2006/09/21

見工血淚史

每每在街上看到身穿整齊行政套裝的少男少女,我都不禁猜他們這一身打扮的原因:見工(一年三百六十五日都有人見工既…)、present(做功課,何解硬要我著suit?)、上莊(一班身穿整齊suit的茂理在校園大呼大叫,奇景﹗最奇是我都曾置身其中做此等傻事…)…。因為呢三件事,我買下人生第一套套裝,穿上身像老了廿年的阿婆,後來成了見工戰衣;說到此時不禁回想起本人畢業以來見工搵工的點點滴滴,在此就分享一下本人失敗(搵了一個暑假依然雙失)和成功(最威一次只搵了一個月,仲要有兩個同時心儀的offer…嘻嘻)的經驗…

以下是本人由interviewee而不是從HR角度出發,有血有淚架﹗

事前功夫

寄出Resume & Cover letter一刻戰鬥就已開始,兩份文件造就人家對自己第一印象,一定唔可以鬆懈。Template在網上或圖書館有很多,但切記唔好整篇照cop,話晒你search到人地都search到,行街撞衫都夠尷尬死,何況兩份一模一樣的resume。當年本人就找來幾個文句唔錯的sample左一句右一句的加加減減,砌出一份有自己特色的出來,用字太深或太浮誇一呢影響自己形象,二來如果如做筆試interviewer看見你寫唔出resume中的文筆就穿煲。

Resume當中介紹自己往績學歷威水史固然重要,當年本人以口水多過茶的風格老吹了三版紙,完全悶人至極,一直覺得係畢業後搵工反應一般主要成因。後來大刀闊斧cut短description,主打具體(記著要具體)的描述自己的經驗如何配合申請的職位,篇幅為兩版紙(據tutor說resume最佳為三版紙以內),加點顏色(顏色忌太鮮艷粉色要穩重至上,有需要可以表、列點表示,總之簡而精)。詳細內容嘛?見工時問吧,呢招叫欲擒先縱,留點想像空間,而且HR人每天收的resume多不勝數,他們那有時間細閱所有的豐功偉績。如有的話就insert一張影得閣下極成熟穩重的相(Yr.3一開學就影了張著suit的三七分面相,好殺~),好多公司請人有個格,一來可以比人家screen吓,若他們真的叫你來面試那成數就高得多;二來…靚人有著數,這是悲衰但真確的事實。

Cover letter都係簡潔有力的sell自己,最緊要唔好copy錯公司、職位、編號,加埋招聘廣告出處咁就very good。最尾寫清楚自己contact方法,等HR大大有興趣見你時省卻再搵聯絡方法的麻煩。當年本人每次都是send email求職,基本上好少寄信,但我想現在甚麼都e的世代有人唔怕麻煩寄信反而可加點印象分吧?

說起醫貓,平時fw來fw去署甚麼名貼怎樣cutie的簽名檔是個人自由,但寄求職信就改個正經的名字拎走那些符號、蛇蛇好了,那麼cutie可會是值得信賴之人?天曉得。

見工前

Send了大堆申請出去,一收到HR大大的來電自然高興得飛天﹗有得in即係有機會嘛。但不要太興奮忘了寫清楚時間地點,好些公司位處同一幢大廈幾層,那層才是人事部?去到才找就花事間了(有些商廈的老爺電梯慢到行樓梯會更快);同時可以plan路線圖,安排好搭車路線(計埋塞車時間),若是去些山卡啦咁遠的工廠區就索性印埋個中X地圖,要不然找來找去浪費時間之餘還弄到自己一身汗,影響儀容嘛。

面試之前一晚無論幾眼瞓都要係咁二做點資料搜集,最低限度上網看一看有關新聞和人家公司網站,記一下基本資料如分店、代理、產品或廣告內容等。係人見工時都話自己對人家公司有興趣,但一樣半樣有關資料都講唔出就有興趣極有限吧。(本人樣衰經驗:講錯公司名和講唔出最新TVC內容…)太深入認識就未必要,但基本的就一定要有,唔係可以返屋企瞓覺。

