[港劇]《十月初五的月光》+張生雜談

這一水夜間重播《十月初五的月光》，身邊很多朋友都在熱追…小的在忙著追另一套無追。不過這部可是近年(都不近了，八年前的…)很熱愛的一部，數吓手指原來都翻煲了很多次…

講開這部不如順手吹吓張生拍過的劇集…反正這一水本人很乏…總不成吓吓都在講《魔王》架﹗雖然劇情已白熱化…好緊張﹗

查一查維基張生產量都好豐吓(養家嘛)，不過很多內/外地製作的都沒看過就不談了，只談無記的吧…

1992年:《沖天小子》

沒看過…

1993年:《射鵰英雄傳之九陰真經》飾  陳玄風

我懷疑是拍來賣埠(當年無記古裝劇在海外還很有市場就是了，只是後來台灣/內地發力製作良品以後就是另一番風景了…)。記得除了這套《九陰真經》還有套《中神通王重陽》(有鄭伊健演王重陽)，好像在香港電視度見過劇名，應該是深夜重播過吧。兩套都沒看過。但看卡士就有趣，兩部劇很多演員都有份拍94年的《射鵰》，但角色就大洗牌…最攪笑係關寶慧由梅超風變穆念慈…大佬，兩個角色爭好遠耶﹗(其實睇完《都市的童話》關小姐演奸人莎樂美，我覺得佢都好qualify演梅超風呢挺角色喎…)

1994年:《黃浦傾情》飾任鴻飛

沒看過。看到劇照驚嘆當年郭小姐塊面可以咁圓…

1994年:《射鵰英雄傳》飾 郭靖

呢部就多野講啦。

郭靖搵張生來演未免太靚仔了吧？(黃日華都好似拉高咗個靚仔curve)郭靖個樣係一望埋去就覺係慒丙(或日忠厚)，真係好怪。朱小姐呢，我嚴重覺得佢係重演翁美玲，那些do咀、玩頭髮和講野語氣都如出一徹，造型嬌俏但演得有點過火，幾難受的。在未看83年版(我是在95年重播才看的…)前覺得94版還可，看完後覺得完全唔掂，選角有點求其和就手囉，都唔好提勁多郊野公園景，大佬…北方有郊野公園的嗎？

最嘔血一幕是蓉兒在沙灘(臨安有沙灘﹗﹗﹗詭異﹗)和靖哥哥行行吓見到有個大嬸抱著嬰兒時興奮大叫：「你睇吓個BB幾得意﹗」﹗﹗﹗真以為自己幻聽，或…其實我睇緊《尋秦記》上篇《尋宋記》…

呢套野無83年版對照都OK難受吓，之後1年開的《神鵰》好像痛定思痛了，雖然場景還是很多郊野公園和假到爆廠景，但在選角和劇本上認真咗好多…

又，我記得肥彭在拍呢套野時有去探班的…不知何解我留起了那期香港電視報導…

又又，呢套劇首主題曲句「射鵰射獅射虎」幾好笑。但插曲《難得糊塗》很不錯，多年來的心水。又又又，其實張生啲歌都幾好聽架，無奈唱歌無發達啦，登台除外。

我看金庸小說1~電視劇篇
[港劇]射鵰馬拉松
[港劇]射鵰英雄傳(83翁美玲+黃日華版)

1994年:《天子屠龍》飾 康熙

睇得多瓊瑤姨的清裝古裝片，其實小的不太看得順眼無記獨創的「成頭都係頭髮唔剃頭版」造型，超怪。明明公主王子阿爹阿娘都有滿州版叫法又要跟番宋元明啲叫法，好唔pro。清宮女子的造型又求其，髮髻後面一張黑色疑似卡紙，腳又唔著花盤底，真係好難頂。所以說，《金枝》係不可多得的認真，at least在造型方面可了一番苦功。

故事無乜特別，就係康熙點揮低鰲拜，中間穿插和冰月和水月(公主)(梁小冰)的愛情故事…。

不知何解我睇親電影版徐錦江或98無記版既王俊棠演鰲拜我都想笑(電影版真係笑片呢既又…)，唯獨呢套野林嘉華又真係有攝人氣勢，可能睇完《射鵰》入面佢演楊鐵心，正氣形象入咗腦…。但見林映輝勁正經的演母儀天下的皇后，我又想笑…

[港劇]最喜愛的回顧~3~古裝片(非武俠劇類)

1996年:《天地男兒》飾 羅子健

見《熱煲系列3~：古天樂先生》《天地男兒》一段(18/2/12後按：仲有呢篇呀﹗哈哈哈)，不重覆了。加多句，張生首插曲《怎會如此》很不錯的。

2000年:《十月初五的月光》飾 文初

其實呢套野劇情老土度和粵語長片有得揮，拋夫棄子呀二奶含辛茹苦養大個女又被大婆識穿…乜都有，娘到無晒朋友，最難受係為QE為了個女著想居然叫文初離開君好…嘩…好衰呀﹗那段我睇到勁喊，但又忍不住勁鬧QE自私…。雖然係咁，但小的還是入了套碟不停回帶…。其實我不太喜歡禮信…但呢個程咬金又實在太完美…唉…雖然劇情很土，不過很感人就是了…如全海景對QE痴情，鄧浩光(忘了角色名)和海琳的感情線，其實我覺得比文初/君好/禮信的3角關係來得感人囉…都說，見到好姨我有點不安…特別看了《銀樓金粉》後…

