2014/04/21

[日/韓劇]《First Class》、《岬童夷》

趁假期想搵啲新野來看,本來開了寶英姐姐的《神的禮物14天》,不過看了一集不太對味,偶然見到《聽見》班底的奧斯卡(哈﹗其實係尹相鉉)有新劇,仲有詩源爸(但其實我而家係斷斷吓地睇緊《回答吧1994》,係娜靜爸呢)同金智媛(而同時我又睇緊《High Kick3》喎﹗),見到呢個班底,呢套《岬童夷》又好似好吸引…

原來這劇是based on華城連環殺人案,岬童夷就係當時疑犯的代號,套劇將發生的地點改為日炭,據維基說:以經過20年悠長的歲月,進化了的怪物岬童夷作為題材,依據隱蔽族的盲目殺人等事件寫成,是套穿插描寫於20年前及現在的犯罪之非真正時空穿越的穿越劇,並通過多名『岬童夷們』的不同犯罪心理,向現代社會人們之病理性問題提出質問。」

我想話唔怪得呀楊鐵坤(成東日)係咁話呢個係岬童夷嗰個又係岬童夷啦,而河念武(尹相鉉)阿爸和佢自己都疑似係喎…呀﹗真係dup低頭打陣機都miss咗啲劇情呀…

睇劇照呢,20年後再重出江湖的岬童夷應該係柳泰伍(李準)吧,佢原來係偶像團體MBLAQ的成員,死啦…我完全linkup唔到…佢個樣成日陰陰森森咁笑…巧令人京京啊﹗

尹相鉉叔叔和成東日叔叔成日對望鬥戲咁,死啦,我成日諗起奧斯卡和詩源爸,想笑…我想問點解尹刑警個郁咁似《聽見你的聲音》車辯做律師之前做刑警個造型既?同埋我想問佢石頭和尚的身份跟單案有乜關係?then成東日叔叔做乜成日壓低把聲,似足《賭神》秦沛咁講野…爭個揚聲器咋…um…我明既…要懸疑嘛…

至於兩個女角,金智媛我次次都唔認得佢個樣,上次《繼承者們》望了一輪先認得係《High kick3》那個…今次我也是看了好久先認得馬芝蔚就係佢,而佢個角色應該仲未入肉吧,都係行行企企咁…囧﹗而另一個女角吳瑪麗亞,佢因為細個時目睹過岬童夷所以改名換姓,日頭是心理醫生夜晚是濃妝抹艷的夜蒲女…呃…佢個唇好厚…不停distract我視線…哈哈

一路睇呢,我一路諗起《梨泰院殺人事件》(好耐無提過某人了…),究竟最後捉唔捉到個兇手呢?好緊張呀﹗
***********************************************************
本來無特別留意今季日劇,但唔覺意(又係唔覺意)發現這部《First Class》,見到有英龍華姐之餘同埋個副題「私以外、全員悪女。」,咦,好似唔錯喎﹗

唔知呢,係咪睇得太多英龍華姐啲花邊新聞(唔經唔覺英龍華姐上一部劇已經八年了﹗),所以比較難投入第一集千奈美(英龍華姐)咁天真可愛,呀,正確來說,應該係話千奈美係一個對Fashion雜誌"First Class"好著迷的讀者,讀完時裝設計學院後想入行但無機會,於是就打住工先,某日媽媽級同事意外入院,陪佢等家人來的時候發現那個姨姨竟然係"First Class"總編大澤留美(板谷由夏),由於阿媽係咁出聲幫,所以留美勉為其難收留千奈美成為雜誌社的intern…

故事發生到呢度都仲ok,但千奈美個角色設定係26歲,返工第一日被惡女前輩fake而做錯野係預咗的,但佢唔識do地係又打招呼唔係又打招呼,跟住又不掩飾地係咁講自己因為識總編媽媽而入嚟做又太天真了吧…

即係呢,我一路睇一路諗起《大奧》,個formula係完全一樣架,女角係好善良的,身處在一堆口蜜腹劍的女人堆之中,本來滿腔熱誠的,但發現被人fake得太盡,於是決意反抗咁。第一集結尾千奈美被留美鬧完一大餐,喊完後望住佢個位露出一個腹黑的眼神實在太令人期待了﹗

除了英龍華姐,其他的演員如板谷由夏(《沒有天使的街角》呀﹗)、田畑智子(《深夜食堂》呀﹗)等都係極熟悉的面孔,跟住個個名懷鬼胎勾心鬥角咁,應該好有火花呀,但呀田畑姐姐和英龍華姐個樣…好殘啊,而英龍華姐個頭髮好厚…好需要做吓treatment…囧…

