2006/12/26

心花怒放的容祖兒

欣賞容祖兒的新歌,是種久違多時的心情,聽到她新歌《心花怒放》,竟然(心中確係覺得「竟然」)幾好聽,那種感覺好像回到初聽她出道作《未知》時那種如獲至寶的感覺。

容天后的歌曲,本人唔多欣賞(或唔識欣賞)好耐了。

喺容祖兒等同K歌、慘情歌之前,而她的型像還未進化成性感女神(還帶點語無倫次)的年代,本人曾經頗欣賞這位愛唱歌但唔多靚的小歌女,曾幾何時她的《未知》、《這分鐘更愛你》、《痛愛》,後期點的《爭氣》、《Mad about U》、《舊日回憶的山丘》先後成為友儕K房大合唱必點作。當天后進化完成,本人無再欣賞過(或係唔識欣賞)。K歌,對幾千年唔入一次K房的本人來說實在不太需要。

常覺得容祖兒和古巨基有點似,出道初期形像很鮮明,歌曲標榜靚聲騷歌藝多於尋常K歌;當人/歌越來越受歡迎,眼光開始放係獎項度,歌曲越來越一式一樣…。走進死胡同後,巨基今年有張濃濃重生感覺的《我生》,總算將上年《星戰》帶來的恐怖感洗掉了點。容祖兒呢?當另一 慘情歌霸關心妍也來一首《玉石樂隊》轉新形象,容祖兒也有個《Ten most wanted》,不過個封面我就唔係幾want,主打的還是K歌。當然唔係話係K歌就唔好,只係當歌者唔甘心只做K歌天后,改曲風卻落得兩頭唔到岸,風格唔突出落得面目模糊的印象。到這次新碟《Close up》繼續洗K后的底,革命未知成唔成功,一首《心花怒放》確係聽得人幾高興。平衡新嘗試和顧及K迷需要,似乎她初出道的舊碟做得比現在好,容天后請繼續努力,以她的實力理應試更多和走更遠…

歌手洗底時,唱片公司也在洗底,捧了幾年唔知佢地想點的「偶像」之後,今年的重點新 人都以實力行先,先有現在已轉咗去別家唱片公司的胡琳(她的《自由像你》真不賴),後有泳兒(還有王浩信、梁晴晴和我唔知點歸類的Sun Boyz?﹗),橫睇掂睇泳兒都很有容祖兒初出道的影子,又是唔賣樣賣靚聲,以非K歌還帶點難度的歌作首支主打(《感應》VS《未知》),現在再來多首高難度改編挑戰(《花無雪》VS《這分鐘更愛你》)。容當年同期新人叫張柏芝--路線唔同到不能扯埋呢講,同類型新人少之下自然較易跑出。但現下偶像失勢, 近幾年唱片公司都努力捧實力新人,師妹前景未明,都係繼續努力。題外話,也許我被中島美嘉的《雪之華》洗腦多時,廣東版…反而唔係幾聽得慣和入耳…

曾幾何時她倆所屬的英記可謂點石成金,可以將反叛少年謝霆鋒捧成新一代Rock友,容祖兒成為K歌天后,Twins也許成為香港史上最成功女子組合,次次都"督"中niche market擊中年青人要穴。睇呢間唱片公司捧人真係幾好睇,但近年眼光就硬係唔知點…同時又有金記東記掘起…

講咗咁耐,其實我只聽過派台歌《心花怒放》…不過都夠我有感而發吹一下水…

Blog 友評論:
田中小百合 平淡的大雜燴
梳吉夫 Close Up/容祖兒

另一篇:容天后Paradox 
***************************
          心花怒放 容祖兒 
作曲:陳奐仁 填詞:周耀輝 編曲:Tim Ngoh for The Invisible Men 監製:The Invisible Men

平日我唱K歌 平日我有把鎖 還是我習慣獨個生活太耐 想你來釋放
一直等一種感覺 今天終於有點狂 不想正常 心花正怒放
春風給我按摩 彷彿有滿天櫻花抱起我
街燈使我發光 彷彿千百串煙花慶祝我 喜歡你喜歡我
其實試過很多 其實信過因果
還是我沒有學過享受愛情 想你來揮霍
春風給我按摩 彷彿有滿天櫻花抱起我
街燈使我發光 彷彿千百串煙花慶祝我
不必想到太多 只知道你的天花也親我
不必給我太多 請將千百紮心花送給我 喜歡你喜歡我
差些遺忘了快樂 差些從此專心工作 然後似瘋也像狂的拍拖

36 則留言:

  1. 曾經都幾鐘意聽佢d歌,不過哩兩三年真係聽唔入耳,去到the most wanted,己經同佢say bye...

