2011/08/03

[港劇]終於和《我和殭屍有個約會》有個約會(初篇)

前陣子無啦啦(其實唔無啦啦的)遲人家8年終於看《衝上雲霄》後(但其實只看了一半…),小的終於動工看這套被大家奉上神枱的att大作了﹗

(係,小的一條龍毒又發作了…哈哈哈…但原來十七皇兄有份的是第三輯喎…我而家先煲到第一輯第5集…有排囉…)

話說當年有位同學睇《殭屍》睇到入晒迷,仲勁讚尹天照令仔(當年我的表情:囧),跟住又一日都黑在煲上面的《假如真的有個約會》…well,當年小的係除了金庸和瓊瑤之外,打死都唔睇亞記的(呃…好似仲有睇《縱橫四海》…明智傑和利兆天﹗)嘛…不過首歌真係幾好聽,去k時咪一齊唱「原諒我當天不懂得珍惜 只知任性 壞事情~~~~~~~~~」(不過我懂副歌咋喎…)

well,anyway,原來家陣亞記又重播,雖然家陣大家係熱追《金g》和《尋秦》…咁呢兩套小的睇到識背,就轉轉口味去煲亞記囉…

******************************************
無意中search到呢篇很強大的文《從編劇的角度看《我和殭屍有個約會》》…真係好強大,將每個單元的細節和人物感情都點明晒…係…穿晒橋,但唔拍我miss咗啲重要細節嘛﹗我都遲咗十幾年先睇囉…﹗我而家只睇到第二個故仔:平媽和裁縫平,阿平媽好恐怖呀…黑麻麻勁鬼片feel咁…夜媽媽睇好驚呀…嗚…(OT:細個睇亞記啲香港奇案睇到我發惡夢架﹗)

well,小的雖然怕鬼,不過唔知點解好鐘意睇殭屍related的劇集(注意是劇集,電影我驚的…),《大頭綠衣鬥殭屍》(鄭天后﹗仲要係未變金毛強的少女盧婉茵版喎…我會唔會俾人打?哈哈哈…但鄭天后和錢小豪是演得很動人的啦)和《殭屍福星》(陳小東﹗同埋當年青春可人的小環…)呀咁深深印在小的腦海,中國殭屍唔知點解一定係著清裝,宋元明無殭屍架咩﹗而佢地又一定係著官服,唔會著其他衫架喎﹗典解呢?跟住西方殭屍又一定住古堡,一定係伯爵那些高級level(同中國版一定著官服有得揮﹗但佢死前係咪官呢?咁邊度偷件衫返嚟著?)唔知點解實有個金髮美女(一定要低胸的…我睇得太多《吸血殭屍驚情四百年》了…)俾佢吸血…哈哈哈…(我呢啲問題《吸血新世紀》阿bella都有問過edward仔…)

真係講開又講,睇況天佑我真係諗起《吸血新世紀》,成了殭屍後有了不死身,跟住edward仔同復生一樣重覆不停讀同一個年級,但我想問佢地邊度有證件呢?唔通年年都做張改年份的假證?跟住況天佑(一路睇我一路諗住《烈火雄心》駱天佑…大家都係98年出街架喎…咁啱既?)當差佢點寫自己份resume?又點開mpf(我太認真了?)哈哈哈哈……唔通《吸血新世紀》個作者都有睇亞記呢套大作取經?﹗﹗

呀係,《我和殭屍有個約會》又真係一新殭屍的耳目,殭屍現代點生活啦,跟住又將啲中國古典傳說溶入現代入面,又真係如維基所言又奇幻(馬小玲呢收鬼啲對白和動作真係好鬼《美少女戰士》…sorry…我無睇甚麼《gs美神》…搭唔到嗲…囧﹗不過我想問…捉鬼著迷你裙…唔怕走光嘛?)加恐怖但又有啲感人喎﹗係拍得有啲黑麻麻,啲人成日好似黑口黑面咁,同埋啲道具有啲簡陋,不過個劇情有趣啲人做得好,啲沙石就飛走佢就算啦。

