2008/09/25

教育電視

(其實我都唔知點分類教育電視,選「特攝片」係咪玩野了?﹗哈哈…)

話說回頭,之前講起卡通片,實在本人記憶很模糊…歸根究底…不就是放學後返學前忙住睇ETV,分散了本人對卡通的注意力囉﹗﹗﹗

又係出賣年齡既時候(謎之聲:不是已出賣了嗎?XDDDD),小的年代係睇鄧一君和江麗娜,whereas江小妹當年係未叫唐寧的…

話說呢,小的小學制度是很奇特,一年上午校一年下午校的(已實行彈性上學時間了嗎?),由於娘親要返工,鏟本人起身塞早餐著校服都要以光速完成,但係呢…一年上一年下係會攪到生理時鐘大亂的…特別係返下午既時間…慢慢媽媽發現電視聲係最有效既鬧鐘,奇又奇在,卡通聲本人係唔會醒…最有效的竟然係ETV放時間表啲音樂聲…

返上午校的日子,一放學返屋企梗係開電視睇ETV啦,先睇明珠再睇國際(vice versa),到三點幾四點先轉返去睇《傳真機》的說。究竟ETV有乜咁好睇呢?死啦我都唔知喎,無論小的係小學仔定中學仔,總之在有ETV播的時間本人都睇一餐,又不論那個節目(當年係成個屍你拔斯分開十幾個topic,每一回就叫「節目X」的…)幾本人都照睇可也…下午兩點幾遇著家母在家,就要同佢搶電視…佢要睇《都市閒情》和重播劇呀﹗

所以說呢,中學時夏令真係好開心,有得追重播劇又有得睇ETV。

睇得開心係一件事,實在我幾懷疑ETV成效的。當年係小三到中三才有ETV,但小的那個年代呢,首先不是間間課室都會有電視,要睇的話一來要就時間(timeable係唔會特登就ETV播出時間架嘛﹗),二來要搶電視(那年代係將個電視鎖喺個和普通中國籍女子同等身高的大櫃中,而且唔係部部附錄影機…),我印象中中學係索性唔睇,小學就只睇中英數,社科健好似係特定topic才會看…好唔開心呀﹗無他,一睇就要熄燈,熄燈就係瞓覺和傾計的好時光,為了就視線,好些坐得遠的同學仔要拍枱,仲唔係傾計時間﹗於是老師們一定要我們做那本粉紅色的so called「練習」,話實,啲問題好廢,特別是英文那些…節目尾段會有啲懶係MC既題目,無睇到前段又唔會睇唔到,求求其其做咗就算…加之高小要學能測驗,有時間都操paper,睇乜鬼丫睇…。我又懷疑,這是小的放學咁鐘意睇的原因。

  • 雖然成日睇,不過真係印象深的ETV不太多…
  • 恆常場景:屋企(附拎茶點出來俾大家食的媽媽)、快餐店(港式那種,一定係食漢堡包、薯條和汽水…汽水係無冰架﹗)、學校(這個可能是唯一的實景…)
  • 英文的小演員只演英文的,其他中數社科健係唔會見到佢地的說…
  • 英文有一個節目係話阿Peter仔好想快啲長大,某天在公園見到個巫婆…佢又俾咗個只要抽條繩出來就可以令自己長大的波波俾Peter仔,咁Peter仔就樂意接受…但佢讀書唔多關係…長大後雖然追到心儀既女仔…結局卻是貧賤夫妻百事哀…最後佢返公園求巫婆俾佢變返小朋友Peter仔…嘩,《童夢奇緣》呀﹗
  • 數學科有時很故事性,如小數王國、嘉年華教百份比、快餐店教乘除數、媽媽切生日蛋糕/分茶點等…
  • 有時又很例牌,計數的時候一定係藍底白字card board show計數的過程,以且係勁慢…點解一定要用長除法呢﹗我用開短除架﹗
  • 無理到英中人感受,全部ETV都係中文,睇一水先知佢講緊邊課﹗
  • 唔知點解所有表姐、哥哥一定好熱心助人,樂意教小妹妹小弟弟野,而咁啱佢地又一定識那個topic架喎
  • 科學我只記得中三有一個節目係剖開兔仔,將藍色液體注入動脈,粉紅色液體注入靜脈,唔知點解我睇到勁驚(時為小學仔…)…整定我讀文科了嗎?
  • 中文教文體、句式係唔見課文的,睇完都唔知睇咗乜…
  • 社會內容十之八九都係outdated的,所以堂上唔會點睇,通常睇健教(細菌大王呀﹗其實消化系統都好好睇…)和科學(光合作用﹗)多,生動有趣,無就咁講書咁悶
睇番維基,ETV人腳除了天王天后級鄧生和唐小姐(我記得某個英文科ETV係有李克人的﹗堂上睇到we嘩鬼叫…)仲有好多熟悉的名字…有80年代我最欣賞的童星馮志豐的說﹗睇一睇條link真係好驚訝,好多人都拍過,好些仲係諗都無諗過…

