2012/02/23

[日劇]很《魔王》的…《オルトロスの犬》(雙頭犬)

原來已經係09年的劇(感覺好遙遠…時日如飛…),一路都想睇但又唔知點解一路都的唔起心肝睇。前陣子(或者係好前的陣子)電視台播過?見有博友提起就諗番起,看起上來相當不賴,雖然感覺好似《魔王》,仲令我即刻想翻睇《魔王》一次耶﹗

 《雙頭犬》的setting是:擁有能救人一命的神之手的惡魔龍崎臣司(瀧澤秀明) vs 內心善良但能殺人於無形惡魔之手的碧井涼介(錦戶亮)

《魔王》的設定是:一心報復但表面是天使律師的成瀨領(大野智) vs 年少時曾疑似刀傷同學的熱血刑警芹澤直人(生田斗真)

個正邪設定和演的人(先輩後輩)都是一樣的﹗﹗﹗﹗嘻嘻,我是比較精嘛,最鐘意比比比一番的,而且兩劇事隔只係一年,同樣是TBS拍喎,差唔多咁既野唔驚先入為主嘛?oh…先說,小的看《魔王》是睇得很如癡如醉的,暫時《雙頭犬》只看到第4集,龍崎的大計尚未入正題,佢都仲係昆緊碧井老師入局,但暫時氣氖很緊湊,感覺滿不錯的說…search一search,原來網上很多看後報告都那兩劇來比…原來覺得似的人唔止我…

um…又說其實我沒怎樣看過阿瀧澤的戲(《義經》和《魔女之條件》也如是…好似仲有套甚麼《西洋》甚麼《果子》甚麼甚麼?),雖然我是知道有呢個人很久既…(想當年佢係吹得最勁的 木村接班人嘛﹗同埋年年睇《johnny's countdown》都見タッキー&翼走出嚟又唱又跳…呀…n年前首《The world will never forget》好好聽的﹗) …咦…這套可能係佢出道n咁多年我才第一次睇的劇喎﹗唱歌還好地地,佢對白把聲唔知點解沉得嚟有啲機械人feel,正經八八地講人生道理時禁不住想笑…

見到錦戶亮和水川麻美即刻諗起《last friends》,跟住諗起麻生同學(自從《一公升眼淚》之後小的都係咁稱呼dv男…哈哈),據說因為佢老哥喺《流星の絆》演出生鬼所以喺《雙頭犬》演善良老師備受注目云云(n年前在forum睇到阿dv男又真係好多毒舌攪笑語錄的…)…um…講番套劇,佢做老師好似太年青?點解佢同個學生拍埋我唔覺佢大得過個女仔好多…anyway,個角色係好善良所以好痛恨自己點解有掂一掂人就殺到人的邪惡力量,同時佢想幫人於是被龍崎利用,內心好痛苦的說咁話,唔知呢…啲表情我覺得佢都係木木地…又或者未到中段仲舖緊掛,於是碧井係不停被龍崎牽住鼻子走而完全無對決的味道。(其實《魔王》直人都被成瀨牽足大半套劇的…好慘啊﹗)

水川麻美嘛,我想問點解刑警就係不停咁跑?但查案又唔見佢案得出啲乜喎﹗佢個角色跟《魔王》的詩織妹妹一樣就係夾喺兩個男角中間走來走去…但建樹…詩織妹妹都仲話可以睇牌解謎,阿長谷部刑警嘛…呃…(佢喺《last friends》勁搭枱feel…呢套好少少…)

演長谷川個friend吉住正人(忍成修吾)又有演《魔王》,仲要係勁賴皮攪屎棍那一種,然而在《雙頭犬》度so far佢都仲係正人君子…但我又禁不住諗佢會唔會後尾都係奸既呢?

um,邊睇呢…我仲想問…走犯喎﹗點解龍崎仲可以大模斯樣走嚟走去?無人捉佢既?佢又可以神出鬼沒喎﹗這比成瀨的計準時間殺人更神奇﹗然後個監獄佢話走就走喎﹗然後佢被困住10年,出到去無適應不良?(定係有無講我聽?)…10年前後啲手機都差好遠啦﹗(同埋點解佢就咁拎咗白川部手機,點叉電?)

