2013/02/14

突然懷舊之周星星篇

睇完《西遊.降魔篇》後,小的內心對周星星的熱愛一吓子都被呼喚了出來(太誇了﹗)是咁的,前兩日睇煙花喺梳化的報紙堆中見到上星期的蛇果娛樂版,驚見有呢篇《星爺笑死你50》﹗實在無辦法了,我要爆啦﹗

(即刻開番個周星星的category先…哈哈哈)

No.1《少林足球》——卡拉OK
每次聽大師兄(黃一飛)同五師弟(星爺)震住音唱:「少林功夫勁,係好近(勁)!」總會失控喪笑,星爺頂唔順邊拍邊笑入晒鏡。少林功夫crossover卡拉OK?邊個話唔work!

雖然「我有鐵頭功~~~~你有金鋼腿~~~~」攪到俾人怒爆樽係好笑,但我內心最愛都係《西遊記月光寶盒》(?)唐三藏(羅家英)的「Only you~~~can take me取西經~~~~~」,那個「opp~噢」跟住先「only you」實在係太有感情了~

另外,就係《賭俠》的拎住水壺傾情一曲「逝去感情如何留得住,半點癡情遺留殊不易,更多淒淒慘慘的遭遇,我不知道~~~~~杏_橙」,話說,曾經小弟係用過呢段clip做電話聆聲,佢就要趕在最後三粒字唱出嚟之前接聽…唔係就…哈哈哈哈﹗唱了咁多年,我是後來SEARCH番原來係小鳳姐的《變色感情》﹗

No.2《國產凌凌漆》——太陽能電筒
文西(羅家英)係偉大發明家,其有光先着、冇光絕對唔會着嘅太陽能電筒,創意誠意滿分。當然仲有將西瓜刀、火藥、硫酸綁埋一齊嘅攞你命三千,殺不死你都笑得死你。

就算係一卷廁紙和一條底褲都有佢既用途,實在係充滿正能量﹗﹗﹗﹗除了呢兩樣法寶,仲有無敵監視櫈都好爆的說﹗(sorry,唔sure係咪呢個名…)

No.3《家有囍事》——喪心病狂
邊個話星爺冇演技?佢演繹「無定向喪心病狂間歇性全身機能失調症」病徵為之一絕,尤其扮精神分裂,一路叫:「邊個淫蕩呀你淫蕩!」一路歇斯底里自摑,正到喊。


家陣老笠要錢定要底褲和月經前緊張先正啊﹗阿醫生一本正經又帶緊張的說「嚴重起上嚟係連男病人都會有」…跟住星星就做出抑鬱的表情…笑爆咀…

No.4《唐伯虎點秋香》——粗口對聯
唐伯虎(星爺)同對穿祥(谷德昭)攜手炮製家庭篇對聯,工整得來粗口兼備,唐伯虎一句有尾音嘅「你老母兮親下廚」,搞到對穿祥喺鏡頭前狂噴十九幾両血。

對穿祥那十九幾兩血真係經典…噴極都仲有。any肥,其實我鐘意星星同鄭佩佩介紹含笑半步釘和一日冚苞散的功效,仲要back住京都念慈um首廣告歌,好正…(對唔治呢篇文好多粗口添…)

No.5《逃學威龍》——曾Sir記性
「哥士的王子」曾Sir扮演冇記性化學老師,不停將周星星(星爺)同黃小龜(黃一山)撈亂,輕描淡寫嘅演繹令人會心發笑。好懷念曾Sir呢。


