2013/01/19

[日劇]《金田一少年事件簿~香港九龍財寶殺人事件》

終於俾我睇到了﹗果然是很爆…忍不住一路睇一路打文耶﹗
  • 咩九龍城寨有個傳說係日本女性換衫時會消失咁爆?
  • 點解曾志偉講國語,但街邊倒水的阿嬸講廣東話既…
  • 阿一和美雪究竟係喺九龍城(寨)?旺角(美雪揀衫那家店好有美芝feel)定中西區架(玩滑板咁爆﹗)?
  • 咩事阿一追番美雪時要不停有跳起拎番塊板又差啲撞到阿叔的慢動作?扮港式動作片了?
  • 原來九龍城寨有「東洋魔窟」之稱…而我不知道喎﹗
  • 楊蘭呢個名真係…老土到不行…
  • 勝利做乜講國語呀﹗太爆炸了﹗但佢轉頭又講日文了…做乜佢得一場就唔見了…
  • Vvivian姐還真是美…ko了新美雪…
  • 吳尊都去講日文了…其實佢可能係講國語最流利的喎反而唔叫佢講國語…掉轉啲日人講國語聽到我耳到側埋…都算了…做乜特區警察都講國語呀?(但睇睇吓吳尊應該係配音喎…)
  • 楊蘭又反而去講日文喎…攪到我好亂…不如全部清一色講日文算啦﹗
  • 勝利…金龍東…London Kim…又真係好周星星啲龍九和Kowloon喎…90年代得很呀呢個gag…
  • 美麗模特兒們…好難受呀﹗啲對白用字70年代都嫌太先進了﹗
  • 原來吳尊是台灣來的國際刑警…點解佢會指揮香港的差人既?同埋佢係咪代替劍持Sir的工作了?
  • 吳尊巧令仔添…勝利失色呀…新的那位金田一…無力囉…
  • 做乜有人死了…唔使落口供既?阿London可以轉頭就同金田一去食大排檔既?﹗
  • 去我屋企睇Laser Show…乜有人招呼人去自己屋企做呢啲野…勝利仲要一副誠懇的樣子…好好笑…
  • 曾志偉做乜一出場就死…甚麼九龍皇帝王龍呀﹗九龍皇帝唔係曾灶財咩﹗
  • 點解那個甚麼新力的人會住喺London樓上?
  • 吓?劉艾薇俾阿李警官講完甚麼九龍寶藏是不祥之寶的反應…竟然是…mau低?
  • 吓?金龍東係王龍個仔?點解佢喺香港大但係細個講國語大個講日文既?
  • 點解一個waiter會有酒店房間的main key card既?
  • 乜野呀﹗因為怕大家會恐慌所以香港警察唔介入…留俾個台灣刑警做?
  • 乜野呀﹗舊蘇聯的原子彈會喺香港爆?仲有十個鐘…做乜crossover埋啲世界末日啲日影劇情呀﹗癡線架﹗
  • 蒙住眼美雪都可以打電話…佢用既應該唔係智能手機啦咁﹗我有份推理了﹗但…金田一個電話唔係綁架美雪既人俾佢的嗎?係咪啲綁匪叫美雪打俾金田一去引佢既呢?
  • 做乜學埋韓劇咁玩手機app呀﹗又會咁啱個龍紋身(的女孩?)會貼得落大澳個地圖度咁爆…
  • 王龍到底有幾多個仔?勝利又係…吳尊又係?
  • 佢地坐遊艇入大澳咁高級既?
  • 金田一可以就咁跑落隻船度叫個大叔幫佢開船去追劉美薇咁爆…佢有錢找數架啦…
  • 唔係fa,原子彈咁大舊野…一堆友就咁拎住個電筒就去拉?拆彈專家呢?機械人呢?
  • 繼pc、船大叔…連醫生都會講日文了﹗(我真係麻煩,講日文又嫌講日文,講國語又話佢講國語了…)
  • 吓…個彈就咁就拆了…
  • 吓吓吓吓吓吓…喺香港大街度從酒店(仲要成十幾廿樓)用鋼索將屍體運到對面的民居?大街點會無人睇到呀﹗癡線架﹗
  • 個兇手仲要用手收番條鋼索咁low tech﹗
  • 用衣架變鋼索?點駁埋佢呀?仲要用熱氣就自動變番一個個衣架…人工智能先進產品呀﹗巧京京呀﹗點解有啲咁先進既野出咗我都唔知既﹗
  • 其實阿蘭殺劉艾薇時應該會留低好多指模架喎﹗
  • 吓…楊蘭阿媽放火同啲害佢既人同歸於盡時…個女都喺間屋度架喎…咪死埋一齊…
  • 吓?桐谷健太又係曾志偉個仔呀﹗
  • 點解廿年前劉艾薇好似改革開放前啲郁?
  • 吓?蘭係曾志偉第四個孩子咁京﹗
  • 癡線…做乜無啦啦放煙花架﹗
我竟然可以睇到完場…真係太強了…之前仲覺得龜梨個sp唔多得…原來可以低處未算低…囧

12 則留言:

  1. 看過漫畫原版嗎?漫畫由新版開始故事一直很不知所謂......

