2010/07/26

關於運氣

無啦啦諗起,當年中化會話有條題目係《性格決定命運》,當時抽到即刻諗起我好迷既《伴我縱橫》入面,李修賢同郭城城講過一句:「做人既野,三分人事七分天意」…命運,好多時係講彩數,即係運啦…

(死啦,究竟係三分人事七分天意定係七分天意三分人事呢?但不知何解這句老生常談我特別記得《伴我縱橫》李修賢講過的那場…)

從小小的就不是特別有自信的人,於是很迷星座運程,跟足著乜野色既衫束怎麼樣的髮型希望可以升運,生怕不做足的話就會招黑運。很無聊吧?﹗哈哈。

活了這麼多年,開始覺得係性格決定命運,人生中有很多野係上天私人醒你的(例如…騎呢同事…我覺得上天對我實在太好了…囧﹗),但人生一個一個選擇環環相 扣,人生交叉點完,順心意既咪叫好運,不順心既就係黑仔囉。很多時自己會不自覺賴咗個天…唉呀﹗做乜咁黑仔架﹗就唔去諗番係咪自己做得不夠好,招致惡果囉。小聲說:小時讀書懶,派成績表前就望上天送我一個奇蹟…唔好紅色…唔好紅色…(怨念…)

常覺得我的際遇係「誤中副車」 命,讀書工作都如是,最恨入既總係入唔到,硬係差少少。當時梗係唔高興啦,總覺得個天在玩我…。唔開心係有既,但掉轉頭睇吓手上的offer,又係咪咁差 呢?總覺得運氣係相對,如果學懂釋懷失去的,又懂欣賞得到的,人自不然會開心好多,望望手上的…睇睇吓都幾好丫,事後就會覺得原來自己的運氣原來也不太 差。

其實…(又是)總覺得人家在怨自己運氣不好,遇不到好對像,找不到好工作前,在怨天怨地怨到一地樹葉的時候,不如反過 來諗吓自己這幾年來做過乜野選擇,怎麼會導致眼前境況…。即係呢(可能我是滿天真的…),失敗挫折既野人人都有,你睇我好我睇你好,唔通我份工做得唔開心 又日日同你呻咩…。失敗就將之當作上天俾個chance你停下來諗諗下一步應該點行,衰了一次就不要再衰第二次囉…。懂得反過來諗,人會開心好多的(可能 我真係滿天真啦…)

記得前司年代有個惡女無啦啦叫我幫佢chop相…天呀﹗我未掂過相片店架喎﹗你咪玩啦﹗佢一句到尾叫我 攪掂佢就算,那晚公司空無一人…小的邊摸相片店邊想哭﹗怎麼我會咁黑仔遇著呢啲賤人架﹗誰估到因為佢我摸吓摸吓懂了一點skill,會喺呢份工用得著…而 家睇番,遇著呢件惡女又可能係我幸運喎…(要唱番咀馬小生的《幸運就是遇到你》囉…)

真覺得天意既野係好神奇。有時形勢比人強,自己改變不了劣勢就試吓改變自己心態,輸人不輸陣嘛,死都捱到有光明既一刻﹗好野﹗

(各位要搵好路數既友好共勉之﹗yeah!~)

14 則留言:

  1. 我第一!我認為世上某些人真的是天生是極具運氣,旁人怎麼努力也比不上,沒法只好認命~

    26th Jul 2010 21:56 PM

    回覆刪除
    回覆
    1. 我呢度係唔使搶沙發架﹗
      我覺得個天好公平,看上去好似順風順水,但總會拎走你一啲野…同埋好多時你睇我好我睇你好咁,好多野暗啞底大家唔知既…
      (我咁諗會令自己舒服啲…條氣順啲,咪又開心啲囉…)

      27th Jul 2010 13:22 PM

      刪除
  2. 我由細到大都冇運氣架喎!抽獎一定抽唔到, 就算抽到都係十年抽到一次二百蚊咁大把的.

    老實說, 我又唔多羨慕運氣好的人喎. 我因為知道自己冇運, 所以做咩都俾十二錢肉緊. 咁都係得著黎0既.