想男生多數都係西裝一度就可起行(請暫時放棄外星撤亞頭,夾埋西裝好得人驚)。女生的造型千變萬化,複雜點,基本上都係簡單唔好太多飾物(哈,本人就無咩,不過係唔捨得染番個黑色頭…);女生為見工而買衫是個絕妙的購物藉口,穿新衣唔係問題不過要穿得自在才好,否則不停左拉右扯就煩,不如找件舒服又穿得你有自信的好了;本人不幸總在夏天出動搵工,大熱天時實在頂唔順一件厚厚的suit,所以通常以twin set襯西褲,如地點是方便的商業區,就索性在商場洗手間換衫,總之唔好令戰衣一股汗臭。而手袋內永遠備有可伶X俐潔顏綿乙包,此物乃改頭換面必備之物,溶妝、造型太誇、一身汗味就即時用來抹抹refresh一番。當比預約時間早了到公司時(這是必然的啦)就趁機到洗手間執好眼耳口鼻,順手在步行途中可觀察下在職員工的style,做點心理準備。一身打扮永遠over好過under,我就試過因為面試之後返part-time,斯文上衣暗藏彩虹belt乙條,最慘係比個interviewer見到,見唔成之餘仲要被他(佢係大學師兄…)語重心長的「訓話」一餐…瘀到死;太斯文的話就在second in 時down dress一點好了。

最後就是執好見工file,十間公司九間都要填form,更會要求應徵者學歷/工作證明、相片等,再帶定原子筆、塗改液,分門別類放好,人家問起不慌不忙的拿出來,多優雅﹗

見工

進入會議室(多數都在會議室吧?)先set好自己坐姿,微微向前傾唔好整個背脊癡實椅背,睇書說這樣表示你願意主動拉近和HR大大的距離,令人覺得你有熱誠;著裙(著褲也可以)就蹺腳坐,這樣令身體無咁容易放鬆”pair”起來;雙手放係枱面,可避免雙手放係枱底因緊張而搵野攪,而且一邊講野一邊加入適當的手勢可加深人家對你的印象,不過要適可而止。

面談問題十條有九條是考急才,本人被問得最多的有:

試簡單介紹自己?

簡單好啦,唔好成份resume背晒出呢。通常HR大大係你講野時邊聽邊睇resume搵野問,所以要忠於resume免得自相矛盾(所以resume簡單就最好,唔怕臨場發軟蹄忘了自己寫過甚麼,基本上我每次都係臨場重新演繹)。不幸遇著成績麻麻或之前份工做得短/轉工密就要諗定原因兜,本人就被問了幾十萬次為何兩年轉三份工?哈。

所說的經驗/興趣和能力都要合乎申請職位所需的條件(有需要還要舉例說明之,若說自己愛看書要預備定幾個業界權威著作或名家書作了),其實即係sell自己如何合適,千萬唔好講唔關事的行街睇戲食飯,除非應徵生活版記者。

你點解有興趣我地公司?/你對我地行業有咩認識?

若然有講過「有興趣入呢行」或「我對你地公司有興趣」大大就一定問的問題。所以一定要上吓網做吓research。根據當年老師的講法,應付呢類問題就以倒三角形式,首先概括的summery,之後挑一兩樣自己最熟的來舉例詳細說明;如果真係唔太熟要認低威不要胡亂老作,一來笑死人二來表示自己虛心學習,前提是唔好一樣都講唔出。

試講述你三個缺點?

三個缺點即係三個優點,主打都係掉番轉sell自己;例如自己太追求完美主義(即係讚自己要求高)、太近死線交貨(都係讚自己要求高)、唔識同人相處(律己和待人都嚴,又係讚自己),最後一句"但係3年大學生活/上一份工令我學到如何同人相處…"等等兜番話自己已改善咗之前說的缺點,再讚多次自己肯改肯學。

你仲有咩問題?

唔好睇少呢個問題,死人都要問一兩句表演自己如何對個職位有熱誠,例如"這職位/行業前景如何?"、"這職位主要職責?"、"貴公司有何發展大計?我做到這職位後可以點樣幫助公司發展?",總之關於份工和公司就行。如果之前有關公司/職位的問題答得唔好,呢個時候可以問返大大,志在顯示自己是個有頭有尾會follow-up和改進自己的人。

最驚的一次,個大大問我「比三個原因我點解要請你?」,以本人一般的急才就答了「肯學肯做肯捱」,哈哈,而家請新界隻牛咩?﹗

現在的HR大大除了廣東話對答更愛英文普通話發問,時人時事的英文就要留意一番(珠三角的英文名…真係要搵啊);普通話難度更高,就算答得甩甩cut cut,起碼自己名字、學校學科都要讀得好好睇睇,否則他日請了你怎handle祖國同胞?