    我在心中金田一真人版只有堂本剛!(郭志權配音)

    換衣時消失的傳說大概是來自這
    http://zh.wikipedia.org/wiki/%E8%A9%A6%E8%A1%A3%E9%96%93%E7%9A%84%E6%9A%97%E9%96%80

    回覆刪除
    回覆
    1. re:WINSON

      我n年前啲乜乜密室殺人事件都有睇吓漫畫既,但今次呢個二十周年就無睇過…其實我都係有劇就睇劇…好少特登搵番本漫畫嚟睇…

      堂本剛又真係先入為主既…但以似原著度嚟講我覺得第二版的松本潤高啲,不過都比而家呢個好…哈…

      換衣時消失的傳說真係有架…囧

      刪除
    2. 我覺得松本太木獨,堂本剛把金田一查案時的穩重,平時的調皮好色都演出來(話說之後的金田一好像直接被編劇刪除了好色調皮的性格),堂本剛版的演劍持SIR,已故的古谷尾雅人也很讚,不過我很不滿真人版都把明智的戲份刪掉了。

      刪除
    3. RE:WINSON

      吓?好色調皮的部份刪掉了?我見山田涼介呢套都有少少的喎…唔係佢集都一本正經咪好悶囉?﹗

      我睇龜梨個版本劍持sir變了一個年青的大叔,很其怪的說…只能說我們都被堂本剛的版本先入為主了…

      刪除
    4. 真人我只看過堂本剛跟松本潤,松版確實毫不好色調皮,木木獨獨的,總覺得之後的金田一都變成偶像劇了。

      刪除
    5. re:WINSON

      松潤我自遠古的《我們的勇氣未滿都市》就唔多鐘意佢,所以之後佢啲劇我都自動skip的…而小的係kinki粉嘛,雖然鐘意光一多啲不過剛既劇都會睇…是有偏心的…

      於是乎…松潤個version我係未睇過的…哈哈…

      刪除
  2. 其實我覺得綾瀨遙好啱做美雪…

    放煙花果度好TBBQ ending feel

    同埋你覺唔覺得一路都冇好實質的証據指控到咩人做,係個兇手俾人講兩句就自己認左咩?作為一個��模個兇手可以用咁多財力體力物力搞咁多野,真係好令人懷疑有冇其他共犯囉,點解唔可以有共犯?

    回覆刪除
    回覆
    1. re:blue

      而家呢個女主角都ok既…係個男主角比較…umum

      放煙花真係好爆,又唔係新年又唔係國慶,無鬼啦啦做乜放煙花…咪玩…

      金田一成日都係阿一講完推理後個兇手就會自己行出嚟認架嘛,同埋攪咁多野一個女仔就做得晒都幾神奇…

      刪除
  3. 同埋以港人串嘴習慣,你同人講我係某某個孫,實俾人串返:「係呀我夠係李嘉誠個仔」XDD

    回覆刪除
    回覆
    1. re:blue

      或者答:我識你係老鼠呀﹗咁囉…

      刪除
  4. 我覺得我睇呢套SP真係浪費我時間呀!!
    成個故事情節真的神奇到不能形容!
    D日語,廣東話,國語真係亂到令人無言呀!!!
    男女主角都好唔吸引呀!!!
    而犯案情節真係令人O哂....
    點解會咁GA!
    破壞哂金田一係我心目中GE形象喇~

    回覆刪除
    回覆
    1. re:星晴

      其實我有少少衰既,因為12號播的那晚我出咗街食飯…
      返屋企時大家都講晒對呢個sp既意見,頹和hea是知的,不過我又鐘意掃雷所以心思思想睇吓有幾雷…
      睇完,十萬個不合理,情節兒戲,推理求其…吳尊有差人去搵原子彈真係爆笑之霸…
      睇完…我諗等閒搵番堂本剛個版本出嚟溫習吓好啲…

      刪除

要講幾句嗎?﹗XD