ETV癮到高中就慢慢除掉了,一來是課業忙,二來是煲劇忙。後期一點的我只記得好爆的中文科「Q博士」,仲有歌仔唱的:「Q博士,Q博士,來自太空藏身學校中…」,好驚。據說有一集仲有鄭伊麵客串,但我就無睇過啦…

與時並進update吓,家陣的ETV不逐年級分科(係囉,內容又唔跟教課書喎…),除社科健變常識,仲加了普通話、通識系的節目,又有光碟、多媒體等方式播放…但我又懷疑,家陣資訊咁方便,學校設備都咁齊全(每間課室有電腦、電視、projector等係基本的吧),咁多附助教材可以選…真的要ETV嗎?﹗

延伸閱讀:
ETV Online
小學教育電視改革見效
你管裡的ETV

32 則留言:

  1. 李小球30/8/13 20:19


    我當年小學係返下午校的,每朝訓到十點先起身,然後就ETV送飯!正~
    好記得細菌大王同埋細菌開party呢兩輯健教電視呀~ 仲有係永遠擁有無上權威的表姐:
    「表姐~ 點解會ABCDEFG O既?」
    「哦~ 表妹~ 係因為HIJKLMNOPQ,所以咪會RSTUVWXYZ囉~」
    「哦~ 表姐~ 我而家明白晒喇~」

    25th Sep 2008 10:49 AM

    回覆刪除
    回覆
    1. domotoiceko30/8/13 20:25

      怨念呀…我弟小時講過點解佢家姐唔似教育電視啲表姐咁熱心教佢功課架…哈哈哈…
      實在,啲表姐真係乜都識…即係呢,我升咗班仲鬼記得上年學過啲乜咩,教乜鬼喎…(超級怨念…)
      etv送飯真係好開心的,有時睇到唔知時間差啲唔記得落街搭校車呀…
      雖則我幾懷疑etv的功效,不過有幾輯令人難以忘懷既,都叫成功吧…

      27th Sep 2008 20:26 PM

      刪除
  2. 我對 etv 的回憶就唔係太多, 但係對於鄧一君和江麗娜佢地就陪住我~ haaa.....尤其係香蕉仔鄧一君...宜家都冇做藝人走左去賣保險...
    不過博主都好厲害.....記到咁多etv 野, 我經已一片糢糊了

    25th Sep 2008 13:17 PM

    回覆刪除
    回覆
    1. 鄧生個樣真係十年如一日的後生,佢做到01年仲做緊少年張無忌…which is大家都接受唔到成年版係程至美醫生,可見鄧生係幾咁「年青」啦個樣…
      可能佢都感到發展的侷限,咁轉行都無可厚非既…
      我既童年不就是狂煲電視…讀書又唔見我咁叻…哈哈哈
      27th Sep 2008 20:51 PM

      刪除
    2. 終於見博主浦頭, 係啦~ 都唔知有冇攪錯~ 叫吳啟華做無忌哥哥, 都唔知係咪整古佢~ 痴晒線~ 佢一出乾坤大娜移果時, 個肚腩係咁震, 都真係笑鬼死我~
      哈哈, 你真係都煲劇~ 成績都唔係差啦~ 起碼都做左我師姐先啦~ 哈.......

