2011/12/26

[日劇]《家政婦のミタ》雜談

其實小的看這部是有點立心不良的…因為小的好奇點解呢套劇可以咁勁,收視節節上升之餘結局仲衝破40%喎…平時見啲劇雷聲大雨點少,或掉番轉刀仔鋸大樹拎到個好收視都有,但衝到咁癲的就少見嘛…
(謎之聲:其實看好我覺得…um…ok咁啦…)
((我會唔會俾人打?其實我想睇既係《還有第11人》呢…宮藤官九郎耶﹗突然我好想睇番日劇…哈哈))

Um,其實個設定幾係公式家庭劇,一個問題滿載的家庭,每集輪住發生唔同問題,啲問題either家人合力解決,劇中四姐弟妹個setting無不令我諗起《同一屋簷下》…um。而日劇最鐘意的另一件事就係有一個人行事跟其他人完全唔同,置身喺其他人既世界入面幫人解決問題後又順手解決埋自己的心結咁…。

咁呢套劇就係兩樣野都有齊。主人翁阿須田一家問題度比柏木一家高得多,阿爸走去攪婚外情而向老婆離婚攪到佢自殺,四個子女各自面對問題之餘仲要承受阿媽過身的打擊,都仲未復元之際又發現原來阿媽唔係意外而係自殺,然後攪到家變…攪攪吓又梗係離離合合中發現世上無野比家人重要呀咁…其實都幾老掉牙的…

有趣的是插入三田到阿須田家,個化學作用確係幾正,三田真係好神,家務料理樣樣掂之餘,人家叫佢做乜佢又做,想要乜佢又拎得出,佢個袋真係拍得住叮噹(我堅持叫叮噹)個百寶袋,最攪笑的是叫佢玩拋波佢又識…叫佢打佢又打…連放火都得…好神…頭幾集真係幾好笑(第一集阿媽之死攪到我喊咗…)…喺有少少老掉牙的家庭溫情劇之餘有啲爆點,唔怪得收視係咁升啦,啲預告又話菜菜子放火爆屋除衫殺人又乜又盛咁,到睇下一集時又…chur…都無料到既﹗(溫情嘛﹗)咁看點…咪就係三田的身世囉,究竟佢點解會成個機械人咁,冷冰冰咁不苟言笑…

而阿三田又被抄又被請回來…跟住冷冰冰之餘又暗地裡幫一家人走在一起…um,是估得到的…唔知集集追的人會唔會覺得被騙?不過收視又真係被追了回來就是了。咁呢家人跟三田建立了關係,越來越依賴佢唔想佢走都言之有理,不過四姐弟玩到叫三田做自己媽媽又真係有點那個喎…佢地唔係好在意媽媽架咩?唔係都唔原諒唔到阿爸啦…其實後尾幾集又點溫情得濟了…不停地講大切的東西係咩咩咩…呃…

(我會被打了﹗)

而那些攪事的鄰居(好似日劇中的家庭妣係有個唔好相遇的鄰居?)、多事的阿妹、古肅的阿爸、欺凌人的同學…um…實在係有啲熟口熟面,包括啲性格設定和行為…um…

呀,講開又講,排第4的小妹好可愛,成日問呢問那樣…好cutie呀﹗

故事是很熟口熟面的,還好三田的身世還滿有追看性…讓小的忍不住追下去(雖然佢自爆的一幕有點odd…之前又寧願唔撈都唔講?無啦啦講晒出嚟既?)…總算追完了…。

人腳方面…我發現除了菜菜子和相武之外全部都唔識呀﹗4姐弟唔識…阿小三風間唔識…係咪我太少睇日劇唔知家陣有乜新晉演員呢?um,睇演員表見「長谷川博己」個名熟熟地口面,但維基一吓先知其實我應該唔識佢…(雖然佢有拍《33分探偵》和《BOSS》…不過睇番角色名都唔記得係乜…)…嘻嘻嘻…我想話呢,雖然我一路睇一路好嬲阿須田惠一成日無主見又懦弱,明知對唔住仔女攪到老婆自殺仲掛住個小三,(但佢哭住講當年老婆有咗時逼佢結婚又真係好慘喎…佢話自己根本末有做爸爸的覺悟又好合理喎﹗)…呃,扯遠了…我想話呢世博己哥哥做得好入型入格啊﹗想打佢一身但又打唔落﹗

