「天佑亞記」

其實，我屋企係忠實無記粉，咁多年來我地基本上都係長開無記，只在亞記有啲乜野爆炸的節目先會轉台。或許我地都係一台獨大的幫兇…um，印象中，好似係《縱橫四海》、《還珠格格》(仲有我勁推的《雪花神劍》)先引到我轉台。尤記得當年做白面古《神鵰》的時候撞正《今日睇真D》做解剖外星人，阿娘要轉台睇，阻住小的睇白面古，雖然有錄影機…但我唔能夠即時睇，而且錄影機唔會cut廣告，佢完全唔明我的內心有幾受傷呀﹗

我懷疑，這令到我一路唔鐘意亞記…哈哈哈。
Any肥，我地都好似習慣了亞記久不久就轉老細，久不久就頹吓，久不久就有啲正野出嚟。無數次係亞記殺出新血路，後來俾無記照抄。又試過無數次無記紅了的人俾亞記重金撬走。又又試過好多次俾亞記奇招攻破，逼得無記使出真功夫動員上下去打仗。雖然次次亞記都唔勁得幾耐，但奇妙在換完老細都會好似好啲，好一陣又頹，頹一陣又好咁，好似已經成為習慣。

呀，順手講番，篇文的題目係睇完盛生聲明的「天佑亞記」有感而用…我抄佢的…哈哈。

又說，當年大HIT的《我和殭屍有個約會》我是近年先睇番，《情陷夜中環》我無睇過…太勾了…

近年亞記唔玩拍劇，我當佢唔用無記強項直接對打啦，咁做綜藝節目，好似得亞姐/先生呀咁，then文娛時事節目，其實我只記得《感動香港》。之後就後一大堆祖國/泡菜劇，咁其實外購劇都有好野既，又說，佢唔好挑戰無記的路線反而走自己獨特路線都無野既，niche market反而可能走出一片生天。之前一大輪都覺得…呃…做乜係咁播泡劇…仲要播極播唔完…呃…而那些泡劇係我媽媽(aka…c9)都頂唔順，呃…咁都係一種market嚟既，話晒佢地可能先係睇電視既忠實粉絲，咁有人會忠實睇無記，我都相信會有人忠實睇亞記既。

不知從何時開始亞記變到好有祖國feel，呃，都係一個路線嚟既，只係唔中我咁解。又不知從何時開始，亞記變成重播台，歲月留聲台之餘本港台都不停在loop舊節目，好爆炸。跟住又不知從何時開始，亞記會錄得零收視，真的好爆炸，作為一個商業機構，零收視喎﹗貢都得。到有一點收視時，就係100%的增幅，咁爆炸，真係大開我的眼界。

其實當我連無記都無乜點睇的時候，我係無睇亞記的，我只係睇有關亞記的報導，fb大家的瘋傳和友人口述(屋企有人仲堅持睇緊﹗勁﹗)，首先得承認我對現在亞記的認知係無事實基礎的，覺得佢騎呢都係一個印象而已。我只是很直覺地覺得，零點收視真係太爆炸了，商業機構要賺錢出糧架，好啦，我當有堆廣告商有理無理都會落，但無收視，即係無(乜)人睇，公用大氣電波(電視咁講啱唔啱呢？)整啲無人(乜)人睇的節目出嚟，又真係有啲浪費…。都唔講無記連唯一的對手都無埋，真係任得佢出乜都得了。

盛先生喺被通訊事務管理局要求終止其職務後發的聲明都很爆炸，說自己走在「良心路線」之上，又話「4年來其家族為亞視投入現金16億元，無一分錢銀行貸款，變化有目共睹，受到觀眾和對手的高度重視」，實在係太爆炸了，咁我無睇過啲節目唔知有幾「良心」，但你唔借錢投資了16億其實唔關我事架喎﹗在政總面前跳舞反對發新牌呢吓…會受到對手的高度重視嘛？

咁我相信總有人係buy盛先生的路線(於是佢地去撐佢…囧)，又或者佢地覺得一個台走正常路線，一個走良心路線另類一點就剛剛好，大家都有得揀啦﹗噢…咁實在係太強大的論點了。或者我太著意零點和以啲三四五六點的收視，就係無無記咁郁啲都十幾廿三十幾點咁勁。好了，是另類的選擇，既然總有人睇就唔應該否定佢既存在既話。

其實我都係唔明，佢係負責去燒錢的嗎？無收視，仲可以有錢賺？咁世上千千萬萬個電視台都要向佢地取經先得啦﹗而佢唔係一心去賺錢既話，又會有咁多錢去燒…大囧。一個謎﹗

有牌做緊的又走緊啲大眾都唔知佢想點的路線，想做的又唔發牌俾佢，即係你係官台的話走特定路線定霸住公營大氣電波就無計啦，但亞記係商業架喎，係咪應該放番出嚟俾有能之士tender呢…(或者係我天真同傻，事實背後係有好多考量既…)

無呀，純粹係覺得個聲明太爆炸所以想講兩句啫。點解聲明既內容同我既認知差咁遠？係咪我真係太少睇亞記呢…哈哈哈哈。