2011/03/24

清影碟的雜碎文

都說我一條龍mode開著咗架啦,先到影碟店掃了一堆新碟,再搵吓櫃入面有乜看的…一個weekend看了差不多4,5部片…哈哈。
 

就來賦文自娛一番~ (我又挑戰零留言紀錄了…XDDDDD)

飛砂》 我肯定是以後在電影台見一次睇一次,睇極都唔厭之選的其中一部…哈哈,睇得我太開心了。片中玩轉《無間道》、《黑社會》(《監獄風雲》?)的點子,玩都唔 緊要,最緊要玩得癲,舊勢力火水哥(方中信)和啤梨姐(余安安)出行力捧火腩(陳小春)和燕子文(鄭伊健)上位,刀光劍影唔多見,反倒是癡癡線線的你有張 良計我有過牆梯,笑爆咀…。跟住殺出較剪偉(陳子聰)得到傳說中的龍尾棍做到真正大佬,但佢係傻架喎﹗而且係人都知佢身邊條0靚劉浩龍係無間道…反智到癲 咗﹗睇得我好開心(不厭其煩講多句~哈)

記得此片上年上畫時同期應該有《志明與春嬌》和《月滿軒尼斯》,好難得我又全部都有入場睇喎﹗即係呢,睇番呢啲滿滿本土情懷的片子好舒服(aka…我頂唔順合拍片那種半天吊的感覺囉…)

雜碎來了:火水哥好搶﹗好少見方中sir(唔係benz雄喎﹗)咁狂爆粗的…哈哈。啤梨姐我覺得佢似仙度拉喎﹗火腩一開始拎入會儀式將雞、油加埋塊葉整嚟食…笑死我﹗阿燕子文話喺獄中識咗個大佬叫費利文…笑爆咀…其實啲配角,葉旋(仲有對仔女蕭玉蕭立,佢地上網msn同燕子文對話一後好好笑)、劉浩龍、藍奕邦都好爆,不得不提我覺得好得的歐錦棠,佢做既銀行經理真係…好正﹗好有畸寶hotline啲唔理你乜問題都係講機械對答既風格…

最後呢,其實睇呢套片至有共鳴既係,上一輩想下一輩走佢地認為既既定路線,但新一代其實有自己諗法,個角力無休無止…咦,我係咪應該俾套戲我娘睇呢?呵。
********************************************************
我想睇《商天鵝》多啲喎﹗有無人拍啫?

其實呢套都應該俾為人父母者睇的,戲中個媽媽保護Nina近乎成癡,睇落都好心寒的,睇住佢廿幾歲人間房仲咁小女孩粉紅色晒咁,唔逼到個女癲就難囉…

呀,呢套戲係未出碟既,不過寫開就順手寫埋咁。

話說友人看完後話好down,於是我就趁看鄭生演唱會之前睇,諗住balance番個mood嘛。睇完之後腦中浮著一個問題:「藝術係咪真係要有咁大犠牲?」係咪一定要咁逼自己埋牆呢…卒之佢用了誘發自己黑暗 面方法嚟逼出邪氣,中間有好多疑幻疑真,一路睇一路諗係幻想定真既呢既場口(我堅以為佢喺化妝間度殺咗個眼中釘的本來…囧﹗)

um, 影片氣氛無疑是一流的,不過有點不以為然就是了。同埋我想問,如果阿媽喺公演前幫個女報了sick leave,阿女又飛身去演出場地,又真係俾佢話演番就演番?﹗跟住仲有5分鐘要出場,佢又真係換得切衫既…連妝都換埋喎?同埋無人幫佢換衫轉妝既?﹗一 個人5分鐘攪掂…我平時出街都唔得啦﹗

well,同期電影,我喜歡《皇上無話兒》多啲,但我唔喜歡個譯名。
********************************************************
我記得鄭生某次喺韓國唔知乜影展度拎了影帝(後按:應該係《第一誡》跟余文樂拎了雙影帝…),我一度以為得獎電影是這套,咪買碟來看囉…典知係第二套喎,買了…咪睇埋。成套戲都十萬個熟口熟面的。

個故仔同《九龍冰室》一樣,漿糊大佬喺泰國坐完監出嚟後想改過自身,退出漿糊搵新攪作,但舊人舊事唔放過佢,卒之引起不少風風雨雨咁…唔同既係…《九》片阿大佬(鄭伊健)出冊後做茶餐廳伙記,《天行者》葉秋(也是鄭伊健…)就係有錢人,開公司上市行善乜乜盛盛的。跟住又係有個少女識咗阿漿糊大佬咁的…不過 《九龍冰室》就簡單啲describe個故仔而已,《天行者》無啦啦又去泰國、澳門、柬埔寨都去埋,葉秋每個手下都好似好有故事個性,個個人都疑似會有條線發展出去,但成個故事就在這種「好似會有啲事發生」的氣氛吓完咗…吓?無啦…

啲人既角色都好熟口熟面的,方中sir(又係佢﹗)演既熱血差人,好似套套幫會片都要有個咁既差人角色,佢又硬係會lead住條team,而team入面又硬係有啲熱血青年人咁…。張智霖個律師角 色好似好會耍手段,都幾似《三岔口》入面鄭伊健個角色,不過佢除了幫葉秋攪吓呢攪吓路之外就無乜料到了,反倒是一開始收個女人十八萬八時型好多…呀,就係呢套個角色撩起我條癮去睇《三岔口》和張智霖啲舊片…

last but not least,鄭生個角色無乜存在感的。其實成套片都好無存在感,好似好想言之有物但出嚟又…umumum…我都係鐘意《九龍冰室》多啲。
********************************************************
check番原來鄭生和余生拎獎既係呢套喎﹗本著一條龍忠粉的精神我煲埋佢﹗一開始我以為係警匪片,跟住一開始余生演既警察俾個變態殺手所傷我先知原來係鬼片(定係應叫懸疑片呢?)

