2nd Little Life - 店舖+又一堆恐怖舊物…

見LITTLE LIFE第二擊既題目時我確係思量了甚久…卒之俾我諗到啦﹗

我最喜歡既店舖就係圖中呢款街坊式文具舖囉~記住要街坊喎﹗

從小到大我都好喜歡貢呢款文具店，基本上九成九都係入去貢，睇吓有乜有趣野，得百份之一機會係真係有野要買，而呢一個巴仙既機會入面，又有百份之九十九機會 係聽日上堂但今晚執書包時先發現無喎﹗所以…同一時間我可以有幾set墨盒+毛筆、水/廣告彩、雕刻刀、三角尺、畫簿、圓規…囧﹗

啲衰野硬係要用時就搵唔到，之後先死番出嚟架嘛﹗咁就要急急腳走落樓下買啦﹗

以前屋企樓下方圓五分鐘腳程內座底有三家文具店，而呢號稱自己係文具店既店又往往有大量精品賣喎，咁看倌們明點解我會儲落咁多恐怖舊物啦，返屋企既路上好似過路障咁，但小的意志又薄弱，咪見一間就入一入，又忍唔到手硬係要執少少戰利品返屋企囉…呵…

咁多樣當中我最愛呢件﹗ 死未﹗佢表面上係係印有郭城城既盒，實際上佢係個紙巾盒，不過我唔見咗中間個隔﹗

係啦，啲小文具舖既特色就係有好多冒牌野，大牌子如三你奧既公仔產品少之有少，老翻既就天上繁星，但係佢個設計分分鐘靚過原版，又極具創意，唔得佢死架﹗

喺我識去無印買文具之前都仲有去文具舖買正經既文房四寶，但中咗無印毒後就最多都係買吓hi-tech c，入文具舖主打貢奇珍異品囉。

好了，些牙吓今日我搵到既騎呢舊物先﹗

美少女轉身變已變成戰士﹗其實以前我係好迷呢套野架﹗買咗好多product(不過大部份如上圖那本係老翻…平嘛﹗小朋友邊有咁多零用錢呀﹗)，面那本仲呃得吓人，底那本就呃唔到，假到爆﹗哈…

咁呢兩本係乜呢？﹗登登登登：

佢係一本貼紙簿﹗死未﹗上面啲貼紙呀閃卡全部都係老翻，喺文具舖幾蚊張，買返屋企貼貼貼好開心架﹗真係死未﹗《飛天少女豬丁》我都有﹗而我成日開口埋口話唔鐘意既hello mimi都有﹗死得了﹗最死既係…劉華和周玉女﹗超驚﹗唔知點解以前啲貼紙好鐘意扮郵票﹗

PC狗﹗有一水我係好鐘意架﹗龍貓竟會做我的良朋﹗死未，可以做貼紙既閃閃書簽﹗應該係關於香港未來發展既貼紙系列，我喺本野度見到有新機場、機場鐵路、大橋同填海工程﹗驚﹗扮包公貼紙﹗驚驚﹗不過呢啲都不是最驚，最驚係唔知點解會有張DODO姐閃卡﹗

閃卡來了﹗YAAH卡﹗我都唔知係乜嚟﹗哈哈。

都說我小時唔專心讀書架啦，就係努力儲埋呢啲野囉﹗咁看倌們都明點解文具舖我都可以貢一餐啦﹗~

死未﹗竟然搵到一SET未開封既墨盒~話說係前幾年失業時悶得濟，竟然諗到練大字…不過買咗野後就有offer…於是就收了在一邊…唔知而家仲用唔用到呢？﹗






文具舖既其他搜購plus我的舊物珍藏：
其實我不喜歡sanrio2~聖誕禮物篇
我在床下底搵到張餅卡…
一堆舊物
購物後的價錢牌和紙袋…
其實我不喜歡sanrio
滄海桑田之廿's咭
屋邨情懷另一篇：我係屋邨大﹗