2013/08/29

[國劇]那些年的《神鵰俠侶》

作為超級《神鵰》粉,見到祖國又拍《神鵰》梗係豎起耳仔(咦,點解係耳仔…)聽實邊個係啦,

據說,小龍女的人選是…沈佳宜妍希bb…呃,如果造型真係呢個…我可以囧嗎?

no offense(真係no offense的),只係呢個look會唔會太可愛呢?兩舊野喺個頭度?郭襄喎我會以為係…

(sorry...我已經禁不住不停在搵相想進一步了解…)
網上流傳之前妍希bb喺電影《花漾》既古裝look,呃,第一眼望埋去以為係陳moss嫂喎﹗um,以妍希bb笑起上嚟cute cute地又面圓圓既外型,暫時唔太feel到cool樣…當然,其實小龍女係無表情所以冷若冰霜,又無人話佢個樣一定要拒人千里既…

據說其他人選有angelababy(完全係人氣之選咋喎﹗)、楊冪(當年郭襄升格了…不過個樣都大有不同了…),um,啲氣質差咁遠既。any肥,看這篇好好笑,啲人話妍希bb會瞓爛繩,又話佢演甯采臣(咦,講起上來也似喎﹗估唔到無啦啦搵到《倩女幽魂》的新接任人…)…呃,氣質清純但同冷若冰霜好似有斷距離喎﹗不過微博度于正話「光试妆就够秒杀你们了」(容許我照dup唔轉番繁體字了?﹗XD)件事又好值得期待…

um…同埋妍希bb可能要化番多少少妝,個look好面無血色…

反倒是傳說會做小龍女師姐李莫愁的張馨予個郁幾令,夠晒冷艷,但佢唔係道姑呢嫁咩…um,或者呢個係佢後生時跟陸先生相戀時的少女look

其實舊文比比比過,可能我被陳玉蓮和李若彤的版本影響咗,覺得要個樣有啲拒人千里先係龍女…我係咪要睇番本書研究吓其實小龍女個樣其實係點既呢?又或者妍希bb可以同李通明鬥cute…
(圖片刧自網路)繼續睇其他角色疑似人選。楊過是陳曉…而我只知道陳曉東…囧。睇百度,佢喺2013版的《笑傲江湖》演林平之﹗which is係我好鐘意的金庸小說角色之一喎﹗想當年呂頌賢版何寶生先生演得相當出色,更不能不提我最愛的宋達民版(其實係任賢齊做主角的,今次我好叻,一寫就寫啱係宋達民﹗哈哈哈),any肥,即係其實我都唔知佢係邊個(87年﹗跟某人和洪小白同年﹗)…

其他的角色…呃…就係…咁囉(毛曉彤演郭芙、孫耀琦演陸無雙、趙韓櫻子演程…但全部我都唔識)。很爆的發現,據說劇組搵了新加坡版演楊過的李銘順演黃藥師,實在係太爆了(佢有咁老做東邪了嗎?)…呃,我想像唔到古天樂而家走去做黃老邪係乜樣添…我心目中的黃老邪是曾江嘛﹗

死啦攪到我好期待添,據文說呢部劇會9月開拍,到時要睇清楚啲人腳﹗呵呵。
***********************************************************
其實我都好耐無重溫過呢本我熱愛到唔食飯都要掃本小說回家的大作(看,是大本來的,就知買了幾耐﹗哈哈哈)

於是…偶然…不幸…喺旭屋見到有日文版喎﹗不過我只係買了第一冊…但不排除好快會掃埋其他四冊回來供奉﹗哈哈哈﹗

喺睇書的同時,都係時候將偉大的古版《神鵰》拎出嚟回味了﹗(<--癡咗)

12 則留言:

  1. 話說看你舊文你常吐糟83版神鵰改了很多劇情,但同樣改了很多劇情的83射鵰卻大讚,還真是偏心古版神鵰偏得很出面,哈哈。

    回覆刪除
    回覆
    1. RE:WINSON

      哈哈﹗我承認我是很偏愛古天樂的楊過,翁美玲的黃蓉跟三哥的楊康…

      唔知呢,我覺得翁黃的《射鵰》加進去的劇情都合情合理,但陳劉的《神鵰》呢,我真係覺得心高氣傲的楊過係唔會扮王重陽去整古全真教的道士(太低能了﹗),同埋佢係唔使見到張德蘭和區瑞強的師生總人辨被石扔死先立定心志同姑姑繼續師徒戀囉…(我太認真了﹗)…呢啲劇情有啲太畫蛇添足囉…