    王浩信我覺得都ok,但定位又古古怪怪

    不如你去挑戰無記果個娛樂大決戰?:p

    26th Dec 2006 19:25 PM

    回覆刪除
    回覆
    1. 我係「心淡」嗰隻碟之後就無再留意,對上一隻真係有全隻聽的要數到去「something about u」…但覺得個封面唔多掂…
      總覺得啲歌太一式一樣,基本上呀水唱都可以
      王浩信我只記得他的「愛與被愛」,全因巴士地鐵全面轟炸…
      咩無記有啲咁既野?但呢期唔太得閒煲娛樂版,有少少脫節啦…

      27th Dec 2006 15:58 PM

      刪除
  2. 其實今年容的表現已經很想尋求突破,ten most wanted的跟珍芳達做健身操是其中一個突破,之後還有《情歌的情歌》,結合弦樂,好fit她的聲線。

    26th Dec 2006 20:18 PM

    回覆刪除
    回覆
    1. 「珍」一曲由本人極欣賞的范曉萱打造,不過為獎為銷量,這些歌只會成為滄海遺珠…
      可能係本人要求太高…我只好轉向她敵方的懷抱…

      27th Dec 2006 16:00 PM

      刪除
  3. 但係容祖兒市場定位始終係k
    佢唔可以太冒險, 玩得太激佢未必carry到. 最緊要果樣, 人地公司係搵錢行先. 你睇twins唱左咁多年都唱到咁爛就明... 好多野搵到錢就是王道

    我都係覺得佢仲係"鍾意唱歌", 但係真係未見到佢要"做自己音樂"呢個層次.

    一係佢好似楊千嬅或者hocc咁, 搵一個好了解佢o既填詞人, 咁歌詞入面佢自己o既原素會豐富返, 可能帶得出佢個人風格.

    講真果句, 我相信hocc係唱到容祖兒o既歌, 但你叫joey唱返hocc 果d勞斯萊斯呀, 佢唔得囉
    joey o既歌只係用來show off佢靚聲. 唔敢講佢冇用心唱, 但真係搵到個唱到高音o既人, 都搞得掂佢d歌囉

    26th Dec 2006 23:10 PM

    回覆刪除
    回覆
    1. 當同公司的謝先生結婚去也,twins銷情告急,容的銷量更不容有中失…
      她的風格真不及hocc或千fa突出,後兩者在創作時有加入自己意見(hocc直頭有作埋一份),歌曲度身訂造,唔係人人都啱唱。容給我的感覺就是有歌就唱,說不出甚麼個人風格,如果k都係一種風格的話,咁就係啦…但觀乎她的言行…又未去到可以以歌載道喎…

      27th Dec 2006 16:10 PM

      刪除
  4. To blue

    容祖兒聲底確係好聽, 不過走k歌路線很可惜, 可能現今社會就要這樣. 音樂我唔識欣賞, 不過有時填詞人寫給她的歌詞都幾好的, 但如Blue話, 可能填詞人不很熟悉容祖兒, 無法為她寫出風格, 又或者, 佢自己本身就不是很有經歷/ 感受豐富的人, 所以亦為她寫不出點什麼

    27th Dec 2006 11:53 AM

    回覆刪除
    回覆
    1. 詞人填給她的詞到肉極還是情情塔塔,總覺得這類歌阿水唱都可以,只是旋律方面有幾個高音位讓她顯功架。當市場充斥這類情歌,幾高難度都好過目即忘,可以成為長青金曲又有幾首?﹗配合她個人經歷的可能係前幾年的「爭氣」…