      28th Sep 2008 04:11 AM

      刪除
    3. 星期六日我啲摺精要搵周公補充睡覺素質呀…真係支力到差點想死呀…唉呀…
      吳生做張無忌簡直係大整古啦,佢做張翠山都算…做青年無忌真係得啖笑,上一個鏡頭先係鄧一君…下一個就變咗程醫生,個對比大到嚇死人…我寧願鄧一君繼續演落去囉…
      哈,我成績真係見人見智…不過我好proud of我充滿電視的童年架﹗哈哈…
      29th Sep 2008 09:34 AM

      刪除
  3. 記唔記得小學三年班英文個片頭係不停hello, hello?
    細菌大王呢個我梗係記得, 太經典了! 仲要翻拍過幾次...
    表姐通常係權威人士, 至於係邊方面權威就視乎科目而定.
    d人讀野超慢, 計數d數眨成分鐘都未計好...我都想訓著...其實教小數分數可以諗諗分其他野, 可以拍個溏心風暴版, 成班表兄弟姐妹姨媽姑爹爭下家產咁!
    仲有你記唔記得n年前九鐵有個廣告叫疏與密係抄etv架?

    25th Sep 2008 13:57 PM

    回覆刪除
    回覆
    1. domotoiceko30/8/13 20:27

      其實好似全部小學的英文etv都係hello hello hello一大輪先開始的…
      細菌大王和表姐看來都是我輩的集體回憶了…哈哈…
      數學etv一到計數就悶死人,啲數式仲要用白話文讀出來,又長又chum的,佢計既時間夠我計幾次囉…
      喂喂喂,分家產拍過架啦,國王臨死分金幣俾幾個仔呀﹗仲有個係用天秤睇幾重來分辦邊啲係真既金幣…好有創意啊﹗
      九鐵n年前那個疑似鬧鬼的廣告我印象深啲啫

      27th Sep 2008 20:31 PM

      刪除
  4. 當年ETV 首播, 看見班房中的電視櫃, 真的覺得很有趣, 後來更知道是可以收看普通電視節目的, 覺得更神, 上課時, 總想着: 如果可以看電視就好了:P 那時候看的ETV 不多. 跟妳的情況差不多, 校方根本很難安排時間給所有學生收看, 反而長大以後, 偶爾休假, 都會看ETV, 才發現, 原來也有不少好節目, 不過, 久而久之, 我好像全都看過了, 所以就沒再看了:P

    25th Sep 2008 19:18 PM

    回覆刪除
    回覆
    1. domotoiceko30/8/13 20:28

      哈哈,你個case就好似我以前間小學班房門後面boom牆有兩隻小小的櫃門狀物體,又唔係櫃呢架喎,我有day 1見到已經好好奇…好想知係乜…我不停想像開咗後會有啲乜…點知…謎底果然不及想像吸引…係水渠來的…chur…
      小時候娛樂不多嘛,電視就係最大娛樂,我係乜汁都撈的說,etv也當然不會放過啦﹗

      27th Sep 2008 20:34 PM

      刪除

  5. 我讀書時候也愛上eyv堂。因為輕鬆一點,雖然d製作好差。

    25th Sep 2008 21:11 PM

    回覆刪除
    回覆
    1. domotoiceko30/8/13 20:28

      真頭係low tech啦啲制作…
      不過low tech得來我當年又睇得好開心…哈哈…
      而家睇番鄧一君細個個樣還是很親切就是了…

      27th Sep 2008 20:35 PM

      刪除
  6. Mr RiceBall30/8/13 20:22


    你其實是不是剛小學畢業?為甚麼記得那麼清楚?
    我從小就迷上了唐寧姐姐了~
    但就算老師吩咐我們在家看教育電視,我是打死也不會看的,在家只會看朱茵姐姐的漢堡包傳真機,如果遇上熱心教我數學的表哥我會打他,因為我討厭數學