唔,我想話呢,阿須田一家係咁逼三田講出佢既過去真係好強人所難囉,係,三田的心結係被解開了,但人家唔想講又做乜要逼人講?講咗出嚟唔一定舒服啲架喎?同埋我其實有少少討厭大女的直腸直肚,直得濟囉,吓吓要將真相爆出嚟,但攤晒出嚟又係咪最好呢?um,個人其實最鐘意爸爸惠一條線,佢性格雖然係懦弱而且弱得好討厭,想佢出聲又硬係唔敢出聲(所以大女先要咁強勢?),但佢係最合乎人性(現實)的一個,明明係老婆逼自己奉子成婚,咁結啦,就算未ready都頂硬上,到頂唔順時就攤牌,一下子俾老婆死咗,雖然唔想但都試吓做好爸爸,卒之唔得…佢有試喎起碼…好過媽媽睇唔開一野就死咗佢丫…

呢講開又講,之前話仔女們無啦啦叫三田做媽媽時,阿惠一O晒咀地問三田唔係呀fa時…三田竟然拎張簽咗名的結婚證明書出嚟時惠一個表情超好笑…(雖然後兩集一輪咀講啲人生大道理有啲煩)…

睇番維基先知呢個哥哥仔原來77年喎﹗(嘩﹗同安室17皇兄同年喎﹗繼67和79年的偶像後,我又開始儲77年生的偶像了﹗仲有松隆子呀﹗)之前一路做開舞台劇,近呢幾年先去做電視劇,唔怪得完全唔知佢係乜水啦…(哈…我貼得相…我想話佢個樣奸奸地得嚟幾ok喎﹗)((乜佢之前做開賤男角色的嗎?看來我一條龍mode有新target了…哈哈))

好啦…高收視的追完,要去追吓宮藤官九郎的新劇了﹗噢耶﹗~

劇集主頁 /  維基

(29/2/12後按:執舊文時睇番《外派員的條件》篇文,睇番三田和大前春子個角色性格和設定都幾似喎﹗)

03/08/15後後按:一條龍成功爭取:
[日劇]《11人もいる!》、《鈴木先生》、《セカンドバージン》

12 則留言:

  1. 呢套係唔錯, 但係真係唔係好明點解個收視爆到咁, 我理解唔到日本觀眾諗緊咩...睇到最後無非想知道三田點解有那一堆古怪的行為, 但到最後, 都只是故事一個, 無咩message, 個人就比較鐘意mother和マルモのおきて多D, 至少言之有物...可能我都係偏向鐘意睇D有D寓意或者睇完會有insight的作品啦...

    回覆刪除
  2. 我都覺得雖然個收視好爆,但LI套唔會成為到經典,成功主要係因為個人物設定(加選角)做得好,同埋早期個劇情真係估佢唔到(有邊個會諗到個長男真係會叫菜菜子除衫就除衫)!

    不過見到菜菜子終於洗走霉氣,之後多返佢D劇睇,都幾開開o既!
    講開長谷川, 我覺得佢呢個角色寫得幾好, 其實呢個人係認真過龍的人, 有幾多個人係有晒心理準備甘做爸爸, 同埋我都覺得個亞媽好自私, 丟地d仔女走左去死, 即係要個阿爸一世都遺憾..
    睇完三田, 我走左去睇長谷川初主役的, 我覺得好好睇, 劇情好有深度, 而且講得言之有物, 個劇本節奏掌握得幾好, 推介下!