      27th Dec 2006 16:15 PM

      刪除
  5. 填詞人唔了解joey, 某程度上係反映佢同幫佢創作o既人交流不足, 對歌曲o既參與度不高. 其實去到佢呢個位, 要突破應該俾多少少, 唔應該繼續做d係人都唱到o既歌. 我諗佢要試下同班幕後多d交流, 參與多少少, 而唔係人地俾乜就唱乜, 做負責出聲果個就算. 不過佢間公司咁流水作業, 佢而家唱呢d又賣得, 佢公司未必敢俾佢take呢個risk...佢仲咁後生, 好應該俾佢試下丫

    27th Dec 2006 12:55 PM

    回覆刪除
    回覆
    1. 一年出三張碟(兩張廣東一張國語),時間這麼趕又如何交流,再加上要保持銷路,大路情歌就最有保證…

      27th Dec 2006 16:16 PM

      刪除
    2. 難聽d講句, 可能要等joey遇到低潮, 先會試試新野
      我都好怕d人一年幾隻碟. 外國一隻碟可以plug幾年, 不過外國環境唔同, market大
      香港做到一年一隻已經很不錯了

      27th Dec 2006 20:38 PM

      刪除
    3. 我都係,未消化完上一隻碟又出第二隻…我比較少聽外國歌,聽開jpop歌手通常都係一年一隻碟,多啲時間做歌又多啲時間比歌迷煲。
      太密,好多時浪費了碟內的好歌

      28th Dec 2006 13:35 PM

      刪除
    4. 初初古天樂唱歌果陣拿咪拿到手震
      你知唔知佢咁o既歌藝做乜都要出碟?
      咪就係因為要登台唱自己歌囉

      其實關於joey之前我都專文探討過, 有興趣可以睇睇大家討論下

      我只係打份工咋!


      28th Dec 2006 14:09 PM

      刪除
    5. 你呢篇文之前拜讀過,一萬個同意,佢呢個STYLE真係幾LOCAL…

      29th Dec 2006 22:31 PM

      刪除
    6. 係一個standard工廠模式
      我諗好多人都知joey個問題o係邊
      但同時有可能好多事情都唔係佢可以掌握之中
      始終每個人都有自己考慮, 未必可以滿足所有人

      30th Dec 2006 11:48 AM

      刪除
    7. 其實唔只佢間唱片公司,好多本地龍頭都係,始終市場細,要風格定係銷量,唔使問都知。
      悶歌一大堆之下本人唯有出走聽日文和台灣歌

      1st Jan 2007 16:11 PM

      刪除
  6. 當我知道歌手賣一張cd只可以分得$10,我就知道為什麼一定唱k歌,因為收卡拉ok的花紅好過賣cd.
    有時候為了食飯,沒有辦法.

    28th Dec 2006 00:59 AM

    回覆刪除
    回覆
    1. 好多歌手而家出唱片只係副業,正職係拍廣告/戲搵真銀
      k歌都有k歌既市場既,不過當太多似樣既充斥時就好想搵其他類型的歌聽

      28th Dec 2006 13:37 PM

      刪除
  7. CLOSE UP 她已經開始當監製
    卸妝心花怒放黃色大門這些都是她揀歌和跟曲詞人交流的成果

    28th Dec 2006 05:16 AM

    回覆刪除
    回覆
    1. 除了主打的心花怒放之外還未聽過其他歌,有機會會找來聽聽…
      我覺得joey可以更好,唔止而家的level

      28th Dec 2006 13:38 PM

      刪除
  8. 我唔相信hocc唱到joey d歌lor!