    26th Jul 2010 23:24 PM

    回覆刪除
    回覆
    1. 我由細到大都無乜運既,12個人抽10分table prize我都可以唔中。不過好似你咁講,因為知自己無運行,所以會小心啲希望出少啲錯,都係一種得著嚟…

      你講完我諗起楊千fa十萬年前一首舊歌《繼續努力》…都講得幾中的…


      凡事格外出力 我這種小角色 欠缺先決運氣
      唯有對你一直專心努力 沒有權消極 我這種普通貨色
      笑我怎厚待你 算再費心力 不一樣的
      別人隨便做 便人人都愛慕 我用十倍的氣力來做
      若然還不好 就重頭深造 緣份繼續用努力補
      若得不到愛的分數 有點感動到亦算好
      功過 我不知道 也願勞力讓你看到
      沒旁門左道 沒迷人噴霧 " 努力 " 大概於我是全部
      並無其他好 為情人消耗 餘下那條路叫 " 默禱 "

      27th Jul 2010 13:25 PM

      刪除
  3. 我覺得一個人個心點諗,事情就會向那個方向發展的(係咪好玄呢?),但騎呢同事間間公司都有o架喎,點會遇唔到呢XDDD

    27th Jul 2010 01:04 AM

    回覆刪除
    回覆
    1. 係,好多野係取決你自己點諗,係好係壞真係無定論…
      騎呢同事啦喎…你咁講我個心又舒服多了…哈哈。(我是很會安慰自己的…XDDDD)

      27th Jul 2010 13:26 PM

      刪除
  4. 性格決定命運唔多唔少都有關係嘅!

    27th Jul 2010 15:03 PM

    回覆刪除
    回覆
    1. 一定有既,雖然話有啲野唔係人可以控制,但人做不同選擇時已令人生行向不同方向了…

      28th Jul 2010 13:30 PM

      刪除
  5. 好認同你呢篇嘅講法!

    有d事情,呢一刻睇可能係苦事,但再過幾年,可能係一個得著都唔定。例如篇中提到嘅相片店事件。正所謂「石頭他朝成翡翠」,做人係睇畏長線嘅。

    另外,點樣去睇一件事都好重要。杯水係半空定係半滿?要做手術鋸走一隻殘廢腳,係冇咗一隻腳,定係仲有一隻腳可以用?完全係視乎自己點去睇。

    下面有一位提到有d人一世死好命、自己點都比唔上云云。首先就唔須要同其他人比啦!二嚟,正如網主回應入面話齋,「好多嘢暗啞底大家唔知嘅」。可能睇到嘅只係人哋好運嘅一面,又或者,人哋前世係苦命都冇得再苦呢?

    仲有,我好相信,人生係「多咗d嘢就一定會喺第度少番d嘢」。例如我有個朋友,成日同我講佢某某同事一世好運,開會又唔駛點準備,又唔駛出trip,喺公司冇乜做嘢但又吃得開,然而我朋友自己又做到隻癲咁......我覺得呀,嗰個同事可能好想有貢獻,只不過無能為力,佢可能為自己工作能力不如人而一直咬牙切齒呢!

    27th Jul 2010 15:51 PM

    回覆刪除
    回覆
    1. 現實生活中的確有啲人工作能力超低,但又硬係死好運死唔去咁,雖然都覺得不公平唔抵咁,但係掉轉睇,就係佢廢所以無人敢俾重要task佢做,於是佢咪平平穩穩無事無幹又一day。只要這種人不是不自量力地有大野心,安份守己既話都ok既。外間好多野我自己控制唔到,唔抵得人又攪到自己唔開心,人生苦短,就算係唔開心都無理由為咗人家…特別係呢啲無能而又乞人憎既同事,所以我傾向相信上天係公平,人家有一方面優勝,一定有些方面係差啲…

      29th Jul 2010 22:13 PM |

      刪除
  6. 這個題目,其實很玄,視乎是廣義還是狹義。幾日前才聼到有人說:蠢人相信運氣,聰明人相信因果。Well, 如果要相信占卜命理,未嘗不可,但要信,要信全套,不能只選自認爲合適的才信,也當然不能作奸犯科。另外一個例子,買六合彩,是靠運氣還是靠實力?

    如果只買一注,當然是99% 靠運氣,但如果買14 百萬注,那就必中無疑,是"實力" 的表現!這正好説明,如果"實力" 不夠,總得要靠點運氣:)


    27th Jul 2010 16:08 PM

    回覆刪除
    回覆
    1. 咦,從前我很信命運,而家我信因果多啲…難道係我開始變得聰明﹗哈哈哈…
      其實我從來都唔覺自己係好有能力那種,只能將勤補拙,就係無自信所以希望可以除了努力外再多啲野確保成功,咁迷星座多多少少係求個心安…
      人大咗開始覺得好多野係自己做成,命運很多時係賴既藉口…

      29th Jul 2010 22:17 PM

      刪除
  7. 少少補充,好運氣其實係一件壞事。

    點解啲人會爛賭?因為第一次賭就嬴。點解啲人又懶又大駛,因為初初出嚟做嘢時揾錢好容易~~


    1st Aug 2010 21:14 PM

    回覆刪除
    回覆
    1. 都係,人年輕opportunity cost低啲,負擔又少啲,承受錯誤之後再改方向既能力都高啲…
      學柏芝話齋,犯錯梗係年輕時好啲,翻身都易啲…

      4th Aug 2010 12:05 PM

      刪除

要講幾句嗎?﹗XD