2012/03/07

[韓劇]《快刀手洪吉童》~我是在看金庸劇嗎?(完成了﹗~)

一條龍的最後一步。其實第一集我睇了幾乎兩個星期先睇完…呃,咁個男主角唔係我杯茶嘛…(《coffee house》係咪即係《咖啡王子》?記得當年日文同學大讚話好睇的說…)…成集都望住佢真係睇得好辛苦…。咁話說最近追2將會播某韓劇達人本命(是嗎?)的某套古裝片,好奇開了一看…但諗諗吓都係唔好,清咗昌輝王子呢套先,最多洪吉童啲戲FF啫…(XDDDDDDD)

睇睇吓是有點意外驚喜的。

(注意有劇透,雖然我未睇晒)

話說n年前被某勇樣粉夾硬拉入戲院睇《挑情寶鑑》(汗…)…是一個很大的陰影…真係巧京京囉(冷靜唔到添…﹗﹗﹗)呃…從此小的是怕咗泡菜國古裝片,加之於個男主角既尊容(佢個頭做乜成個麥當奴叔叔咁…),第一集真係睇得好辛苦…而昌輝王子只有幾個鏡頭咋(這就是男二的命運?﹗)

某一晚心血來潮開嚟睇有新奇發現,話呢套野主線是講洪吉童(就係麥當奴叔叔那位)點樣由小混混變成英雄,副線是昌輝王子點樣企圖復位,兩條線疊住去,加插三人身世之謎,又加埋啲官呀黑幫呀爾虞我詐咁…我覺得我在睇武俠劇喎﹗

呃,睇網上劇評都說呢套野好破格,將啲現代野撈落古典文學度,於是人物會無啦啦講國語/英文,又會有青樓妓女跳舞播電子音樂。其實我覺得洪吉童小時遇到師父教佢武功(阿大師跟利祿爺爺用筷子鬥夾野食好有《神鵰》山上洪七公跟歐陽鋒一段的風采),跟住比武招親識咗利祿(嘩﹗《射鵰》楊康就係比武招親識念慈架啦﹗),之後無心插柳之下拎住支幫主信物去救班盜賊(好黃蓉呀﹗),之之後又無啦啦做咗英雄,成件事好《射鵰》囉﹗

click著咗個武俠片mode趣味就開始嚟。不過可能睇得金庸劇太多(港劇啦特別),硬覺得啲武打係有啲參考港式武打,不過又唔知做乜好似《廿二世紀殺人網絡》咁不停定鏡喎(而阿王子用劍好有日本武士feel)…好唔流暢囉…

個王子復仇記好有《射鵰》楊康+《天龍》慕容復的風采,而呢三個角色又一樣係氣質高貴儀表不凡既貴公子look,身負重任而硬係cool cool地(咦…花癡mode啟動了?﹗)…而結局又係慘慘地(我自我劇透了,昌輝王子的結局好似頗有無間地獄的意味…)啊﹗(但我想知點解阿王子個郁咁嬲憂?丐幫咁既feel喎﹗)

睇睇吓發現原來吉童阿爸係殺咗利祿阿爸,攪到昌輝差啲俾阿哥燒死,條伏線爆點都好大喎﹗另,我想問阿吉童爸既然唔想俾人知原來先王係想主大君(昌輝)做王,所以先殺咗利祿阿爸搶埋把刻咗密旨既劍…佢又keep住得閒無事拎出嚟望?咁咪俾大君和盧尚宮等人有實質證據(other than支鳳釵)justify大君先係真命天子?(我認真咗?TBB formula告訴我們證據一定要實體的,就如file係唔會經email send一定save落floppy或先進啲save落usb架嘛﹗)

um,令我好想發文講一吓的就係呢把劍啦﹗字幕組有一個譯做咩寅劍(exact名字忘記了),另一個好爆地譯咗做「尚方寶劍」﹗﹗﹗﹗﹗唔怪得我睇《白面包青天》時包龍星阿女麻諗住拎尚方寶劍但拎咗條鹹魚出嚟啦﹗原來俾人拎咗去泡菜國呀﹗(攪gag的…速逃…)

um,不過呢…點解感情線又係二男爭一女?then男一又係古怪男,男二又係溫柔男(雖然今次加埋個悲慘身世於是長期黑口黑面又愛不出口咁),個女既就傻傻更更開開朗朗咁(佢用個尿壺遮住自己等王子見唔到佢,點知王子反而想借佢避人耳目就順手買起個尿壺,典知利祿當個尿壺係寶仲叫阿王子做尿壺公子…哈哈哈﹗),then又會有個攪事既女二愛上男一,之後得到女一既又係男一?﹗
劇入面某人長期黑口黑面的,抓圖時見到有張笑意盈盈架喎…貼吓先…(隔離那張係唔爭在貼埋的…XDDDDDD)

好,繼續煲,後感待補。

維基 / 劇評:這個這個
我看金庸小說1~電視劇篇
番外篇:點解古裝劇表達時間飛逝的方法是鬍子?
********************************************
14/3/12後感:(大劇透﹗)

(咦,以我快飛一日兩集的速度都睇咗成個星期喎…)

