2011/07/07

[港劇](隨波逐流寫)《金枝慾孽》

原來近期無記重播《金枝》,見博/樸友們講到不亦樂乎,小的亦來差一腳呃吓文。話說,如果要數近10年tbb劇的5套飛佛,呢部都數一數二的了…(謎之聲…咁另外4套應該係邊4套呢…篤…)

喜愛的原因,應該係以下幾樣:

1. 造型和場景是認真的,舊文成日講無記清裝劇hea的時候可以很hea,男既就唔剃頭,女既就著平底鞋(清宮妃嬪要著花盆底架喎﹗),而且那個永遠係一幅畫扮紫禁城的廠景也讓人很納悶…丫,呢套劇女仔既衣服、髮型都夠仔細(雖然係無黑色六角型的大舊頭飾的…),而且到北京故宮和橫店取景,加分﹗看倌們明白嘛,次次港劇拍落雪時見到啲發泡膠粒粒蓋著翠綠的樹木時…感覺是讓人更納悶的…

2. 講宮廷/家族鬥爭劇tbb都不知拍過幾多千百部,公式永遠離不開有件超級無敵奸鬼和一個忠角爾虞我詐咁,重點係那個奸鬼永遠係超奸,而忠的又超忠。咁《金枝》的劇本難得地係好平衡,超級奸角是有的,不過每個角色都有血有肉,忠有時奸有時,最緊要係背後有合理原因去解釋嘛,呢吓先會睇得有共鳴架﹗(也讓我覺得像在看辦公室古裝片版…)

3. 好喜歡劇本的舖排,幾個小主入宮時係夏天,簡約衣飾加淡掃蛾眉,隨住佢地加入宮廷爭寵,地位慢慢提升,天氣亦漸漸由秋天進入冬天,在結局一場殺戮(講得太誇張了…哈)前,個個都著晒冬裝和化濃妝,好配合故仔個悲劇進向。成套劇個timeframe唔長,應該一年都無,但就從天氣和衣飾由白入暗,好難得的意境﹗囧﹗

4.有說這部是港版《大長金》(呢套沒看過…),又說是女版《雍正皇朝》(oh﹗港版唔係應該係《鐵血保鏢》咩?﹗)…其實個格局應該似《大奧》或《女系家族》,陳秀珠的皇后係勁有春日局那套《大奧》入面高島禮子的阿江與夫人(唔知有無記錯個名)既影子…一行出嚟已經好鎮住個場的說…點都好啦,好睇就得,難得的是劇情張力很強,個個角色不能話佢完全衰,又不是完全好,只是嘆息連連,係啦,係餘韻。重點係…唔突兀…無記好興為了製造高潮無啦啦要呢個死那個癱,9唔搭8的。Anyway。可惜的是,之後又故態復萌了,《金》帶起女人鬥爭劇,一連幾部《火舞黃瓜》、《胭脂水粉》、《珠光寶氣》、《掌上明珠》、《銀樓金粉》、《宮心計》,大部份都回復過往家族劇的mode,為奸而奸,為鬥而鬥,為嘈而嘈,好煩。

*****************************************************
講吓人物:(注意有勁多劇透呀吓﹗)

如妃(鄧萃雯)
我回帶,如妃係我心目中的視后,就算係唔俾佢,俾蛇視后(親生女丫﹗)都無理由俾講野抖晒大氣的黎視后吧﹗

Anyway,如妃個角色強在上佢可以同皇后抗衡,下佢可以mon住後浪,睇通大局,仲得閒幫皇上生番一兒半女鞏固自己地位。得寵時氣勢凌人,失寵時也不失氣度,沉住氣(有臥薪嚐膽既feel﹗)靜待機會上番位,呢吓沉住氣真係要學野學野。最記得佢雪地中抱住斷咗氣既女傷心欲絕,但同時又勁理智的抱住個女見皇上,一來不枉女兒枉死(如果我無記錯應該係皇后攪事令個女病咗都無人好好照顧…),二來抓住機會翻身,一石二鳥,咪話唔勁,啲心計係高章過《宮心計》那些好多呢…(同時又令我諗起睇史書說武則天同樣用自己個女條屍去皇上面前喊苦喊忽博同情上位,不過唔同既係如妃個女係俾人害死,但武則天呢…野史說佢係自己親手殺咗個女的說…)

