我們的九十年代~1

唔得啦唔得啦，睇完生果報前一的一篇《我們的九十年代》，再讀埋芒姐的一篇，真係手痕痕要寫番幾句…。八十年代雖然精彩，但始終不及親身經歷的九十年代，樣樣野自己有份，親切感一百呢(其實好多八十年代野我都係九十年代先接觸番的…哈)

可以講的太多了，為免太長(也方便我呃文)…這回應該會cut開做三篇的說。(6/1/12後按：最後只寫了兩篇…同埋第三篇的草稿唔知去咗邊了…囧﹗)((30/4/12後後按：終於搵番兼寫埋了，傳說中的第三篇…~))

1.四大天王張學友、劉德華、黎明、郭富城，黎明賑災獻唱「我又怕心難死」轉key勁走音，還有城城金句： 30歲前唔失身。

郭城城雖然係我小學偶像，但真係覺得那句金句是相當難頂…男人老狗使唔使咁claim自己純情呀？﹗囧﹗不過呢，佢老人家可是由90年代頭爆到尾，頭的杜拉格斯頭帶領無數少男的造型潮流，尾就高呼自己generation x，狂呼「流藍色血」…都係咁貫徹始終的令人滴汗…(無視了三大天王…)

2.玉女一定要長頭髮。唱功毋須好但五官要精緻。掌門人有周慧敏和楊采妮，受歡迎程度還看 Yes卡和信和賣相指數。

記得當年雜誌成日貼完新四大天王後就貼邊啲人係四大天后，記得有一水周玉女係其中一個嚟的說(？﹗﹗﹗)。楊玉女嘛，最記得係佢同郭城城的「情字」廣告，同埋《梁祝》囉，佢和吳柿龍發功令我喊濕幾個枕頭啊…嗚…(怎麼我最記得的都是楊玉女的兒歌…《愛的魔法》、《全城來吧chachacha》那些？﹗)

3.周星馳憑精奇骨格闖影壇，角色名大多叫阿星。越紅越寸，96年演寸爆食神史提芬周，唔扮嘢做自己。

簡單貼番周星星舊文link就得了： 周星星飛佛五大

4.王家衛91年憑超班作《阿飛正傳》攀高峯，上映當日王家衛驚到要老友劉鎮偉在cafe陪坐天光。

我只看得明《阿飛正傳》，其餘的都係睇一陣就頂唔順…如《墜落天使》…殺手都有小學同學…？﹗

5.《大時代》方家三兄妹與四隻蟹被掟落街，玲姐瀕死尋戒指……最後慳妹隨着紅絲巾飄飄，離開紅河村了。

這套劇我真係無乜印象。係咪應該而家拎出嚟欣賞吓呢？﹗

6.王菲改名王靖雯乘《尾班車》來港，改搭尾班機赴美學藝。學成返港做番容易受傷的女人豆泥嫂。

我曾經以為《流非飛》和王菲有關…。當年小的不怎樣聽王菲的…和王大導一樣…唔慣…

7.王傑越「嬲幽」癡女越狂。初來港蓄短髮尚算乾淨，《誰明浪子心》奠定浪子形象，齋唱悲歌。

本來都唔覺，睇完《今生無悔》之後覺得男主角的故事很有型很悲慘… 後來才知原來係王傑的故事…囧﹗太有型了。佢無聲無息走咗…係更型…。但後來喺英記復出就有點反高潮了…那套紅色西裝都唔緊要，最爆和攞命係瞓棺材和《這個夏天有異性》…

8.林志穎17歲台灣小旋風林志穎，愛穿Body Glove及勁厚shoulder pad，髮型勁似城城。

小旋風林志穎﹗﹗﹗Body glove﹗﹗﹗(和Theme有關係的嗎？這個我一直想問的…)呢個我當年好熱愛的…仲買咗好多tee和有個銀包的說…那個手掌logo很經典啊…

9.金牌監製鄧特希開拍《壹號皇庭》教你品味生活，閒來落 bar， 98年《妙手仁心》再斬四両，開始走火入魔。

《皇庭》曾經令我想做律師(因為打官司唔多卻又有閒情成日去飲野喎…)…。《妙手》呢，最記得係紅咗蘇永康的《不想獨自快樂》(當年有同學鐘意到返學路程上可以repeat全程的說…)，同埋佢早過阿嬌叫啊嬌…

10.師奶殺手師奶癡戀電視小生。高檔有西裝形羅嘉良，平民化有型警陶大宇，書生形有吳啟華。任君選擇。

深深記得《刑事偵輯檔案》第一輯的主題曲「一箱一箱檔案裝滿心窗，情理都歸於某一方…」…我好喜歡的古怪基啊﹗…大勇、義仔、Gigi、Jessie…可惜，拍爛咗，後尾攪攪吓直頭crossover(或曰抄…)金田一…好恐怖…。羅嘉良和吳啟華就無乜特別…