      刪除
  2. 啱啱今日先知,yahoo blog會玩完,台灣無名都會玩完,唔知點解時間都差不多。

    覺得電腦時代,一樣係保留唔到咩,我都要將我要既文存起,其實都唔係d咩黎,不過係日記,有d記錄,d相都唔留,係有d連結,當初都係用blog黎留,而家可要可唔要,而家咩都留唔到

    其實都唔係話無人睇,我見我blog都有點擊,尤其是講電影都有人睇,好諷刺,我好憎既討論區之類又長做長有,自己建個blog,都唔留得耐

    真係有種好茫然既感覺,唔知幾時到fb玩完,其實我唔鐘意用fb,你而家用呢個blog好唔好用?可能我搬黎呢度都唔定,不過,又係唔知留到幾耐……

    by無敵

    回覆刪除
    回覆
    1. RE:無敵

      你好似問咗BLOGGER呢邊好唔好用好耐但都未決定搬唔搬喎﹗
      YBLOG我好早就唔鐘意無用。揀呢邊係貪佢同GOOGLE LINK埋,跟住又有BACKUP和輸出,要備份或再搬都無咁痛苦啫,之前喺SINA搬走時真係一篇一篇咁COPY架…
      電腦時代SOFTCOPY好似懶方便咁,真係KEEP唔到啲野,就算我SEND去自己EMAIL都唔知個EMAIL會唔會有一日死掉…
      我估,BLOGGER和WORDPRESS應該一時三刻都唔會死住既…

      刪除
  3. 我勁憎大陸,不過劉亦菲版個神雕選人真係唔錯,做黄蓉果個真係同周迅有少少似,所以好接戲,個郭靖就攞命d。

    其他d女角真係好正,所以終于明點解d男人咁鐘意上大陸,不如叫佢地拍個h版神雕都得,反正d大陸女人好開放,佢地係得把口話唔睇/播肉蒲團,實質咩都做齊

    by無敵

    回覆刪除
    回覆
    1. RE:無敵

      祖國既野…我普通啦…唔特別LIKE也不特別討厭,我只覺得不能理解…

      刪除
  4. 李若彤真係冇得輸

    回覆刪除
    回覆
    1. RE:灰先生

      係喎﹗還是咁不食人間煙火…
      不過陳妍希這個未係FINAL的郁吧,即管睇吓會點…

      刪除
  5. 我幾鐘意2005版,拍得幾靚同幾鐘於原著,女主又真係幾似小龍女氣質,係海棉大哥演技有點囧。。。今次搵研希bb真係夠晒話題,就算低收視都好有話題性!

    回覆刪除
    回覆
    1. RE:鈴

      你說的那個版本因為世界盃我沒有全看,只睇了點點,印象中造型是OK…但俾網民搵到好多穿崩位…哈哈哈﹗
      話題性…咁又係…當年吳倩蓮個黑色郁小龍女奇奇怪怪得嚟但確係引起好大回響…

      刪除
  6. 早幾日見到呢個消息先記起之前打算重溫06版神鵰,我覺得真係好好睇,而且都算係比較近年既作品,所以都好值得一睇。

    至於依家又拍新版,見到你話人地話驚小龍女瞓爛繩,我真係笑左,哈哈

    回覆刪除
    回覆
    1. RE:John

      那個版本我無認真睇,因為那時意大利拎世界盃冠軍,場場都要睇真係瞓都無得好瞓…囧﹗一路話想睇但又無乜特別動機…卒之而家都未睇…
      慣了日劇十幾集,睇番四十幾五十集的好痛苦呀﹗
      希望陳小姐的新造型會好啲啦…仲係呢款真係太驚了﹗

      刪除

要講幾句嗎?﹗XD