    30th Dec 2006 17:52 PM

    回覆刪除
    回覆
    1. HOCC把聲沉啲,音域無JOEY咁闊,呢個可以說是JOEY殺食之處,選曲上選擇多啲…但HOCC風格就統一啲,各有各殺著啦

      1st Jan 2007 16:14 PM

      刪除
  9. 我總覺得每個歌手都有自己的Selling Point,問題是你Buy或是Not Buy。好像從出道都現在,我也沒聽過Twins任何一首歌,但她們的唱片依然大賣。世界之大總有容身之所。

    在這也沒有對與不對的事情,反正音樂是主觀的。

    當然,我還是為容祖兒的求變而有點欣慰。變得好或是壞都未時候去定斷。

    30th Dec 2006 21:33 PM

    回覆刪除
    回覆
    1. 對,她入行都有一段時間,再唱著一式一樣的歌實在唔掂,或者呢兩隻碟係個轉型開始,即管走著瞧…
      只能夠講,她前幾年的大熱都唔係本人杯茶…

      1st Jan 2007 16:16 PM

      刪除
  10. 世上有不同的人, 要求都不盡相同. 所以每個人都有自己生存之道和定位.

    我都覺得joey肯求變是一件好事.效果未必一時三刻睇到, 但好過乜都唔做, 後生搖搖繼續k落去.

    可能我用"hocc都唱到joey的歌"表達得不太恰當, 不過joey一路唱的歌都不覺得是"非佢唱不可", 甚至沒有所謂"o岩唔o岩佢唱"這回事, 因為根本就是tailor made for karaoke. 我想這樣說會比較清楚吧

    30th Dec 2006 22:44 PM

    回覆刪除
    回覆
    1. JOEY把聲音域廣啲演譯唔同類型歌曲上係有著數,SEXY(唔係扮的)到型到CUTE都得,問題係佢掌唔掌握到同肯唔肯去試…
      HOCC歌曲類型上選擇可能少啲。不過想當年梅姐一樣可以整首CUTE到震的「床呀床」,要試,無話唔得既,問題係…有無咁既功力令出呢成件事唔恐怖囉…

      1st Jan 2007 16:20 PM

      刪除
    2. hocc呢種聲線唔係個個都接受到, 但好彩在有一班好好o既幕後幫佢, 搵到自己風格同定位. hocc都冇咩可能好似joey咁cute(佢自己都話小丸子令佢成為史上最老牛聲的兒歌女歌手), 把聲沉沉地sexy都ok. 而joey把聲有點像彭羚, 係classical靚聲女高音, o係流行樂黎講好多歌佢會受到, 所以條路易走過hocc好多.
      其實大家對joey的睇法是"恨鐵不成鋼", 並唔係睇死佢或專登踩佢, 事實上當年佢出道係靚樣偶像當道之時, 佢一出黎都算開創左實力偶像呢個局面. 早幾年佢捱過失聲(果期真係好慘,佢live唱自己歌都要降key). 而家靚聲返返黎, 佢handle把聲已經好圓熟, 只係希望佢唔好只係kkkkk, 唔好浪費自己靚聲, 做多d野.

      1st Jan 2007 20:42 PM

      刪除
    3. 係啦,就係恨鐵不成鋼,歌係唱得好,不過曲風唔係本人杯茶,所以聽到呢首新歌會有咁大感概﹗
      我覺得小丸子的心事得喎﹗當年梅姐都有首iq博士啦﹗
      我反而欣賞hocc唔走大路路線,她第一張碟我就有幫襯啦﹗只覺得歌路上她做到個人風格,但型像總覺得好梅姐…

      4th Jan 2007 12:04 PM

      刪除
    4. 如果hocc學人走去做糖衣偶像我根本就唔會buy佢啦(講開我懷疑緊係咪成個仙奶國得我一個瘋狂hocc fans, 事關黎左咁耐都冇見過其他fans. 我諗其他fans應該都走晒去yblog開檔睇佢個blog)

      佢由細到大都咁崇拜梅姐, 大左又做埋佢徒弟喎, 好難怪
      我諗佢都不再在意人地是否覺得佢梅姐上身, 反正佢身上都有梅姐血了.
      我覺得佢係呢兩年轉左會之後先想到要嘗試繼承梅姐o係舞台上的華麗風格, 所以梅味係重過以前

