2006/06/07

十大車廂惡頂族人

時:6月6日晚
地:港島東行線某新巴
人:回家中疲憊的本人、PDA哥哥、綠色眼影姐姐、大聲嬸嬸乙件

某嬸嬸:「係新X記落車丫嘛,知啦。」 <--大聲的…
本人:將MP3聲量提升至10 (平時開到9已大聲到耳聾…)

該嬸嬸:「係呀,我啱啱上車嘛,係新X記落車呀嘛,我知啦。」 <--再大聲了…
本人:冒耳聾的危險我再將MP3聲量提高至12…

又係該聲如雄鐘的嬸嬸:「得啦,我知啦,新X記呀嘛,係廣東省對面呀嘛,係嗰度落呀嘛,得啦。」 <--又再大聲了…
本人:15…15已經係極限,我真係會聾的…但我仍聽到該嬸嬸從她巨肺發出震耳欲聾的聲音…

再次係那位嬸嬸:「我知架啦,好啦,就到架啦…」 <--很煩的語氣…還是很大聲的…
本人:我忍唔住啦﹗擰轉頭望一望坐在後面的嬸嬸,同時坐係我前面的PDA哥哥和綠色eye shadow姐姐都忍唔住掉轉頭望望…我們的眼神有著一致的訊息:「我們知道你要在新X記下車了﹗」

大聲嬸嬸終於收線(當然和我們的眼神無關);和她同行的女伴好像感受到我們對嬸嬸的伸訴,對嬸嬸說:「你講電話好大聲呀…」
萬幸,事情告一段落,空蕩蕩的巴士車廂回歸平靜;我的MP3終於可以回復到7的正常音量水平;PDA哥哥繼續睇PDA;綠色eye shadow姐姐繼續望街…

晚飯時將之和媽媽「分享」,果真一山還有一山高,媽媽遇到一位比「新X記」嬸嬸更難頂的粗口叔叔:他從旺角銀行中心開始講電話直到柴灣東區醫院下車,約一個鐘的車程中連綿不絕的粗口不停播送--每句話都熟練的夾著粗話。其他人就聽佢大聲地由九龍爆粗爆到港島東。我想,如果當時有人拍佢膊頭可能又是另一單全城熱話。

公共交通工具上難頂族人何其多,偏偏我地就撞中當中之首-巨肺族人…

1. 巨肺族人

特徵:擁有雷如雄鐘的聲線,天生講野大聲,分貝比其他族人高出起碼50巴仙或以上;不過佢地講野大聲唔代表佢地無禮貌,咁架車人多或對方電話收得唔好咪要大聲囉,唔係人地點聽得清楚呢。此族人非常顧已及人。為怕對方聽唔到自己講咩,無論對方有無聽覺問題或身處的地方接收好唔好都大聲講野定先,非常細心體貼, 確保訊息成功傳遞,不過係佢地講話/電話時坐隔離/附近隨時有耳聾的危險。未成年巨肺族人聲音偏尖、高,驚呼和狂叫時同樣不能接近,對聽覺有莫大危險,係極需要留意的。

2. 愛心族人

特徵:他們生性慷慨,知道很多悶 人上車後只是呆呆的坐,所以非常樂於將聽的mp3、打的機或看的pda片聲浪調高,自娛之餘再與身邊人分享。他們同時亦很熱心環保,他們下車前會將看完的報紙雜誌丟在車上,等有緣人拾到可以看看解悶,多一個人看經濟效益就更大嘛﹗所以同一道理,他們也會將吃/飲/用完的物品留在車上,好等它們遇到下一個有緣人,看他們幾有愛心啊﹗

呢族人另一個命脈係電話,佢地同空牙脷人一樣好識把握時間,坐車橫掂都無咩做就換吓鈴聲,個個鈴聲都聽吓揀吓,攪得呢都差唔多落車啦﹗又可以同人(無論佢識定唔識的)分享至HIT金曲喎,他們真堪稱為時間管理的高手。係佢地玩鈴聲時又可以令周圍睡星人不能熟睡,咁樣一定唔會過站都未落車啦﹗真係偉大啊﹗

3. X拿星人

特徵:X拿星分大和小兩區,合稱為X拿星。此星球族人同語豪邁奔放,對他們而言,髒話才是王道,這樣人們的情緒才不會被抑壓,所以他們毫不保留一己情緒,其率真之情可見一斑。當其他人正常用語和髒話的比例是99:1時,真性情的他們是1:99。由於語言的獨特,非X拿星人可能隨時聽唔明佢地講咩,所以此星球族人多數脾氣暴躁,越講越慶,越慶越講…

4. 盲眼氏

特徵:他們雙眼能看度是非常浮動的,他們眼中只有同行的友伴,如親熱中的情人、吵吵鬧鬧中的朋友或和講是講非中友人。他們極度好動,要搵出此族人基本上係睇吓佢地 有無「異常好動」、「旁若無人」、「手舞足蹈」和「郁身郁勢」就行了;只係族人個個都係群體動物,如無同族同行他們不會顯露以上特徵,旁人亦睇唔出佢地係呢個氏族嘅人。不過而家難好多了,由於此族族人非常外向,早已和其他族人如巨肺族人及X拿星人等打通外交之門,很多族人和其他族人成為朋友之餘還學曉了他 們的絕技,大聲和爆粗乃家常便飯,令很多人攪唔清究竟佢地係邊一族人。

