Hocc《Heroes》…我中招了…

上張《喺瘋人院的10日》不太對味(仲要係第一次聽就已經…)，今次這張呢，在演唱會度聽了兩cut就已經迷上了，覺得一定要買了…


(咁樣講何某會唔會好傷心呢？上一張話晒係嘔心瀝血之作喎﹗)
((還是上張碟太孤芳自賞，今次平易近人多了，啱我呢啲simple又naive之徒呢？﹗XDDDD))


再說一些無聊話，從網上見到新碟外貌時真係眼前一亮…但…圓DUMDUM的…我點放呀？﹗(何某人又鐘意出第二版喎﹗)本來一心等平裝的，但…又係那個演唱會…聽過《妮歌》和《冰心》之後莫名喜歡，決定有理無理買咗先了…唱片店只有黑色…嗚

而更揼心的是…神推鬼own…買完碟的第二天我又無啦啦去紅館幫人買紀念品，會場居然有紅色版賣呀﹗點呀而家﹗﹗﹗算啦，黑色型﹗黑色正﹗黑色無得頂﹗yeah﹗(全場我最喜歡紀念品就係呢隻碟﹗哈)

另，那本金剛經…可以用來練的嗎？

01.　舊約/10.　舊約 (青山變奏)

一開始的Instrumental在lalala的好有型﹗演唱會前的第一cut派台歌，其實我無乜聽過…一開始我仲諗《聖經》同超級英雄有乜關係…但其實係食字…舊時的約定呀﹗可以當新歌sidecut咁聽…哈。派台版編曲比較簡單，青山變奏派編曲豐富好多又多埋啲人聲，好眾志城城feel，好鬼團結好有氣勢…小的是比較喜歡青山變奏版囉~

02.　飛簷

其實係咪音樂劇歌曲嚟架？快慢急緩都有，可以想像同堆dancer狂跳狂唱囉，跟住後面有個影扮歌詞中的飛天俠(這個名係我作的…)在一堆高樓大廈的剪影中飛來飛去扮飛簷走壁，成個picture浮晒出嚟啦﹗

03.　惹火

總唔會係講消防員既…(《烈火雄心》﹗﹗﹗等我自行抽水一吓﹗阿佑呀﹗)上一首百老匯feel，估唔到呢首卻係小品中慢版，仲要係溫馨架喎啲歌詞﹗火人(也是我作的這個名)被馴服了，唔周圍亂咁放火，反而係留喺屋企為愛人煎蛋煮野食…好sweet呀﹗救命…(邊聽邊諗起某忠粉推介的《喜歡喜歡你》…唔知點解…)

04.　狂草

是講保育的嗎？一轉眼變咗滿目蒼茫的，唱腔都好有戲啊…狂草人(也是我作的…)是向亂嚟的地球人報復，所以將地方都變成一片草地…加埋discovery channel啲《地球50小時》啲黑白紀錄片可以做mv啦﹗

05.　冰心

想說第2cut Instrumental(應該是《惹火》吧)好鬼70年代遊戲/旅遊節目背景音樂feel﹗聽得人心花怒放的。說回《冰心》這一cut…係唔關作家冰心事的(很爛的gag…)，演唱會上聽一次就很喜歡了，火是熱情冰是冷漠，因為有「親手將愛人變作冰柱」的力量，所以忍痛叫愛人走…很悲傷啊…想愛而不能愛…人間悲劇啊﹗

06.　面書

前兩天先同同事講起睇其他同事的面書有好多野睇，家事情事學業工作私底下乜都寫在tag裡，跟住去邊度玩邊度hea邊度旅行都會upload相片上面書，就算你跟那人不熟，但人家狂update…你想唔知對方的野都唔得囉…

啊…其實小的都好addicted…邊聽…邊覺得阿y話緊我﹗V.V (又扮熟了…呀，此曲的編曲也是很70年代旅遊/遊戲節目feel，很grand的感覺，有趣…)

07.　可可

超喜歡這首﹗對啦，聽得太多呼天搶地攪到個人都頹埋。但太明刀明搶講人生大道理又hardsell嘛，呢首係講古古力人力量只是無聊聊的變古古力，「話我蠢 還是信 神力天生總有用」…天生我才必有用，總有一天會有上場用得著的機會嘛﹗嘩，好勵志呀﹗

呢首可以做演唱會ending萬人大合唱﹗好warm啊﹗

08.　妮歌

個人一廂情願覺得係講梅姐的…。不過而家聽聽吓又覺得未必係特別指一個人…(邊聽邊諗起鄭天后的《加爾各答的天使德蘭修女》)…

演唱會時聽「為你療心傷」聽咗做「為你療傷傷」…囧﹗

09.　金剛經

我初頭以為係武俠小說的金剛經呀﹗唔知係咪《光明會》聽到入晒腦，硬覺得呢首好似無咁好un…雖然啲lalalala還是令人很有衝動跟住唱的…(《光明會》個mv真係跳得好好睇啊﹗)

*****************************************************
其實我有點怕concept碟，攪不好concept行先，夾唔到歌曲旋律之餘啲詞又夾硬嚟(容我quote番最「驚」典的古眼神先生《星戰》…)，今次《Heroes》各方面都好balance吓，真係好唔錯﹗有番當年聽《艷光四射》時的驚喜呢﹗加油加油~~~~(fing啦啦球﹗)

全碟歌詞
*****************************************************
特登走去影碟內小書…係因為…

Hocc整本金剛經，Swing就整本秘笈，而家興練功嘛？

話時話，Swing隻碟都好唔錯，可以寫埋的說﹗呵

文已寫：
新碟雜碎：盧廣仲+王菀之+藍奕邦+薜凱琪+Swing