2012/02/12

《Concert YY 黃偉文作品展》~13XXX人集體唱K

開首:Shine《燕尾蝶》
我諗我終於明白點解聽到Shine 2人在台上唱此曲時會聽得毛管棟了…00s出道/plug的歌已經拎出嚟集體回憶一番了﹗嗚呀…
(補充資料先:我係睇11/2那場的,睇文說今晚12/2那場SHINE再登場,仲唱多首《祖與占》添﹗

容祖兒  《桃色冒險》、《.跑步機上》、《隆重登場》
容天后閃爆禮服個郁好令﹗同埋我是比較鐘意睇佢勁歌熱舞的…。

薛凱琪 《奇洛李維斯回信》、《男孩像你》
記得y文話過因為千fa長大了所以佢將啲少女情懷轉移咗去費公主度,然而費公主又確係handle得到喎﹗兩首都係k房一時hit歌耶…

吳浩康 《洗剪吹》
雖然覺得英記太有心想捧佢做陳醫生第二,但老實說Deep哥唱歌確係不賴,不過際遇(不論係外來或自家因素啦吓…)既野真係好難講,歌依然唱得好,但只怕記得佢係莊思敏前男友的人比較多吧?

李蕙敏 《(你沒有)好結果》、《活得比你好》
把聲真係好沙﹗係唱了幾句就沙那種﹗不過呢兩首歌都鬼咁慘鬼咁滄桑,聲沙反而更對味喎﹗終於00s青春小鳥回憶錄可以停一停返一返去90年代了。btw,兩首其實我都麻麻,我鐘意《橫濱別戀》。

何韻詩   《艷光四射》、《你是八十年代》、《光明會》
光明會嚟了…忽然好似去咗06/07年睇《live in unity》咁(被某博友感染…我竟然有一絲期待會唱《我是芭比》…哈哈)…睇見《光明會》跳番mv入面隻舞好開心呀睇得﹗

林宥嘉 《自然醒》、《唐人街》
yoga哥的歌其實我聽完第一隻碟之後就無聽了…呢兩首友人說係新碟的歌…《自然醒》幾得意喎﹗等我搵嚟睇吓先﹗同埋yoga哥現場把聲好壓場的說…就算唔識首歌但還是聽得很投入的說…

黃耀明 《親愛的瑪嘉烈(黃耀明X林宥嘉)》、《.這麼遠(那麼近)》、《我這麼容易愛人》
同行友人high到癲咗…我…幾乎係瞓著咗…一邊狐疑點解草蜢敬hins之後我又再一次睇到個有明哥做嘉賓的演唱會架?﹗

twins  《明愛暗戀補習社》、《愛情當入樽》、《二人世界盃》、《下一站天后》、《多謝失戀》
點解第一場係醫生唱6隻我睇時係癲士唱5隻架?well,首先我唔明如果要唱3首快歌的話點解會整對行都危危乎的無跟高跟鞋俾佢兩個?相信係繼黎老闆後第二個唱快歌但企定定的說…而…雖然癲士係喺我個年代既歌手…但太耐無聽過真係up唔出籃球和足球那首歌叫乜名…(於是我地就叫兩首歌做《籃球》同《足球》)…

亦因為佢地出色的演出卒之成了全場最勁的廁所位…真係聞者傷心聽者流淚…

容祖兒 《牆紙》
好聽﹗有人在fb傳過前兩場走音版…睇的時候又無事喎﹗

李克勤 《世界末日的早上》、《我不會唱歌》
我想話呢…我好鐘意一首《勤仔》的歌…唔知有無人識?好攪笑的…

周國賢 《目黑》
當我在疑問點解唔叫費公主出嚟合唱的時候…同行友人話呢首有獨唱版架喎﹗

何韻詩 《勞斯萊斯》、《癡情司》
周爸爸唱完《目黑》之後無走到跟住hocc就出嚟唱了…嘩﹗全場wi嘩鬼叫…(好似變咗hocc演唱會咁﹗小的都叫埋一份…但問題係…其實我無睇過《梁祝》架喎﹗)…另…雖然《賈寶玉》我麻麻地,但十分喜歡《癡情司》的說…

傅珮嘉 《絕》
說好的《漩渦》、《垃圾》呢?(其實candy姐我比較喜歡《自戀影院》…都係一時唱k之選…)

