2011/09/11

一碗爛的魚生飯~《勁歌金曲3~party king》

呢水睇緊《魚躍在花見》,容許我咁樣形容:此曲就如將壽司店裡現成的刺身食材都放進碗裡,唔理魚的紋路,味道夾唔夾,總之清一色用同一個切法,同一款醬汁撈埋一碗…um…一個字:囧﹗


(真係好耐無試過有一首歌令小的咁想發文一番的說…仲要小的好耐無試過想發文的程度是明明同一日發了一篇都仲要發…)

話說呢首歌party king包括了以下的歌:

  • 跑步機上
  • 衝口而出
  • 側面
  • 頭髮亂了
  • 倒轉地球
  • 失戀
  • 周星呢
  • 打得火熱
  • 酷愛
  • 狂野之城
  • 今夜星光燦爛
  • 這個冬天不太冷
  • 活著 VIVA
  • 極速/非常夏日
  • 火熱動感LaLaLa
  • 熱力節拍WouBomBa
  • 發熱發亮
  • 失憶周末
  • 心急人上/明愛暗戀補習社
  • 886
  • 鐵幕誘惑
  • 又愛又恨
  • 烈女
  • 小心女人/Volar/Take it
  • 獨自去偷歡/光明會
  • 大日子
  • 爆了
  • 眼睛想旅行

啲歌大致上無問題架(除了古sir那兩首囉…),我唔明個選曲想點,一時有啲red hot hits撈埋,woo bum ba完一輪就lalala之後無啦啦tune咗去非常夏日,以為佢玩懷舊野啦,無啦啦又會有新啲既歌如《886》喎﹗《volar》和《烈女》其實算唔算hit歌呢?(佢好miss金記的日子咩?)《take it》真係好神奇…好啦,或者對製作人嚟講呢啲歌都係好野嚟既,有啲就自己唱一段,有啲又幾首combine埋,《心急人上》同《明愛暗戀補習社》都係少女野,擺埋都ok,《光明會》和《獨自去kowloon》想點呀?

啲歌都唔係最勁,最令小的驚嘆不已的是所有歌古sir都給他們賦予一個全新的生命:就是同一個唱腔和同一個編曲,如果我唔識以上既歌名…大概我會以為這首是每段都講啲唔同既野咁…即係以為係同一首歌囉,可以將內容風格南轅北徹的歌炒埋一碟,實在是太神奇了﹗囧﹗

個mv,只能說實在是太有型了~~~~~~~~~~~~~~~~~~~

um,即是說呢,第一次《勁歌金曲》係好有趣既,第二次《情歌王》選了國語歌…但…還可以啦…今次…嘩…可以有多少少heart嗎?當千fa有首《火鳥》重生,李克人又有首感動小的既《天河》,蘇永康都有那誰沒有下次的《那誰》…古sir呢首新作真係…爆了﹗(係我要爆了…)

(究竟眼前呢個古sir係咪我十幾年前鐘意聽那個嚟架?﹗)

要聽番啲正常野平衡吓我心理…囧﹗

其他巨基:
忽然懷舊之~那些年,陪我長大的古怪基
一刻永恆@古巨基《Moments》 27/8/07 (一刻懷念永恆永不變﹗至理名言啊﹗)
敗家實錄vol.1 古巨基 13/06/07
巨基.我生 27/8/06 (一洗之前頹風的全新大碟,當然比之《愛與夢飛行》年代仍差很遠)
買唱片 26/8/06
我的巨基年代 12/2/06
最終幻想 23/11/05 (國語炒雜錦,不過恐怖度絕不及上述的《星戰》)
Thank You My Dear 古巨基 (碟評《星戰》)  24/10/05

18 則留言:

  1. MV也來置入式廣告、由頭不變的編曲(還可以是落名???),當然也及不上那一成不變的唱腔,我不如聽機械人好過。

    又或者古生想表現的是:即使我的歌有多難聽,但我年尾還是會羅無線最佳男歌手,吹咩?我覺得大家最好以後唱K擺點古生的歌泄憤。

    10th Sep 2011 23:04 PM

    回覆刪除
    回覆
    1. 那個佐記太空船真係突兀之最…囧﹗
      咁製作人將唔同曲風、編曲的原曲編成一首一氣呵成(aka:same tone到尾)的歌都要勞心勞力地做既…
      古生咁玩法,我真心覺得林lone更值得拎男歌手喎﹗(以無記內部可以拎獎的人嚟計…)
      唉…聽咗佢咁多年,見到佢無進步不突止,仲要倒退真係好心傷的說…

      16th Sep 2011 09:54 AM

      刪除
  2. 囧......超囧!!!!勁歌金曲part 1時已經有種不知怎樣形容的感覺了,不過那首還算好,這首真的更不知所謂
    自己最愛還是阿Lam的十分十二吋!
    其實90年代有首鼓舞飛揚都ok