睇親呢幕我都諗起《三人新世界》(定三人做世界?)曾sir滋油淡定的喺鄭dodo開唔到個攪拌器時,指出佢其實無插插蘇。

No.6《賭俠》——五條煙

「各位觀眾,五條煙!」星仔初會陳刀仔(劉德華),例牌晒料拋窒對方,其間喺達叔身上抽出五條香煙,嗰副懶認真同得戚樣,華仔真心拍手笑鳥。

係咪有一幕係拎住五條香蕉?啲賭片劇情我記到亂晒了…XD

No.7《食神》——瀨尿牛丸
基哥(李兆基)叫手下講:「爭咩吖,溝埋嚟做瀨尿牛丸吖笨!」八両金印身印勢,林雪背錯對白,然後輪到星爺開聲露餡,都係衰把聲太yap。

《食神》我比較少睇…印象深既位係家燕媽媽做評判,一個演員真係需要一份好的劇本,襯托出佢個人風格和演技,呢一幕,家燕媽媽浮誇和落力的演出得到完美的配合了…從此,我永遠都記得摺櫈是藏力民居絕佳的武器…囧﹗

No.8《整蠱專家》——誠實豆沙包
整蠱之霸(程東)出動誠實豆沙包對付星爺,搞到星爺一輪嘴話:「袁木好誠實,李鵬係最偉大領袖。」原來拎錯謊言豆沙包。


誠實豆沙包和慚愧波板糖可說是最記得的整蠱武器,已經成為小的口頭禪之一了…

No.9《少林足球》——醬爆登場
天生異稟骨骼精奇嘅醬爆(何文輝),見星爺唱山歌,不禁燃起心中一團火,如同痙攣般扭動佢副火柴身軀,所以話毒男都有發光發熱嘅moment。

呢一刻…我要爆了﹗有一水成日扮的…哈。雖然《少林足球》我不是特別熱愛,但唔知點解我入戲院睇了三次…囧

No.10《食神》——情與義
雞姐(莫文蔚)空手入白刃幫星爺擋刀,成手血淋淋,仲面不改容、哨住牙咁唱出「情與義,值千金」,何其壯烈,弊在星爺見到佢副尊容唔領情囉。


《食神》我唔係睇得好多次…回帶…我都係對家燕媽媽的摺櫈論比較深印象…哈

No.11《國產凌凌漆》——打靶戲份
呢幕槍斃戲寸盡內地法治,先屈盲人黃一飛偷睇國家機密;然後有死囚鄧兆尊撻老竇係局長求情;最經典都係阿漆(星爺)用一百蚊賄賂公安古明華才可甩身。


鄧兆尊句「我咁靚仔」係重點呀﹗

No.12《新精武門1991》——召妓劉晶
劉晶(星爺)初來港,俾瀟灑哥(鍾鎮濤)老點去咗光顧妓女吹瀟萍。嫖客聽完劉晶自我介紹即刻話:「嘩!你急成咁,我讓你先!」睇一次笑一次。


唔知邊個飛篤痰跟住又唔知邊個吞咗落肚係咪呢套?呢套我睇得唔多…唔係好記得…

No.13《西遊記月光寶盒》——菩提老祖
劉鎮偉導演本身就係喜劇好材料,佢演嘅菩提老祖超爆笑。至尊寶(星爺)以為佢偷走葡提子喪鬧:「你偷咗我抽葡提子,仲提我老母?」食字食到盡。


原來我真係唔太記得兩套《西遊記》的劇情﹗我要食慚愧波板糖了(<--活用)﹗我要翻睇先得﹗

No.14《大內密探零零發》——紫禁之巔
古龍筆下四大高手決戰紫禁之巔,俾零零發(星爺)控告非法集會,零零發蛋散前蛋散後,又出靈犀一指,將四大高手侮辱得體無完膚。

究竟有無人可以話我知呢套戲入面啲發明係咪正式拎approval用落去既呢?(我指呢本書)…如果係照抄的話我會好失望啦…同埋我本身唔太like呢套…比較少睇…

No.15《九品芝麻官》——舌戰公公
包龍星(星爺)審理秦蓮(張敏)冤案,俾監場嘅李連英(劉洵)阻撓,於是一輪嘴喪鬧公公:「你周身籮油印,抵你插住碌棍。」將公公激到嘔血。


