追車…

 從前我最討厭的交通工具叫小巴，而家我的敵人是巴士…囧﹗ 
從前我搭的小巴，條龍飄忽無定，有時會車等人(﹗)，有時條龍長到無朋友。遇著交通意外、打風落雨於是塞到傻，等幾個字都唔嚟一架車，最神的是…的士會消失於天與地，你可以做的只有send whatsapp比老闆說我要遲到了，大囧。

又有時唔知點解，天氣放晴，地盤佬無multplier effect(sorry我唔應該歧視DPL，無佢地我地都無路用無樓住，學生和OFFICE人有時都會一個排突然變10個的﹗大囧﹗而呢條小巴龍係好神奇，大家有潛規則係唔可以幫人排和插隊架﹗)，交通無意外，但可以等十年都無車，冬天最多都係食風，夏天就身水身汗，超慘。最慘係遇上上段的情況老闆好易得知(佢都要搭車返工架嘛﹗)，但呢段的無啦啦排長龍就…死無對症囉，好似我講大話咁的，好討厭。

有時，真係唔怪得地車可以咁大安旨意加價，因為有啲時候，你明知巴士/小巴唔使行咁遠但你唔會搏的寧願俾貴啲去搭地車，一串光陰有時係可以用一串金去買的。

但上天對我的玩笑是我連續第二份工喺無地車直達的地方，即是說第一程我可以搭地車但第二程都繼續要受地面交通的煎熬。問過同同他們的意見，小巴是有的而車程十分飛快(萬年先會遇上一次塞車，發生率幾乎是零)，但條龍的multplier effect是1000，人生最悲唔係搭小巴時自己係第17具乾屍(<--第x具乾屍是金田一某個殺人事件的名…XD)，而係明明啲車一架一架咁嚟，但因為前面啲人不停單細胞自我分裂不停增生(仲勁過搽任何一集skincare)，於是你永遠只能在隊上乾等，望住時間一分一秒的流逝，明明自己準時出門口都得到遲到的收場。

係，人生不如意事十常八九，其中一樣一定係明明準時出門口(甚至早咗)，但我遲到…大囧﹗

於是我決定忠於我最心愛的巴士。但天意弄人，從來我都相信香港生育率不停下跌，但到這一刻我懷疑了…。要搭的巴士途經好幾家中學和大學…本來開學前都相安無事，但開學後好似全世界的學生都會搭呢幾架車咁，條龍由街頭排到街尾不用說，仲上埋天橋的上層…我大囧了﹗《天梯》呀﹗幾多對持續排到幾多歲﹗

我唯有搭的士啦，真係灰到無朋友。

最灰的是…如果我遲起身攪到遲出門口，飛的返工是我自作自受，但重點是我準時出口架﹗大囧囧囧囧﹗

轉搭了另一架巴士一輪，這陣子因為太累遲了起身(<--我錯﹗不過都仲係安全線以內，只係另一架安全巴士要好好好早起身囉)於是又要挑番呢個天梯路線，咦，看來該大學的學生過咗頭一個月已經開始走堂mode，條龍又回復正常水平了﹗感謝神恩啊﹗

就說，交通就如人生，好的開始是成功的一半，如果那天搭車不順利，一整天做甚麼都覺得不順暢的。

人生另一個悲劇就係一路行去車站時見到架車嚟，有得追還好，追唔切，望住佢開走…欲哭無淚，真係慘絕人寰。

巴士司機叔叔啊﹗人同此心，多做一分好事多開一次車門吧﹗我相信種善恩會得善果的﹗(有時啲司機叔叔都好慘，無啦啦都會俾客鬧…唉)

雖然我係勁鐘意搭巴士，但返工的地點還是有地車好，雖然地車都會壞(我真係試過地車呆在隧道裡唔郁大半個鐘而遲到了中學時…寫手冊…理由是「地車塞車」…感覺相當詭異…)…

um，無得解的死結，唯有自己早啲瞓，祈求周公子第二日準時放我走，咁就可以準時搭一千零一架唔塞車安全號巴士。謝謝。