角色寫佢既氣勢和睿智寫得好又演得好,同皇后唇槍舌劍勁好睇,同班小主相比真係無得比。

玉瑩(黎姿)
我回帶:黎視后啲抖氣聲和瞪眼真係…呃﹗

玉瑩個角色話佢阿娘喺班大小老婆度唔得寵,於是佢為了出人頭地同阿娘爭啖氣就誓要入宮飛上枝頭變鳳凰咁,一開始因為佢外型太搶眼,為免人家會當佢係假想敵,於是就扮晒天真可愛咁,又同爾淳扮晒好姊妹咁,後尾被踢爆就露出真面目…同爾淳反大面咁…。我想話呢,中段黃德ben演既小祿子幫佢梳既甚麼飛星逐月頭(差唔多咁既名啦,唔exactly記得了…)有啲恐怖…一舊二舊叉出嚟咁…又難得皇后會buy喎…

Ot了…言歸正傳,玉瑩呢頭要爭寵,嗰頭又manipulate(真係manipulate…)孫白颺既感情,係相當乞人憎的說。不過現實中又總係有啲人唔心足…既要馬兒好又要馬兒不吃草吧…。佢離譜到將孫經手既bb當係龍種,最終玩出火被人活生生燒死(如果我無記錯好似係皇后下令封屋燒鬼死佢兩個的)…um,幾個女角,我覺得佢係至唔值得同情,難為孫白颺要陪佢被燒死呢…

爾淳(佘詩曼)
爾淳係徐萬田train出嚟入宮為妃,幫自己鞏固地位既工具,好記得佢知道徐萬田瓜咗後那個眼神好似在講「咁我為乜咁辛苦呀?」呀…比起玉瑩成日bilibala鬧人怒啤,我鐘意蛇視后呢個角色,總係憂怨好無奈咁,想置身事外但又唔得,又睇住自己暗戀的孫白颺同玉瑩越走越埋…oh,好慘。特別係一場佢一心叫玉瑩去暢音閣想整鬼佢,點知孫白颺救咗佢,自己跌到反而無人理…oh,又是一個好慘…。最後暴民殺入宮中得佢一個走得甩,真係心中暗喜,本來皇宮就唔係佢既世界嘛…。傳說,話爾淳結尾係有咗龍胎,劇播完就有傳說話開續集會由佢呢個bb大個咗再入宮爭過…嘩,好彩無啫…唔好畫蛇添足啦﹗

講完爾淳就要講埋演佢家姐的福雅(梁琤),印象中我最記得《黑貓》佢咬住把刀潛入水的(但我無睇過呢套戲喎﹗),跟住入電視台又唔覺佢演好多動作野,《烈火雄心》、《雷霆第一關》和《金》佢都係做啲柔弱既女仔,仲要三部有兩部都要死…嗚…福雅原來又係鐘意孫白颺,仲因為咁寧願背棄徐萬田攪到被打進冷宮,不過佢又樂得清靜,偶然識到爾淳先知佢係失散咗既妹,但又為咗唔想佢難做而唔表明大家關係,最後好似係了行了斷(好似係﹗)等孔武可以帶爾淳出宮…嗚…好慘啊…

安茜(張可頤)
安茜係小的睇得最有並鳴的角色,要在宮中做小宮人,既要小心處事又要小心講多一句講少一句,處事圓滑但漓得濟又反惹主子唔高興喎,佢教宮女句句都係做人處世金句呢…。見佢咁難得逢凶化吉(最慘俾皇后fake佢要和公公對食…慘到無朋友…),有孔武做知心好友(仲有小祿子暗戀佢添…),仲以為佢可以喺夠年數出宮返鄉下後跟孔武一齊啦,典知俾皇后睇中佢聰明才智,出古惑留佢喺度幫玉瑩單挑爾淳,最後仲挑撥佢為報仇而自己走去獻身做埋貴人…oh﹗被逼上梁山呢﹗

安茜最好睇都係做宮女那段,後尾佢做咗貴人就有啲行行企企食飯兩味,等閒話同呢個聯手對付那個,跟住攪唔掂就要由東山再起的如妃幫佢手…oh…又說,都係如妃先鬥得過皇后呢﹗

