2006/07/25

講故駁故

琴晚返屋企時行經路口見到個電話亭,因為最近《超人》上映的關係停下來看了一看;細看之下香港的電話亭係無門的﹗咁超人如果係香港打壞人點換衫呢?無門之外,三邊都係透明的,佢換換吓衫可能會比差人捉佢公眾地方行為不檢喎…唔知片中新超人仲係咪要換電話亭換衫?定係好似蛛蛛俠咁隨街扯開件衫就攪掂?

本人睇戲留意劇情之餘,還喜歡留意穿崩、犯駁位;完場人人討論劇情時本人總係度講當中攪笑野,總被朋友拋出一句「講故咪駁故」。唔係喎,有啲位真係好無理由,點相信先?

唔明1:點解認佢唔到

講開超人,除了對佢換衫地點有疑惑外,從小我就想知點解超人唔似蛛蛛俠蝙蝠俠咁包住塊面(除了那蠟起的頭髮和S型的額前的水),個樣無遮無掩,點解無人認出佢既真正身份?(神奇女俠都係),雖然超人平時戴眼鏡,但個樣都唔係爭好遠,有咩理由認佢唔出?呢個疑問我細個睇《美少女戰士》已提出過,學生月野兔和變了身做了戰士之後除了個造型,個樣都係一樣…當然,我又被話「講故咪駁故」了。

唔明2:點解變身攪咁耐
睇美少女或那些《咩咩戰隊》我好唔明點解主角先要變身,而主角又通常都係普通人,相反啲壞人只有少數「埋伏」係常人當中,其餘多數外星人一出場就係怪獸 look,係無變身的需要。而主角變身的pose、變動次次都一樣,集集都播來dum波鐘。主角變身時通常都back住閃電行雷,無理由壞人會sense唔到邊度有人變緊身…


唔明3:等十年先使得出絕招

壞人除了會等主角變身外,仲會企係度等主角使出絕招。看美少女她們使絕招時pose之多effect之多我係壞人就趁佢地擺pose時一野打低佢地,等佢地 擺完pose出招就蚊到瞓。那些《咩咩戰隊》又係,次次五條友唔夠人打或對手忽然變成大怪獸時,佢地就召喚五件機械人出呢再呢個六神合體,呢個合體過程同 變身過程一樣都係等十年先合完和每集都是一樣(好多時個背景會唔連戲),點解壞人又會企係度等佢合體?前世未見過乎?

為咗知道究竟新超人仲係咪係電話亭換衫,我決定呢個星期尾去睇一睇,嘻嘻。

延伸閱讀:
卡通回憶…  23/09/08
龍珠

10 則留言:

  1. 精采的一篇, 寫得好喎~ emoticon

    25th Jul 2006 13:46 PM

    回覆刪除
    回覆
    1. emoticon謝謝~不過這些都係我多年來的疑惑…

      27th Jul 2006 10:55 AM

      刪除
  2. 講到dum波鐘, 最經典應數足球小將吧~
    有中場帶波開始, 到埋門都已經用左一集~
    好喇, 終於等到佢射門喇, 但佢個衝力射球或猛虎射球, 剩係起腳到真係隻腳掂到波個下又用左半集...
    好喇好喇, 終於等到將個波射左出去, 但個波我當佢係禁區頂射, 正常時間唔需要一秒鐘既"波程", 佢夠膽死又要用左半集先去完成...
    細個時, 每次睇足球小將都會俾佢激死...而且每次做完, 我都會少不了噓聲連連...

    25th Jul 2006 20:45 PM

    回覆刪除
    回覆
    1. 足球小將集集都有回憶位,射門或坐車都回憶一餐,少則一節,多則幾集。真係好激氣﹗睇極都未知個射門入唔入﹗emoticon

      不過被足球小將訓練得多,睇無記劇就知邊0的係婆媽位,可以行開去廁所﹗

      27th Jul 2006 10:59 AM

      刪除
  3. 好有同感呀~~其實真係唔少野唔make sense!

    不過都明o既,d美少女集集變身變咁耐,又係用返果d畫面,畫少好多幅,慳返好多人力物力o架!

    足球小將就真係離譜,一場可以踢成半年....

    呀,我係第一次o黎o架,好鍾意你呢度呀,好多懷舊野,你d文筆又搞笑,繼續寫多d啦!


    25th Jul 2006 22:45 PM

    回覆刪除
    回覆
    1. 多謝支持~我會努力繼續發花癲是但up!呵呵

      講開呢個一條片reuse,當年黃日華版射鵰都係,佢每次使出降龍十八掌時都有條片影住郭靖擺pose打掌法。個背景黑色咁邊集都用得,但個問題係郭靖身上套衫唔連戲﹗到結局郭靖出掌時依然係著住初初套衫條片﹗好攪笑﹗

      27th Jul 2006 11:02 AM

      刪除
  4. 一: 一切都是幻覺......

    二同三的問題呢,變身同合體有得合理化架....
    因為我地所見的畫面其實係超慢鏡,實際上主角只係用0.000001秒就完成左所有動作~~~~

    有關"死靚妹越野兔"有一說,佢地變身後會令一般人視覺產生問題,所以會認唔出云云~~~


    25th Jul 2006 22:53 PM

    回覆刪除
    回覆
    1. 一. 咁佢地一定係學咗整蠱專家古晶既絕技:你睇我唔到…你睇我唔到…

      二 & 三. 為咗照顧我等凡夫俗子,就將變身過程放慢咁多倍真係令人好感動呀

      月野兔變身會令人有幻覺一說你講起我好似記起,以前唔知係邊度聽過…好

      27th Jul 2006 13:59 PM

      刪除
  5. 哈哈~我都有咁諗過~!尤甚係"如果我係壞人就趁佢地攞POSE時一野打抵佢地",跟住我仲會諗D壞人會不會等佢地變身或者出招時,等到訓著o左~!又或者D壞人都俾佢地變身時的花巧動作所吸引~!
    仲有呀~!記不記得有套"天才小廚師"味吉陽一呀~!D人肯定不係有網想症就係思覺失調,食野食到會飛上天,仲會覺得自己變O左隻牛呀~魚呀咁~!如果宜家睇返一定會笑死~!

    25th Jul 2006 23:40 PM |

    回覆刪除
    回覆
    1. 味吉陽一0的人嗌好好味呀時一定會有個富士山/火山噴發…哈哈哈哈

      27th Jul 2006 14:01 PM

      刪除

要講幾句嗎?﹗XD