包龍星被train如何鬧交同阿女麻拎住條鹹魚扮尚方寶劍笑到我爆咀…呢套好似比較冷門啲?但係同《審死官》一樣我都係翻睇又翻睇的…哈

No.16《國產凌凌漆》——蠱惑的槍
「試鎗做乜唔同我講啫!」阿琴(袁詠儀)千方百計暗殺阿漆,兩次從後偷襲都誤傷自己,就係衰喺支梅花間竹向後射完再向前射嘅蠱惑的槍上。


跟住阿琴入廁所同司令匯報,佢問阿琴做乜成身血,阿琴答刷牙流牙血,之後阿漆入廁所時司令即刻變臉由陰險變慈祥都好勁呢﹗呢套真係百看不厭呀﹗(我是後來先知阿漆和聞西兩個名的真締…囧)

No.17《整蠱專家》——跳騎呢舞
如何落Disco而不失霸氣?不妨學吓古晶(星爺)。佢為博靚女Banana(邱淑貞)一笑,上舞池跳出苦練多年嘅沙里洪巴嘿唷嘿民族舞,全場人靜晒。


我太耐無重溫呢套了…完全唔記得有呢一幕喎﹗

No.18《喜劇之王》——甜筒輝
甜筒輝(鄭文輝)港大畢業冇嘢撈,學人行蠱惑,拎住甜筒喺天后廟前收陀地,睇佢臨尾擸兩把菜刀攞尾彩個可憐樣,連基哥(李兆基)都怕咗佢。


我太耐無重溫呢套了…完全唔記得有呢一幕喎﹗

No.19《回魂夜》——道友明
電影最強角色唔係女鬼係道友明(陳永標)。佢充當肉盾身中多刀、被割脈、觸電又中幾槍,但都死唔去,唔怪得話:「好心了結我生命,等我唔使再受苦。」


我懷疑我無睇過《回魂夜》,呢套同《百變星君》都唔太能搭咀…

No.20《喜劇之王》——外賣仔
尹天仇(星爺)做臥底扮送外賣,結果俾黑幫拋窒,有人問佢早餐都可以加底?佢就答:「咁你加兩條腸都得嘅。」貫徹無厘頭風格。


呢一幕真係充滿演技,睇到人勁緊張…囧

No.21《大內密探零零發》——阿發外父
電影末段突然加插頒獎禮,零零發坐定粒六以為穩奪最佳男主角,得主卻原來係阿發外父(潘恒生),致辭嗰陣仲重新演繹踢爆阿發入雞竇嗰段戲。


老婆劉嘉玲發表得獎宣言又係好正﹗

No.22《賭俠》——錄影片段
星仔拍片拜賭神為師,話自己有特異功能,只要將手上隻煙士捽一捽,就變成巢咗嘅煙士,因為未發功喎,結果換嚟陳刀仔一句「發神經」。

好似仲有一開始食公仔麵架喎﹗《賭俠》真係不得不提侯賽因,你睇我唔到同埋龍九的英文名是Kowloon…

No.23《賭聖》——餵飽綺夢
達哥要吳君如扮綺夢嚟刺激星爺恢復特異功能,星爺當正君如格肋底粒痣係綺夢,一時同佢談心,一時幫佢抹汗,仲餵埋佢食龍蝦,口味重到呢。


太耐無睇…都唔記得添…講起龍蝦,諗起《與龍共舞》葉德嫻姨姨的晚裝…哈

No.24《國產凌凌漆》——鬚刨傍身
阿漆「笨」唔係浪得虛名,佢身上嘅大哥大同風筒,實際上係鬚刨嚟;至於鬚刨同對皮鞋只不過係表面掩飾,實際上都係風筒嚟,問你死未。


