2007/08/17

工作經驗…

看來人力市場市況真的很不俗,「人」如輪轉。究竟現在是還有沒有人講「工作經驗」?仲要係以整數年做單位架喎﹗

話說…

朋友告訴我佢「又」轉工,若這份工她會(能)做到年尾的話,新東家是她今年她效力的第三個老細了。轉個頭問起本人近況,得知本人剛做滿了兩年,msn另一端傳來一句「好勁」,其實,有咩咁勁?

她遲我一年埋葬於社會大學,打工總數已比我多。究竟係邊個勁啲?﹗

家母常將「唔好郁啲轉工」 掛在口邊(她覺得本人是會衝動劈炮的一類?﹗),說某親友畢業後兜兜轉轉,終於到三十歲打後才能安定下來,然而因為和本科無關,之前的「經驗」派不上場亦不被老板看在眼內,只是要從頭做起。

能做到「唔好郁啲轉工」,先要了解自己興趣、能力和目標($$$$~)吧。大學tutor講的,都是叫我們盡量在學生生涯的最後三年找出自己所長,不致花太多時間尋覓傳說中的一份「dream job」;找到就努力做。前老細曾說過,幾個月的所謂「經驗」他都不放在眼內,幾個月做得啲咩?過了試用也不代表甚麼,最多只是從最外圍的庶務工作進而深入少少吧…

也許,做生不如做熟這一套可能已落伍了。

八掛人家的轉工原因,不外乎公司遠(咁又去in,又接受人家offer…umum)、人工低(同上)、工時長(再長都誇唔過我最長紀錄掛…)、無野學(好多野都係相對既…)。也許家陣市況真的很好,公司內部升不到職加不到薪,就算過塘來整肥(相信呢款肥無人抗拒…)自己。實在現在的僱主係咪真係唔care面試者以前工作經驗多(數量而言)但唔長(年期而言)呢?

錢,我想要(有邊個唔想丫﹗);title,唔想勁啲就呃你既(係咪先﹗);但我怕不停轉環境轉同事轉任務轉轉轉轉轉…

怎麼弄得我窩在吾司兩年就變怪物咁呢?怪乎。

28 則留言:

  1. 我覺得要問O下點解唔好郁D轉工先?
    轉工成功係雙向的
    都要有實力先可以轉呀

    老細話幾個月經驗不算甚麼
    其實有好多人做幾年野又如何?
    咪又係十年如一日無進步

    所以時間長短只係其中一個參數吧

    17th Aug 2007 12:45 PM

    回覆刪除
    回覆
    1. 呢個係我成日諗既一個迷思…

      初來報道人家當然唔會俾重要既任務新人,咁個新人可能覺得學唔到野而想走,但唔做耐啲舊人點敢交托呢?﹗
      的確好多好多野係相向…

      家母話唔好郁啲轉工,係話唔好一時意氣,做得唔開心就轉…人家出錢請自己係做野,唔係逗我笑嘛…

      17th Aug 2007 12:50 PM

      刪除
  2. 同意你講呀, 我又係怕又要適應又要煩囉, 做落無咩咪做囉, 過過下都過左好耐囉(相對於而家d人)

    其實僱主當然介意, 我去請人時都會介意佢做唔做得長, 大佬, 我花咁多時間screen人, 請左你番黎, 教得識你自己做野都半年後啦, 你話走? 咁我咪又要重頭教過???

    轉得多工的朋友, 每次都會比人問佢做咩份份工都咁快走...
    份份都唔過一年都幾驚...半年都唔過, 你咁樣得黎幾份, 下次除左散工都無人敢請你...

    17th Aug 2007 13:26 PM

    回覆刪除
    回覆
    1. 係呀,我一來怕煩(好怕又要重頭記過晒啲routine野和同事名)。我覺得只要份工有野學(呢個字好似好自己好fresh咁…),唔係坐係度hea原地踏步既,留喺度繼續做都無問題丫…
      太無聊的話當然走都走唔切啦…
      話實我都好怕要不停train人,同一段對白幾個月內重複講,有時會上次講咗今次唔記得講,亂籠﹗
      若果做sales既我諗行內較接受轉呢轉去,文職人員轉得太多就好似你咁講,會令人疑惑係咪applicant有問題所以成日轉囉…

      20th Aug 2007 09:31 AM

      刪除
  3. 我覺得如果請人個d 都係睇履歷同面試表現. 咁份份工都做唔長, 個履歷真係唔靚架喎. 我第一個直角, 就係呢個人應該點都有d 問題. 咁對面試好不利. 雖說話係同一間公司做得耐未必代表工作表現一定好好, 但如果有兩個應徵者, 面試差唔多, 我會寧願請唔會成日轉個個.

