2011/03/16

Young and Dangerous~《古惑仔》

唔好意思,小的一條龍癲咗咁煲症又發作了,看完南哥的演唱會…回家就在看《蜀山奇俠》,之後失驚無神又想回顧吓呢個《古勒仔》系列…(典解會無咗第一集隻碟架?﹗囧﹗) ((個英文名好有型﹗))

有人說呢啲黑社會片教壞細路,小的從x年前劉華叔叔的江湖片(但我最喜歡的唔係《天若有情》或者《旺角卡門》,係《龍在江湖》﹗)煲到伊麵哥哥的《古勒仔》,到而家還是個好孩子呀…哈哈哈哈﹗

um,其實小的從來無煲過原著漫畫的(竟然還有個網站﹗) ,會留意這部片…原因係…係…係…係…登登登登:

係咪好勁呢﹗我仲有儲住當年既剪報架﹗就話說無記當年拍敏感而替古生推了這片,小的咁八掛就梗係要睇吓有乜咁特別啦…(文中說的《天地男兒》,主角根本係adam鄭、張至型和羅家良,古生根本是超級無敵二打六吧﹗)噢…(只是一轉眼就去拍《男燒衣》和超爆的《龍虎砵蘭街》了…)

如果我無記錯,《古》片第一集(其實是每一集如是)係睇vcd的,仲要驚俾娘發現睇埋晒啲打打殺殺片而驚餐飽地躲在房裡插住headphone喺電腦睇的(話說小的當年情迷里安納度哥哥,睇佢套《心之全蝕》時又係驚餐死地睇…驚俾娘發現呀﹗三級片來的…都說我是乖小孩,做壞事怕會被發現的…)…第一個印象係…怎麼南哥唔係伊麵哥哥真聲﹗呢吓佢做乜學劉華叔叔呀﹗

啦啦啦,雖然我覺得人物有型,但小的可是分得很清劇情和現實的,打打殺殺睇吓就算,唔會走去學囉就係。

又如果我無記錯啲劇情,頭三集應該係講南哥點樣從散仔升上渣fit人,跟住第四第五集就開始搵戲嚟做,又去日本又去台灣打大佬咁,好無聊(跟住又好似《真情》咁明明死咗既人又翻生,仲要一模一樣樣咁…好娘…)。雖說頭三集好睇啲(起碼叫有劇情),但都離不開南哥因為被蔣生(萬子哥﹗)睇得起而被人眼紅加以陷害,跟住佢又次次中招,之後各路兄弟就出嚟幫佢東山再起,睇現兄弟之情既可貴咁,都好公式吓的。中間穿插吓啲兒女私情咁,睇番好攪笑,片中出現的女士收山既收山,閃人既閃人,好像只莫karen和舒淇仲拍緊戲,oh。另,啲刀光劍影其實都幾好笑,有乜理由幾廿人喺馬交大橋度砍幾個人都可以失手俾人家走甩呢(雖然有人係中伏的…),離晒譜的(同埋典解揸刀既佢地?無錢買槍咩?)…


又忍唔住貼一貼,幅圖嚟自第三集,本來講到兒女私情佔戲最多既細細粒和南哥,細細粒俾奸人所害要死了,南哥睇住愛人死嚟眼前好傷心的,加埋back住《甘心替代你》(好聽啊﹗)本來成件事好傷感的…但我諗個貨倉太熱…南哥甩紋身喎﹗弄得我又喊又笑的睇到…

呀,真係講開又講,呢個系列啲歌真係得﹗無論係江湖味的《友情歲月》或《戰無不勝》,還是情深款款《甘心替代你》咁,真係好得吓﹗雖然呢個江湖人物角色令鄭生形象或多或少受損(前老細說政府公益事都不會考慮佢做代言的說…) ,不過紅戲又紅歌…世事總係有得又有失既…

講咗咁耐,雖然說幾套《古勒仔》小的都愛看(仲係一見電視做就忍唔住坐低睇系列來的),不過小的最愛過是這部《九龍冰室》,um,拍完一堆歌功頌德的古勒仔片,用這樣一部寫實、悲情的來作結,也不失為一個好結尾呀。

(後按:看完博友留言((鮮奶那邊))發現了《天行者》,個formula都係《九龍冰室》那種想回頭但原來回頭太難,都幾ok的﹗當然,後《古惑仔》的古惑仔片,最好睇當然都係《飛砂風中轉》了﹗嘩哈哈﹗)

另一篇:鄭E面(+我最喜愛的十首)

4 則留言:

  1. 忘了是古惑仔四定五,有幕講南哥追住個貎似細細粒的女人而入捷運跳閘無買票,為此遭到台灣禁播囧

    16th Mar 2011 00:39 AM

    回覆刪除
    回覆
    1. 係唔知第四定第五集,就如《真情》咁明明死咗既角色都照翻生…好老土…
      禁播呢吓真係唔知喎…謝謝告知﹗台灣都好似好迷呢種江湖片的說…

      16th Mar 2011 13:28 PM

      刪除
  2. 作結尾的應該是飛砂風中轉

    17th Mar 2011 11:56 AM

    回覆刪除
    回覆
    1. 係喎,都忘了這部添…我仲未買番隻碟嚟睇~
      不過我覺得《飛》好黑色幽默,攪怪既多,跟《古》系或《九龍冰室》唔同feel的說…

      17th Mar 2011 12:11 PM

      刪除

要講幾句嗎?﹗XD