(睇番覺得好攪笑…勁多人而家去咗無記…冼灝英、曾守明((剛剛在《潛行狙擊》第一集俾laughing gor殺死的鄭sir))、杜汶澤((其實佢都係拍過一部《女王辦公室》咁大把啫…))、呂有慧((諗起《摘星之旅》喪悶…))呀咁…好熟口面呀…)

******************************************
第二輯據說係第一輯加強補元版,將第一輯留落嚟的問題解答一番,再加枝節的故事,同期對手係《創世紀》…嘩﹗呢套絕世悶劇呀(雖然深夜重播都風行一時…但小的頂唔順…)…咁當年夜晚我好得閒,應該係晚晚icq掛怕且…不過睇街坊評價,2雖然有強大資源support,又多咗好多強大陣容(任達華、謝君豪、梁榮忠、張慧儀呀咁…),但大家都好似鐘意1既原始味多啲…或者係先入為主掛?

第三輯又據說本來唔係而家拍出嚟個樣,係馬小玲一開始就受傷攪到要大改劇本,但故仔太天馬行空攪到評價不一,不過大眾都prefer第一或第二輯咁…咁又睇吓我頂唔頂得順追晒佢囉…嘻嘻…(見評價說第三輯最雷係…陳百萬富翁首主題曲呀﹗哈哈哈哈…)

其實呢…小的前陣子係有追亞記另一套鉅製《滿清十三皇朝》的…但頂唔順太黑麻麻…我追嚟過去睇咗成個月都仲努爾哈赤緊,皇太極都未出世…哈哈哈﹗《殭屍》應該唔會重蹈掛…暫時好有mood追落去喎﹗

以上。

下一篇:[港劇]終於和《我和殭屍有個約會》有個約會(之2)

14 則留言:

  1. 其實3輯之中,我最喜歡第二輯。因為感情戲寫得最好。
    正如你所言:第一輯就係新鮮感,第三輯就太過天馬行空了。

    3rd Aug 2011 11:19 AM

    回覆刪除
    回覆
    1. 我睇完大眾評語後決定由第一輯開始睇,順住落,睇吓睇完的觀感跟大家的一唔一樣~呵…
      雖然我係最想睇第三輯既…呵呵呵…

      3rd Aug 2011 12:01 PM

      刪除
  2. 3輯之中,我最喜歡反而是第三輯, 雖然天馬行空, 但我覺得個世界觀超勁, 又自圓其說到喎, 好似話嫦娥奔月係因為XXX原因, 睇完有D覺得真係(睇到上腦@@)

    同埋第3輯個結局好搞鬼, 當時來講可以話係超特別, LIKE!

    3rd Aug 2011 18:08 PM

    回覆刪除
    回覆
    1. 天馬行空唔緊要,最緊要係自圓其說到(特別係我呢啲咁鐘意挑骨頭的人…哈哈),而家我睇到第一輯青蛇個單元啦…我幾鐘意佢將啲古典故事套落現代人生活度…套落去又覺得ok唔突兀喎﹗
      所以我對第三輯點樣仲玩得癲啲是頗有期待的~

      4th Aug 2011 09:46 AM

      刪除
  3. 當年我都係"殭屍"既超級飯, 晚晚一路睇一路送飯...(係,我知爛左)佢係個個單元都有d非常感動位, 每個角色就算小配角都有血有肉, 睇到我一殼眼淚!
    可惜"殭3"隔左太耐先出, 殭屍仔張國權係第一輯真係好可愛, "殭3"出返黎個樣都變左"死o靚仔"...