    17th Aug 2007 16:20 PM

    回覆刪除
    回覆
    1. 我都係咁諗,我諗除了sales,文職的轉得太快一來同一份工得不到太多實際經驗,二來老闆都怕請咗返呢轉頭就走…
      請個人返呢唔只要train,又要攪mpf又要乜又要盛,轉個頭就走都幾煩…

      20th Aug 2007 09:58 AM

      刪除
  4. 俗語有話...貴精不貴多...符堅有80萬大軍又點...咪又係比人草木皆兵ko左(請參閱淝水之戰)...
    識既野多唔一定有用...正如你學齊八國會話...但瓣瓣半桶水...你估有邊個搵佢做翻譯...
    計我話...魚唔過堂唔肥係啱...但只係用喺同行之間嘅跳槽...若果連瓣數都轉埋...啲野就要重新學過...重新上手

    17th Aug 2007 16:59 PM

    回覆刪除
    回覆
    1. 草木皆兵呢單野我識喎﹗哈哈…
      我就係唔想不停重頭學過,一時間之前識的技能無晒用咁。所以我好配服人家做咗野一段時間仲有勇氣轉去啲風馬牛不相干的行業…
      話實,唔好講八國語言,有些人三文兩語都未攪得掂…撞鬼…

      21st Aug 2007 12:22 PM

      刪除
  5. 有一種人通常負責interview果個一見到,總會覺得非請不可,然後返工頭幾個月又會個個讚正,然後就算走,人地都會話,你走咗下個一定給比下去喇!

    呢款,真係會走得好密。而且係公司入面嘅powerhouse,因為坐唔定,又好多嘢睇唔慣,所以會出聲提改善點子,而開明老細會受。但係快變老油條眼中釘,所以一輪改革後又好有危機感咁自己執包袱。

    咁樣轉工嘅,我會鍾意請。同埋,睇下每一份工係咪越轉越好。

    試過以前請馬,可以由抄股轉行去做編輯跟住坐唔定話去想教書,差咁遠的話,當然三思。

    17th Aug 2007 17:08 PM

    回覆刪除
    回覆
    1. 我諗睇咩post啦,開荒牛和守業者,同埋公司文化囉,有啲公司規矩係咁就咁,唔改得架嘛…唔係俾啲老油條插死的說…有啲又可以隨你鐘意…umum…

      我都有親戚失驚無神去教書,仲教得鬼咁enjoy,算係搵到條啱自己的路掛。咁樣轉法要好大勇氣,同埋opportunity cost大,有時都幾佩服佢地夠膽話轉就轉。最驚係三分鐘熱度,才剛轉完又話轉…暈…

      21st Aug 2007 12:28 PM

      刪除
  6. 都係個句囉, 想轉同轉得成係2回事.

    當有3年10次轉工QUOTA
    用晒之後,你得到咩呢?
    人工一定升, 同一行入面你識O既人多O左,有唔同公司的經驗

    拎住呢D野可唔可以換多D QUOTA, 就要睇個人喇, 所以無話好定唔好

    反轉諗,一個人做一份工做得長, 到話想轉時, 我一樣可以QUERY佢係咪有問題, 唔夠料轉工, 個人不思進取, 見識又少, 思考和做事模式亦固定下來, 佢想轉工可能只係上一間公司迫佢resign,佢要搵一個水泡

    17th Aug 2007 17:18 PM

    回覆刪除
    回覆
    1. 時差之回覆:

      睇到呢篇特別感概,寫的時候做了兩年…而家…哈哈哈﹗
      終於都要走,百般滋味在心頭…

      刪除
  7. aulina:係啊.
    我有少少唔同, 未必係做改革者, 但係唔介意做開荒牛、帶新人, 藉此換取管理經驗. 到一年半載, 負責的工作上了軌道, 便會開始搵另一個新機會.