5. 空牙脷人

特徵:他們身體構造異常獨特,胃永遠是空空的,牙和脷要不停接收和處理食物,所以他們無時無刻都在食。其他人上親車都見佢地食緊野係個誤解,呢族人係不停食野架嘛,只係其他人永遠都係搭車時先見到佢地之嘛。呢族人另一特點就係非常flexible,簡單如一個麵包,複雜如一個飯盒,甚至乎係M記餐佢地都可以喺車廂中極速攪掂同時唔影響消化。係眾多族族人中佢地係最勇敢的,因為食野係不容於唔同交通工具嘅乘客守則之中,但係佢地為個胃、棚牙和條脷的幸福仍然冒死挑戰,唔勇敢係咩呀﹗

6. 應屬柱鋁群島氏

特徵:無腰骨。此島島民天生無腰骨,去到邊挨到邊。身體的缺陷令他們對「柱」有種莫名的親切感,無論車廂中人多人少,佢地一見有空柱就撲埋去以自己的背脊緊緊的貼著長長的柱,造成一個完美的配搭;亦令其他人不能伸手接觸柱的任何一部份--在他們的字典中,柱應該是屬於背脊的,手請搵其他野扶啦唔該。

7. 長腳族人

特徵:族如其名,當然係長腳啦。他們深受巴士/小巴歧視,位與位之間狹小的空間根本就唔夠擁有修長美腿的族人背貼椅背的坐好;為伸展坐到硬的筋骨,他們只好變身按摩女郎,以膝頭頂前座椅背去換pose,可是唔係個個接受這份厚意,此族族人常常因為力度唔啱(通常係太大力按錯位)而被人鬧番轉頭,真係慘。所以 好多時佢地會仆去坐巴士啲4人包廂位,貪其可以伸直腳又唔會頂到對面個位﹗坐車之餘仲可以做做yoga,可見呢族人其實非常注重健康的。

8. 睡星人

特徵:去到邊都可以瞓﹗無論架車上高山下斜路都照瞓可也,乃善用時間高手之一。另一奇技就係唔怕生保枕,因為佢地進入入睡狀態後人人膊頭都可以挨,絕不影響睡眠質素;從佢地搭搭吓瞓瞓吓都可以流口水就知佢地美夢正甜。可恨佢地天生有個死敵--愛心族人,愛心族散播愛心時總會把睡星人弄醒,兩族一直關係惡劣, 好比《火舞黃瓜》中兩大家族一樣日日鬥過你死我活﹗

9. 愛美利堅合眾族人

特徵:呢族人無時無刻不會自己儀容著急。在車上你會見到佢地族人化妝、剪甲(手/腳)、採礦…。對佢地而言,結果比過程更重要,為了靚靚,佢地甘心忍受旁人無情的眼光,繼續做佢地應該做的事;總之攪完後靚就得啦。很多時你會見到佢地上車前落車後個樣係唔同的。可惜,呢族人比較無手尾,他們不怎在意剪下來的採 出來的,多數都要等清潔人員來執手尾,唉…

10. 龍躉族

特徵:為人穩重,但來無風去無影。他們在等車時不曾現一下身,到車來時"zip"一聲就攝了個頭位上車。天生的重量級龍躉好助佢地霸實攝回來的好位,同時避免其他人意圖或企圖以子之矛攻子之盾。其他人就算心有不甘見好位被霸也只得甘拜下風。不過在一片瘦身風潮中,此族族人人數正不斷減少中,面臨滅族危機。

***

十大車廂惡霸之首我還是投神聖一票給一號佳麗巨肺族人,謹以下面歌曲獻給族中所有人以表敬意﹗

另外的:
你好趕咩?﹗
噪音.燥音
趕客之家族…路x通《精叻家族》

請將音量收細 蘇永康 (@獨立宣言, 1997)
曲:吳國敬 詞:林夕


開開燈 偷看一切怕妳突然被誰代替 像抱在臂上的恤衫 換季 

關關燈 假設跟你永遠在床上能避世
漆黑中 傾聽一切怕這大門突然漸細 就算是妳立心將我放低 但也請將這聲響收細
臨行前  如留我安慰  請悄聲放低 臨行時  門縫要緊閉  彷彿最體恤敬禮
如離去了 趁宇宙未全枯萎 傾聽這寂靜下滴滴時計 點算著最動魄驚心的姿勢
開開燈 窺探一切怕這動人面容浪費 在轉換了睡姿之間便轉世 

關關燈 假設心裡要說話題便無忌諱
漆黑中 等妳傾訴對妳虔誠就如上帝 就算是說未可一世愛到底 但也請將這聲響收細
如離去了 趁宇宙未全枯萎 傾聽這寂靜下滴滴時計 點算著最動魄驚心的姿勢

17 則留言:

  1. 這篇真的很維園啊嬸
    可惜我不愛聽MP3,唯有忍受巨肺族人

    8th Jun 2006 02:14 AM

    回覆刪除
    回覆
    1. 親身經歷麻...個新X記嬸嬸大聲到無人有...係震耳欲聾0個種﹗我好想叫佢細聲0的...但佢又有權講電話喎(我諗佢係天生大聲0個種)
      係車廂度真係好難平衡人地同自己的權利...
      8th Jun 2006 12:37 PM

      刪除
  2. 靚女Aunt14/5/12 13:51

    哈哈~呢十族人如果一齊出現,簡直唔敢想像........