    10th Sep 2011 23:12 PM

    回覆刪除
    回覆
    1. part 1始終係第一次做,同埋喺旋律接合上都有啲transit位做過吓野,聽都無聽得咁悶(遙想當年佢喺金記第一次開演唱會我有去紅館睇架﹗)
      到第二次時覺得吓?仲嚟?好好玩嘛…第三次…吓?勁喎﹗完全唔party feel既party king…最勁係將原曲本身的節奏感都殺掉…完全唔會令人聞歌起舞…
      阿lam嚟呢真係聽到人不自覺ununun,《鼓舞飛揚》好似聽過吓?哈…唔記得…搵嚟聽吓先﹗

      16th Sep 2011 09:57 AM

      刪除
  3. 偶像也需要有style地老,”老餅“也有”老餅“的Style吧。。。大概是“age gracefully"吧,像劉華唱十幾年的綠茶歌曲,但也符合他的年紀。“老孫”也算是ok的轉型吧。。。奈何巨基一把年紀還是唱同一樣的歌,好像沒有成熟,也沒有感動觀眾。。。”一個一個偶像 都不外如此 沉迷過的偶像 一個個消失“,自王菲,《開到荼靡》。

    12th Sep 2011 14:30 PM

    回覆刪除
    回覆
    1. 你說AGE GRACEFULLY說得真是很對啊﹗對比差唔多出道的陳醫生,古生就係少了份灑脫,好似很用心很計算地想留住以往的時光…
      劉UNCLE都係近幾年先放低偶像包袱做番佢個年紀的成熟角色吧,但很多男藝人(特別係TBB演員)好似都不願長大,幾廿歲都仲做0靚仔角色…都OK難頂的…囧﹗

      16th Sep 2011 10:14 AM

      刪除
  4. 蘋果妹14/3/12 18:00

    講真﹐我都係由細迷左古sir N年既死硬飯﹐但近呢幾年(特別係去左英X)我真係再頂唔順
    以前見碟就買﹐上次隻國語碟我收手喇﹐買唔落。
    今次我都真的爆了!

    點解再見唔到以前愛與夢既Leo Ku呢?
    真係唔鐘意囉...
    連黎緊既演唱會我都唔知點
    有叫朋友拎飛﹐但朋友問如果拎唔到咁點
    我話"咁無辦法啦"
    以前我一定會去買飛睇﹐而家﹐拎唔到睇下有無人賣
    買唔到...算啦。

    12th Sep 2011 15:44 PM

    回覆刪除
    回覆
    1. 嗚…你好啊﹗大家都是聽了古生n年的歌迷…真係要同哭一聲﹗
      我係從佢第一張碟就開始追,好suprise《娛樂新聞眼》主持仔竟然唱得唔錯喎(加埋有電視劇推波助瀾啦…),那個假音小王子年代真係自然唔造作,《愛與夢飛行》是小的飛佛啊﹗佢都有繼續sell假音,但同時又試吓其他野(前前後後啲碟會有啲rock/快/jazz的曲風…),每次都有驚喜的說…
      就算係《歡樂今宵》hit咗,之後的《天氣會變》都無話翻兜之前成功方程式,其實好可喜架…直至佢摺埋前一隻碟《new pattern》小的都係愛不釋手…
      但據說佢係約滿eei同埋跟公司鬧不和…所以摺前幾隻碟都幾乎係0宣傳…囧﹗
      或者佢經歷無歌唱要返祖國拍劇的日子,難得回流,真係唔想輸,所以選曲極端保守,一見ok就不停repeat,金記初期都ok,去到《星戰》時真係聽到想嘔…想點呀…唉…感覺佢無咗初出道啲自然,好拘緊地扮kidult…um…感覺係越聽就越有「吾不欲觀之」之感…
      其實都已經唔關佢入邊間公司事,而係感覺佢無進步,兼且不停倒退,水準比起拍劇前任何一個時期都比不上…真係好失望…嗚…
      (死啦…我講到咁衰會唔會俾人鬧…=P)

      16th Sep 2011 10:07 AM

      刪除
    2. 蘋果妹14/3/12 18:04

      同感呀~~ > 3 正是天氣會變那期﹐那封面! 企棟棟成盒特厚的那個!)
      當年仲係小學生﹐愛上刑偵第1輯(我都勁love 1~3輯!! 特別係1&2!) 主題曲插曲無一不愛呀
      路邊攤又係超正(日記﹐冬天!!)天氣會變﹐歡樂今宵(唔係最愛呢首歌但成隻碟80%以上掂!!)
      學你話﹐愛與夢飛行是小妹飛佛! 人在外國﹐多年後古生翻生成功過去加國開演唱會﹐我第1隻諗到要簽名既正係愛與夢飛行

      今時今日﹐我覺得真係變晒質﹐真係懶kidult﹐但又要天王格! 我懷念當年一曲歡樂金宵﹐係香港大球場某頒獎典禮第1次獲得最受歡迎男歌手銅獎的古巨基!

