我們的九十年代~2

一不離二，二不離三，繼續數。

42.《Especially For You》
每日放工放學，都會聽到電台熱播Jason Donovan與Kylie Minogue這首合唱love song。

咦，乜這首是90年代的歌？我仲以為係80年代添…我是前兩年某次喺有記度睇到，覺得好好聽就愛上了。少聽洋樂的我一路都唔知Kylie是誰…直至佢2000年代復出那個泳衣拗腰廣告…oh…澳洲小雲雀就係佢…囧

43.《無人駕駛》
「喂，我打通咗呀？阿邊個，我……」嘟一聲，唔好意思，因為你爆粗。商台晚間節目，任你噏冇主持。

我諗我係90年代成長的小孩中少數完全無受903薰陶？﹗我是聽RTHK大架，當年好鐘意《倫住嚟試》、《娛樂滿天星》等，903的廣播劇和DJ我都聽不入耳…奇哉…。

44.飯島愛
有「T-back女王」的稱號，成為首位成功打入藝能界殿堂的 AV女優，可惜紅顏薄命。

記得陳天后細佬陳B翰有首《愛與和平》(有誰會記得佢唱過乜歌嗎？﹗)，入面有句歌詞係「聽說有個女優吧，示範傾倒所有愛，嬴盡喝采」…UMUM，由那刻開始我就留意到世上有個人叫飯島愛了。

45.周華健
情越濃越會化不開，香港仔台灣成名，光榮回歸，唱作皆能，氣勢直逼四大天王。

《濃情化不開》個廣告(應該係金行？﹗)女主角好似係醫生嫂喎…。BTW，這張碟我有買，好好好好好聽。不過當年我咁熱愛周生又唔係趕潮流呢，因為佢有份主唱古版《神鵰》的主題曲呀﹗嘩哈哈…(迷偶像迷到愛屋及烏的最高境界…)。實在那個年代四大天王咗幾年，大家都需要一點新衝突打破吓個悶局…

46.傳記片
呂良偉增肥40多磅拍《跛豪》勁收，掀起風雲人物熱，藍江傳雷洛傳新哥傳奇陸續出籠。

《雷洛傳》因為有郭城城演出所以我看得特別著迷…，至於其他的《藍江傳》(哥哥﹗)、《新哥傳奇》就沒有太大印象。《跛豪》沒看過，但就記得呂生有個cm度講「增肥四十幾磅？﹗為部戲囉…」(還是難忘Mofork囉…哈)

47.《新不了情》
當廟街歌女遇上霉音樂人，靚靚和青雲狂放催淚彈，靚靚的死此刻我仍揦住揦住。

呢部太慘啦，都係睇《金枝玉葉》笑吓算啦…

48.碧咸與辣妹
萬人迷球星離奇娶了當紅女子組合Spice Girls成員Victoria為妻，令萬千少女心碎。

其實碧太初初喺Spice Girls度我覺得佢好型好cool架(有點像Speed裡的上原多香子)，只係後來個形象越攪越得人驚…囧。碧生呢…我鐘意劉華染金毛扮佢(是《賭俠1999》？)…哈。我不是英格蘭粉，一路都唔太欣賞碧生的說。

49.《風雲》
馬榮成漫畫，曾改編成電影，鄭伊健飾演聶風，郭富城扮步驚雲。人人褲袋梗袋一本，潮流標誌。

「平地一聲惹風雲，誰是結局誰是因…」…呢套戲第一次睇就勁鐘意，despite我完全無睇過原著喎﹗所以孔慈本身唔係雄霸個女根本唔重要…btw，當年我是欣賞風師兄(弟？)的。十年啦，十年後先上續集…兩個主角都快成中年阿叔了…(人生有幾多個十年呀﹗)

50.湯漢斯 VS 丹素華盛頓
兩個 90年代多產荷李活巨星兼票房保證，湯漢斯連續兩年封影帝。兩人曾合作電影《費城故事》。

唔知點解初中年代我買了本《阿甘正傳》英文小說來看。(是第一次買英文小說吧？﹗umum)