    25th Sep 2008 21:22 PM

    回覆刪除
    回覆
    1. domotoiceko30/8/13 20:29

      殺手都可以有小學同學,點解小學畢業生不能記得清楚呢﹗(嘩哈哈…)
      唐寧姐姐可是童年現在一樣可愛啊﹗難得佢而家個樣似似地細個之餘,又無話好似安達佑實那種一個細路餅印,大個咗反而似老人精…唐寧姐姐真係幾靚女的說…不過在無記好似越做越無聲氣就是了…
      朱茵姐姐教你數學呢?你有無幫佢數吓總共捉了幾多次姦呀﹗﹗﹗佢教你數學你不會打佢吧…

      27th Sep 2008 20:38 PM

      刪除
  7. 1992年 你諗係D咩?
    HI,各位好~~
    唔知1991-92年,大家會諗起咩?
    我係一個業餘小說作家,而家正為一個91-92年時得9歲既角色搜集資料。請問大家係AROUND呢段時間,會有咩令你最印象深刻?無論你當時幾歲,不妨俾D意見~~謝~~

    26th Sep 2008 00:13 AM

    回覆刪除
    回覆
    1. domotoiceko30/8/13 20:29

      91,92年的回憶吧…
      郭富城首《對你愛不完》大hit啦…
      無記套《今生無悔》啦…
      王傑啲歌啦…
      我的回憶都是偶像oriented喎,你不如去維基或谷哥一吓睇番當年有乜大事會唔會更多資料呢?﹗

      27th Sep 2008 20:42 PM

      刪除
  8. 咁細菌大王的確係特攝片嘛.....好典型的魔王+無能手下三名的組合喎!
    哈,睇黎我地(我黎認細了...)呢一代,放學時不論年級咁掃ETV 都係一種教育呢!
    又話說....點解你記得架! 到今時今日,除左小數/分數王國、細菌大王之類少數經典外我都唔記得哂其他ETV 有乜內容了...(尤其是中英文..)

    26th Sep 2008 01:08 AM

    回覆刪除
    回覆
    1. 博士,智理明言啊﹗一言驚醒,原來我無選錯分類耶﹗
      不,我不介意的,你唔見我無時無刻都在認細…我心裡已暗暗將自己出生年份調低十個年頭,好讓自己成為平成一代嘛﹗哈哈哈哈…
      其實etv真係經典得來…好cult吓…

      27th Sep 2008 20:44 PM

      刪除
  9. 我果陣一放學我就會睇教育電視...
    d 百分比王國呀,細菌大王 (我果陣睇係霍亂菌?)之類
    數學都有個教體積,有個有開口既measuring cylinder,放件野入去睇佢幾多人流出黎就知果件野體積幾多
    中學果d 好少睇...

    26th Sep 2008 09:00 AM

    回覆刪除
    回覆
    1. 霍亂應該係under細菌王國?﹗大王開會時各式病菌同佢報告點樣整病啲人類架嘛…
      阿,你講開我又記得,計體積有時係用啲藍色的水倒落個容器度,之後再秤吓啲水有幾重,就知邊個容器大啲啦﹗
      同埋用磅時會有啲standard咗放落去秤野既野(即係整好晒重量,eeee…10g呀20g100g那些呢…),我覺得好神奇的說﹗
      27th Sep 2008 20:48 PM

      刪除

  10. 小弟當年都曾經參與過ETV演出!!
    可惜唔記得邊年邊科喇....

