2013/02/20

[港劇]需要觀察的《心路GPS》(至7/3/13)

雖然喺微博度(係喺微博度喎﹗)得知呢套劇會上,但我唔知原來《初五啟市錄》《戀愛季節》已經做完,也唔知原來《心路GPS》今個星期一已經做…真係失格了…
  • 琴日補睇番第一集,感覺…好平淡…呃…又因臥病在床所以無特別動力去追第二集…17哥…我對你唔治呀﹗(而…瞓醒後我係掛住去睇《ATARU》的…XD)
  • 唔知呢,上次《衝呀﹗瘦薪兵團》我都頂到一半架喎,今次…其實我都係想睇《叛逃》多啲呢,幾時播啫?
  • 據說《叛逃》的主題曲已經錄好了(據說是和唔唱K合唱的…)…今次呢套《心路GPS》更爆,有司棋姐featuring喎﹗
  • 據說,個劇情就係劇中人各自面對唔同問題,在工作和感情上遇到唔同事之後搵到自己的路向…就係GPS之意啦…
  • 於是,母子情有兩條(司棋姐/陳秀珠姐姐),男女感情(17哥跟黃翠如),師徒情(麥包跟少年家明)呀咁…
  • 據說,司棋姐本為平凡C9,有美滿家庭咁,但因承受唔到老公過身,仔女對佢冷淡令佢覺得無存在感,雖然養子(17哥)對佢不離不棄,但又覺得負累佢於是離家出走,好似話應該會沉淪賭博…最後被陳秀珠姐姐收留和解開心結…
  • UM,第一吓我覺得陳秀珠姐姐做17哥阿媽會唔會太爆炸?但睇番wiki,咦,陳秀珠姐姐79年選港姐喎,咁77年生的17哥…係生得出喎。劇情就說陳秀珠姐姐16歲生了17哥,但因跟男友分手養唔掂所以就拋棄了個仔。司棋姐就喺17哥8歲時收養了佢,17哥就stay喺寄養家庭直到18歲咁…
  • 因此,17哥唔鐘意親娘,反而跟養娘有深厚感情…
  • 可想而知…呢條感人的母子情線應該會佔好多篇幅…
  • 17哥個角色名叫夏日長(讀詳音),即刻諗起鄒靜首《我愛夏日長》﹗而17哥一身緊身tee加銀器郁…我不其然諗起陳小東的《心理遊戲》mv…唔講我都以為佢係黑社會喎…哈哈…
  • 而司棋姐個女婿…係林偉﹗﹗﹗﹗﹗﹗我敬愛的宋銀哥哥﹗(應該無人知道我講緊《餐餐有宋家》?哈哈哈)
  • 雖然17哥係無記出身,林偉哥哥N年前都係無記人,但加埋梁嘉琪、黃翠如,件事即刻好外援FEEL…不過都好過睇嚟睇去都係巴士高、除紙山既(no offense,我最頂唔順既其實係鄭視帝和胡囧囧…不過一年睇十幾廿次巴士高和除紙山,ok都變唔ok啦﹗)
  • 做乜成日有17哥就有梁嘉琪﹗《洪武》有佢《衝呀》有佢而家《心路》又有佢﹗不過比起最初《學警狙擊》花藥煲時已經好咗好多,起碼少咗有記報娛樂新聞時代啲面容誇張地扭曲同吓吓提高聲線…
  • 至於黃翠如…原來唔覺唔覺佢都過咗3字…(佢係第一代主播?﹗)…可能佢喺有記拍埋啲片太雷(我被炸了很久的《奪標》),而家見到佢同支紫花油都驚一驚…(其實第一集佢既演出係正常既…)
  • 佢係17哥身邊幫佢公事又幫佢家事,於是不知不覺下擦出了愛火花云云…都好既,係有條線順住去,好過吓吓都鬥氣冤家咁悶…
  • 麥包哥哥個髮型好潮﹗
  • 佢同家明會有段師徒情,而麥包哥哥屋企好似都好煩…應該又有一大段劇情係佢一家人點領會家庭之愛吧…
其實我睇完個劇情簡介都好似知了劇情一大半咁…仲睇唔睇好呢?﹗我又失格了﹗哈哈
****************************************************************
7/3/13後按:

基於阿娘呢幾日都在家煮飯,我食完飯又掛住candy crush,於是就睇吓一集睇吓又一集

  • 我娘睇得好投入,特別係阿叔(關菁叔叔)過身那一兩集,睇到眼濕濕…咁司棋姐功力相無庸置疑既…
  • 阿爸過身,阿仔先呃阿媽按樓同佢俾首期,跟住阿女又同細佬一齊想呃阿媽轉名,跟住阿媽因為仔女唔理自己而無所寄托,性情大變走去賭錢,於是幫佢的只有養子…嘩﹗突然變咗粵語長片…
  • 當然戲劇係要極端先有爆點,咁觀眾(c9﹗)先會睇得咬牙切齒…但…阿爸阿媽又唔係富豪,而你知道呃走阿媽層樓佢就無人無物先住的地方都無,咁都謀又真係太無人性吧?
  • 我知,是因為要令觀眾睇得投入所以先寫到仔女咁奸,跟住女婿和未來新抱又賤格吧…
  • 於是成家人都係奸的,只有養子summer哥是忠的…我囧了﹗
  • 那位可兒小姐,佢把聲我真係好驚,佢一開口叫「阿b~~~~」我就打冷震了…只能說我不會嗲功啦…但,現實中真係有女仔咁講野,而,又真係有人受落的…
  • 因為有了呢位可兒小姐,於是本來有點難受的黃翠如即刻變得正常了…
  • 陳秀珠姐姐條line還未正式開始吧…而家鬧交鬧到無朋友集集都,之後就要集集都淚之大和解吧…
  • 17哥屋企條line煩,麥包屋企條line都煩,婆媳糾紛日日有咁,但個佈景係咪都好大間又裝修到鬼咁靚…富戶嗎?
  • 最攪笑的是,830《戀愛季節》胡定欣同馬helen鬧交,930就到張美妮同夏萍姐鬧交…囧
  • 更攪笑的是,17哥叫summer,除紙山又叫summer喎﹗
  • 呢套劇有趣的地方是睇開的投入就繼投入,頂唔順的繼續頂唔順…