51.《人鬼情未了》
男女主角玩搓泥的場面固然經典，主題曲《Unchained Melody》亦成為金曲。

我…可以說…我覺得《家有喜事》的「巴黎鐵塔反轉再反轉」更驚典嗎？仲要咬斷咗隻手既手指公…(笑死我了…)

52.松松姐姐
就算是 80後，都是聽松松姐姐的兒歌長大的。《烏卒卒》、《小白船》等等，多麼懷念這些兒歌呀！

講起松松姐姐的名曲點能夠唔講TBB兒童節的多年主題曲《夏季sha la la》呀﹗佢真係由細陪到我大…多謝你呀，松松姐姐，仲有譚玉瑛姐姐，仲有黎芷珊姐姐…

53.《強姦》系列
三級片成風，《強姦》系列馬德鐘舐朱茵面珠令人毛管戙，王晶也打造《赤裸羔羊》邱淑貞。

睇完《制服誘惑》之後我見親馬德BELL先生的演出都覺佢其實演緊變態佬…。《原始武器》更令我邊睇邊笑(身邊的朋友相信都聽過我介紹劇情之爆吧﹗真係多得電影台唔少)，當然爆極都爆唔過邱小姐的「赤裸我思緒走進火焰裡…」…更估唔到呢啲咁惹人想入非非的歌詞係黃凱芹先生填架囉…

54.Marlboro Red Hot Hits
萬寶路贊助唱片公司炮製合唱歌，華星《火熱動感lalala》鬥寶麗金《熱力節拍 wo bum ba》。

萬X路Red Hot Hits簡直係我等的集體回憶﹗入K場的破冰之選，實有人識唱架嘛。不過呢，《火熱》出先，之後先到《熱力》，其實不存在「鬥」呢回事喎。不得不提當然仲有95年的《打開天空》…「似高高低低飛奔的天馬…」(我諗起「男人心一字馬…」)，陳天后一支獨秀，兩位陳生影都無的說…

55.林憶蓮 VS 葉蒨文
梅艷芳引退，兩女各領風騷，當年《愛上不回家的人》惡鬥《祝福》，憶蓮輸咗最受歡迎女歌手。

唔知點解我一路都唔多鐘意葉莎莉的…我諗我只鐘意佢一首《信自己》…

56.美琪賴恩
憑《90男歡女愛》成為 90年代的愛情片天后，《一切從失戀開始》、《緣份的天空》一樣勁冧。

我也沒看過愛情片天后的片喎﹗反而很喜歡湯寶如既《緣份的天空》。仲有那水很多港片港劇都係《一切從XX開始》的…

57.曉格蘭特
94年憑《四個婚禮一個葬禮》奠定影壇地位，翌年與黑人妓女當街發生車震事件，成為全球笑柄。

又要扮獨特了…我也是沒看過呢個哥哥的片…(《九月之癢》囉？)

58.《鐵達尼號》
Jack和Rose在船頭張開手，和「You Jump,I Jump」的對白被抄到爛。

生平第一次入戲院睇同一套戲三次﹗(其實…《功夫》和《蛛蛛俠2》我都睇咗三次…都係入戲院…)仲癲到買晒所有雜誌、特刊、《電影雙周》、卡、相、碟…乜都買…瘋了。十年前二人年青少艾激情似火，十(多)年後《浮生路》再相逢，演一對年青夫妻同樣令我看得入神…啊…大家都長大了…

