[日劇]攪怪劇之《虎與龍》

陰錯陽差，偶然看到關於這劇的簡介，衝著編劇宮藤官九郎的大名，衝著久仰大名但其實未看過的《池袋西口公園》和《木更津貓眼》，衝著仍未睇厭的長瀨智也(對，我仲未睇厭)，縱然對「落語」無所知還是一鼓作氣衝進去。實在是個精彩的世界啊…

劇情說因為家人欠債自殺成孤兒後從未笑過的山崎虎兒/小虎(長瀨智也)，得黑幫流星會組長(他的角色…確係叫組長…哈哈)收養並順理成章成為黑幫份子，帶著既是少爺又係小弟的銀次郎(塚本高史)到處討債。某次到落語家林屋亭どん兵衛（谷中正吉）處討債(為何要去討債是個重要劇情，一定要留意~)，意外看了他的落語演出竟然笑了出來，於是決心拜入門下，不過虎兒全無落語天份，本著虎兒的誠意どん兵衛收他入門，條件是虎兒每學一個段子就交十萬元學費，師父就用這筆錢還債。虎兒偶遇成為設計師而放棄繼承父親的落語天才谷中龍二/小龍(岡田准一)，因為落語和神奇惠美(伊東美咲)—一個同時令五個男人為她在身上 紋M字蘋果紋身的美女導遊，慢慢成為朋友，亦即係劇名的《虎與龍》。

首先貼一貼何謂「落語」：(資料來自雅虎知識)

"落語"是中國的單口相聲，不過在中國純是個人間的消遣，雜耍場上不曾聽說過有此一項賣技，它為士大夫所不恥，復不見著錄。日本"落語"其初原只是說笑話，供一座的娛樂，及後乃有人在路旁設肆賣藝，又轉而定期登台，於是演者非一人，故事亦漸冗長。日本落語家有三游亭與柳家二派，周作人曾見柳家小官昇高座，儼然如村塾師，徐徐陳說，如講《論語》，而聽者忍俊不禁。也有更為"花梢"的，這就是黃公度《日本國志》卷三十六《禮俗志三》所記：說話人（落語家之通稱）"手必弄扇，忽笑忽泣，或歌或醉，張手流目，膝扭腰，為女子樣，學傖荒語，假聲寫形，虛怪作勢，於人情世態，靡不曲盡，其歇語必使人捧腹絕倒，故曰落語"。 日本關根默庵著《江戶之落語》這樣描述"落語"之魅力："一碗白湯，一柄折扇，三寸舌根輕動，則種種世態人情，入耳触目，感興覺快，落語之力誠可與浴后的 茗香熏煙等也"。

簡單而言表演形式頗類似港式「楝篤笑」，一個人手坐在台中(見左圖師父表演中)，手執摺扇或手帕，細細道出不同段子，主打係有寓意得來又引得你笑的古典故事。沒有甚麼道具音樂襯托，故事能否打動觀眾就很視乎表演的人的功力，事關段子當中男男女女一人擔演，時哭時笑，再加些古靈精怪的表情引觀眾發笑。就咁睇看似簡單但實際難度好高，尤其是引唔多熟古典日本文化的本人笑，但呢套劇又做到喎，咪就係勁。

每集以一個落語段子貫穿，首先由師父どん兵衛正面示範(通常都要睇多次先明…)，之後小虎就以故事大橋配以自己經歷重新演繹一次(因為他說話悶蛋，以傳統方式表演悶到觀眾忍唔住離場…)，睇埋小虎的段子，我完全明白了仲狂笑一餐；慢慢看下去成了小虎「語迷」，期待他的特別版段子﹗還有就是結尾小虎恭敬的交學費後兇神惡殺的向師父討債，仲兇佢為何無信封入住，係每集必睇位啊﹗

最爆，都係小虎講講吓途中有手提響，聽得入神的觀眾大罵係邊個時小虎竟然從容的從衫袖中拎個電話出呢聽，無言…

雖然「落語」是古典東東，但落在攪怪(網友對他的評語，不過我看完《虎與龍》後深深認同…)的宮藤官九郎手上就和「娘」、「悶」完全沾不上關係。師父示範期間會突然轉mode變成古裝劇，第三身講故事會變成第一身現身說法，確係易明好多；當中的古裝人是劇中師兄弟、惠美、銀次郎等親身上陣，耐不耐又會來個男扮女裝(次數最多是師父扮元配妻子…感覺好係曾志偉扮女人)，掛住笑好易會miss咗一句半句攪到又唔明…哈。因為佢地扮的大多數是低下階層， 造型草根，偶然仲會有極性感的檔布(係咪咁叫？﹗即係日版男裝底底…一個二個man月光光照地堂…當然兩個Johnny's哥哥無份啦)((3/7/14後按：係咩？))、短褲(長瀨條腿的長和白可比伊東﹗)，光睇造型已爆笑(會失驚無神轉咗古裝…)，再聽埋佢地扮鬼扮馬腔口…返轉頭睇多次，睇唔明跟就睇小虎版時就笑唔出架啦…

個人覺得最好笑的一回是《猫の皿》，故事中古董碗變咗古董牛仔褲，笑到我斷氣…哈哈

笑之餘，也有親情和友情。如《厩火事》中的夫妻情，《粗忽長屋》中穿幫會櫃桶底的康雄原來是為幫助養的自殺債仔遺孤，少不得當然係最後一集《子別れ》一回中師父和龍二父子情，以及組長和師父對小虎的愛惜又互相指責對方唔好好對小虎，笑中有淚，看完有點心upup的說。

此劇在去年四月播出前曾於前年十二月播過一個special，當中已交代了人物來龍去脈。而連續劇第一集其實無咩交代過special的劇情，一出場虎兒、 龍二和惠美已認識，虎兒又已拜入林屋亭門下，無睇過special的本人完全一頭霧水。不過會很感受到，每個角色一行出來形象都很強烈，小虎永遠是有型的西裝，龍二是他那無品味的設計，就算係林屋亭幾師兄弟，劇情不斷重覆他們名號，完全唔使驚認唔到邊個打邊個的說。記住記住記住，一定要睇咗special 先。

<<龍二的店和自家設計…真係幾難頂的說…每件龍二設計都有的item：龍、網和拉鍊

估佢唔到劇情不斷之餘，仲有估佢唔到客串之星—藥師丸博子演的避債女子，無啦啦被臨時拉夫去參加聯誼？﹗還有北村一輝演的個面精心慒的傻佬康雄，小虎、龍二幫他脫難配合該集段子《粗忽長屋》(講咗粗心大意的人唔知自己死咗…)好正﹗小虎講完故仔後觀眾拍手本人又睇到拍晒手~

據說這劇在日本掀起年青人對的落語的興趣，看後本人都好有興趣睇多啲落語段子。上網一search，原來有好多作品以落語為題，有動漫又有電影。反觀香港，X年前的《刀馬旦》後很少見以傳統藝術為題的劇集…不過…係拍的話都係俾港台拍…我驚無記又來看家本領三角戀…

P.S.嫌《My Boss My Hero 》中的真喜男太智障的話，《虎與龍》中的熱血好男兒小虎 (又係黑幫)可以係另一個選擇。長瀨做喜劇確係有一手…

今期熱煲：長瀨智也~
我最喜愛的十套日劇
劇集官網

我真係好迷呢部架：新春東京遊(1)+10年自high系列~Dragon Soda呀~