容祖兒 《痛愛》、《16號愛人》、《.心淡》
救命呀﹗唱k之選呀﹗(其實我幾鐘意《爭氣》架﹗不過梗係《心淡》的對白攞命啲﹗怎麼無咗彭姑啊﹗嗚…只能在fb洗版文之中回味了…)

蘇永康  《那誰》
阿公怎麼只唱了一首《that who》呀﹗我不依呀﹗我們可是因為佢在演唱會裡賣的廣告而去買飛架喎﹗

陳奕迅 《大開眼戒》、《活著多好》、《不知所謂》、《不要離我太遠》、《超人的主題曲》
前兩首都好聽呀﹗估唔到會唱史姐的《不要離我太遠》…不過驚喜不及《超人的主題曲》:「盧大偉陳惠敏方中信方中信方中信給批斗」、「吳耀漢河利秀,江欣燕江欣燕江欣燕」…我爆笑了…

陳奕迅、蘇永康、黃耀明、容祖兒、何韻詩、薛凱琪、黃偉文 《給十年後的我》
又是一個好攞命的歌詞…um

*****************************************************************
只是還有一個小小的挑剔,既然場中間放了咁多芒來展示啲歌詞…不如都出埋歌名和原唱者丫…好難估歌名架﹗同埋中間又一段少咗兩粒字和錯space位…不過瑕不掩瑜既…

其實萬幾人一齊大合唱真係好high的。哈哈。

歌單資料來源

22 則留言:

  1. 我同事都係睇呢晚,twin個part佢都叫晒救命....

    彭羚同明哥首漩渦簡直是全晚高潮....(我都係youtube到睇XDDD)

    回覆刪除
    回覆
    1. 以唱嚟講佢地算走音走得少…但我真係接受唔到佢地有意圖或企圖去跳…但對鞋又真係太危危乎幾乎企都企唔到…咁明知要郁就轉個方便啲既郁啦…

      同埋…其實癲士最紅啲《女校男生》、《風箏與風》…係林夕架喎﹗

      我睇那晚無《漩渦》呀﹗嗚…之後那一晚(星期日)有草蜢和swing添呀﹗我不依…嗚…(滾地)

      刪除
  2. Shine呢兩條友,我細個果時迷到佢地不得了,我全部碟都有,見到佢地真係激動到眼淚都係咁流!!!!!經過今次佢地應該會認真考慮下復出…哈哈哈!

    回覆刪除
    回覆
    1. 佢地出道時我聽jpop聽得最癲,廣東歌聽係有聽不過無乜邊個特別追…

      我最記得係《祖與占》、《曼谷瑪麗亞》,反而係佢地摺咗之後買番隻精選碟先覺得佢地啲歌幾唔錯…

      呀…其實我好鐘意又南同阿sa套《一碌蔗》…呀…我的青春歲月呀…嗚呀…見到shine出場時我係莫名感動的…

      刪除
    2. 我都好鐘意《一碌蔗》﹐翻睇過好多次。又南真係好得
      Shine最好聽係燕尾蝶、一一、祖與占和半成年……其實仲多好歌
      睇完你個blog突然好想聽返佢地D歌添

      刪除
    3. Hotaru:

      呢套戲唔記得喺長洲定南丫島拍,拍完之後有啲場景已經拆咗啦…又南真係ok的…話時話,我講咗好耐去睇《打雷台》都未睇…

      又說,癲士咁多套一齊拍的片,我最鐘意睇呢套和《這個夏天有異性》,夠清新…oh﹗

      係喎,《未成年》…講起嚟我都想拎番佢地啲歌出嚟聽…

      刪除
  3. 我只睇返clip咋,但Shine真係唱live都唱得唔錯,嗰時我幾乎首首shine都識架,可惜就是紅不起
    另外Twins.....講真真係好唔掂囉,唔只唔唱得,個outfit都唔係好得,不過我睇clips,好似男星啲outfit都比女星來得好(女星有啲都唔錯,不過整體上又好似男星啲型仔啲)

    回覆刪除
    回覆
    1. 聽落覺得天佑把聲有啲緊張(我能我睇佢地現身第一晚啦…),不過首歌當年成日聽,喺紅館見一出場就係佢地仲要彈番《燕尾蝶》個調子即刻莫名感動…嗚…

      係囉,twins套衫和鞋唱慢歌就ok,要跳舞(起碼郁,行嚟行去)完全唔match,明知佢地要行嚟行去整對boot俾佢地乜都好,唔好整對企都企唔穩既丫…

      男生既西裝一度唔會死得人既,女仔我鐘意容天后跳快歌時套變種踢死兔,好有型,到換番晚裝時就ok咁啦…可能一晚太多晚裝飄來飄去,我對佢同hocc唱快歌時個郁有印象啲…