      我有時間真係要寫返版blog懷念一下古先生(人家仲在生﹐但當年的鄰家精神已死!)多多交流!!!!

      19th Sep 2011 10:19 AM

      刪除
    3. 《天氣會變》除咗啲歌好聽,好重要係入面送的red wing掛頸繩,當年我邊有錢買red wing,有條繩可以掛吓電話已經好滿足啦,同埋歌詞冊係1999年記事簿,入面有古生啲插畫,好可愛的,雖然係大盒,但從歌到贈品係難得一次令小的無限滿足﹗
      《路邊攤》我記得係放學行過唱片舖見佢擺了喺新貨啲角落度先知出咗碟,除了你說的《冬天》、《日記》,小的仲勁迷《幸福號列車》,張震嶽寫曲,好型﹗最開心係我諗住呢啲side cut實無機會公眾場合唱的時候,古生上《獎門人》玩遊戲時竟然唱了出嚟,即是說佢都記得有呢首歌啦﹗(我好無聊…哈)
      好多時我聽古生啲碟都係因為派台歌而想去買,跟住返嚟聽時就轉而愛上入面的side cut…哈…
      其實佢要kidult玩theme唔緊要,但好多時本末倒置,玩主題玩包裝玩形象,最後啲歌詞和曲都十分行貨,唱又聽得好唔舒服,唔進步唔緊要,但唔好退步囉,好多主打歌都有濃烈的為搶獎而出的感覺,又說,04,05年係撞啱醫生合約時宜而停下來,老實說以那水古生啲歌我實在唔明有幾好聽喎…
      我在過往的碟反感度零零散散地寫過啲失望和傷感…(嗚…)…等你也分享一吓囉~握手~

      21st Sep 2011 14:28 PM

      刪除
  5. 古生呢幾年真係...上腦...唱左咁多爛歌出黎...乜鬼勁歌金曲既作用只係唱k既時候用黎攝時間

    12th Sep 2011 18:26 PM

    回覆刪除
    回覆
    1. 我啲FRIEND好鐘意點佢跟容天后有次搵闊的串燒歌嚟唱…
      不過次次都唱唔晒…唱到中間就無MOOD會STOP咗佢跳去下一首…因為死唔斷氣好煩﹗哈哈哈…

      16th Sep 2011 10:10 AM

      刪除
  6. 呢首其實係咪想正式宣佈 佢巳game over! 大家可以爆了

    14th Sep 2011 15:25 PM

    回覆刪除
    回覆
    1. 睇無記頒獎禮,真有池中無魚蝦自大之感…囧﹗

      16th Sep 2011 10:16 AM

      刪除
  7. 同感!!(路過......)

    20th Sep 2011 15:37 PM

    回覆刪除
    回覆
    1. 真係吾不欲觀之…

      21st Sep 2011 14:31 PM

      刪除
  8. 我都係由細聽古生聽到大呢~
    以前真係好好聽架~ 依家就...

    明明佢在金記臨走前做既用四種不同的樂器做主題的EP都唔錯架~ 點知佢竟然會突然轉會去英記... 那時我就有點想放棄了 (因我勁討厭英記)。其實係咪小兒科都已極度頂唔順...

    佢一轉會嗰隻周升呢真係聽到想打人~
    以為佢有少少變返以前咁,點知又整隻爆了,真係驚喜一浪接一浪啦~

    我覺得佢想吸納多D小朋友粉絲,可惜同時放棄了很多跟佢多年既FANS呢~ (小朋友錢真的易賺D嗎?)

    以兩次CONCERT 都好高興咁去買飛,依家覺得睇都浪費時間呢~ 上次睇TBB勁歌見佢唱這隻PARTY KING,真係滴晒汗~ D歌唔夾就算,但竟然係完全唔啱音呢~ 去到倒轉地球時簡直嚇到我立即轉台呀~~

    28th Sep 2011 18:02 PM

    回覆刪除
    回覆
    1. 自從佢去回流之後就開始唔知佢想點,開始我會諗係咪我太沉醉喺回流前的曲風所以接受唔到佢啲新曲,《愛與誠》、《愛得太遲》我真係覺得好普通好無料到喎…
      就如你所說真係"驚"喜一浪接一浪,本來去到金記最後幾隻fever系列以為佢會集中返喺音樂本身唔去攪無鬼謂的concept後,去到英記唔知點解係咁唱啲唔知做乜又係咁玩concept仲要變本加厲…真係嚇到死…之前金記尾啲碟我都會買吓…英記那幾隻真係頂唔順…
      我又想知…啲小朋友係咪真係會buy佢…
      我為了寫這篇文好認真地睇過成個mv一次架﹗真係嚇到要媽媽鍚番﹗

      29th Sep 2011 13:42 PM

      刪除

要講幾句嗎?﹗XD