    17th Aug 2007 17:24 PM

    回覆刪除
    回覆
    1. 我和你剛好相反,我諗我係守業者,或做後面support的~哈

      21st Aug 2007 12:30 PM

      刪除
  8. 你好!這篇Blog已經被我們選為精選文章! 請繼續寫更多好Blog和我們分享!

    MySinaBlog 分類精選 - 生活


    17th Aug 2007 18:47 PM

    回覆刪除
    回覆
    1. 時差之回覆:

      鮮奶當年上精選有通知架喎原來…

      刪除
  9. 近日都有不小朋友話轉工, 但係好似個境唔係想像咁好囉...

    17th Aug 2007 19:21 PM

    回覆刪除
    回覆
    1. 新人成日轉,俾人感覺好多心咁,始終覺得唔太好…

      21st Aug 2007 12:30 PM

      刪除
  10. 好市時轉工轉得密也是正常現象...d 老板亦唔覺轉得密係咩問題嘛~
    不過唔好市時有張咁既cv就衰d...

    17th Aug 2007 23:55 PM

    回覆刪除
    回覆
    1. 一好市,啲人走得快,老細急住請人有時都唔理得個applicant係咪成日走…但求佢正正常常快快手返工就得的了…

      21st Aug 2007 12:32 PM

      刪除
  11. 其實,成日轉工對自己唔係太好的。cv問題反而係其次,成日走去唔同地方見工好辛苦的。而且,重新適應新GE工作環境都好煩的。
    工作能夠配合自己想要的生活就滿足了。

    18th Aug 2007 11:01 AM

    回覆刪除
    回覆
    1. 我都覺一份工要做番咁上下日子,對工作既範疇了解先得深入,同事亦要咁上下時間觀察個新人係咪可以勝任更重要的任務的說…
      生活逼人,好多人打工都係為$$,前途反而放在後面了…

      21st Aug 2007 12:35 PM

      刪除
  12. 係香港黎講,一份工做一年或以上是合理的,不算太短了.

    19th Aug 2007 04:27 AM

    回覆刪除
    回覆
    1. 喺好多公司一年已算係長…
      所以本人先會成日被問幾時轉工…

      21st Aug 2007 12:36 PM

      刪除
  13. 好多時轉工係因為人工低、無得升、遠、工時長……
    雖然話呢D野一早知,點解當初都肯做。
    但人要down to earth,
    為左上述原因而久久唔做野,
    餓死都無人可憐。
    自然求其抓到份工就做,然後「擇木而棲」。

    而且,幾個月的經驗d老闆睇唔上眼,
    咁幾年的經驗,又唔見得d老闆覺得珍貴。
    如果一個唔該轉工種,
    花幾年時間老闆都唔會理。
    所以好多人不斷轉工係因為唔知自己想做什麼工。

    所以,雖說成日轉工唔係值得驕傲,
    但都唔係上一輩眼中咁差。
    有d野,係時代造成的。

    19th Aug 2007 19:28 PM

    回覆刪除
    回覆
    1. 回lesia :

      所以見人最怕請著啲騎牛搵馬的,始終train一個人要時間心機,要走唔該早出聲囉我覺得…

      心頭高係應該既,人望高處水往低流,不過也不可以太急功近利

      21st Aug 2007 12:39 PM

      刪除
  14. sevensky

    我唔小心睇到你個blog,我想同你講世界日日變,唔需要理人地點睇!社會價值更加唔需要放在心內!
    我三十七歲人,從U出離做野開始,我從CV一張紙、寫到現在三張紙(九份工),老闆知我肯做,所以每份工都戰跡輝煌,跟著就打完齊唔要和尚.....我最長個份工三年!有時我真係覺得幾傷心!有時我又安慰自已每次都會有人再請我!...上一份工老闆拆股、分家黨派政治...現在半年了!只好努力搵工!.....生活就係甘!好多野控制唔到!

    27th Jun 2008 13:59 PM

    回覆刪除
    回覆
    1. 多謝你留言啦,多多指教
      唔覺唔覺呢篇文都寫咗差唔多一年,其實呢一年(特別係08呢半年)發生咗好多事,令我對工作又好多想法,經常左右腦交戰…
      說到底,只要工作能賺到足夠我生活既錢,又可以俾我發揮所長,現實和理想都滿足到就夠架啦,不過呢啲條件都唔容易滿足呀呵…
      唉…我又在腦交戰了…

      28th Jun 2008 20:52 PM

      刪除

要講幾句嗎?﹗XD