佢展示完自己的架生,就到阿琴玩槍,跟住阿漆展示佢小李飛刀個刀…呀…實在係太絕妙了…

No.25《賭聖》——三叔
達哥一聽三叔就失控,向身邊人up吓up吓,暗戀達哥嘅盧宛茵春心大動,打出砧板心口色誘對方,最後要低頭謝罪。

我成日攪錯《賭聖》和《逃學威龍》入面達哥的角色…我成日都通通叫做三叔就算…哈

No.26《新精武門1991》——打劫貞操
劉晶拎住張「我要你的處女貞操」紙條打劫銀行,全行得九號窗肥妹(羅雪玲)有,最抵死係肥妹飛出櫃台,將劉晶狠狠推倒。


無乜點睇…唔記得…

No.27《西遊記月光寶盒》——踩細佬
至尊寶成身着火,二當家(吳孟達)見勢色唔對,即時對準佢「弟弟」博命狂踩撲火,如同將多年冤屈氣一鋪同佢算。


有呢一幕咩?真係太耐無睇了…我覺得我好有必要重溫一吓呢兩套…

No.28《賭俠II之上海灘賭聖》——殺死丁力
川島芳子(黃韻詩)命令星仔殺丁力,仲教佢用催眠方式嚟憎恨丁力。只見川島咬牙切齒話「我要殺死丁力呢條仆街」個衰樣,真係好唔開胃。


「我要殺死丁力呢條仆街」呢句係需要睇埋黃韻詩個樣先夠傳神﹗(我諗起時忍唔住偷笑了)講開又講,有一次阿娘開電視見到黃韻詩,叫我出嚟睇…但佢講咗何韻詩…囧

No.29《食神》——夢遺啜毒

星爺意外碌落山,且被荊棘所傷,全身中毒。醒來發現少林寺方丈夢遺大師(劉以達)爬上床,以啜毒為由有所異動,結果俾星爺一腳兜開,結下深仇。


咦…我最記得都係《零零發》劉以達問「大夫~~~我係咪有咗呀?~~~」

No.30《少林足球》——汽車維修員
正職做編劇嘅馮勉恆,扮斯文敗類冇得輸,喺電影演汽車維修員嘅佢,同少林隊踢友賽,跌士巴拿仍不慌不忙,之後仲要黃一飛將底褲笠落頭,賤到出汁。


佢呢句「作為一個汽車維修員,身上面有個士巴拿係好合理既」呢句我日扮的說﹗哈哈哈…

No.31《食神》——十八銅人陣
少林寺十八銅人陣,查實只得十二人,個個搽晒金粉餅,惡形惡相。每當星爺偷走,銅人陣即時築起,前面的作勢耍拳做屏風,後面就用摺凳狂揪星爺。

都話我唔係成日睇架啦…做乜無啦啦會有少林十八銅人?做乜又linkup了摺櫈…我完全唔記得…我又要食慚愧波板糖了…

No.32《國產凌凌漆》——鹹帶療傷
古時有關公捉象棋刮骨療毒,今日有阿漆睇鹹帶鑿骨攞彈頭,仲將全身血液谷埋一處,以免失血過多。有網友居然搵到鹹帶女主角條片,有seed有真相。


《國產》…不是零零咩?原來我一路都打錯戲名…唉呀﹗我又要食慚愧波板糖了…btw…我是因為呢套戲而識《李香蘭》呢首歌的,從此我都不能將佢當作一首正經的歌嚟聽…

No.33《國產凌凌漆》——陀地中伏

李健仁扮女人梗係起晒朵啦!佢扮包租婆可以話係風韻猶存,一幕突然踎底幫阿漆除褲,表明自己係陀地,百五蚊全套喎,即被一腳兜出麗晶賓館。

副3D眼鏡好爆炸,效果強大到不能。而麗晶賓館和麗晶大酒店都係一絕,阿漆那句「SHIT」是多麼的有感情啊﹗

No.34《家有囍事》——反轉鐵塔
星爺同張曼玉學《人鬼情未了》橋段玩陶瓷,睇星爺着條超窄牛仔褲已爆笑,之後兩人喺跳線版《Unchained Melody》下,嚟個巴黎鐵塔反轉再反轉,浪漫到暈。

仲有食手指啊﹗其實當年睇呢《家有喜事》時我是未睇過《人鬼情未了》、《風月俏佳人》、《Terminator》的說,我係咪要多謝周星星令我認識咁多西片?﹗仲有,我一路都期待緊《南拳北腿孫中山》同《醉拳甘乃迪》…最後…我得到一套《吸血鬼獵人林肯》…囧﹗

