2013/08/12

家電的壽命

見鄰家博友講時限(電器的…),癡吓講埋一份,計吓計吓,原來屋企真係用了好耐的電器無乜幾多件了…究竟係我用得粗定係而家啲電器無咁襟用呢?以前乜機物乜係唔係都用得上十年架嘛﹗
Netbook電腦       3年
第一部Notebook(Fujitsu的)玩得比較耐(好像都有5,6年?),之後的三姨HP都係玩了3年左右,現下這部也是Fujitsu的,諗住第一次那部襟用嘛。前陣子無啦啦唔著,嚇得我要死,拎去整時…一插…又著喎﹗店家哥哥面呈三間的說叫我插吓第二個插騷…好啦。So far,又相安無事。

DC                              4年
都仲係用緊呢部。無轉…其實因為我無乜用佢,對上一次已經係上年夏天了,我成年無郁過佢了 (連電也拆了出嚟),無計啦,用手提影方便嘛…所以都不太有需索轉新機。

NDS/字典機         快6年,TIME FLIES
也因為智能手機而被我放在一邊的,跟DC一樣,無轉不代表我長情,只係有人取代咗佢地囉。

手提                      4個月
上一部用了差唔多一年,我嚟講,耐架啦~

Hi-Fi                           2年
當年興MD時買了舊CD+MD+收音機的東東,聽了幾年(其實自從聽mp3之後都好少聽CD/MD了)後就擺乜入去都跳線,大囧。趁屋企裝修時掉咗佢。但我要聽收音機瞓覺架嘛﹗於是就去買了舊5百幾蚊的CD+MP3+收音機的組合,CD我都係好少聽的,MP3佢可以駁USB或者直頭插部IPHONE/IPOD落去,詭異的是,我插IPOD落去佢識自動播和叉電(相當好用的叉電機),但IPHONE是沒有反應的,跟住用USB個駁口去插USB叉電也不能,詭異﹗呢舊野就係諗住唔開電腦時都可以叉電嘛…但HANDICAP囉…

床頭小燈            嘩,快用了17年…
其實佢係用緊兩腳插,有時插唔實會有DE DE聲,我成日覺得漏電會電死我(以前床頭BOOM牆滲水的,而盞燈的電線又要兜過呢BOOM牆),而家轉了陣,好似插得穩咗。如果我無記錯,盞燈係實惠幾廿蚊的貨式,估佢唔到咁襟用。

書桌的燈            13年﹗只換過一次燈膽﹗
本來我係用上述的小燈作書枱燈,某晚挑燈夜讀時阿姨話傷眼,阿娘就購入一盞PANASONIC的白光燈,真係光好多(做乜好似發現新大陸咁?)。而呢盞燈也是十分襟用,咁耐都係換過一次燈膽,真係唔知點解可以咁襟…好瘋癲…

全屋冷氣            2年
之前那部豐澤牌用了差不多10年,是前兩年屋企裝修時阿娘一炮過換晒,本身都無乜問題,係成日滴水整到無得好整師傅索性掛塊板喺度兜水…囧。而家變了日立,靜好多也無滴水問題,只係機上面無掣撳,一定要用遙控有啲煩。

Desktop電腦               4年
呢部野擺廳的,體現了PUBLIC GOOD就無人愛鍚的道理,大家都用得很粗,但佢生命力都好強壯…竟然一路無乜事﹗係慢啲得閒要幫佢清垃圾…

電視                      3年
其實次次都係返屋企時阿娘無啦啦就換了電視,佢話想喺房睇於某日無啦啦將廳的電視搬入房,之後廳就無啦啦多咗部電視…完。

廳的風扇            6年…或以上
前年裝修掉得既電器都被阿娘掉晒咁濟,剩下的並中一樣就係呢把…PANASONIC的風扇…P記產品真係好襟吓的﹗

雪櫃                      2年
之前那個都大大話話十幾年,再之前的就係好細個時的有霜了(如果我無記錯的話),也是裝修時阿娘怒掉之後換的新東東。詭異地,佢係三叔牌的。更詭異,是冰箱在底,中度冷(據說是雪野菜的…)的在中間,普通冷藏間喺上面,弄得我適應了很久…

微波爐                     2年
好了,也是裝修時換的。之前的SHARP,唔好講笑,用了十幾廿年,係初初出微波爐呢樣時買的…

煤氣爐                     應該有7/8年啦
記不起有多久了…見佢啲積咁厚…都應該有一段時日…

德國佬攪拌器  2年
我估架咋…總之某日出現了在我屋企啦

飯煲                      2年
又是裝修時換的…阿娘唔鐘意飯焦所以換西施煲,但西施煲唔襟用…KEEP住久不久就要換…

風筒                      2年
也是裝修時換的…

直髮夾                     4/5/6年?
呢個唔記得幾耐了,應該好耐,因為佢開始唔多熱…睇番舊文,再上一個08年時仲健在…而家的那個應該…4-5年倒吧?

洗衣機                     我相信是千禧年前買的?
我娘是愛妻號的超級粉絲。洗衣機又是一個神奇,印象中換過兩三次,部部都用到10年以上的。

熱水爐                     6年
屋企入伙時的爐用到6年前換過一次之後就繼續用到而家了。
*************************************************
估唔到,全屋的襟用之王,竟然係我床頭盞燈…囧

2 則留言:

  1. 電子產品同家電(大小又會唔同 :P) 壽命不能同日而語嘅...

    雪櫃,我家一直都是用冰格在最下面的那種. :P 其實冰格最少開,放下面比較user friendly呢.

    壞掉的那個是日X,我媽原本也說要換三叔... 這次輪到我堅持不用三叔.哈哈.

    回覆刪除
    回覆
    1. RE:lu

      因為我房的家電大概只有冷氣和燈…哈,跟住我成房都係電子產品了…
      部三叔雪櫃係我姨大推和送俾阿娘的,雖然我唔慣佢個三隔,但娘係大推和勁熱愛,話好好用喎…(咪又係咁雪野…)

      刪除

要講幾句嗎?﹗XD