2013/03/29

HKIFF~《狼少年之戀》

雖然去文化中心有啲遠,開場時間又晏,於是睇完都十二點幾,加之於番了成個星期工(但聽講你上星期先放假嚟喎),真係好似俾人毒打完咁攰…囧﹗不過這部戲是值得一看的,也怪不得在泡菜國屢創入場人次新高了…

先謝謝友人上網搶票,讓我等能先睹女林大人精彩演出為快了(看得出是粉絲花癡時間了?XD)
(大雷,小心慎入﹗)

之前一路追開微博大概知道此戲內容,也知道很火熱,配起《善良的男人》令女林大人人氣更更更更更上一(幾廿?)層樓了。出門口看戲前再看了點詳細的劇情介紹,見到有文說此片掀起了寵物情人潮(但明顯係唔關年前同名的一部世紀爛了…),雖然我覺得《狼》是好看的,但它確實和《寵物情人》有若干相似之處:

  • 女一一開始很討厭男一,但又因為各種理由而無奈接收佢
  • 喺相處上女一係處處看男一不順眼,但男一都不會反抗,反而接受女一「教導」
  • 女一漸漸發現男一可愛處,慢慢軟化繼而接受佢
  • 之後男一和女一會有段快樂的相處時光,通常都會有「同床」、疑似KISS和英雄救美
  • 但當SWEET到一定程度時就會因男一身份特殊而要拆散二人
  • 之後總會有啲離別位,大唔大團圓就…DEPENDS啦…
我想話《寵》有金荷娜姐姐替某人沖涼,呢套就有媽媽為哲秀(女林大人)同佢沖涼,而無啦啦說要收留奇怪狼人又幫佢起個名叫哲秀的就係媽媽,戲中媽媽係好可愛的,雖然初初都想掉走呢個不明來歷的狼人…但又於心不忍…同佢沖涼一幕好好笑,哲秀沖沖吓涼瞓著咗喎﹗又話佢堅守住條褲…哈哈哈


少不了的疑似同床和英雄救美,仲有女一總係會被男一/二從高「宅」落嚟既BODY親密鏡頭,不過呢套戲係純愛劇嘛,感情線都係有個纏住女一敵視男一的大奸狗男二,不過主線還是男一和女一慢慢累積出來的感情線,淡淡然的,而且係笑住的累積,一開始會跟住純伊(朴寶英)覺得哲秀好得人驚和討厭(因為純伊有潔癖)((雖然哲秀是女林大人﹗係女林大人呀﹗你唔要我要呀﹗XD)),但哲秀很體貼又是個可愛的乖小孩,媽媽喜歡佢,純伊擔心佢,連阿妹都接受咗佢…呢家人好有愛呢﹗

因為知道呢套係催淚力甚強的,都好驚會哭紅了眼睛唔知點返屋企,但戲前半部都係笑架﹗女林大人大半部戲都沒對白,只靠眼神、表情和肢體語言來表達,但就好傳神的表達了哲秀如何從野孩子被金氏母女「教」成乖小孩,佢啲笑位真係好正,跟純伊的互動好有愛…離別的不捨又好到位。

呀,《寵物情人》都有玩拗波和執波喎﹗

無啦啦彈結他﹗突然諗起《愛情雨》添…不過剛才睇的版本好似無哲秀彈埋一份喎﹗ 


呢個無辜的表情幾可愛…而佢成日伸頭等純伊讚佢乖又真係勁可愛…好鐘意呢啲微細既位去推進部戲的說。

女林大人做得精彩不在話下啦,跟《善良的男人》既復仇男完全唔一樣,特別係啲肢體動作,從野狼到似模似樣的人樣,下的苦功一定好多了(真想伸手拍一拍女林大人的頭說聲做得好呀﹗)朴寶英妹妹是第一次看,呀﹗好.天.然的樣子(淡淡的妝(起碼無粗黑眼線先﹗)看得好舒服…佢本身係好孤癖一類的少女,成日寫啲傷春悲秋的東東自傷自憐咁,但因為遍到哲秀,就拋下那本自作業去睇動物訓練手冊…笑死…

要催淚梗係要悲劇結局啦,去到中後段好幾次都想哭的時候…哲秀一講野我就想笑…哈哈。我係咁讚呢套戲呀呵?﹗其實有啲位都好ODD架,例如一路連字母讀音都講唔出的哲秀無啦啦字正腔圓的叫純伊不要走…笑咗囉…跟住在樹林純伊叫佢走時,佢又無啦啦連環講勁多野…呃…雖然之前純伊係教佢讀書寫字啫…唔係學野學得咁快嘛?真係邊抹眼淚邊笑…好精神分裂。

至於最後的結局,一度以為是女一的夢境…但應該是真的吧?我想話點解可以咁叻阿哲秀學埋讀書既?邊個教佢呀?難道純伊留低成套韓文初中高書喺度?佢又識修理番個結他喎﹗但ANYWAY,呢個47年後的結局還是悲中帶喜的,嗚嗚…呢個MOMENT,友人說不要深究…阿哲秀47年來食乜維生?點解佢個樣唔會老?做乜佢可以DECORATE到個貨倉咁令?