    8th Jun 2006 13:54 PM

    回覆刪除
  3. 最怕人剪指甲

    8th Jun 2006 15:15 PM

    回覆刪除
    回覆
    1. 指甲已好,我見過個阿婆係地鐵度棟高腳剪腳甲呀﹗恐怖過恐怖片﹗

      8th Jun 2006 23:02 PM

      刪除
  4. 我昨天碰到過個空牙脷人,是用叉子在車廂中吃芝士餅的,技藝高超。

    9th Jun 2006 14:47 PM

    回覆刪除
  5. 最討厭盲眼氏. emoticon

    因為即使我用厭惡+不屑的目光投向他們, 他們都視而不見, 繼續樂在其中.


    9th Jun 2006 16:50 PM

    回覆刪除
    回覆
    1. 嗰啲攬攬鍚鍚的年青人~~個個都盲當其他人死的...連體嬰咁行又要親熱真係辛苦


      9th Jun 2006 17:08 PM

      刪除
  6. 郭小瑤14/5/12 13:54

    搭地鐵真係睇到好多野架?!
    我見過有人係油麻地站列車等候時食完麥記,就隨手將飲完既汽水紙杯由列車與月台之間既空隙中...dum...之後返埋位坐...當時我真係O晒咀仔...
    亦見過一對情侶完全旁若無人地扮接吻魚...4個站既車程,真係咩kiss都有...成面口水添,當時既我,好想大巴大巴車埋去...因為好多學生係度睇熱鬧-.-"

    學生係度睇熱鬧-.-"

    10th Jun 2006 17:12 PM

    回覆刪除
  7. 哈, 我都唔知原來搭巴士有咁多野啟....
    我返工o係繁忙時間搭地鐵,比較迫,反而係最憎D人係車廂入面啟免費日報,各位大哥大姐亞叔亞嬸,唔係唔俾你啟,可唔可以摺起細張D日報先啟,位得咁少咁迫,你攤到咁大張,人地唔洗企咩!!!!日報入面都印左出黎,要班客仔閱讀時請顧及旁人嘛(係報紙左下角亞)!!!!

    同埋,我最憎係"應屬柱鋁群島氏",都係個句,如果大把地方又無人,唔係繁忙時間就話之你啦!!!影响唔到人地亞嘛,係繁忙時間咁做,好反感亞,彈開啦,條柱寫住你個名咩,公用架,咪當係自己屋企咁先得架!!!!!


    10th Jun 2006 21:48 PM

    回覆刪除
  8. 如搞投票選出三大惡頂車廂族人,希望可以令眾車廂族人提高對車廂內應有的公德心起關注,亦祈望可挽回香港人的聲譽(因巴士阿叔段新聞竟上了國際新聞網,唉!)


    10th Jun 2006 22:45 PM

    回覆刪除
  9. 發現第十一種惡頂族人--傘水族
    話說琴日落雨落到唔停,個個都拎住濕遮上巴士,架巴士又多人喎,有個阿叔坐好之後(架巴士係城巴兩排面對面坐,唔係向前一排排嗰種)就拎巴縮骨遮出呢起勢fing走啲水,難為對面個姨姨一對玉腿比個阿叔fing濕晒﹗
    整乾(然而呢個方法唔可能有效地整乾把遮﹗)自己把遮就整濕人地個身,勁無公德心﹗

    12th Jun 2006 12:43 PM

    回覆刪除
  10. 好難選......十種都好討厭啊! ~>

    13th Jul 2006 18:32 PM

    回覆刪除
  11. 多謝你黎探我喎.
    原來我地寫d野都幾似!哈.
    我都有篇野係講呢樣野!

    3rd Aug 2006 13:50 PM

    回覆刪除
    回覆
    1. 唔使客氣﹗我至仲意周圍逛~~哈,也謝謝你留言啦
      你又寫我又寫可見車廂幾多怪物啦,唉

      3rd Aug 2006 17:39 PM

      刪除
  12. 哈. 今日我放工搭地鐵, 有個"想應屬柱鋁群島氏"的妙齡女郎, 我係佢未行動個陣, 先下手為強, 一個"批掙"撞落佢背脊, 佢先冇挨落條柱度, 我先有得扶咋.

    3rd Jan 2007 22:18 PM

    回覆刪除
    回覆
    1. 見到呢啲人衰格的本人一定伸手埋去頂住佢背脊,一個人霸晒條柱咁衰丫啦﹗

      5th Jan 2007 15:06 PM

      刪除

要講幾句嗎?﹗XD