11.台灣歌手香港偶像派被台灣幫殺得片甲不留。陳淑樺、伍思凱、張洪量、優客李林，教你聽歌學國語。

仲有張宇、伍佰、黃品源、陶吉吉、范曉萱、蕭亞軒、張震嶽、任賢齊… 當年要扮型嘛，不屑聽香港的偶像，聽台灣國語歌係型既指標嚟架﹗

12.《還珠格格》瓊瑤劇和亞視在港幾十年都紅不了，小燕子和紫薇格格卻打破悶局，來港宣傳fans更逼爆玻璃。

第一集小燕子讓我覺得佢好似傅明憲+范曉萱的說。紫薇性格好一貫的瓊瑤劇女角，相當悶人，當年仲迷小燕子迷到買埋佢隻碟的說。但其實，一系列瓊瑤劇(特別係馬生主演那些)我等友儕當中係好hit吓的…例如《梅花三弄》…

13.鄭秀文、許志安緋聞比愛情更經得起時間考驗。許鄭華星地下情由92年《其實你心裏有沒有我》唱到現在。

佢地兩個都算係「好朋友」呢個詞語的發明人吧？﹗說實在佢地十幾年來不停玩緋聞好鬼煩囉…(我會俾人打嗎？)

14.《午夜凶鈴》一盒錄影帶，睇完就會離奇死亡，最經典係貞子會喺電視度爬出嚟，仲有人睇完部戲之後嚇死咗。

菜菜子在戲中的倒後泊車好強﹗李健都教唔到呀我覺得。同埋呢，而家睇會覺得係笑片，但當時睇完返屋企真係幾驚的…夜晚望住電視和鏡…好驚貞子會爬出嚟囉…囧。btw，自呢套片之後所有「嬲嬲憂憂」的長髮人(不論男女…)都會被稱為「貞子」…(一個新term的誕生啊﹗)

15.《天若有情》華Dee與千金JoJo之戀震撼 MK，穿上婚紗騎電單車踏上最後一程……主題曲插曲同樣催淚。

發現很多戲和mv都鐘意翻扮呢套戲，特別係華dee為Jojo打爛玻璃拎條裙出嚟那一野…(FIR的《我們的愛》﹗)

16.木村拓哉木村憑《悠長假期》、《戀愛世紀》等日劇攻陷香港，水晶蘋果更成為冧女的最佳禮物。

講起上嚟《長假》係我第一次去信和買vcd的睇。本來係為咗睇木村的，但睇完第一集就中咗竹野內豐招了…

17.卡拉 OK怎能忘記飛圖台柱梁雁翎？《像霧像雨又像風》晚晚播，長髮飄飄娘味十足，仲有異國風情伴碟。

飛圖年代我家沒LD機，無得唱K啊…同時間另一稱霸的《天碟》我也沒怎樣看過。睇番啲劇90年代初啲K係要走出去舞台上對住細芒望住台前所有觀眾一齊唱，好驚的說﹗看來是唱慣了現在的自閉房K了…

18.煲日劇老翻VCD興起，由柴門文《東京愛的故事》開始，日劇迷大嗌：《上帝！請給我多點時間》。

《東愛》和《愛情白皮書》我都是近幾年喺有記度睇番，所以感覺不是太深…。話實…《上帝》雖然老土…但都喊濕我幾包紙巾啊…

19.《 X檔案》觀眾全情投入跟莫探員與郭探員追尋不可思議外星生物奇異事件，還真以為戲外兩人是恩愛夫婦。

《X檔案》我沒怎樣看，當年常看的是《ER》…

20.《超級無敵獎門人》超級無敵估歌仔、馬拉松、乒乓波……玩足14年，獎老曾志偉冇高過，遊戲冇變過。

B仔個仔呀…仔女個女…女兒個兒呀…兒孫個孫呀…。初時真係好迷的，後來就頂唔順啲遊戲浪費又核突…無睇…好多年了。 同埋睇咗咁耐，唔多慣獎老無咗林曉LONE的說…

21.《真情》善姨好姨容姨叉燒炳。張慧儀死而復生，雙雙忍痛讓愛兼送仔。我至鍾意都係MayMay同低B瓊。

無記好像一定要整套半個鐘的處境小品，記得當年睇《卡拉屋企》好入神的(我仲記得首歌點唱﹗「喂…夠鐘啦，開電視，睇吓今集講乜先﹗講乜先」…)，之後有 《我愛玫瑰園》和《開心華之里》…無乜印象…之後的《愛生事家庭》想攪笑點知笑唔起，轉走溫情又唔掂，點知就俾接力的《真情》走無限化大溫情老土路線跑出，你真係估佢唔到。WELL，我想問，究竟叉燒一族屋企住到幾多個人？有無人試過整理佢地所有人的關係圖呢？﹗A3紙都印唔晒呀分分鐘…(啲角色死咗都可以無限復活喎﹗)