      刪除
  4. <>這首歌是周國賢獨唱版先架,唱片公司見他首紅,所以先整合唱版的啊~~

    我都有去睇9號個場,真係超級好睇的一個演唱會。

    回覆刪除
    回覆
    1. 目黑<--唔知點解個post del左個歌名=='

      刪除
    2. 其實我都唔係好控制度啲標點邊個得邊個唔得…

      9號咪第一場?你就好啦…有敬hins呀那一晚…

      《目黑》當年好鐘意架,當年我有聽fiona第一隻碟,係經佢先聽《目黑》再知道誰是周國賢…

      刪除
  5. 固然一晚睇到咁多紅歌手係值回票價, 但某些都冇得做, 但又令人好懷念的歌手先難能可貴...都唔紅, 唔係呢個show, 你想睇都冇得睇

    回覆刪除
    回覆
    1. 其實都係,shine出嚟開吓音樂會大家一齊回味吓又無妨(反正而家興集體回憶),但講到出新歌就可能破壞以前美好印象…

      刪除
    2. 如果我知係有shine我死人都要去!!!!

      佢地想出返黎都唔好咁衝動住...香港人好善忘, 呢頭話你返黎啦, 到人地真係出返黎又唔俾錢買碟就死得...人地就係做音樂搵唔到錢先要轉做其他野, 搞到搵唔到食就唔係幾好...

      不過又唔係冇得做o既, 某c9所謂非情歌都冇阿y寫俾shine果d咁精都可以大賣(呀周生d詞呢...係呀好多野想講好多topic呀, 最弊係d詞好粗...娘到...), 証明呢幾年集體回憶本土意識係有得做...係佢地timing唔o岩o者...有d 80/90後而家話shine係佢地童年回憶, 証明都有個底係度...不過佢地兩個一向都唔唱得(睇片就覺得進步左, 但同個"好"字都未拉得上關係...), production要有返咁上下先ok (其實當年電影男孩隻碟係做得唔錯的...)...求求其其就棧搞

      刪除
    3. 我識人就係知道佢二人會現身,到網拍處買680的說…

      佢地啲歌夠攪回味音樂會既話都OK既,好似草蜢咁開親SHOW其實無出碟的,出一首半首新歌當係主題曲跟住就狂唱舊歌…或者佢地可以戲照拍但得閒先合吓體唱吓歌過吓癮咁囉,難得而家大家反應咁好,證明仲有人想聽佢地(原因可能係回味自己失去既青春啦…)最緊要唔好做得濫啫…

      其實攪笑的是張C9最紅那首《喜帖街》係阿Y填的…。我諗周生就好似寫博咁本身儲埋一堆TOPIC,初頭寫時每首都幾得意幾獨到咁,不過當出咗幾隻碟之後就唔夠料開始要搵野嚟寫,唔夠神來之筆啦梗係,最慘係張C9反而紅咗多人留意佢啲歌啦喎…

      刪除
    4. 唔係話唔想shine出返黎, 但當年點解佢地要走都係因為冇人支持o者...如果貿貿然為左一班霎時感動都唔知講真講假o既歌迷全面復出, 到時竟然班人又閃鬼晒就真係重灰...完全証實了D人係幾冇良心....佢地都係派下一兩首歌, 搞D小型SHOW睇下反應先再打算啦... (不過我覺得佢地未必冇機會彈返起, 但確係要小心部署, 絕對不能好似BOYZ咁突然殺出黎唔知佢做過乜....咁真係唔出好過出)

      說起創作呢, 村上春樹(真身, 不是向西那個)有本書講跑步, 談及佢自己在寫作方面不是靠天才和天掉下來的靈感, 而且他是以寫作為生, 不可能咁等運到, 所以他每天是不停寫不停練, 使發掘靈感成為他的作家技能...要寫作的時候就不愁找靈感了...
      雖然歌詞九成都是寫情情愛愛, 但要做到好像阿Y咁愛情都可以寫幾百款(噢...我突然想起D日文歌高達八成唔係"愛してる"就"抱きしめる"...), 重加埋唔係情歌又幾廿樣首首見得人, 就不能坐低等靈感到....要識得發掘題材先得...一個普通人寫得出幾首好就唔奇, 呢D可能係佢之前已儲了幾十年的元氣彈, 但一用左就冇晒, 唔識發掘, 要儲又有排等, 於是D野睇落咪好似點解差左咁多...皆因不是差左, 而係好貨已售沽, 冇貨補, 唯有求其堆砌應市...所以話職業同興趣可以差好遠