我驚上正場時我會再睇多次﹗嘩哈哈哈哈。

(上面POSTER係台灣譯名…好爆。據說呢套係泡版《吸血新世紀》…咦…狼人係負責除衫…女林大人…有露背和啲褲都幾低腰…佢又要成日MAU低…巧性感啊…((誤焦點…))…呃,我想話大家都係TEENAGE LOVE STORY,《狼之年之戀》我投入到好多喎﹗)

《狼之年之戀》@電影節網頁/維基/豆瓣

1/5/13後按:終於俾我買到隻碟日有加長版添﹗

14 則留言:

  1. Efficient 到你吖!XDD
    真係好睇呀!(我幾驚佢47年後係一隻老狼XD)

    一齊彈結他果度應該係cut左,係買dvd既時候了~組個團先…

    回覆刪除
    回覆
    1. re:火女

      因為太開心啦,好耐無試過睇完一部電影會有睇完演唱會那種hyper的感覺,生怕會唔記得細節,於是勁眼瞓都要寫晒文先肯去瞓…

      47年的老狼…哈哈,就如我細個第一次睇《胭脂扣》時,如花在80年代終於遇番十二少,十二少已經成為一個阿伯(明明十二少係令仔到無朋友的哥哥嘛﹗)…勁shock囉我…我都好驚《狼少年》會再嚟呢一幕…好在變老的是女一(呃…這是甚麼好彩…哈哈哈)

      刪除
  2. 真係超級爆想睇呀!!!!
    但係..但係...但係...
    真係好咁夜呀!!!
    仲要上得2場..
    第2場時間仲夜=口=
    冇機會睇....好希望遲D香港有得上LA..
    不過電影節好似好少會有得上(唔好唔上呀..會好浪費GA!)

    好冇營養的留言..因為我冇睇你內文.

    回覆刪除
    回覆
    1. re:星晴

      不用擔心,因為我篇文都唔係好有營養,都係讚美女林大人做得好啫…
      電影節場次得咁少都無計啦,不過我諗…以仲基的人氣…應該會有機會上正場既,到時我地拉隊去再睇過啦﹗或者去開台灣時咪買隻dvd日煲夜煲,4月26日台灣上市啦﹗﹗﹗﹗﹗﹗

      刪除
    2. 收到你情報,依家知道一定要買喇..好想快D收到呀~
      到依家都唔覺有消息.
      希望可以有啦...
      好想推多D人落坑..

      刪除
    3. RE:星晴

      哈哈,我都係咁叫人去睇加入熱愛女林大聯盟…
      而家未有得翻睇《狼少年》的時候我就去翻睇《攢錢羅曼史》…

      刪除
    4. 攢錢羅曼史

      呢套我未睇,因為我唔知好唔好睇..哈哈
      你得閒都得成均館緋聞.
      真係好睇~

      刪除
    5. re:星晴

      你見我開口埋口都女林就知…我已經睇咗啦﹗~~~~

      刪除
    6. 係WOR..點解我冇留意到GE..
      可能我真係成鬼日都好想人睇XD

      刪除
    7. re:星晴

      哈哈哈﹗我是很明白的﹗《成均館》真的相當不賴,不過係我睇完無同你地爭佳郎,switch咗去女林哥哥度之嘛﹗~~~
      (上年睇得好兇,今年就慢下來了…要瞓番多啲覺呀﹗)

      刪除
  3. 我搵咗朋友幫我買台版啦~ 如果唔係上正場個陣我都會再去睇.

    我好想抱仲基番去養, 拍下佢個頭讚下佢呀!

    回覆刪除
    回覆
    1. re:紫熊

      我地成堆人努力推動台灣經濟…
      我諗上正場我會去歡樂早場一番,可以盡情地喊…唔使偷偷飲泣(XD)
      仲基真係好勁,DESPITE佢既娃娃臉,要邪惡有邪惡,要可愛有可愛,完全突破咗佢外型既限制…

      刪除
  4. 不過剛才睇的版本好似無哲秀彈埋一份喎﹗ (我估呢個係導演終極加長版先有!!)
    早知我今晚就睇導演終極加長版唔睇戲院上映版~
    少左呢PART SWEET野~~
    咁即係要我再睇多次.好LA.趕完PAPER再睇

    回覆刪除
    回覆
    1. re:星晴

      我看的版本都無呀﹗不過我覺得如果有講伊純教過哲秀彈結他,咁後尾佢識修理就合理啲(我還在堅持合唔合理呢個問題﹗哈哈哈)
      去戲院睇完之後我無上網搵番嚟睇啦,留番等隻dvd來到屋企先再回味可愛的哲秀~~~哈哈

      刪除

要講幾句嗎?﹗XD