孝和睿皇后(陳秀珠)
成篇文我係咁講皇后乜皇后物﹗係,其實我覺得成套劇能夠和妃妃爭一日之長短既就只有皇后,如果視后位要留呢套劇既女角,配角應該俾皇后喎﹗(真的假的﹗看維基說當年女配角係如妃?唔係我最喜愛的女角咩?)即係呢,佢出場唔多,但次次出口/手快狠準,唔狼死都唔做,好攝場…不過就無乜描編幅講佢既背景或內心世界,作用只係襯托其他角啦…

**********************************************************
寫到停唔到手﹗好野…打完﹗~

等我再諗吓先,5套飛佛應該係:
尋秦記》、《洛神》、《烈火雄心2》、《金枝慾孽》和《鐵血保鏢》﹗(謎之聲:仲有《洪武三十二》啊﹗XDDDD)

唔好意思,我啲選擇係偏門咗少少的…哈哈哈…

另一篇:[港劇]最喜愛的回顧~3~古裝片(非武俠劇類)
一篇都係講呢套劇的文:一部描繪後宮鬥爭的港劇~金枝慾孽

12 則留言:

  1. 除左《金枝》,《尋秦記》都係朝早重播
    不過次次睇都會笑到碌地XD...
    其實本身都買左《金枝》DVD(正版個盒好靚)
    但都會追重播,唔知點解睇電視總係緊張D同投入D,可能因為冇得Fast Forward
    話說首播時我只有9歲人仔,但為左知個結局我境然自掏腰包買左本《TVB週刊》,可見當時《金枝》既魅力有幾勁!
    雖然我要下個禮拜先返香港放暑假,會miss左頭幾集,不過呢個暑假星期一至五都有宣萱同張可頤陪真係大滿足=)
    (星期六都有張可頤,呢排佢既出鏡率奇高的說)
    唔好意思,個cm長左少少....

    6th Jul 2011 18:22 PM

    回覆刪除
    回覆
    1. 嘩﹗你好重本呀﹗我買嚟買去無記劇都係vcd咋﹗
      睇電視一集一集睇好吊癮但好緊張,同煲碟感覺唔一樣既,不過始終要返工,夜晚睇到咁夜第二朝一定唔使旨意準時起到身,所以我無煲午夜重播劇好耐啦﹗(記得中學時晚晚睇《人在邊緣》不知幾開心,我記得仲睇過《擸鷹》…)
      無線收費台那邊之前先做過我們的張可頤,可能見那邊播完呢邊又播吓…
      你鐘意張可頤和宣萱的嗎?咁睇埋《難兄難弟》和《天地男兒》先得囉…
      我唔介意大家comment長架~多多指教丫嘛﹗(你睇《金枝》時先9歲…好細個呀…)

      7th Jul 2011 15:45 PM

      刪除
    2. 因為我平時住係外國,所以都係Yesasia到買碟,我通常都係等到佢半價先買,如果唔係我都唔捨得咁敗家...
      《難兄難弟》和《天地男兒》我都好鍾意睇!
      基本上張可頤既劇我都睇過哂;而宣萱個D就選擇性咁睇
      不過係《天地男兒》我都係鍾意葉曉冰多D,我覺得阿雪真係超級唔爭氣,睇到我好“蚊”!!
      我覺得就演枝上張可頤更勝一疇,但宣萱性格就比較可愛和有觀眾緣 =)
      正因為我年紀小,但又鍾意D年過四十既演員(e.g. 張可頤、宣萱、溫兆倫、王喜、古生etc)所以成日比D Friend笑我其實係出生於80年代,然後坐時光機來現代!囧

