2013/03/04

[港劇]《On call 36小時》、《仁心解碼》

因為突然發現《仁心解碼》和《on call 36小時》都拍了續集而且就快播,於是小的決定翻兜一吓(於是剩下的《ataru》sp第二回睇極都未睇完…)

其實《仁心解碼》前兩三年已經睇過,應該係《碧血鹽hill》時熱追二少的劇定係睇完《真相》癡狂地追17哥舊劇而睇的呢?我都唔記得了…就如舊文所說啦(如這篇這篇),其實是相當好睇的說,但詭異的09年拍落放到11年先播,喺呢段過程,劇入面演實習醫生的17哥已經有大茄升呢做男配再升做男一了,呀,真係時日如飛…

又如舊文所說,個setting其實相當《皇庭》或者《妙手仁心》,就是在一間醫院內,有一班很熱心的醫生(方中sir、蔣志光呀)、護士(二少、陳芷菁呀),佢地好熱誠地照顧病人,而啲病人又會好詭異地有啲係佢地家人喎,跟住又詭異地會有個人演差人的,然後接到唔同病人就發生唔同事件,當然會有感情線,亦好詭異地啲主角係會住埋一齊,咁放工喺屋企或者落pub飲野時會有好多好笑的互動。

可以有人告訴我點解啲醫療劇既女主角一定要有病?同埋點解最後一定要由男一去幫佢醫呢?不過呢套入面除紙山是ok的喎(總好過硬演純情少女既),呢套跟《妙手》最唔同係除紙山和黃智賢哥哥查案線是相當重點,差唔多去到一半一半,於是個setting是十萬個《神探伽里略》,連劇入面蔣志光都係咁講,好好笑。可能因為又查案和又醫人,於是劇情是無咁拖拉,反而幾流暢,睇得好爽。

《妙手》是A & E,《仁心》就係精神科,呢一科比起平時一味血血血和手術手術手術幾唔同,感覺幾新鮮的。不過因為擺了兩年先播,於是楊秀惠小姐的外型…我完全唔認得囉﹗一開始佢扮肥妹唔認得是正常的,後來佢減肥成功都唔認得﹗哈哈哈。而陳芷菁又係護士﹗噢,雖然《天與地》是2011年尾先播,但就硬係覺得熟口熟面。

剛剛LAP到續集預告好似話方中SIR會能醫不自醫,跟住除紙山個角色會死掉換成伊麵嫂和羊兒﹗噢﹗又係羊兒﹗佢喺《on call》度係醫生而家又係醫生﹗咁會減低我的觀看意欲喎﹗囧﹗更驚的是,據說《仁心》第二輯之後接檔的是《金枝》第二輯喎﹗我咪要勁睇電視﹗

《仁心解碼》@維基
************************************************
哈,就因為就嚟有第二輯出街,於是這幾天我都在睇番呢套《on call 36小時》,發現和樓上的《仁心解碼》好多相似喎﹗
  • 《仁》有張國強,《on》有黃智賢(又係佢﹗),都係做男一(方中sir和馬明)的死對頭,成日針對佢又唔俾佢上位
  • 兩劇都有班新丁跟住男一學野喎﹗(17哥、陳yoyo、洪天名vs黃智雯、羅仲謙一班人等啦)
  • 也有一個男護﹗(二少 和 郭政鴻)
  • 也有一個lum爆醫生的護士(徐suki 和 周家怡)
  • (如果我說都有一個護士長係咪太爆?哈哈哈)
  • 主角們都係同住一家喎﹗
so far睇了五集,阿羅仲謙同老頂馬明頂晒咀反晒面,呢件事實在太難唔令我想起《學警雄心》和《烈火雄心》了,硬係會有個新仔同黑面神老頂唔啱,但慢慢反覺原來佢對自己好好,然後來個淚之大和解咁(我話既﹗)

啦啦啦,真係好《烈火》和《學警》呀,《烈火》王喜同李子雄原來係親兄弟,跟住《學警》陳鍵lone和三哥又原來係父子,《on》都有羊兒和黃智雯係兩姊妹,噢﹗乜呢個世界咁多失散咗既兄弟姊妹既﹗