    4th Aug 2011 02:18 AM

    回覆刪除
    回覆
    1. 係喎,啲小角色真係寫得好立體,有血有肉,完全唔會覺得佢地係行行企企食飯兩味,跟住又帶動番主角啲發展呀咁…通常無記啲查案劇啲單元既角色出完就算,唔會影響番啲主角架嘛…
      我lap咗少少第三輯…真係大個咗好多喎﹗童星都幾慘,大家太掛住佢細個個樣,一大個唔得意就無人睇佢了…

      4th Aug 2011 09:48 AM

      刪除
  4. 其實成套講我最鐘意第二輯 (可能太耐冇睇搞亂左)
    因為d 畫面(條龍果d)靚左好多,卡士又勁
    故仔就第一集啦,集中d
    情節呢雖然第二第三變左有d夾硬 (要遷就咁多新人物又要唔可以駁之前果d),但仍然算合理呢樣真係勁
    主題曲第一二輯都好,不過第二輯只係副歌ok,聽講成首歌其實麻麻

    講最雷果樣野...莫過於當年亞記台慶三個主角出去唱第一輯首夢裏是誰,嘩,難聽到呢...

    4th Aug 2011 08:58 AM

    回覆刪除
    回覆
    1. 照計都係第二輯補番第一輯啲沙石位,第一輯啲特技有啲頹…哈…
      亞記道具人力唔夠無記砌,但創意搭夠囉…同埋次次都係阿邊個邊個約滿唔續約,攪到啲角色大兜亂,無咗一氣呵成的感覺…
      嘩…我想睇你話最雷那樣野…哈…亞記台慶我真係一次都無睇過…我係咪要去掃一掃雷?

      4th Aug 2011 09:51 AM

      刪除
  5. 睇完第一部,我會覺得有好多遺憾同失落,亦影響左我既人生價值觀,我覺得係最經典。
    第二部就係最感動之作,由其是金正中果part。第三部就打鬥場面最好...可能是科技進步了吧...劇情方面配角比主角更突出,而且虎頭蛇尾,一開頭的人性表達真係唔錯,但去到中段已經無力...而個結局真係極之創新,基本上冇電視劇既結局會好似佢咁神經質...但接唔接受到又係一個問題,接受到既...會大讚搞鬼,接受唔到既,會狂插佢唔正經...不過點都好,一定令人印象深刻

    6th Aug 2011 04:55 AM

    回覆刪除
    回覆
    1. 影響人生價值觀咁嚴重﹗
      睇完你地講,第一、二輯應該比較易入口,第三輯就天馬行空…得濟,接受既就接受到,唔得既就頂唔順啦呵?
      攪到我好期待想睇第三輯添…我而家睇到第一輯17集咋…仲要努力慢慢追﹗

      10th Aug 2011 11:23 AM

      刪除
  6. 亞視重有套正嘢叫美麗傳說.超強卡士, 有機會睇下, 我由第一集追到尾.

    10th Aug 2011 21:06 PM

    回覆刪除
    回覆
    1. 聽過呢套講選美的…同埋《情陷夜中環》都好爆架喎…
      由頭睇到尾的亞記劇應該要講到《雪花神劍》和《再見艷陽天》了…

      11th Aug 2011 15:20 PM

      刪除
  7. "GS美神", 對對對,馬小玲的造型跟她一個樣。我看畢"GS美神", 但只偶爾看看馬小玲,因爲,eeeeer, 我向來喜歡動漫人物甚於人:P 至於"滿清十三皇朝",我挺喜歡的,那時候,真的加深了我對清朝的瞭解。滿以爲會一直做到清朝末,但.... 無癮。

    3rd Oct 2011 17:26 PM

    回覆刪除
    回覆
    1. 不好…GS美神…搭唔到嗲添…
      唔怪得我硬係覺得馬小玲個郁跟劇入面其他人(起碼同王珍珍)格格不入啦﹗
      《滿清十三皇朝》前陣子有重播過,我睇到努爾哈赤咋﹗(好似皇太極都未出世…)…套野黑麻麻咁…攪到我無乜心機…
      但係咪話無拍到去宣統朝?好似話梁思浩定唔知邊個做同治就摺埋咗啦喎?﹗

      10th Oct 2011 22:57 PM

      刪除

要講幾句嗎?﹗XD