好鐘意片名「第一誡」, 呢句係李國強(余文樂)上司雜務科阿頭黃sir(鄭伊健)((黃sir﹗好《無間道》啊﹗))同佢講既第一句「呢個世上係無鬼的」,詭異的是佢地既係片中世界係有鬼的,於是佢地就要用先似科學的方法令人相信世界係無鬼,甚麼泳池怪聲、隔離屋開我間屋個電視咁, 明明阿強發現靈異所在,但阿頭又硬話無事,問題就係「安心」度,然又後一句智理名言:「唔好想信你眼見的」…嘩…好得喎呢個pt﹗

其實我驚驚地啲血和鬼的,但還是忍不住要睇埋佢…個點子我幾鐘意(原來黃sir日飲夜飲個酒樽入面係水﹗),雖然畫面setting有啲土炮…umum。兩位影帝嘛…余生個角色一味在搵真相…成日都梗埋雙眉咁,反倒不及一日飲酒飲到黑的鄭伊麵搶喎,據說佢為此片增肥(又真係肥咗…),個頭好似十年無洗,成日飲酒食煙,講野無聲無氣hea吓hea吓…爛爛地好o喎﹗(情況又有啲似郭城城的《三岔口》)。想說的是,我終於感覺到佢在做戲了。

(4/2/12後按:原來李蘊妹妹有份演這套的…)
********************************************************

前面《第一誡》說眼看未為真,呢套《有時跳舞》就驗證到,x年前睇時唔知點解我覺得ok,跟住身痕痕搵出嚟睇…嘩…悶到我幾乎乎乎大睡…點解當年我 會覺得幾好睇架?(許太啲英文發音好作狀…哈哈…張生還是很靚仔…驚異地…發現在大澤隆夫…成套片廣東話、國語、日文、英文)咁嚟…好煩…。故仔講因為小島上疑似發生會傳染的疫症,於是要封島,島上幾個互不相干的人就係咁困在一起,感受人生呀咁啦…。um,而家睇番,諗番起沙士時,係別有一番滋味的。

另,原來呢套片係2000年的…轉眼11年…好驚…

um, 再搵一搵啲vcd,張生的片仲有《驚天大逃亡》、《豪情蓋天》(印象告訴我此片是ok的,除了片尾揸貨車由國內偷運軍火回香港有啲攪笑)、《G4特攻》、 《夕陽天使》(定《絕色神偷》呢?印象告訴我兩套都係笑片來的…),仲有我至愛《飛虎雄心之傲氣比天高》﹗還有很多片可以煲喎…
********************************************************
當年見郭城城拎影帝咪走去買嚟睇,但只看了半套,而家我翻看都只睇了半套,印象還是依舊的:我感受唔到郭生的眼淚有幾大威力,我還是喜歡鄭生演的…略帶邪氣的律師,同埋吳生演的殺手…

 (後按:我到而家都未睇番後半集喎﹗而家9月啦﹗)






********************************************************
 呢套也是看了一半,感覺套片很靜,好多留白位,好多要諗的地方,很喜歡片子倒敘手法,第一場之後是一星期前,一個月前,幾個月前…咁,一路睇一路諗 片名《親密》係咩意思?係咪湯少(鄭伊健)和阿佩(林嘉欣)呢?﹗不明所以之時就開始倒敘了,但每一個場口又唔代表會交代番二人(或其他人)的關係喎,要 一路睇一路估的;呢部片唔可以喺戲院睇囉…有必要時要倒一倒帶睇番之前…你知啦…我鐘意一心二用嘛…琴晚睇時我係一路做練習一路睇的…哈哈哈…

睇番網上評論此片毀譽參半,我覺得OK呀…不過係平淡咗少少,有啲支線(如曾志偉個醫生)係咪可以短啲…囧)…我覺得此片影得林嘉欣好有氣質(佢本身就有啦…哈),鄭生個金絲眼鏡好似變態佬…

睇番原來林嘉欣和鄭伊麵合作過好多次:《戀之風景》(印象告訴我這部是好看的…)、《後備甜心》(已買碟去看了…XDDDDD)和《雙雄》(好似曾經喺屋企見過VCD的…)…
********************************************************  
寫完,YEAH~~

仲有一套《辣手回春》瘋狂煲戲日

6 則留言:

  1. 好有品味喎,你揀的大部份都係正戲。

    24th Mar 2011 16:54 PM

    回覆刪除
    回覆
    1. 係嗎?哈哈哈…
      好多時行VCD店會有好多奇怪發現…
      得閒無事拎嚟睇好開心…

      24th Mar 2011 17:30 PM

      刪除
  2. 正在睇緊「飛砂風中轉」,YU ON ON 真係好似仙度拉。
    原來係近年既戲黎架?我以為係好舊既。

    24th Mar 2011 17:40 PM

    回覆刪除
    回覆
    1. 唔舊架,上年上畫的,《飛砂》同《志明與春嬌》都值得睇啊~
      余安安個仙度拉式演出係少少令我不安的…

      24th Mar 2011 17:56 PM

      刪除
  3. 戀之風景係好睇,但男主角係劉燁喎!

    24th Mar 2011 22:57 PM

    回覆刪除
    回覆
    1. 係呀,劉燁同林嘉欣一齊搵番鄭伊健既過去嘛…劇情有少少記得…
      同埋首主題曲好好聽…

      24th Mar 2011 23:04 PM

      刪除

要講幾句嗎?﹗XD