧苦學生，紅磚，等我呀﹗

十年前，我很討厭每天上學；十年後，我覺得返學是世上最幸福的事。
這是毫無疑問的…

十年前，我討厭每天穿一樣的校服和黑皮鞋；十年後，我更討厭要煩配襯的返工衫和高跟鞋。
我覺得老闆已經放棄我…由得我converse了…哈哈哈﹗

十年前，我對即將要面對的會考感到很茫然；十年後；我對前路依然茫然…
Stepping into tomorrow, tomorrow, 明日へのドアをノックしよう～(希望快啲成事，唱住歌先)

十年前，隨身物品(尤其是文具)一定要無印﹗十年後，隨身物品一定要抵﹗(其實還是有很多無印…雖然佢狠狠咁hurt過我兩次…嗚…)
其實我依舊是周身無印…哈哈哈﹗同埋成身u記囉…

十年前，我覺得自己知的已很多；十年後，我覺得我知的還未夠多…
好奇異的是，會不停有人問「你學完日文未呀？」、「仲去讀書？」…學海無涯喎﹗唔去買樓拎去讀書…是奇怪的選擇…？

十年前，我沒想過讀大學；十年後，我發現讀了大學還未夠…
當年勉強擠上了學士的行列，不用去追副學士…是好彩吧？我alevel啲成績…呃…

十年前，我以為「失業」只是econ書的一個term而已；十年後，我畢業後失學又失業幾個月先搵到工呀﹗﹗﹗﹗﹗
當我以為沙士已經好癲時，08年來個金融tsunami喎﹗我的mpf呀﹗

十年前，選科隨感覺行事；十年後，慶幸當天聽天尤命亂選的大學本科讓我今天搵到啖飯食。
咁嚟緊應該點選科呢？好頭痛啊﹗

十年前，我幻想第一份工就是自己的dream job；十年後，兜兜轉轉才找到一份和理想相近的工作。
5年來…都仲係…唉…

十年前，身邊是諸事八掛的書友；十年後，身邊是諸事八掛的工友…
身邊竟然有同同睇過《快刀手洪吉童》，人生有個真正朋友的確好極﹗飲勝﹗

十年前，我不喜歡作文；十年後，我竟然自發走來作文…
08、09年是寫少咗好多，不過so far都keep住久不久就來寫(雖然都係花癡文多…仲連地盤都轉埋)…都算勁吧﹗(hills mode中)

十年前，一定要帶住喺身的是地鐵飛；十年後，一定要帶住喺身的是發達通。
因為公司出入都要用發達通，日do夜do之下竟然返屋企都想拎發達通來開門…超癲…
 
十年前，常和家人爭電話煲粥；十年後，只會和家人爭廁所。
屋企可以裝修，但不能整多個廁所出嚟…囧

十年前，電話都是2字頭；十年後，電話有1,2,3,6,9...等字頭。
97年…我未有手提喎…07年用的號碼尚在，不過而家多多一個了…

十年前，手提只會是黎明手中的物品；十年後，已不知換過多少部手提…
轉手提呢啲野唔好俾我媽媽知…佢唔知…佢唔知…佢唔知…(XD)

十年前，我家看的是成報；十年後，我家看的是生果日報。
我連娛樂版和副刊都沒看了，娛聞從微博看就算了…

十年前，我每天都追TBB劇；十年後，我每天都煲日本電視劇。
日劇都仲有追，今年竟然睇埋泡劇和動畫(係…我確係睇緊動畫…)，奇呀呢﹗

十年前，便利是有年青人讀物；十年後，便利是麻甩仔讀物。
除了是為某人做封面而買的外，我好似n年無買過雜誌了…
 
十年前，我打的是gameboy；十年後，我打的是NDSL。
而家…係打手提的囉…

十年前，家中電腦用win3.1/95；十年後，家中電腦用XP。
netbook轉了win7，但我司部機仲係XP 和office 03，奇呀呢﹗

十年前，儲文件用的是1.44 floppy disk；十年後，儲文件用的是gb gb 聲的usb手指。
手指都仲用緊喎，同埋用icloud呀dropbox之類的雲端硬碟啦…(我好先進﹗哈哈哈)

十年前，家中電腦不能上網；十年後，家中電腦一按即上。
um…5年前仲要靠lan線上網，而家有wireless router拎住部netbook周屋都可以上，科技先進令我們生活更方便了~~~啦啦啦~~~~

十年前，我只有一個通訊地址--屋企；十年後，我有十萬幾個電郵地址。
而家仲多咗兩個﹗巧京京囉…

十年前，我不懂打字和中文輸入法；十年後，我每天打字和打中文比寫字還要多。
除了日文輸入法，仲學堆泡文輸入法…哈哈哈﹗

十年前，回家第一件事是開電視；十年後，回家第一件事是開電腦。
而家手提都可以上網，返家都唔急於開電腦了…

十年前，我多數聽華語歌；十年後，我多數聽日文歌。
哈，呢水我勁聽泡星的日文歌喎﹗(我今年太反常了…)

十年前，最讓的感動的歌是陳奕迅的《今天等我來》；十年後，最令我感觸的是張敬軒的《笑忘書》…
um，這幾年我成日講「正能量」…係啦，就係需要聽多啲呢啲歌等個人都熱血起來﹗

十年前，Kinki Kids是《硝子之少年》；十年後，Kinki Kids變成兩個佬味十足的佬…
opps﹗今年係佢地出道15周年了﹗

十年前，我對巨基的《歡樂今宵》感到莫名興奮；十年後，我對巨基的《星戰》感到莫名失望(其實這張碟是前年出品…)
我好似徹底skip咗古眼神了？﹗

十年前，我出街聽discman又常買唱片；十年後，我出街聽mp3又不願買唱片…
唱片真係少買了，其實都是rip做mp3的嘛…(最近買的幾張…都係某人囉…ost和日文album)

十年前，樓下的超級市場是KK；十年後，樓下的超級市場是惠X。
這個沒變…
 
十年前，看電影一係入戲院一係租帶；十年後，看電影一係入戲院一係睇DVD/VCD/XX…
我對上一次入戲院會唔會係上年套《奪命金》呢？話時話…

十年前，佘詩曼是出爐港姐；十年後，佘詩曼是出爐視后。
佢都奔向大中華了…

十年前，出國拎的是BNO；十年後，出國拎的是特區護照…
前幾天娘才講起話日不落國過幾年唔會再發，要換趁手…但對照特衰護照，費用貴好多，免簽證地方又少好多喎﹗？

十年前，沒有人說要學兩文三語；十年後，兩文是學了，但三語仍然很爛…
考了日文一級，應該是這些年語文上最大的成就…哈哈哈哈﹗

十年前，我捨不得英國佬同時不知如何面對祖國同胞；十年後，我依然捨不得英國佬和依然不知如何面對祖國同胞…
沒有變…怎麼辦…

十年前，我期望登記做選民；十年後，我登記了做選民但…次次投票我也miss…
因為我討厭xxxx，於是次次都有去投票的…哈哈哈﹗

十年前，我對政治毫無認識；十年後，我對政治依然毫無認識，但估唔到自己有份行7.1大遊行…
其實只限03年一次…好熱呀﹗呀…

十年前，我覺得香港很可愛；十年後，我覺得香港很(或有點)可怖…
好似越來越差…怎麼辦？