咁個女主被人蝦到無朋友既時候梗係要有個人去救佢架啦,那個人竟然係Kat-tun個中丸雄一…因為我無睇過個cast就開嚟睇嘛…嘩﹗好耐無睇過KT啲人既劇囉…囧﹗

而家先係第一集,說好唔好睇仲係言之過早既(所以我係咁話人殘…XDDDD)…希望追落去會好有火花~~~好難得我會想睇番日劇架嘛﹗哈哈)

6 則留言:

  1. 個人覺得英龍華已經無法做番天真純品的角色,佢最好盡快變黑,否則我捱不到很久就想放棄…同埋呢,唔知係咪女角用晒d budget,男角真係好弱

    回覆刪除
    回覆
    1. RE:まこと

      第二集都未變黑喎﹗而且比一般出嚟做野的人都太天真…囧﹗
      我諗我會睇多一兩集觀察吓先…可能過多一兩集先會反擊…

      刪除
  2. 好耐無睇港劇,但近來我有睇「女人俱樂部」,諗住你會講,諗唔到你未講

    睇唔係為左曾志偉,某程度上為左果七個妹妹,大佬,唔通貪老果七個夠老咩?我鐘意佢用七個女仔演李若彤等人既少女時代,好得意,你一邊睇一邊睇佢配對係幾有趣既事

    套戲跟本係「天與地」女版, 又係用兩批角色去演兩個年代,又係講理想、夢想,天與地係遺棄理想,而女人俱樂部反而係重拾理想,江欣燕個角色令我諗起家明,大概佢係一個引,令到李若彤等人重拾理想,反之家明係一個引,令到陳豪佢地遺棄理想

    兩批角色,我配對佢地好易,大概我有與趣,反之,如果其他人唔係咁識班妹妹,佢地會唔會睇到好亂?佢地將兩個時代新舊過場時唔聲唔聲,我諗有啲觀眾都睇到亂

    佢背景講八十年代,終于會明點解會揾李麗珍、袁潔塋同葉温儀做,佢地三個都可以話係果個年代既代表,用佢地三個去神追八十年代,不過好希虛,你見到葉温儀而家肥少少都真係成個師奶咁就係一例,佢前幾年都仲呃得下人,而家你不禁會諗,糖妹老左可能都係另一個葉温儀……婑既人大概肥少少都好覺真係好慘

    演陳慧珊少年版果個陳瑩最靚,其他都靚,係演張慧儀少年版果個女仔無咁靚,鼻哥隆好大,嘴尖,個樣好怪,係有集佢扮埃及妖后靚啲,扮江欣燕少年版果個都靚,可惜係大陸黎,佢演李麗珍個角色啱啲,因為佢係大陸黎,我成日都係度諗,陳嘉寶同黄敏奕調轉演會唔會好啲?因為李若彤高過李麗珍,陳嘉寶又唔高,佢演李麗珍會唔會啱啲?(我有係陳嘉寶FB講過,佢都唔理我)

    BY無敵

    回覆刪除
    回覆
    1. RE:無敵

      呢套我只係行過唔覺意LAP到吓咁,我喺FB見到啲人話劇情有MENTION85年翁美玲過身,又真係幾貼近番80年代的情懷,不過都係挑唔起我睇的意欲啫,所以都無特別講呢套野啦…

      你咁講,啲劇情又真係幾《天與地》…

      刪除
  3. 見到有人講《女人俱樂部》, 我也說兩句吧,這套較《天與地》輕鬆多了,是一群失散多年的中學朋友因為緣份重遇而再一起追逐理想的故事,只要中學時代曾經有一群好友,但後來因各種原因而沒有再聯絡的人都會有共鳴,而剛巧我就是其中之一,所以我很喜歡這劇集。

    其實這套劇令我最欣賞的是有深度的對白和流暢的情節,令人覺得有意思又不造作的對白很久很久沒有在TVB的劇集中出現了,老實說,有時喜歡看韓劇也是因為其精警又猜不到接下來的對白。而且當中那幾個飾演女主角少女版的妹妹仔的演技很自然,這也是令人看得舒服的原因。

    不是要推薦什麼,只是這套真的是近年難得一見的佳作,而且可以與近年我喜歡的韓劇媲美。

    回覆刪除
    回覆
    1. RE:五月

      《女人俱樂部》我見FB好多人SHARE劇情,咁多80年代的歌、紅星,又有中學情壞,無《天與地》咁沉重應該會睇得開心吧…我睇吓之後會唔會有心機睇番,因為又係講朋友和成長的《回答吧1997》我都睇得好開心…我估呢套應該會中我的…

      最攪笑有朋友問我會唔會因為李若彤而翻睇《神鵰俠侶》…呃…當年我係因為白面古中招…唔係因為姑姑喎﹗XD

      刪除

要講幾句嗎?﹗XD