讀書報告 #5~《角力．韓國: 只記得第一名的社會》

我又忍不住買書了(其實沒停過就是了)。不過這書的題目確實吸引，最爆炸的是作者是個日本人，讓我想起很久以前的一本《日本人的縮小意識》是泡菜人作的，這回由壽司人去寫泡菜國，很有趣，兩個國家總讓我覺得是打生打死的難兄難分嘛…

COPY寫得很吸引，特別是一句：韓國亮麗成就背後竟是如此憂鬱﹗係啦，就係覺得泡菜國硬係要超日趕美，咁先夠強大﹗

(自卑才會導致自大了？歷史上泡菜國的朝貢國和被侵歷史所致了？)

因為作者是壽司人，譯者是寶島人，於是內容都是壽泡對照，跟住譯者就會加一點寶島的對照。但看看吓，其實咱們特區甚至偉大的祖國都有類似狀況，都是你睇我好我睇你好吧…

• 將夢想寄託在選秀節目上

本來我以為會講吓藝人在經紀人公司作為訓練生的秘辛，但原來係講泡菜人一窩鋒的跑去參加歌唱/才藝比賽，因為走正途讀書搵好正的老方程式上位不成，難得有個比賽可以憑學業以外的能力去出人頭地，自然吸引人。而因為呢啲比賽，市面各式良莠不齊歌唱學校應運而生…

香港的《殘酷一叮》、《星光大道》、《超級巨聲》甚至做0靚模都係咁上吓吧，搏一搏無衰啫…

• 人生的競爭從「教育」開始

書說泡菜國覺得英文能力十萬個重要，於是從小學開始就不停補習催谷，但求搏入名牌中學再入名牌大學再再入大企業就可以過安穩生活，同埋諗結婚生子。呃，咁啱呀，我地都講緊嬴在起跑線喎﹗睇日劇就成日有年青人出身自三四流大學所以鬱鬱不得志，三四流的高中就更加無話可說，所以先有《龍櫻》這種奇人改造垃圾高中生入東大的神奇故事吧﹗(而呢套劇係有泡版喎﹗

書說泡菜國政府為了改善高中生升學壓力，早於70年代就設了個公平升學法，以學區為單位RANDOM的抽學生入學校，掉轉頭學校無權選學生，跟住又取消高中入學考，但學生的壓力無減低了，佢地還是要入名牌中學和大學以求有美好人生路吧。回想起來，當年我成日覺得會考和高考折騰死人，但睇完後…呃，原來當年我都被折騰得好他條咋﹗

講開又講，壽司國因為唔想俾太大壓力學生於是將中學課程大量簡化，大學生英語能力一直…哈哈哈﹗看《龍櫻》時更驚訝考東大都係考呢啲英文﹗﹗﹗﹗咁不如我都好考啦﹗東大喎﹗(但我喜歡早稻田多啲，其實﹗)其實，壽司國係咪太相信自己的強大所以覺得學好國語就可以呢？看新井一二三說以前大學要求學生除了英語外學多一種外語，但慢慢都解除了…當世界講一體化，而壽司國經濟不振時，壽司人的競爭能力…噢…(咦，我掛住關心壽司國了﹗)

• 就業與戀情都要看規格

入唔到一流大學就入唔到大企業再結唔到婚生唔到仔，連鎖反應到處都係，大家都係高樓價買唔起樓，做唔到正社員就逼住打工，壽司國和泡菜國仲多個問題係大學生上「京」讀完書後返鄉又唔係，留喺大城市又搵唔到好工，打工莫講話前途無保障，做月光族(泡菜國叫「八十八萬韓元世代」)都咪話唔慘。

呀，我離題，估唔到N年前的「四仔主義」到而家都仲APPLY到，但當年係努力省錢就可以逐樣逐樣儲回來，但而家…非不為也是不能也呀﹗除非我去《決戰一分鐘》嬴個一百萬番嚟…囧﹗

• 「正職人員」與「非正職人員」的鴻溝

日劇好似好鐘意拍吓飛特族、派遣的故事，派遣呢個香港比較少？我地一係TEMP、一係時薪的嘛，共通的是，人工低福利少咁。以前以為係人情味滿載的老企業敵唔過經濟浪潮，都係要炒人了，更莫講壽司國崩潰了的終於僱用制，看新井一二三說，以前日企會有平租租樓房俾員工(就是《飛特族買個家》二宮阿爸個SITUATION)，又或者借錢俾佢地買樓，但隨住泡沫經濟爆破，企業都要變賣呢啲資產嚟抵債，都無呢啲歌仔唱了…

只能說，我出生得太遲啦…嗚…(7/4/13後按：估唔到泡國翻拍大前春子成《職場之神》了﹗)

• 大企業不救弱者

咦，我做乜成日上個TOPIC講晒下個TOPIC既野…

• 您住在那裡呢？

「住址」的品牌力到處都一樣吧，諗起N年前劉松仁套《無業樓民》伍姑娘夫妻為了幫個女報學所以租了劉松仁的豪宅住，當年覺得係劇集誇張了吧…但原來一個見得人的地址係好重要的…尤其是當要攪婚活時…大學、公司和住所缺一不可﹗

泡菜國高級一點的地區係咪南山和清譚洞了？﹗書中就MENTION了個女仔為了KEEP住自己南山女孩的身份所以將人工大部份拎了去租房，續約時被大幅加租就向父母求助咁…

• 家庭崩壞與自殺大國

聽得最多就是泡菜國藝人自殺，但原來學生、軍人、老人自殺率都很高，《告白》式的弒母事件也不是稀有事，邊看邊諗起之前香港的一單扮在FB尋父罪但原來兇手就係個仔的案件…好恐怖的說…

**********************************************************
看湯禎兆啲書講的壽司國社會問題都能在呢本書度搵到泡菜國的版本…都是先進國家不能避免的問題吧？但一樣咁慘的時，問題你可以參照其他國家的經歷，但政府又唔多ACT得切，也是不能避免的了？﹗囧﹗