      7th Jul 2011 22:39 PM

      刪除
    3. 我有位年紀跟你差不多的90後表弟都係勁鐘意舊野…同我勁有話題…
      80年代好多野我印象模糊了,好多都係90年代補元番的,跟住那水開始有vcd同埋阿媽唔管得咁嚴可以俾我睇夜晚重播劇,睇睇埋埋好多舊劇(所以讀書就…囧﹗),成日俾人問:你究竟幾多歲架﹗哈哈哈﹗
      《天地男兒》阿雪真係幾煩,宣萱我最鐘意佢喺《壹號皇庭》入面的阿sam,爽朗活潑,跟michael襯合都不行,所以睇《掌上明珠》好大原因係有齊佢二人(雖然個結局…表哥啊﹗我睇到眼濕濕的說…)…張可頤喺《天地男兒》度有少少茄喎﹗同古天樂一樣都係行行企企食飯兩味,葉曉冰連感情線都唔多條,阿康起碼都有份同張智霖(唔記得佢角色名…羅??)爭吓蓉蓉丫…另…我都係睇《天地男兒》先第一次見到未起又一城的城市大學…(當然是看重播,which is我讀咗城大之後…)…睇到嘩嘩聲﹗
      哈,你啲藝人preference跟我都幾似,我勁熱愛古生、王喜的…溫兆倫停留喺《我本善良》、《今生無悔》個年代,佢後期的《流金歲月》無睇呀…
      我都唔係套套劇買碟,除非超級無敵熱愛,否則都係上網睇就算…就算我身處香港,都好少晚晚追的(除了《洪武三十二》囉…哈),邊有咁得閒呀…多數都係之後聽word of mouth,有興趣的就上網睇番…=)

      8th Jul 2011 09:44 AM

      刪除
    4. haha,我同你一樣大,又係好鍾意張可頤~
      其實我翻睇左好多次...都係因為佢~
      我覺得佢演技真係超掂,喜劇正劇都做得掂,而家新一代o既花旦拍馬都追唔到~
      唔知佢仲會唔會幫tvb拍劇呢?我見佢仲係好fit呀,演技又冇生疏到~佢舊年頒獎禮殺左入5強我勁開心~

      13th Jul 2011 18:53 PM

      刪除
    5. re:Yuki

      你們都很年輕啊…(老人家泣奔…)
      張可頤初初出道時我麻麻地鐘意佢的(佢那一年港姐我勁熱愛譚小環的…),去到《九五至尊》、《烈火2》和《金枝》有啲轉變…《九》雖然有我很劉華的江華哥哥,但阿呂四娘真係好好笑…
      新一代的花旦無乜幾多個可以專注演戲,要不去唱歌,要不狂出商場show,邊有得好好演戲呢…
      張可頤剛剛同黎耀祥拍咗《鑑證》…唔知今年會唔會出呢?

      14th Jul 2011 17:25 PM

      刪除
  2. *印象中《尋秦記》已重播了兩次
    不過次次睇都會笑到碌地XD...

    6th Jul 2011 18:24 PM

    回覆刪除
    回覆
    1. 我買咗碟嚟欣賞,次次睇都笑到收唔到聲…睇我好開心的說…
      同埋首主題曲係難得一首我覺得古生唱得可以一聽的歌…
      (謎之聲:王喜有少少客串…驚喜呢…)

      7th Jul 2011 15:47 PM

      刪除
  3. 金枝真係好經典, 當年做audit忙到披星戴月都要留意下, 否則搭唔到訕好out...話說那時剛巧全女班做SM, 大家都覺得呢套劇太似辦公室古裝版, 就把部門裡面的人配上角色, 真係好有親切感...最記得那時我們叫有個SM跟班的manager做寶禪...那時都有人想match我做安茜, 我當然立刻轉移視線match去另一個senior一D ge同事, 然後辯說自己只是小宮女啦, 一入宮門深似海呀...

    6th Jul 2011 22:13 PM

    回覆刪除
    回覆
    1. 寶禪真係處處有喎﹗
      當年我記得星期六定日播大結局的,跟住我和友人去澳門玩,食完晚飯係飛的返酒店睇大結局,好難得會有套真正大hit的劇我係有份追的(通常大hit的我唔睇,而我狂追的又唔多hit…哈哈哈﹗)
      安茜唔好,佢太明顯地做俾人睇「我很圓滑」啦,再收一點鋒芒先得,始終佢身處既係皇宮喎﹗平時我等既辦公室有時太醒都唔好啦(又諗起楊修了﹗),有需要時要扮吓蠢既…
      我做小宮女白蘭得囉~企喺一邊睇吓戲…有需要時做吓跑腿咁…哈哈…

      7th Jul 2011 15:51 PM

      刪除
  4. 點都好過花家姐呢d爛劇...

    8th Jul 2011 13:02 PM

    回覆刪除
    回覆
    1. 嘩﹗《花家姐》明顯係一套老翻失敗的劇啦﹗

      9th Jul 2011 22:16 PM

      刪除

要講幾句嗎?﹗XD