    又, 睇左, ok唔錯, 廣末涼子依然美麗, 和童星對戲唔錯, 劇本唔拖戲, 仲過快添XD

    回覆刪除
  3. 打左符號被吃了劇名添
    "長谷川初主役的鈴木先生"
    "又, 睇左還有第11人"

    回覆刪除
  4. 睇完三田,對呀惠一哥哥,我都有少少鍾意咗佢XD
    第十一人我只看了三集,都努力補完中

    回覆刪除
  5. 《還有第11人》真係好好笑~
    神木隆之介好cute呀哈哈哈......

    回覆刪除
  6. 我寫完自己個總評先來看這一篇, 要跟你握手, 即使要被打, ”あなたは一人じゃない”.

    其實這一部收視可以咁爆, 我真心覺得日劇好悲哀. 除了三田好奇怪, 菜菜子做得不錯之外, 究竟有什麼賣點? 同makoto 一樣, 我理解唔到日本觀眾諗緊咩. 我亦理解唔到因為收視高而盲目追捧, 究竟有咩意義?

    回覆刪除
  7. まこと:
    同意﹗呢套係唔錯但唔係超好睇…初頭都唔明點解會咁爆,我自己估本身日本人講求服從性,所以會幾ADMIRE啲敢與眾不同的人…
    但看其他博貼的文,就都關311事,因為日人心靈受創了,希望有個強者出嚟可以保護自己和家庭,所以特別看得投入…
    加上這套是治癒女神菜菜子大變身之作,就再加上多啲吸引力…
    我同你一樣都鐘意睇啲有寓意和思考位的東東,呢部我諗都想表達家庭很重要甚麼的既,不過就不太投入囉我睇得

    回覆刪除
  8. 白鈴:
    人物設定加上演那個係菜菜子囉,睇啲評論文說,一來係菜菜子本人叫座力,二來是日人經過311之後好希望有一個咁神的人出嚟保護佢地,所以看得特別投入掛?﹗
    成套劇除了三田,我個人好鐘意爸爸條線,當然佢逃避又懦弱係好討厭,但起碼佢會試,又會諗,最後都浪子回頭丫…唔係好似大女咁想做就做(好了,佢細路女唔識世界了),害到爸爸無咗份工…
    媽媽更唔在講,聽番阿爸話佢當年用自殺嚟逼佢同自己結婚我就好反感…或者佢係驚爸爸唔負責任…但吓吓以死要脅都唔係路架…
    um,我聽你講去咗睇《鈴木老師》…果真是一套好野﹗

    回覆刪除
  9. 白鈴:
    呢個留言先講…
    《鈴木先生》我都幾驚訝會咁坦蕩蕩地講啲禁忌話題,喺香港真怕且第一集已經投訴都暈…
    同埋我好鐘意鈴木老師係同人傾,經討論和觀察讓學生有自己思考得出結論,唔係一刀切的叫佢地點做點做…有這樣的老師好幸福啊﹗(也其實可能好危險…)
    睇完小的又更欣賞惠一爸爸了…哈哈…

    回覆刪除
  10. 藍映 :
    來吧來吧來吧﹗繼17皇兄後,我要組織一個惠一爸爸後援會﹗
    《還有第十一人》大仔神木和細仔都好可愛…小的好快手聖誕假幾天睇完了…

    回覆刪除
  11. 火女:
    係呀﹗神木好攪笑…佢越認真地o咀我越想笑…
    (劇透:我以為佢老婆個肚係一場誤會…點知真係奉子成婚喎﹗)

    回覆刪除
  12. 紫熊 :
    就看評論說是311後遺症,大家都好投入希望有個全能的人如三田去守護自己屋企咁囉…
    會唔會係一開始追同我事後先睇有分別呢?我真係唔鐘意4個仔女頭3個成日喺度無風起浪,好鬼煩…
    小的鐘意《還有第一十人》的真田一家多了…呵…

    回覆刪除

要講幾句嗎?﹗XD