一路都以為條線就係大君如何成為君王,點知尾3一集就成事,諗緊跟住3集點埋尾,估緊係咪談情說愛一番的時候,竟然是揭穿寶劍(繼續覺得字幕組譯”尚方寶劍”是攪gag),攪了大半套劇,大君一心以為係justify自己正統身份,天經地義去跟阿哥拎番應得的皇位時…竟然係有人為自己孫女登上皇后寶座攪出嚟的大龍鳳,呢個玩笑真係開得未免太大了﹗好慘好慘好慘﹗呢幾集真係睇得好心up…

就此…因為洪吉童知道寶劍密旨的秘密,而佢係無講俾大君知,到大君知道時只除了O咀(唔係仲可以點),就係做野去證明自己,本來坐上皇位的皇牌一個係寶劍一個係洪吉童,而家無咗一樣總唔可以單靠洪吉童架…咁無啦,一個翻身變成朱元璋,要盡殺幫自己登位的活貧黨,又是一個心UP…(突然變咗《倚天》…又諗起《天龍八部》段正淳有幾廿個私生女之後,個仔原來唔係自己親生﹗囧)

而那條感情線又唔算好拖拉,大君最後放手俾利祿搵番洪吉童,亦忍痛一併攪掂,呃,真係好無間地獄…

睇吓睇吓,就好似利祿話齋,好懷念大君仲係龍門公子的時候…呃…同埋點解登基時個郁變咗秦始皇?而著咗皇帝衫之後…又好懷念個嬲憂武士郁了…

唉…估唔到會越睇越心傷的…(但睇完《倚天》,都明朱元璋殺功臣既原由既…鬼叫洪吉童又唔似張無忌咁自己彈開咩…)…

我諗我要搵番套可以笑吓既嚟BALANCE番…囧

last but not least,我想問點解除了大君中刀那次,之後佢中箭和尾段洪吉童中劍,佢地都唔使除衫包紮,就咁喺血衣上面包疑似紗布的東東…呃…咁新長出來的肉咪啜住啲衫?呃…好令人不安耶﹗

8 則留言:

  1. 我曾經好熱愛個男主角,
    不過當佢拍呢套戲既時候佢已經出左名,
    而我亦都沒鍾意佢好耐!
    呢套戲我沒睇過,造型都不願置評,
    但我想講,佢著西裝真係好型好型!!!

    唔知點解,每當我鍾意既明星出左名,紅左,
    多人識個陣我就會唔再熱愛佢地…
    可能我真係適合迷D小眾偶像

    回覆刪除
    回覆
    1. 我仲諗緊呢套劇會唔會有人留言…好在有你留啫﹗(咦,你都有睇韓劇?我見次次同你講的都係港劇…)

      咁那套甚麼coffee house係咪即係《咖啡王子》?當年個同學大讚話好睇同埋個主角好靚仔…或者古裝(雖然佢個髮型唔太古裝)同時裝兩個樣會差好遠吧…

      又係喎,好多時我都係個藝人未紅時好欣賞,紅咗就唔鐘意(例:古黑子和郭城城),就如而家睇張根碩,其實我prefer《梨泰院》、《貝多芬》那一水多過《美男》大紅之後的《瑪麗外宿中》(雖然呢套我係有係咁翻睇…哈哈…口不對心)

      刪除
  2. 咖啡王子和Coffee House不是同一部電視劇來的
    咖啡王子較舊,07年播出,由孔侑和尹恩惠(宮的女主角)主演,是講女扮男裝加入咖啡店的故事。
    Coffee House是10年播的,是洪吉童男主角演的,他在裡頭演小說作家

    回覆刪除
    回覆
    1. oh,原來係咁,(其實我應該自己去google一吓…太懶了)…
      感謝資料提供…
      (小的識既劇集和演員沒太多個…唔知邊個/套打邊個/套…笑)

      刪除
  3. 你竟然有勇氣睇呢套劇,,,睇黎你真係中毒已深.....
    我連黃真伊都看不下去....(其實本人真係唔睇古片)...
    加油,如果之後你話好睇..我可能,,,都會睇下
    btw,,之前j2好似有播過...

    回覆刪除
    回覆
    1. 因為要睇張某人嘛…~~~~

      話實除了講韓文和著韓衫之外,和武俠劇沒兩樣,求其拎一套金庸劇出嚟有的劇情《洪吉童》都有,而且節奏又幾快,都睇得幾舒服的說~

      但好攪笑係阿洪吉童受傷極都仲行得走得,張某人係被人"筒"一刀喺小腹,一係就心口中毒箭,次次都就死就死…好慘啊﹗(但攪笑的是前一段仲見佢瞓喺度死死吓,轉個頭佢就行得走得了…囧﹗)

      刪除
    2. 從劇照可感受到,
      妃子今次係扮病君......
      又係另一種味道

      刪除
    3. um,《洪吉童》入面張妃係一個因為小時被奸人所害親眼睇住媽媽為咗救自己而葬身火海,跟住死裡逃生,就忍辱負重訓練自己成為一個強人為求他日返嚟搵今日報復同重奪王位,所以是一個抑壓自己情感同埋長期黑口黑面的人…(呢啲角色通常都會有個女角對佢由憐生愛…但編劇就無分番一個半個女角俾佢囉…)

      據紫熊大人講,《黃真伊》入面恩浩公子就係文弱書生來的…

      刪除

要講幾句嗎?﹗XD