59.《本能》
就算當年號稱荷李活最昂貴的電影劇本，也震撼不過莎朗史東在鏡頭前蹺腿的真空演出。

我又無睇過喎呢套戲﹗可以說我印象最深係《逃學威龍三之龍過雞年》入面梅姐扮沙姐嗎？﹗哈…

60.茱莉亞羅拔絲
90年的《風月俏佳人》令大口茱麻雀變鳳凰，勁有觀眾緣，成為 90年代電影票房當紅炸子雞。

《Pretty Woman》我有睇過，不過我鐘意《家有喜事》多啲…入面阿歡見到荷里玉時要化身Richard…就用箱頭筆畫件西裝…好好笑… 

61.《虎膽龍威》
89年的《虎膽龍威》令布斯韋利士成為港人熟識的動作巨星，之後的二、三集一樣大收。

和《龍兄鼠弟》那些港產片有關係嗎？﹗…對不起，這個系列我沒看過…

62.占基利
《神探飛機頭》令占基利被封西洋版周星馳，連星爺的《百變星君》也向其《變相怪傑》取經。

《飛機頭》我笑到死咗…癲架…。BTW，《百變星君》很爛…

63.吳剛
每年《歡樂滿東華》，吳剛師傅食炭飲滾油心口碎大石，全身油令令，不過好多人懷疑係假。

每次睇都令我好唔舒服…通常我都轉台的…

64.《Yes!》雜誌
因為電台節目《三個寂寞的心》誘發而誕生，《城市驚喜》吸引萬千少女狂影沙龍博刊登。

我真係keep住本90年代的《No﹗》雜誌呀﹗好驚。呢本野既影響力除咗書本身，仲有一條龍的 廿's咭 和Idol雜誌，真係使咗我唔少零用錢架﹗

65.《我和殭屍有個約會》
「臨，兵，鬥，者，皆，陣，列，在，前，諸邪！」驅魔龍族後人馬小靈忍着一泡眼淚捉殭屍。

其實我無追晒成套劇，不過呢個題材幾新鮮的(無記都有，不過都係民初片，如《大頭綠衣鬥殭屍》--鄭天后和錢小豪﹗，同《殭屍福星》--譚小環和陳妖lone)，況天佑當時在我校仲相當有人氣添﹗馬小玲喺男生界就唔在講啦﹗(31/1/12後按：後知後覺的我終於睇了第一和第三輯，第二輯就無乜心機睇了…)

66.《尋找他鄉的故事》
熟悉的音樂配上鍾景輝的旁白，觀眾便能感受到海外華人的艱辛。亞視節目終於發威。

我娘有睇，我沒看過…但記得有人send過個鍾Sir的旁白鈴聲，很爆笑的…

67.《陰陽路》系列
《陰陽路》開闢發財路，導演由邱禮濤變南燕，首部勁賺6百萬到越拍越爛，龍婆與你常在。

頭幾集因為有古天樂關係我係有硬住頭皮去睇架…

68.濱崎步 VS  宇多田光
一個形象百變，一個靚聲日式 R&B，專揀同日出碟硬撼銷量，令 J-Pop音樂推向巔峯。

光妹出現令很多人失驚無神唱R&B(情況就如華語樂壇的周姐卵)…步姐嘛？想講佢越唱越爛囉…

69.《笑聲救地球》
乜太廖偉雄與小李胡大為用笑聲拍板追打黃一山，竟招來觀眾投訴虐待童工，真係笑聲救地球。

當年爹娘好驚我拍我弟個頭，好似乜太打人咁拍傻小弟的說。講番轉頭，當年的攪笑節目真係好好笑，除咗《笑聲救地球》，仲有《點解咁好笑》(林敏聰？杜德偉？)和《叻人新世紀》 ，唔使屎尿屁，抄吓野攪吓gag就好好笑…

70.安室奈美惠
以4吋高踭長靴加勁舞成為金漆招牌，黝黑皮膚金髮幼眉更令少女爭相模仿。

我是喺安室宣佈結婚生仔先開始聽佢啲歌…當時勁buy《Don't Wanna Cry》，仲會跟住演唱會live喺度伊伊哦哦跟住唱添。老實說佢最紅那個年代我唔多buy，同埋睇番啲相好似晒黑咗既鄧萃雯﹗哈哈

又數住咁多先，下篇再續

上集：我們的九十年代~1
我們的九十年代~3