我在電影院消磨的時光(至2013年8月)

寫得港劇篇，唔爭在寫埋這個吧~哈。

西遊．降魔篇

新年到而家我仲記得啲劇情，特別是空虛公子…，證明是成功的啦﹗XDDDDD。雖然舊酒新瓶不過睇得開心就算啦，呀，好似話仲會有兩集喎﹗

當總統遇見皇上

劇情是英國的國王(如果我無記錯，英國的「皇上」是King，應該係譯國王，而「皇」，應該係emperor)去美國見美國的總統，英國的國王應該係英女皇(女王定女皇呢？又是一個學問，但可以肯定的一點是，中環啲皇后大道乜，應該係指19世紀末的維多利亞女王吧，雖然英文都叫Queen，但意思應該係女王，而唔係嫁了國王而定成為王后的queen囉)阿爸，即係二戰前後啲野？睇番先記得係佐治六世到美國跟羅斯福總統會面…我完全唔記得﹗要睇番劇情啊…(所以才講了咁多唔關事既野？哈哈哈)

狼少年之戀

我熱愛到去台灣訂隻dvd番屋企再睇喎﹗再睇仍然後笑中有淚(女林大人太強大了﹗)，不過係覺得被個導演版欺騙了，就是尾尾度老版女一變番少女女一咋嘛？女林大人要服役了，兩年後佢會唔會由牛奶肌變成古古力肌？巧京京…

忠烈楊家將
篇幅有點太短，劇情是可以既，跟住啲人好似死得就死…趕住死﹗看得有點心up。

東京家族

我想睇番原版喎﹗人情味滿載感動之作，仲令我無啦啦走去搭個巴士團添﹗哈哈哈。戲入面做孻子的妻夫木聰跟女友蒼井優比家姐阿哥來得搶鏡，呀，我想說的是，頭髮果然影響外觀﹗長髮的優妹唔係特別令但總算有氣質，剪短了…即刻成個絕症病人咁既樣﹗

相愛的約定．前篇

前篇比較好，純愛戲嘛，令仔令女就可以啦。Um，斗真同學廿幾到尾仲可以做高中生，實在太神奇了﹗(當然我完場時的奇遇是更神奇…囧)

DNA白金數據

跟我睇預告後得出的期待有點出入…我會睇番本書，睇吓會唔會好似之前咁東野啲戲都不及小說精彩…

大亨小傳

就是小題大作的追女大作戰，咁畫面是令的演員都精彩，只係我覺得實在係太小題大做了…

北方的金絲雀

又是想睇番原作《往復書簡》。套戲跟《大亨小傳》一樣令我浮出一句「小題大做」，不過程度無咁高啫…。係咪人既野有啲野未做心掛掛既時候就一定要攪番掂佢？even揭晒瘡疤出嚟…而阿老師的瘡疤，其實又不特別瘡疤啫。Any肥，據說小說的書信有更多(好像是六封)，電影只係抽了一封出嚟…

電影的宣傳拎呢套跟《告白》比較，無可厚非既，但以戲論戲，故事內容、人物設定和演員(其實都係松隆子)，梗係《告白》高一線既…

聖誕玫瑰

楊玉女第一部導演之作，台前幕後有十萬個群星貢照，很強大。估佢唔到唔係愛情故事而係因為性騷擾而上法庭的案件，懶係案中有案奸中有正正中有奸咁，起承轉合做齊晒，都算係咁啦。Um，郭城城真係幾over，喺智叔面前真係體現到乜野係四兩撥千斤，演城城的律師對手既夏雨是第一次睇，反倒ok喎~

非常盜

看來小題大做是講故事的永恆定律。阿偉大的加士比(《大亨小傳》)為了追番舊女友而走去扮富豪又攪party只為搏佢回心轉意，《北常盜》其實都因為男主角的心結而攪出嚟的大龍鳳。Um，過程是有點出奇不意的，懶係正邪逆轉嘛，但睇完…um…真係你講晒啦﹗

神探伽俚略2．真夏方程式

杏真係好黑好瘦好恐怖﹗雖然一貫的將小說情節大量刪去(而且將最離奇曲折的都刪掉)，一嚟就劃公仔劃出腸，大大減低了推理的懸疑度，雖然湯川先生跟小朋友的相處是慢慢滲出溫情，但又好似唔match佢角色的性格…um，

飛虎出征
基於我無睇過《低俗喜劇》，也只在有記電影台斷斷續續的睇過《大丈夫》，其實我有睇但都唔太記得《寒戰》內容…可能我個人無聊啦，《飛虎出征》啲gag位我笑到收唔到聲，由一開始林雪打刧時鬧鄭敬基「酒杯敲鋼琴」(我即刻想唱「你阿媽話痛」…XDDD)。同埋重演蝦米村屋受傷事件的LEGO…我笑到傻啊﹗UM，或者睇過《低》就唔同講法，但而家嚟講我覺得想笑吓，呢套係選擇之一呀﹗

3個特攻美少年

笑料爆炸，主角令仔，動作悅目(係長啲)，溫情洋溢，仲想點啫…

激戰

事前雖然大煲家輝叔谷大隻，但套戲不在肌肉(雖然應該是很多人的看點…彭于晏都谷得好勁喎﹗)，在於那份鬥心，看完個人係好熱血的。雖然故仔大路，結局也有點草草了事…

狂舞派

《激戰》和《狂舞派》，我梗係毫不猶豫選《狂》啦，在偉大的紅磚大拍架喎﹗(雖然睇完成套戲都唔知主角阿花讀乜科的)連場勁舞看得目不暇給，劇情追逐夢想有苦澀也有勵志，起承轉合有齊晒，寫實唔誇張。其實這都不是重點，我最鐘意睇7良跟師父(黃貫中)條line，7良好正啊…

*********************************************************************
本來想看《字裡人間》的但因為星期日想瞓多少少無去睇歡樂早場(但已把小說看完，日影既野呢，有啲驚電影呈現唔到小說的細膩，其實)，暫時2013年入戲院看的戲係咁多了，再續。