事後

呢個又係tutor教,萬試萬靈。話說in完後禮貌的多謝大大給自己面試的機會,再乘機向他們索張卡片,返家再睇求職網前send封thank you letter給大大,再一次多謝面試之餘又可以sell多次自己,內容不外乎覺得面試好fruitful,令自己了解公司/職位多咗,同時自己真係好有興趣呢個職位,希望再有面試甚至共事的機會。禮多人不怪,send個email又唔使錢,就算first in後無下文亦無損失。
--------------------------------------------------------------------------
三份工的見工經驗交織的血淚史未寫得完,想到再續…

23/1/14後按…確係有續篇的:
見工血淚史 之 3 年下篇
見工血淚史 之 2 年上篇

30 則留言:

  1. 原來見工係咁煩架!^^

    21st Sep 2006 19:01 PM

    回覆刪除
    回覆
    1. 係啦…我都覺…

      22nd Sep 2006 09:27 AM

      刪除
  2. 总结的好啊,对正在找工作的人一定有很大帮助。

    最后的“事后”后续工作,往往被人忽视。但那很可能就是将你和其他申请者区别开来的关键一点。除了写些感谢的话外,还可以就你在interview中对该公司的了解,谈一点自己的设想,如何把工作做好,怎么帮助公司发展等等。。。。。

    这说明你对该工作的确非常感兴趣,也说明你是一个主动型的工作者。


    22nd Sep 2006 12:43 PM

    回覆刪除
    回覆
    1. 又唔係主動既,不過失敗得多就檢討吓自己做過甚麼樣衰野…唔係成世都搵唔到工就大件事﹗

      24th Sep 2006 20:08 PM

      刪除
  3. 你的親戚18/5/12 10:24

    勁野!你不愧為我最敬佩的長輩, 呢篇成3版A4都O黎緊經驗之談都寫得出, 真係犀利!

    22nd Sep 2006 13:03 PM

    回覆刪除
    回覆
    1. 我的親戚,如果我無估錯的話我大你一年咁大把,長輩好似太嚴重喎…
      有mood起上呢可以再寫,四版都得﹗哈哈哈

      24th Sep 2006 20:12 PM

      刪除
  4. 早d見到你呢篇就好,想當年我d見工經歷真係有血有淚但又笑死人,完全冇技巧冇準備,結果咪冇人請咁滯囉...

    22nd Sep 2006 13:16 PM

    回覆刪除
    回覆
    1. 我都係,好彩的interviewer唔當面串都好啲,當面串真係瘀到想搵"lone"捐…

      24th Sep 2006 20:13 PM

      刪除
  5. 寫得十分好,很實用,很值得見工的人一看。Good!
    謙虛中見自信,這是最難的。

    22nd Sep 2006 21:06 PM

    回覆刪除
    回覆
    1. …我中學的社…就係叫"謙"…哈哈哈哈

      24th Sep 2006 20:14 PM

      刪除
  6. SILLY FEI18/5/12 10:25

    寫得好詳細啊!
    我見工果陣系:緊張中見浮誇。

    23rd Sep 2006 21:06 PM

    回覆刪除
    回覆
    1. 我係緊張中見樣衰,又其是英文答問題我一定講到亂晒龍

      24th Sep 2006 20:14 PM

      刪除
  7. 你好, 第一次來參觀, 這一篇文章實在好, 很有用啊!

    25th Sep 2006 20:32 PM

    回覆刪除
    回覆
    1. 歡迎光臨lor!!~
      哈,係有感而發吹一吹…見工真係幾慘架

      26th Sep 2006 18:07 PM

      刪除
  8. 讓我補充一項:
    盡量爭取面試時間。如別人約了你後天下午或放工後面試,你可以打電話嘗試再約早上或早一日面試,更應提出充份的理由。此方法既能加深印象之餘,亦令人覺得你是靈活變通、積極主動和分秒必爭的人。而且,面試更能排在其他對手之前,爭加優勢。

    26th Sep 2006 13:37 PM

    回覆刪除
    回覆
    1. 你的補充令我諗起一樣野:
      日本人重視時間觀念,我就係因為做緊的工作突然要開會抽唔到身見工,打電話改遲一日in,心知不妙,最後in的過程沒有出甚麼大錯但都沒第二次in機會,我想是改時間影響了印象分呢…
      26th Sep 2006 18:09 PM

      刪除
    2. 改時間一定要改早,不要改遲呀~試想想,別人把你的約會改遲了,即表示不太重視你吧!