又，呢套野文初和君好介乎兄妹和情人的感情係幾真摯細膩的，我家人就是看了這部對蛇視后改觀(之前還是很頂不順她的雞仔聲…)。記得劇中佢地既主題曲是《分分鐘需要你》，呀，這招似乎《家好月圓》都在回帶，阿慶一樣有首阿lam唱的飲歌…咦，呢個角色又係啞架喎﹗

又又，點解結局君好和禮信帶住小朋友重回澳門，佢要著套條裙勁短的suit，很肉酸…

我想知，陳mana究竟有幾多個假髮？佢同阿紅姨係咪share同個supplier既呢？點解可以一樣咁假，咁核突？

即係呢，呢套野係幾有親切感，乃因小的真係有親戚住喺呢條街，又有親戚讀澳大，雖然很多場景都很懶的在民初街到拍(澳門舊極都無民初年代咁誇吧﹗)，不過見到偶然出一出的澳門實景還是很高興…哈哈。

呢套野之後有兩套食水之電影《跑馬地的月光》和《月滿抱西環》，《跑馬地》沒印象(但應該看過…有記常播就是了…)，《西環》那套有點悲情，特別是蔡一智個女在鄭中基面前被車車死…嘩…煽情但佢成功咗，很慘情啊﹗張生演的警察都好似係要死的…

2002年:《談判專家》飾 楊光

究竟有無在無記播過？我是看大陸版vcd的，逼住要聽國語配音，勁騎呢。睇完先知原來談判專家係警察在正式職務以外top on的，於是軍裝張生就不停要換制服去談判…好忙。那水好像常見文頌嫻演出(仲有《烈火雄心2》)，呢兩年好似唔見咗人？仲有唐寧喎，去咗邊呢？

呢套野最攪笑係警察歐陽震華和郭可盈都忙著工作，冷落了另一半楊婉儀和陳豪，兩個被冷落了的居然搭上，淨下兩個被遺下的慢慢產生感情，嘩，簡直係日劇《戀人啊》那個交換partner concept…

另，張生個角色係鐘意玩的大細路，入training camp會帶埋機煲碟…但…同時…佢係打gameboy…真係無幾可見男仔之家玩gameboy喎？道具方面好像hea了點呢…

2003年:《西關大少》飾 周天賜

張生和蛇視后再合作之作。這套我好像斷斷續續的看過，只能說張生係不老的傳說啦(可以挑戰郭晉安不老之神地位…)，仲做緊後生仔二世祖呀﹗太強大了。當年是為了看松哥和趙雅芝的，中間miss了，再看已是結局…頗喜歡那個open ending，只影住牆上塗鴉和張、蛇二人旁白，簡簡單單的交代了結局…

就是說，印象不太深…

2003年:《飛刀，又見飛刀》飾 李壞

無看過…另，這套是無記的劇嗎？

2004年:《廉政行動2004》

都沒看過。(其他年份倒是有的…)

2004年:《水滸無間道》飾 夏松蔭/武松

記得呢套野出街時好多人鬧垃圾，又抄《無間道》云云，但我覺得佢惡攪《水滸傳》和《無間道》都好出色喎，仲超級好笑，拍得住《尋秦記》既爆笑指數啊﹗王喜很一貫的懶cool警察，張生就係笑點，本來佢都係警察仲要係勁正義那種，點知無啦啦被點去做古惑仔臥底，仲要失驚無神知道自己係武松轉世，whereas其他人如潘金蓮、林沖完全未醒覺，現代版武松只得用盡方法刺激沖恢復記憶…好好笑﹗和黃sir(都係姓黃的﹗)傾點樣整左青龍右白虎整古做怪但求似模似樣都已笑鬼死我；另，松蔭和黃sir每次見面總係要惡攪《無間道》，但又加啲爆笑對白…很爆。呀，補充，黃sir係由本人勁欣賞的劉家輝演，佢和張生演喜劇真係一流…超好笑…

另，黎視后在此劇的造型都勁性感(古代版係潘金蓮嘛…)，佢又要一邊話自己無心勾人家男友，但咁性感又引到其他人暈得一陣陣，吓吓都被懷疑係唔正經既女人，大佬，見你個造型已無說服力啦…呃…

另另，呢套野都幾感概，96年既《緝私群英》王喜和譚小環係男女主角兼演一對，呢套野王喜依然是男主角，但譚小環就去咗演惡攪韓森既元華情婦，真係歲月催人…唉呀…
**********************************************

係咁多，再續…

24/1/12後按：是有一套可以後補的： [港劇]《魚躍在花見》~熟齡版《將太的壽司》
24/8/13再後按，再一套新的《衝上雲霄II》的文：這篇/這篇/這篇

另一篇：突然懷舊之張智霖篇
**********************************************「讀書又唔見咁叻一日到黑睇電視」歲月總集：

熱煲小生巡禮之1：古巨基先生
今期熱煲：長瀨智也~
熱煲系列2~光一王子  (7/2/12後按：原來我無視咗堂本剛那一篇喎﹗)
熱煲系列3~：古天樂先生
熱煲系列5~：王喜篇