      刪除
    5. boyz太奇怪係之前已經sun boyz乜boyz一輪,跟住人腳又轉嚟轉去,攪到古古怪怪咁啫…咪話,其實佢地首《ready》(定乜鬼…唔記得歌名)我覺得幾ok架喎﹗(因為係敬hins做的﹗哈哈哈)…好過成世《la la世界》啫…

      試水是重要的,點樣先可以唔濫地得閒出吓嚟也是困難的,更難是搵番有質素的班底同佢地做歌…更更難…oh…

      你咁講都係,我寫博諗唔到寫乜就唔寫,但當興趣變成職業就諗唔到寫乜都要繼續寫…所以說…興趣變成職業未必係好事呢…

      "愛してる"就"抱きしめる"<<<初初學日文時好開心架,啲生字嚟嚟去去都係嗰啲,好易聽得出覺得自己好有進步咁XDDD(所以說…成日都見日本歌手填詞…但廣東歌詞係難填好多…)

      刪除
    6. 講開又講,其實我無買過shine啲碟嚟聽,都無特登追佢地啲歌…但呢水聽番佢地啲碟,奇異地竟然有印象哼得出…死啦…真係那些年了…我諗係當年唱k時成日聽人唱…

      刪除
    7. 其實我當年最喜愛就是shine和hocc....hocc我買齊, shine我居然冇買, 好後悔囉...邊度有舊碟我要執返呀真係

      而家睇返, shine係做到要消失, hocc係就係好似好紅...但佢變成咁係咪我想睇的阿詩呢? 定係shine冇出黎, 美好印象長留心中係更美麗...呢個問題...我自己都俾唔到答案...而家買阿詩好似唔係為左支持佢d音樂, 而係感情分...都買開咯, 跟左十年...繼續支持下啦

      我諗shine當年都係普通細路, 人地叫佢做乜就做乜, 食左條水o者. 不過我相信佢地浮沉多年, 應該而家都有d自己睇法同想法, 其實可以試下加下自己野, 向Y學下師食返住果個市場(如果可以搵返james ting同y幫佢地做應該好ok)...我成日覺得Y係想借用shine去表達好多睇法, 而有時一些睇法係需要一個形象合適的歌手去唱出來. 好似少女情懷野佢要搵費公主....所以雖然shine佢地唔紅, 但d詞係睇得出阿Y係落足晒料

      而家有時睇music station, 覺得日本流行歌...好似首首差唔多咁...johnnys那些好鬼來來去去咁o既款...都咪話香港樂壇悶...而且香港樂壇冇左大家又好開心咩, 有時d歌要用母語歌詞唱出感情先至給力, 我就真係唔多enjoy國語歌了

      刪除
    8. 我久不久就去灣仔睇吓有無好野執,個郭城城華星collection都大致執番齊…咁樣碰運氣執舊野別有一番樂趣的…

      hocc好彩去到一個新東家捨得使錢又俾佢自由,碰巧佢個班底夾得開又做得長,同shine剛好相反…

      你講開為感情分,我覺得去到07,08年的古眼神和而家的kinki kids都係咁既case(古眼神我停咗無買了),隻隻碟買係會買,但硬係覺得無以前咁wow到我,聽完…覺得兩位大老哥出隻碟好例行公事…歌迷去買碟又係例行公事…大家都好似在交差咁…

      反而安室真係keep住求變,每隻single都有啲wow野出到嚟的…

      music station我無睇n咁多年了…其實日本好多歌手做開一樣野就唔會變,不過人家個市場萎縮極有個譜,都仲容納到唔同既歌手,唔使佢地吓吓電視廣告乜都做悶到你暈低為止。j+其實我鐘意tokio啲歌多啲,情歌好嘈既rock野好,幾多時有驚喜的,同埋我幾鐘意kattun(雖然我最欣賞的赤西仁走了),又唔係一貫出嚟勁歌熱舞一番就算,kk唔知點解我覺得好行貨…(忍唔住係咁講j+添…)

      刪除
  6. 自戀影院!握手!!!!!

    回覆刪除
    回覆
    1. 呢位施主你真有品味﹗(雖然我已唔太記得點唱…)

      刪除

要講幾句嗎?﹗XD