No.35《唐伯虎點秋香》——敲碟鳴冤
唐伯虎俾仇家華夫人(鄭佩佩)發現身上有《唐寅詩集》,隨即rap出押韻嘅唐伯虎惡行,配合強勁節奏感嘅敲碗敲碟,創作力有如多春魚嘅春一樣咁澎湃。

伯虎(我細個成日以為係伯父…囧)賣身契那句「我為秋香」實在是太爆了﹗

No.36《逃學威龍》——怒掟粉刷

星爺重返校園做臥底,終日魂遊太虛,日日俾苑瓊丹用粉刷侍候。日子有功,星爺練成掟粉刷絕技,片尾用善良的槍掟張耀揚,將其制服。


咦,乜有苑仔架咩?SORRY,第一二集我都太耐無重溫了,我比較多睇第三集《龍過雞年》…哈

No.37《唐伯虎點秋香》——燒雞翼
邊首歌去BBQ一定會唱?答案係「燒雞翼,我鍾意食,但係你老母講你就快釘。」唐伯虎夾埋阿媽(朱咪咪)扮病推辭寧王邀請,情急下唔啱音都照唱。


越係快釘之所以越要整多隻,如果而家唔食以後無機會再食~~~。(你睇我一見到就可以接住嚟唱…可見當年我真係放了幾多心機時間去睇…囧﹗)BBQ指定必唱歌…哈

No.38《回魂夜》——牛眼淚
Leon(星爺)教盧雄等保安搽牛眼淚見鬼,成班烏合之眾拎住支李斯德林猛咁搽,鬼就撞唔到,但發現紅衣索女,眾人摸胸扮check心跳博懵。


我諗呢套我真係無睇過…

No.39《大內密探零零發》——解剖ET
當年解剖外星人大熱,電影也來個解剖天外飛仙,扮成外星人的張達明被谷德昭斬了一刀,登時在解剖床上彈跳,效果極其爆笑。

記得李若彤無啦啦變咗無臉人…那一幕我是極深印象的…姑姑…你做乜攪成咁呀﹗

No.40《唐伯虎點秋香》——人體繪畫
唐伯虎用祝枝山(陳百祥)軀體畫出雄鷹展翅氣吞天下圖,胸前兩點作花、雙掌作樹、屁股作石,仲出動對方子孫根畫出雄鷹——嘴擔住嘅蟲仔咋!


因為呢套戲,我堅覺得阿叻是流FEI的…XD…SORRY…證明電影對兒童心理成長發展真係遺禍好深架﹗

No.41《唐伯虎點秋香》——還原靚靚拳
秋香(鞏俐)中了奪命書生(劉家輝)的面目全非腳,變得奇醜,唐伯虎即時使出失傳嘅還原靚靚拳幫拖,仲意外令秋香多咗個靚靚下巴仔!


劉家輝哥哥﹗伯虎同佢打一輪爭兵器譜上NO.1一幕前返屋企沖涼梳洗…我忍不住笑了…

No.42《賭俠》——焚身以火
星爺用特異功能催眠大軍(程東),令其墮進幻境,穿上大紅袍嘅大軍,忘我演繹一幕焚身以火,造手呀、姿色呀,比《秦俑》入面嘅鞏俐更淒美。

SORRY,我記得大軍呢幕多於成套《秦俑》…哈哈哈…張大導不會反眼吧?

No.43《整蠱專家》——我要努力向上
90年代班後生仔幾有幹勁,好似星爺同華仔咁,無啦啦喺灣仔碼頭高歌「我要努力向上」,西裝友一呼百應,今時今日唔知仲有冇呢支歌仔唱呢?