      4th Jan 2007 13:39 PM

      刪除
    5. 哈哈,唔緊要,仲有我﹗但不能否認我欣賞hocc多多少少係因為梅姐,本人幾歲就迷上她,跟住一齊why why tell me why,hocc,係愛屋及烏,情況如同草蜢,因為係梅姐徒弟所以自動加分﹗~
      同埋,本人極偏愛華星幫(之所以本人如此欣賞千fa),同時對某公司公廠式唔知點分類偶像產物極討厭,上文無點名添,哈哈
      當然歌路都好重要,頭兩張碟之後停了一排無聽,到「艷光四射」再先再有幫襯hocc,勁欣賞當中「如無意外」,每次聽到本人好感概…梅姐啊~看到hocc今年終於登上女金,真係感動得眼濕濕…

      5th Jan 2007 15:43 PM

      刪除
    6. 原來你係梅姐fans

      如無意外你識貨喎, 呢首係寫俾梅姐的說
      佢演唱會彈孤身走我路, 完了繼續自彈自唱孤身走我路, 真係勁感動的說!!!!

      雖然都明知d頒獎禮係分豬肉, 但見到佢有金, 真係開心到我, 睇左佢咁多年終於出頭了, 太感動啦~~~~~

      不過你講開華星幫, 我擔心千嬅跟左黎明之後會點, 觀望中

      5th Jan 2007 17:38 PM

      刪除
    7. 唱比師傅的歌,容祖兒都有首「最後一課」,佢係演唱會唱時睇到我都眼濕濕,和「如無意外」一樣,都係好感動的說…(雖然我係被逼睇那個演唱會…)
      叱吒之後,我諗港台和無記的女歌手獎還是容的天下,就讓hocc開心吓吧…
      希望千fa能保留現在的創作班底和風格啦,想她金牌年代都能keep住,見岳少咁認真開記招又大手筆轉會費,我諗老細和千fa都唔想打爛自己招牌吧…雖然唱歌出唱片搵得唔多…

      8th Jan 2007 12:48 PM

      刪除
  11. 唔知你地有冇CLOSE UP呢?
    其實JOEY今次係做埋副監
    入面有D歌仲係講佢既感受
    今次CLOSE UP入面有D歌頭一,兩句反而低音D既
    HOCC我諗佢唱唔到JOEY D高音,就正如JOEY未必唱到HOCC既低音一樣,right?
    上次tmw一半商業一半唔商業
    但係今次close up就好唔同,今次真係做到張好碟

    不過都係我個人感受,未必個個都覺得好既XDDD

    31st Dec 2006 01:45 AM

    回覆刪除
    回覆
    1. 我未聽過呢隻碟,所以文中感受只係「心花怒放」聽後感而已~
      一個歌手要成長,轉變是少不免,喜見她嘗試不同曲風…
      更令本人欣喜的是她形象上改回自然風,老實說那個性感女神look很看不慣(就本人而言)

      5th Jan 2007 15:48 PM

      刪除
  12. 快歌ok喎joey, 喜喜唱disco是一個不錯的嘗試
    慢歌黃色大門不錯, be true(有少少似世上只有)和蒸餾也ok的
    華麗邂逅就比較悶, 不如換過第二首做主打啦
    最驚係如果睡袍太少布, 完全唔得, 我諗佢未到果種風情萬種的年紀, 只能令我想起一個小女孩著米奇老鼠睡衣扮葉玉卿...不過試下都係一件好事, 試多d先知有乜可以o岩自己, 反正今次隻碟都有好多k歌托住, 試少少新野不會太影響吧

    hocc真係唱唔到joey d超高音, 不過高低音問題可以用轉key解決. 我說的"唱唔到"不是指技術性問題, 而是歌的獨特性.
    不過諗諗下joey唱"願我可以學會放低你"應該係ok(當然係要轉key); 掉轉如果hocc唱"一拍兩散", 我諗我唔係好接受到...

    31st Dec 2006 12:05 PM

    回覆刪除
    回覆
    1. 留言時差回覆:

      《喜喜》我到而家都未聽過喎﹗
      又說睇番呢篇文,其實容天后近幾年都係一個FORMULA:一快一慢主打,快歌會玩野啲,慢歌就SAFE去搶獎…如是者年年拎女金…有啲悶啫…

      刪除

要講幾句嗎?﹗XD