14 則留言:

  1. 戀愛季節未完的 囧

    回覆刪除
    回覆
    1. re:Jade

      改番改番﹗因為我係網上mytv睇…所以唔知830定930做的…哈

      刪除
  2. love season still showing

    回覆刪除
    回覆
    1. re:浪子m

      多謝提醒,已經改番~

      刪除
  3. 依家先第2個故事炸!!
    未做完呀!

    -->睇左少少..冇咩興趣...
    反而都仲可以睇下

    回覆刪除
    回覆
    1. re:星晴

      因為我係網上重溫的…所以唔知係930定830做…哈哈哈﹗我仲以為《戀愛季節》係情人節星期限定添…

      我睇完《心路》第一集都無乜大動力繼續睇,都係努力追埋《ataru》先…

      刪除
  4. 宋銀表哥我知!(舉手)
    仲有宋銀,宋富,宋貴~
    白面古天樂同佢女友

    至於GPS,冇興趣呢~

    回覆刪除
    回覆
    1. re:Nicky

      嘩﹗握手握手﹗哈哈哈
      《餐餐有宋家》對我嚟講最吸引就係有白面古,偏偏佢拍拍吓抽走咗去拍《神鵰》,即刻無晒看點啦…

      《gps》…我只睇了第一集,之後都無再睇了…

      刪除
  5. E...點解我個留言冇左D劇名咁得意..但你又可以估到我講咩GE...

    依家我的食飯時間去到9點幾到10點,,
    所以2套都有睇一半一半...

    其實我有少少頂唔順呀唱K...佢套套都係咁GE LOOK..連我阿媽阿姨都忍唔住話又係咁GE樣.悶唔悶D呀...
    不過個故事都幾特別...仲可以睇...

    岩岩星期4呢一集又OK BOR...前一集仲想打O個個O靚仔...今集都仍然想打佢..佢個樣真係好搏打咁...
    我頂唔順首歌..哈哈...打冷震
    不過呢..我其實都冇咩興趣睇落去...哈哈..

    你睇到邊?如何?

    回覆刪除
    回覆
    1. re:星晴

      哈,我叻叻囉(<--自己讚自己…拖出去打﹗)

      唱k有份拍《戀愛季節》?其實我無特別ok過佢,當年《學警》我係buy陳鍵鋒,覺得佢多年來都好似無乜進步,連欣宜都由被人狂鬧變而家可以出碟做歌手啦…呃…但我依然會期待佢同17哥合拍的《叛逃》既…哈哈…

      《心路gps》我無心機追了,而家《ataru》本篇已經睇晒,ko了第一集sp,爭第二集sp就完結了…呵…

      可以返轉頭埋埋個《想你》的尾佢了…

      刪除
    2. 好!送你一個"勁"字!!

      其實我真係想問..點解我D劇名真係會冇左GA!!!!!
      我對上一個留言都冇哂-.-"
      咩事!!!

      都有D興趣BOR.好似幾刺激咁....希望佢今次進步LA..
      唱K係做 S4 做男主咁.勁SELL佢..但依家其他人都進步哂,如馬明.佢都仲係咁.真係無言!

      快D睇埋,唔知你會唔會有劇評?!

      刪除
    3. re:星晴

      哈哈,我都係睇你啲內容估啫,你講得故事即係單元即係《戀愛季節》啦…

      《叛逃》係我鐘意睇既紀律部隊野,又係我勁熱愛既臥底戲(係17哥做臥底﹗)亦正亦邪太吸引了﹗

      《心路gps》人腳和故事都不吸引…我放棄了…可能因為我都無睇,於是收視不濟﹗哈哈哈哈﹗

      刪除
  6. 又冇左 =.="
    係唔係因為我用左括號??

    都有D興趣BOR.好似幾刺激咁-->叛逆
    唱K係做-->衝上
    快D睇埋,唔知你會唔會有劇評?!-->想你

    回覆刪除
    回覆
    1. re:星晴

      咦,死亡符號係鮮奶名物喎,呢邊我唔知有無…你用邊個括號?我用開" "、《 》、「 」都無事的說…
      《衝上》其實我是前兩三年無啦啦迷上陳鍵鋒時先看…都幾感概的,s4去搵人仔的搵人仔,衝視帝的衝視帝,好似只有唱k唔知想點咁…
      《ataru》最後一個sp睇了一半,睇埋就可以清《想你》了,至於會唔會再出劇評就視乎個劇情爆唔爆炸啦﹗(笑)

      刪除

要講幾句嗎?﹗XD