 講講吓會加埋政治家、藥物開發公司阿頭點利用龍崎,跟住龍崎又要報復,主線副線好似都比《魔王》的成瀨向直人報復豐富(但豐富又唔代表好既…)…同埋,據說呢套個結局唔似《魔王》咁死晒咁慘(我自己穿自己橋了…)…um,小的是滿有期待的說…

神奇大發現:日版《原來是美男》的勇氣君在此劇登場﹗佢個印水紙花紙feel紋身好好笑﹗哈哈哈… 難怪博友說很難將此二角linkup為一人了… Hey! Say! JUMP甚麼的我都是睇完劇去維基先知…(順手執舊文時update了一番)…難怪09年時其實睇了第一集一次…但完全唔aware佢出現過囉﹗(要跟平成年代的年青人接軌一吓才行了…)

抓圖時見到的雜誌內文…對照的意味,還影得滿有意境的說。

好,繼續煲。

(原來呢套跟《buzzer beat》係同一季,據聞不錯…係咪應該挑吓?睇番原來《魔王》跟山p的《code blue》打對台的…點解次次都係山p既?)

((謎之聲:其實我唔鐘意睇黑暗劇…但又一套一套咁睇喎…呃﹗))

1/3/12後按:看完9集了,睇睇吓其實又不太《魔王》了,中段開始拆解雙頭犬二人身世之謎同埋點樣同澤村對決(是拉埋個神話和瀧谷村傳說嚟講,中間又突然殺出二人的爸爸喎﹗),長谷部依然廢(龍崎在大結局尤如串佢咁話終於親眼見到你立功,真係太好了…我忍不住就笑了)。 不過整體還滿緊湊,最好就係結局係好既結局啦~

***********************************************
 info / 官網
網海上的文: 這個 / 這個/ 這個

18 則留言:

  1. 這套雙頭犬我都有追,不過不失啦,我只為睇兩男XD
    buzzer beat嘛,其實我有少少頂唔順,想玩Long Vacation feel但又唔夠LV嚟,山P ok但自己實在唔係咁鍾意北川

    回覆刪除
    回覆
    1. 可能先入為主,雖然《雙》都不賴(so far)…但都係鐘意《魔王》多啲…

      北川好似唔太得人心喎﹗咦…你講佢玩lv唔夠lv嚟我即刻勁有興趣添﹗(掃雷小組出動﹗)…我十萬個鐘意lv架…睇吓佢點扮法都好﹗哈哈哈

      刪除
    2. 可能我先入為主好鍾意lv,可能兩位主角又未夠班,劇情又有啲拖,真係覺得麻麻,我唯一鍾意就係佢首主題曲XD
      留意吓啲景,啲場地,啲拍攝角度嗰啲,係幾lv架!
      有人鍾意,可能因為難得近幾年來比較純情的一套??

      刪除
    3. 頭先搭車時睇了第一集,男女主角都失意,love makes me strong個billboard,屋企望到藍球場,男女主角一齊打波…真係幾似﹗

      同埋男主角都係24歲﹗(我果然是比較精﹗哈哈哈﹗)

      豐哥套《流星》都好純呀,那套彩妹好突破的說。呢套要再睇一吓先下定論,第一集覺得普通啦,唔係超好睇又唔係勁難睇咁…

      刪除
    4. o, o, 我都好鍾意流星架,好純而且氣氛做得好好,加埋配樂好正,阿彩妹真係做得好好,一直都麻麻佢但呢套真係好掂(唯一就係,成日諗套劇入面咁凍都可以著住條短褲,唔凍架咩XD)

      刪除
    5. 係呀,有少少意外,因為睇劇情介紹阿豐哥就有個病重的妹,彩妹就有個攪事連連的阿哥,好似好悲劇FEEL(AKA韓劇),但抱著睇豐哥的心情去睇,點知睇吓一集睇吓又一集,好難得係近年睇得晒而又鐘意的豐哥劇…

      彩妹啲劇我好少睇,只記得佢係…收視毒藥…囧﹗呢套佢真係好突破啊﹗個短褲郁又真係幾耐寒…或者佢諗住自己唔多喺室外所以可以著得少啲掛…XDDDDD

      刪除
  2. 原來呢套跟《buzzer beat》係同一季,據聞不錯…係咪應該挑吓?> 你話buzzer beat?可以skip啦.北川d戲都仲要好過山P,你話啦.不過你都係會掃雷的了.我都係睇完先見到有人話係LV09版.完全link up唔到囉.睇黎我d association skills真係好差.

    我依然卡住係第2集呀... 要係tab都睇錄漏左嘅個d,但部tab會攞黎打機嘛.呃....

