2006/09/18

[日劇]超舊日劇回顧《青之時代》

話說當年信和仍為老翻天堂的年代,本人經常穿山過海(的確係要過海)親身朝拜,造就本人入埋入埋好多無咩聽過和無咩睇過的CD和日劇。今日心血來潮,忽然想拎番出呢重溫一番,經過一番翻箱倒篋後搵咗一大堆都唔知有無睇過的舊劇出呢,呢兩日狂煲成功消咗一套(但還未破到本人最高紀錄是一晚消晒整套,有這個瘋狂攻效有《Long Vacation》和《沒有天使的街角》)《青之時代》點解會買呢套劇我懷疑係一百蚊三套時我求其揀餅有堂本剛個樣就算,成套野一啲印象都無好似新劇咁睇。我形住仲有好多呢啲遺忘咗的入購未睇的說…

睇完又覺得幾好睇,但唔知呢套野有無係香港播過呢?(Kinki粉就一定會知啦)
基本資料
放送年:1998年7月~9月(首播:1998-07-03)
編 劇:小松江里子
配 樂:千住明
製作人:伊藤一尋
導 演:松原浩,那須田淳,片山修
主題歌:KinKi Kids『青の時代』
電視台:東京放送TBS

簡介
一群在中學時代不去上學四處倒蛋的不良少年,經常做壞事,有些曾入少年感化院接受感化。主角安積リュウ(堂本剛飾)便是其中一人,原本心地善良的他因被母 親拋棄而自暴自棄,再不相信別人。故事當中他認識到自己想去保護的人和樂於助人的律師,講述他從不信他人至重身做人的經過。最終帶出何謂友情和愛…反映現 時青少年的心態。

一如其他日劇,這次的主題是人性本善,一個人變得暴戾乖張背後一定有原因。帶著這個信念的律師榛名圭一單方面相信不良少年安積隆(根據字幕的翻譯…)開始整個故事,他好人的程度甚至令人覺得他是傻瓜,但就是這股傻勁感動了一群不良少年之餘,更令自己兒子被不良少年殺死的本田大叔對此等少年改觀,願意成為安積隆的監護人。反高潮位原來老好人有段被封印的過去,雙重性格的他是個相信以暴易暴的暴力怪,凡事都不擇手段,就算流血收場亦在所不惜。最後,很娘的說,變好了的不良少年好言相勸令暴力怪覺悟放下屠刀,當中亦如其他日劇一定係大堆又長又悶的大道理對白。

雖然大橋係幾溫情的「不良少年浪子回頭記」,但表達的手法卻一點也不溫情,一集總有幾野主角們打交打到血流披面,不知是否想減低血腥味道,畫面總是黑黑沉沉的(這不能排除影碟質素問題)。除了暴力,還有大量禁忌話題放送:校園欺凌、自殺、男/女賣淫、師生戀…等,相比尺度越來越緊的港劇,日劇強處就是題材廣泛,可能是因為電視台之間競爭激烈,而且一季劇集之多形成對各種話題需求極大, 如近年的《女王》,誰敢想像這種癲覆傳統教學態度的劇集出現在港劇之中?算把啦。

一見編劇是小松江里子,出自她手下又咁啱 係堂本剛主演的有《若葉時代》(遠古啲,有堂本光一共演的)和後期點的《Summer Snow》(好睇,結局更喊到我不能自己),劇情好人性好溫情。今次雖然sell暴力不過都有溫情sell一sell。一開始本田大叔被不良少年搶劫,之後更被上門(他經營彈子機遊戲中心)打劫更被擊傷。因為他兒子十多年前被暴走族打死,大叔本來對這群不良少年抱完全否定態度,多得大好人律師鍥而不捨令他改變態度,更對隆照顧有如親生仔般上心。這種父子之情真係好令人感動(劇中人講到眼濕濕時本人都濕了一濕),亦加強了全劇相信人性本善的主題。

男主腳堂本剛係發福之前角色主打兩款:一係好cool一係多野講到停唔到口,今次就係cool到爆的不良少年,憤世嫉俗之餘心底藏著一顆善良的心,感覺上幾係《To Heart》中的冷漠拳手,襯埋當年鋼條身至確係好入型入格(不過阿剛哥係香港最深入民心還是金田一吧?﹗)。女主腳奧菜惠繼《若葉時代》後又和堂本剛合作,不過她在劇中的角色幾花瓶,無咩特別,都係一般卡娃兒女孩乙件。驚喜是無啦啦發現《大屠殺》中的安藤政信有份參演,做師生戀中的"生",戀著已經唔再愛他的老師。

老好人榛名律師一段過去令他形成雙重人格令整套劇變得有點神怪,他中學時因打擊太大而失去了一個星期的記憶,平時是好人的他暗地裡藏著個暴力怪。據劇中的心理醫生(即係《Long Vacation》中小南的攝影師追求者,個樣極似錢小豪)說這星期的記憶不是忘了,而是被封印。諗諗吓可以如此選擇性失憶都未嘗唔係一件好事,有時記得太多反而負擔太重,適當時候忘記吓都幾好丫﹗(即係《人間失格》的光王?﹗)

剛叔總匯:熱煲系列3~堂本剛

4 則留言:

  1. Local MV, special to u :)
    http://www.youtube.com/watch?v=hEPiLJYZcec

    18th Sep 2006 00:39 AM

    回覆刪除
    回覆
    1. ?! special for me????

      19th Sep 2006 09:53 AM

      刪除
  2. hello, 請問各下有沒有 由中山美穗+唐澤壽明主演的美味關係既soundtrack??

    可否給我一個回覆!!

    =^_^=

    meowatch


    9th Jul 2007 14:02 PM

    回覆刪除
    回覆
    1. 無呀,其實我連這套劇也沒有看過…

      9th Jul 2007 14:19 PM

      刪除

要講幾句嗎?﹗XD