Life as a 2 hit 6: MJ RIP

2009/06/27

MJ RIP

其實我只有一張大神的精選碟，不太認識佢啲歌的說。這首《Man in the mirror》係小的飛佛(貫徹sidecut精風格？﹗)~

片段內的歌迷都癲了~邊喊邊唱邊叫的。置身現場睇氣氛一定很正(不過逼死了…)，可惜大神都來不切開復出演唱會就離開了。

基於我爹娘都唔聽英文歌的，於是大神最火的80年代本人只係知有呢個人而唔知佢有乜歌，記得小時候唔知邊個整蠱我…話MJ即係香港版張國榮…馬丹娜即係香港版梅艷芳…哈哈哈…咁都得？(但小時候本人係唔知西洋藝能圈為何物嘛…)…睇吓啲人名…而家只剩下娜姐一個了…

琴晚聽收音機，說大神90年代去台灣開演唱會時行唱片店，見到郭城城的《鐵幕誘惑》唱片，望到個封面咁似自己既…仲買咗隻添﹗﹗﹗當年本人對大神名曲略知一二，不過英文太爛唔知佢唱乜(同一原因大學前本人都無乜聽英文歌的…)…印象更深的是一浪又一浪的負面新聞… (講開又講，本人另一飛佛古天樂先生初出道時profile也說偶像是大神…這叫…隔空認識嗎？)

去到05年某次行過影碟店見播緊大神的MV看得入迷了。…應該是《Thriller》吧？那個月夜人狼跟女友去睇戲的故仔…歌我是完全沒印象…但就入神的由頭睇到尾…那根本是部電影吧﹗咪話，我企喺條街度睇都有啲驚(喪屍回魂啊﹗)…同首歌個名真係勁match的說…。就係咁買咗隻MV集返屋企睇…睇完再買多隻演唱會，嘆為觀止不在話下，發現(嚴重後知後覺…)原來郭城城和堂本光一很多舞姿都啟發自大神喎…(其實還有杜德偉的…)

記得考 IELTS前一晚剛好看了肥豬台一個講大神夢幻樂園的節目，第二天去考時ORAL的題目竟然叫我講一個剛看過的電視節目﹗巧妙到呢…如果係平時煲煲埋的電視劇試問我怎樣翻譯俾外國人考官聽呀？啦啦啦，講大神就妙了，我在bilibala講Neverland點勁點勁，我懷疑個考官係大神的歌迷，竟然也 bilibala的答了幾句。感謝大神，小的會考和高考都未試過英文oral咁高分架﹗

本來頗期待大神嚟緊的演唱會…點知…。是是非非甚麼也好，希望大神去到另一個世界可以快快樂樂吧。