上面那套就係精神科,呢套就係神經外科,都係比較少聽到的,跟住又有醫生back住,so far劇情都幾集中喺醫院內部的東東,當然,五集都係言之尚早,因為我大概跟過吓啲劇情,淨係羊怡兩姊妹跟馬明的感情線都有排攪…應該可以飛…XD…同埋我想問點解羊兒喺套劇度著露趾高跟鞋?﹗著咗《真相》啲道具了…囧

嘩嘩嘩﹗睇第二輯劇情,上面先話方中sir能醫不自醫,呢套又話馬明會有焦慮症,做乜咁似?跟住無咗羅仲謙,但好爆地加入了程志美醫生﹗(不過佢劇入面唔係演程至美…XD),之後又加咗朱千雪,好在唔係朱晨麗,唔係加埋馬明和羊兒就係一套《名媛望族》了﹗Last but not least,仲有古明華和蘇玉華喎,好像幾有睇頭啲人。

好啦,繼續睇,可能會發現更多共通點,哈哈哈。

《on call 36小時》@維基

6 則留言:

  1. atatu sp上半飛黎睇,因為有一半係重溫,下半反而ok,係到駁完呢邊駁個邊,睇睇下我都唔知駁左去邊,岡田將生又做得幾好,但個結局係關於電影版既引導....(ataru同兒童警察咁都開到電影版,對日榻推理電影真係...唉....)

    on call係馬明個條線係好睇d,其他基本係飛或miss左,呢套最成功就係馬明向羊兒求婚個段,個陣係電視電台雜誌至婚禮註冊都聽到引用,好成功的說。

    回覆刪除
    回覆
    1. re:喂丁

      《ataru》sp第一個回憶版我幾分鐘飛完了,太無料到。之後那個甚麼《來自紐約的挑戰》先有野睇,不過我又無乜心機追,分開十幾廿次都未睇完,而家都係睇到一半左右,岡田將生都係剛剛出場…仲要知道結尾會連番去電影版,仲無心機睇…即係有排都未知道到個結局啦﹗

      《hero》、《非關正義》等都好鐘意電影連電視咁出,或者保險啲掛,大家鐘意睇套劇有一個保障,用套sp嚟引大家胃口再多一重票房保障咁…

      《on call》我未睇到咁後呀,等我努力追…哈哈

      刪除
  2. 我依家都有追呀~岩岩今日大結局呢!
    我O個時同依家都有睇呀!
    我覺得好好睇,唔悶呀!
    而且特別D..唔係只係講醫生咁簡單!
    我都期待第二集.不過有YOYO~我就對佢一般LA~
    我睇廣告楊怡好似係警察?! 唔SURE呀!不過我就唔想佢做醫生.
    因為遲下都會有呀!!

    我係中意睇醫生,警察,律師,紀律部隊GE劇呀~我依家連下午播的都有追埋黎睇呀!

    我有興趣睇!不過O個時我係最忙.忙到係一集都睇唔到.一睇就係睇左結局O個集!我已經知個結尾係咩,吸引度大減呀!!!
    得閒會睇返GE

    回覆刪除
    回覆
    1. RE:星晴

      咦,又無咗劇名了?
      《仁心解碼》我諗番起啦,應該係睇完《洪武三十二》之後去一條龍17哥的劇先睇的,跟住先發現原來很不錯﹗至於第二輯我是一集都沒看過﹗哈哈哈,不過LAP劇情簡介好似又有話楊怡係代除紙山做女警的…你講起又係…哈哈﹗YOYO我自《烈火2》已經覺得佢悶…
      我都好鐘意睇專業人士/紀律部隊劇,因為我體能差,無可能做到紀律部隊…專業人士如果我努力讀吓書第時會唔會做到呢…哈哈哈…
      我最近都無睇電視啦,又無追番《ON CALL》第一輯,走咗去睇《LEGAL HIGH》…哈哈

      刪除
    2. 係WOR.我次次都冇左D劇名=.=

      咁你依家有冇睇仁心解碼第二季~我依家忙到一集都未睇=口=
      反而睇左8半O個套....

      刪除
    3. RE:星晴

      係喎…點解會食晒啲劇名?
      第二輯《仁心解碼》…我是一集都無睇﹗哈哈哈哈﹗之前去了旅行無追嘛,同埋無了黃浩然…即刻熱情少了一大截…

      刪除

要講幾句嗎?﹗XD