      其實,我試過兩次這樣做都被取錄。本來他們是約我放工後見的,因當日下午至夜晚都要去會展當值,我主動再約當日中午,那個老闆也特地回了公司見我。在往後日子裡,原來那個老闆在白天是很小露面的,通常夜晚才回公司。當然,如果別人的時間不能改動也沒辦法了!自己執生吧!

      日本人的心態我也很了解,在日本公司打工要有心理準備,他們有很多不明文的規條,香港人未必會習慣。

      26th Sep 2006 20:58 PM

      刪除
    3. 唉…就係改遲…死得好慘…
      謹記你的意見~也許第時用得著呢~~嘻嘻

      27th Sep 2006 11:21 AM

      刪除
  9. 約你面試的人,多數也是和你 1st In 的人,加深好印象是必須的。如是普通公司,他們更分分鐘是你的直屬上司或老闆。有些上司便愛這樣測試見工者的態度和誠意。

    26th Sep 2006 13:51 PM

    回覆刪除
    回覆
    1. 咦…這個我又沒想過…
      我反而係諗會唔會有啲公司唔鐘意應徵者成日改時間…

      刪除
  10. 乜原來而家見工咁慘嘅咩?老點工作咗三十多年,而家無做嘢啦,不過就從來都未有見過工嘅,原來而家揾份工就真係咁悽涼嘅咩?我地果陣時有一句話,就係博士碩士都不及人事吖嘛,你話如果而家叫老點去見工揾嘢做,就一定"衰硬"都得啦,係咪?不過你而家寫哂你d獨門"秘笈"出來,第日如果你須要見工果陣唔係......

    26th Sep 2006 14:29 PM |

    回覆刪除
    回覆
    1. 唔怕,以上係本人做新鮮人時的經驗,而家打滾咗幾年,第時要見工時就唔係被人問啲咁green的問題了…

      26th Sep 2006 18:10 PM |

      刪除
    2. 到時可能你己經做咗人事部亞head都唔定啦,見工嘅嘢就留番俾下邊d"細"嘅去做都得嘅,係咪?一於咁話!

      26th Sep 2006 19:15 PM

      刪除
    3. 哈哈,承你貴言
      我都等緊有一日自己做大時人做細,等啲細既做我而家做緊的二打六腳色~~哈哈哈


      27th Sep 2006 11:18 AM

      刪除
  11. 亞扁媽媽18/5/12 10:28

    做好自己本分是自己能控制的事,HR那邊有個甚麼人來見你是你控制不了的事,所以要接受天時地利人和的因素,不要因為自己控制不了的因素導致的失敗而灰心,這是個必備的心理質素;況且,不被委任不代表你不好或者是不夠好,只是不適合,或者是有人比你更適合而已。

    26th Sep 2006 16:04 PM

    回覆刪除
    回覆
    1. 的確唔到自己控制,最初自己好在意得失,有機會見心儀的公司開心得不能自己,得知落選後唔開心到喊呀…
      慢慢先識得睇開啲平常心面對,唔太在乎反而會有意外收獲

      26th Sep 2006 18:12 PM

      刪除
  12. 亞扁媽媽18/5/12 10:32

    忘了提醒一句,見工那天早晨多喝水,有些人因缺水而產生口氣,一開口就令人印象深刻!(吃香口膠無用,因為由體內釋出。)

    27th Sep 2006 16:59 PM

    回覆刪除
    回覆
    1. 呢個值得留意
      其實見工之前飲汽水或凍啡/奶茶都好易有口氣,都係飲水好啲

      29th Sep 2006 09:51 AM

      刪除
  13. 唔知幾時有篇請人血淚史呢??

    我睇到幾個錯字,我估你唔會用中文寫app letter掛。

    CO2


    28th Sep 2006 00:34 AM

    回覆刪除
    回覆
    1. 請人呢個要等吓先喎…
      umum…錯字乃本人死穴也…你估中我係用英文,貪有spell check麻

      29th Sep 2006 09:53 AM

      刪除

要講幾句嗎?﹗XD