    30th Sep 2008 15:56 PM

    回覆刪除
    回覆
    1. 快點搵吧﹗youtube有很多﹗
      搵番呢留念都好丫…
      搵到話聲俾我知,等我欣賞吓你的風采﹗XDDDDD
      1st Oct 2008 23:44 PM

      刪除
  11. 我都好懷念,好想睇返勁舊果d,可能想回到過去,最記得係七十定八十年代果代,健教定中文有個短髮瘦女叫「亞秀」而人又真係好瘦,不過都唔知係密水,因為果時太細。仲記得佢地性教育果時都好露骨,真係一男一女祼體……既圖都出埋,不過我果時太細,都只係記得少少,之後起碼都無見過性教育青春期果D節目有祼體……既圖。
    真係好多天王巨星做過教育電視,羅慧娟記得做過健教,呂頌賢、黎耀祥、麥包……我最近期既都係中文Q博士,而家都唔知仲有無教育電視,其實仲有無?
    TWINS啱啱出道果時都做過教育電視,果集俾人勁彈,D白痴既人(好似唔係製作人,而係政府官員,忘了)話TWINS個金髮太潮,又話背心好性感,點知就載魚夫帽加件爛鬼T恤,搞到果集我睇左都唔知有TWINS。
    楊思琪姐姐都有做,係普通話,果時佢應該未選港姐,可能係D人係教育學院見到佢靚,就捉左佢去做幾集,之後見到自己上鏡又走去選港姐,又真係得左,講真,思琪姐真係正,童顏巨……佢出左果個瘦身廣告,真係搞到我地做男人既好慘,熱血沸騰,佢無得返去做老師架喇,唔係D「小朋友」實會諗起佢著泳衣個樣,咁你叫呢D「小朋友」點聽佢講書?
    不過我都好想有個咁既老師教下……不過咁似四仔穚段既?

    3rd Oct 2008 00:27 AM

    回覆刪除
    回覆
    1. 反正港台都出開vcd,不如唔爭在出埋etv…
      即係呢,我覺得有時啲人將露肉就等同色情,介紹青春期生理變化難免會提到身體的改變,圖片/動畫…唔通著住衫咩…之但係講既內容唔色情,但睇既人心邪…都無計…
      呂頌賢、羅慧娟等拍過我有印象,twins就真係唔知啦…。其實,若然小朋友偶像染髮唔夠健康,咁學校老師係咪都應該唔染得呢?我那時啲老師有啲都有染架喎…但佢地就走出嚟捉學生…orz…
      c琪妹確係人靚身材正…不過…你好似諗太多了…哈哈…
      3rd Oct 2008 17:22 PM

      刪除
  12. Switchonann30/8/13 20:34

    我懷疑同你係校友
    因為話一年上午班一年下午班... 我估係得我呢間小學咁怪 - 你仲話你讀女校... 可能係.

    19th Dec 2008 13:44 PM

    回覆刪除
    回覆
    1. 啊,我的小學係男女校架,喺某間醫院附近…
      女校係我的中學…~
      如果同時女校和一年上一年下…我就唔係你校友啦…??﹗﹗
      19th Dec 2008 23:21 PM

      刪除
  13. 我讀書的年代太久遠了,所以對ETV 的印象不深,因爲還是實驗性質,不一定能看。反而是工作以後,因需要輪班工作,幾乎看過所有ETV 節目!最難忘,當然是看到中學阿sir 當了ETV 阿sir 啦:)

    31st Aug 2011 15:32 PM

    回覆刪除
    回覆
    1. 我讀書的年代都久遠啦…睇得最多係小學,特別係高年班時…阿娘要返工…咁放學咪返屋企做功課睇電視食點心咁,無王管仲唔喪睇~
      去到中學就只有考試時放早先睇,後期一點的q博士呀那些就沒有太多印象了…
      2nd Sep 2011 09:39 AM

      刪除
  14. Hello
    Hello
    Hello
    Hello
    Hello...Hello...Hello...Hello...Hello...

    2nd Sep 2011 16:31 PM

    回覆刪除
    回覆
    1. 這是英文etv的對白嗎?XDDDDDD
      6th Sep 2011 16:41 PM

      刪除

  15. 你咁都唔記得...去片
    http://www.youtube.com/watch?v=UTJkeSkNvC4

    15th Sep 2011 10:56 AM

    回覆刪除
    回覆
    1. 梗唔會唔記得啦…
      好懷念呀﹗
      16th Sep 2011 09:38 AM

      刪除

要講幾句嗎?﹗XD