不枉諸君寄望,我要努力向上,定令全人類都滿心歡暢﹗唏,良朋,情長,良朋相勉勵情誼難忘良朋恩高好比萬丈~~~(後面唔識啦…我又忍唔住唱歌了﹗)…SORRY,真係一見就忍唔住﹗哈

No.44《唐伯虎點秋香》——小強葬身
唐伯虎為求混入華府,同賣身漢(梁榮忠)鬥慘,仲揸住隻死曱甴話:「我當你係親生骨肉咁供書教學!」交足晒戲。小強成為曱甴代名詞。


我就說其實我是梁榮忠劇迷啦…。相比呢一幕驚天地泣鬼神的演出,《九品芝麻官》的吳廣得和李廣先就失色得多了…

No.45《新精武門1991》——口水戰
瀟灑哥(鍾鎮濤)同劉晶(星爺)不打不相識,以小學雞口水戰交手。兩人神色凝重咁擺出架勢,又搵cover做掩護上膛,向黃飛鴻系列同警匪片致敬。


咦…我諗上面我話好核突吞口水一段係呢個喎﹗

No.46《鹿鼎記》——化骨綿掌
海公公(吳孟達)被神龍刺刺中走火入魔,不斷重複韋小寶(星爺)對話同動作。韋小寶見狀即誘對方解化骨綿掌毒,點知海公公話:「解你條啫!」


張敏咁多演出,我最鐘意係佢演的毛東珠/太后…而邱淑貞的建寧公主雖然有啲似BANANA,不過夠主動又進取,活潑可愛我鐘意呀﹗

No.47《賭俠II之上海灘賭聖》——叉燒包
星仔以為如仙(鞏俐)未訂婚,即場唱咗首徐小鳳版《叉燒包》贈興,又拎住籠包掟嚟掟去,周大福(吳孟達)就用痰罐跳士的舞,一片喜氣洋洋。


周星星都幾鐘意唱小鳳姐的歌喎﹗

No.48《大內密探零零發》——無相神功
無相王個仔(袁信義)雖然識移形換影嘅變臉大法,黑白無常輪流轉,但次次俾零零發擊中:「喂大哥,你大對腳喺下邊穿晒崩喎,當我死㗎?」


無相神功係咪即係李若彤?

No.49《功夫》——邪門刀仔
阿漆嘅小李飛刀就叻,但《功夫》入面嘅星爺就好唔掂。佢用飛刀暗殺包租婆(元秋),但反彈掟中自己。輪到肥仔聰試掟又誤中副車,認真慘情。

《功夫》我至愛梗係元華和元秋的《神鵰俠侶》啦﹗仲有那本傳說中的如來神掌…。其實我成日將《少林足球》和《功夫》啲人腳撈亂…講開又講…

No.50《算死草》——股罅藏髀
何歡(葛民輝)被判環首死刑,臨上刑場前,特登將暗藏屁股入面嘅雞髀贈予印度庭警Van Dam。Van Dam見雞髀即放在鼻前使勁一索,色香味俱全。

終於都到最後一個了﹗《算死草》我好似只睇過一次半次…無乜印象…都係鐘意《審死官》多啲呢…周星星同梅姐仲有奶媽朱咪咪都好正…

**************************************************
死啦,我係咁話無睇過唔識,又話太耐無睇要重溫,粉絲失格呀﹗典算﹗﹗﹗﹗﹗

其實我唔係套套都有喪煲,早期的《望夫成龍》、《新精武門》、《咖哩辣椒》(?﹗係張學友同梁朝偉?有無周星星的?)呀都係電視/影台播就睇,無乜印象(也不特別好笑嘛﹗)…之後的《賭X》片、《整蠱專家》、《逃學》系和《家有喜事》先睇完又睇煲完又煲,《賭俠》我試過一個星期借三次帶嚟睇添喎(當年影碟舖興買套票嘛﹗)…哈哈,消晒阿娘啲套票…所以次次呢啲店執笠我地都唔係損失好慘重…