    回覆刪除
    回覆
    1. 聽完你地咁講我更想去掃雷啊…哈哈…傳說中的lv09版嘛…我啲association skill通常都係linkup啲人家唔會linkup到既野…攪到我好期待添…

      還好《雙頭犬》得9集(據說dv男病倒所以cut集數),好快煲完…又說,我當年播時睇完第1集感覺不錯的,但唔知點解無動力再睇落去,攤到而家無啦啦好神心再睇番,睇劇有時要timing…(拎住tab等如我拎住部手機…都係想打機的…哈)

      刪除
    2. 阿DV男哩部戲裡面好病樣!!!完全係晚晚蒲死左先laan去開工嘅款囉.

      刪除
    3. 聽聞dv男、山p和赤西仁係蒲友嚟,可能真係玩天光先去開工的說…

      刪除
    4. 當年拍雙頭犬和Buzzer Beat時, 山P 和小亮同時被醫生證實患上當時令人聞風喪膽
      的A型流感, 還擔心會否是H1N1, 一度要停工在家隔離. 當時媒體都有廣泛報道

      刪除
    5. 謝提供!你講起就記番起09年係豬流感。。。有睇到報紙報導,真係時日如飛(又唔怪得錦戶亮個樣咁攰。。。)

      刪除
  3. 當年我有追呢套戲,主要係睇瀧澤同個劇情,so far都ok.
    瀧澤外表真係KEEP得唔錯,而做老師既DV男..就唔太精神,劇情都算緊湊.
    同埋我發現左點解水川麻美成日配J家D人(特別係DV男...)
    因為水川睇落係高既女仔,但實際上唔算高,配上瀧澤,
    DV男同堂本剛,令到各男生睇落無咁唔高(純粹個人認DXXXX)

    另外,其實我覺得BUZZER BEAT係好睇的,當然論演技阿兩位主角都唔夠配角好睇.
    特別係相武同貫地谷明顯比北川好...
    當時公司同事都追幾角關係個條線,仲要話某些同事喜歡よよぎ~~~(XD)
    套戲最唔好既地方係...講藍球講得少...同埋尾D劇情分配差D咁...

    回覆刪除
    回覆
    1. 係喎,瀧澤個樣真係keep得幾好,反觀dv男個樣真係好未瞓醒(有說係佢捱兩個組合加埋上節目和拍劇而捱殘了…)

      水川又真係成日配j+人喎,但配親佢地水川個角色總係行行企企食飯兩味,無乜發揮咁…

      buzzer beat我剛看了第一集,睇你咁講咪好似無記劇咁一開似係咁講劇集主題,跟住男女角要談情說愛所以慢慢偏離了﹗oh﹗其實…山p唔突別扮cool/chop都ok既…雖然我覺得佢成日木口木面的說…呢套要再觀察…哈哈…

      刪除
    2. Buzzer Beat最搶戲係相武個壞女人角色

      刪除
    3. 又食煙又一夜情,同佢以前啲乖巧小巴女生角色真係相差好遠!

      刪除
    4. http://vicky_chau03.mysinablog.com/26/2/12 01:04

      瀧澤同學是我中學時期的偶像~
      不過果時我只係睇左「魔女之條件」、「蛋糕上的草莓」等等

      呢套我就無睇過...等我清左d韓劇就睇~~~
      瀧澤而家好少日劇la,,好似專注係舞台劇度,仲做埋導演tim~
      buzzer beat我幾中意架~山p愈睇愈靚仔,雖然角色好懦弱~
      北川好靚...d衫仲靚~

      刪除
    5. 好奇怪我又無乜中瀧澤毒…但有留意佢…因為佢成日俾蛇果報吹佢係木村接班人嘛…佢啲劇我都無睇過﹗=P…(反而佢啲歌睇J+ COUNTDOWN時有留意…)…

      佢同光一王子一樣都係專注舞台劇啦…嗚…光一自從《壽司王子》後都無拍過劇了…

      山P其實我都OK鐘意睇佢…但佢啲演技好似沒怎麼樣…(於是我專投了去佢個FR生田斗真度…XDDD)…《BUZZER BEAT》睇咗第一集感覺都OK既(雖然又未至於好鐘意)…清咗《雙頭犬》之後再睇落去…

      3月張某人《愛情雨》上檔了…好期待﹗(趁而家清咗啲日劇佢先…)

      刪除

要講幾句嗎?﹗XD