9字中的,比較多睇的係《凌凌漆》(從善如流改番先…)、《唐伯虎》、《審死官》、《九品芝麻官》、《鹿鼎記》,其他的《零零發》、《百變星君》(我諗我真係無睇過《回魂夜》、《破壞之王》,太直抄西片風格了…((其實《百變星君》向占基利取經更甚…)),《算死草》應該睇過一次半次既…),到後期的《食神》、《喜劇之王》,和再之後的《功夫》、《少林足球》就無煲得咁癲了,《長江七號》直頭無睇,反而無露面的《西遊.降魔篇》我又走番入戲院睇…情意結呀﹗

賀年片梗係首推《家有喜事》和另一飛佛《逃學威龍3之龍過雞年》,但《97家有喜事》詭異地我是入戲院睇的(詭異地有吳鎮宇…硬覺得佢係應該做0靚坤唔係自閉漫畫家囉﹗),《行運一條龍》都有睇,其實我不喜鄭天后…睇係為了陳小東啦﹗《千王之王2000》係乜嚟架﹗而我不知道喎﹗睇番維基,《濟公》和《武狀元蘇乞兒》我都應該無睇過的說…

咦…維基仲話有套《西遊.取經篇》構思中﹗咁空虛公子會翻生嗎?或者…有無寂寞公子?或者凍公子?無既話腎虛公子都好吖﹗

我要認真的重新研究一次周星星的電影先得﹗.\ /.

舊文:周星星飛佛五大

10 則留言:

  1. 我比較記得的是星爺同小龜在逃學威龍出貓出到好似騎馬、算死草定審死官同苑仔鬥鬧、賭俠同劉華鬥唔講嘢,同埋西遊記話阿家英哥好似烏蠅咁煩住晒。
    btw,小強係來自男親女愛黃子華隻寵物喎!

    回覆刪除
    回覆
    1. re:brownie

      同苑仔鬥鬧好似係《九品芝麻官》,佢做官做唔掂鬥唔過師爺吳啟明(華?),於是落難時跟苑仔練習鬧交之道,之後再審案時鬧到揮灑自如,勁好笑﹗
      《逃學威龍》出貓我記得達哥定唔知邊個在掉生果…笑爆…
      《賭俠》同《整蠱專家》啲劉華和周星星鬥氣位我好易撈亂的…最記得係《整蠱》的痕粉…同條底底﹗
      羅家英》絕對係《西遊記》的亮點﹗我記得佢啲對白仲多過那條限期係一萬年的感情線﹗

      咦,我睇番youtube,《唐伯虎》入面真係叫小強喎﹗早過黃子華呀﹗
      http://www.youtube.com/watch?v=2JEVUXvjD48

      刪除
    2. 是九品芝麻官!話說我將他的古裝片撈亂晒,因為好似都係電視做望兩眼咁。
      是吳啟華,那些年吳啟明已消失了~
      掉生果咪全差館一齊做中史選擇題?
      賭俠同整蠱我又唔會撈亂,因為劉華太不同了。
      竟然早過黃子華,OMG!!!

      刪除
    3. re:brownie

      我成日都撈亂啲劇情,不過《九品芝麻官》有一水有線成日播,所以咁啱我記得咋﹗
      掉生果…係咪中史呀?我唔記得…
      《賭俠》和《整蠱》達哥和大軍啲戲份我會撈亂的,劉華部份就唔會…
      小強我都係睇番片先記得…我只記得那一段梁榮忠好好笑﹗

      刪除
  2. 話說早前破壞之王飾演黑熊的鄭祖過世了,RIP

    回覆刪除
    回覆
    1. re:WINSON

      噢﹗RIP
      話說,我好似無乜睇《破壞之王》的說…

      刪除
    2. 嚴重肥佬的FANS......凌凌漆的鐵甲飛拳、古惑仔的巴閉也是他

      刪除
    3. re:WINSON

      古惑仔﹗我完全唔記得添…
      好多時我都講唔出個演員名只記得角色名﹗哈哈哈

      刪除
  3. thanks for share........

    回覆刪除
    回覆
    1. re:匿名

      點解一個留言去了三個地方既?

      刪除

要講幾句嗎?﹗XD