22.《包青天》何家勁翻生之作。包大人金超群為尊重此角宣佈暫停行房，一禁就禁足2百幾集。

開封有個《包青天》﹗﹗﹗舊文講過就不在此回太多帶了…。只想說後來無記和亞記拍的版本都有點玩爛了…

23.肥師奶由棄婦變女強人，陳秀雯以精湛演技感動萬千師奶，多年後輪到劇中好姊妹鄧萃雯做師奶兵團。

我好記得首主題曲係彭姑唱喎﹗同埋原來碌落樓梯係會小產的…

24.《長腿叔叔》唐韋琪一曲走天涯。細個希望像茱迪一樣寄宿唔使俾父母管，大個梗希望真係有個長腿叔叔啦。

風行一時的兒歌改良版「長腿叔叔你X媽…交出XX的心是你嗎？可否每個季節來DUP我，解開牽掛…」，流行程度和海X樂園兒童王國劈友版不無多樣…(兒童王國…做主角…快樂常有…與小丑劈友…)

25.《侏羅紀公園》史提芬史匹堡代表作之一，恐龍栩栩如生，擘大口嚇親不少觀眾。全球票房狂收順勢拍多部續集。

啊…我到而家都沒看過啊…反而《國產》入而的「豬籮公園」我熟啲…

26.《古惑仔》細細粒與陳浩南，浪漫悲情。「呢度我話事！」殺入銅鑼灣。現實中伊健因演得太神似失去不少工作。

我前老細都說因為呢套野，鄭生少咗好多政府活動的代言…。WELL，我深深記得本來個角色係想搵古天樂的，但因為太敏感所以轉搵鄭生。就如郭城城冷手執個電單車廣告一樣，世上很多野都係好玄妙的。

27.和記廣告黎明換過N個阿May，其中一個係童愛玲。金句如「有緣嘅話，我哋會再見」。

最記得係跳笨豬跳那個…楊玉女和馮大導演姐弟。都唔知點解要跳？﹗要嬴人先要嬴自己嗎？

28.《Beach Boys》反町隆史和竹野內豐鬥剝衫的日劇《Beach Boys》堪稱經典，當年和木村三分天下。

依然覺得這套不過是老翻《長假》而已…

29.《表姐你好嘢》神奇公安鄭碩男動輒出槍，春情勃發又要扮矜持，瞓水床以為鬼上身，唱歌唱爆杯，仲封埋影后。

啊，這部戲讓我知道同胞們愛MAU低…絲襪襯涼鞋…

30.Take That港女必迷的英國男子五人組，隊中最唔突出的 Robbie William 96年單飛卻成了樂壇巨星。

我好像沒迷過西洋組合？TAKE THAT我一路都唔識啊…。反而有聽吓BSB、BOYZONE、SPICE GIRLS的歌…。唔知呢，硬覺得西洋GROUP啲成員九唔搭八，好似求其捉幾個人組埋一齊咁…(還是叫百花齊放呢呢啲？)

31.解剖外星人當一班儍人對着一個假人解剖解足一星期成為高收視節目，無綫嘅《城市追擊》有慾海肥花控訴被姦都唔出奇。

《大內密探零零發》呀﹗話說當年娘親要睇《睇真啲》，呢個節目仲要卑鄙到一條片CUT開成個星期，仲要加長個節目，令我好不爽呀﹗點解？因為當時無記930係播《神鵰俠侶》﹗呢套劇係一分鐘都唔能夠MISS架﹗﹗﹗(怨念…係會講一世架…你試吓阻住我睇電視丫啦﹗)

32.奇洛李維斯來來去去得一號表情，但勝在靚仔角色又有型，造就電影《生死時速》和戲中所戴的G-shock手錶。

G記手錶係喺呢套戲度紅的嗎？話說這款錶都係中學年代除SWATCH以外另一款熱爆之選。當年只得個望字咋…(我上年買咗隻喎…)奇哥，沒怎樣看過佢啲戲…(連佢另一套代表作《廿二世紀吔人網絡》我都只睇過一集…仲要唔知頭唔知路之下去睇的說…)

33.寶麗金三小花湯寶如、劉小慧與黎瑞恩三大玉女。當年三小花今日最愛攻四方城。

講起寶記我只會諗起《美少女戰士》的周玉女、王HING平同湯寶如「美少女轉身變，已變成戰士…」…

34.葉玉卿冰後藏着軟肉溫香，葉玉卿出位路第一招。第二步拍三級片兼出唱片，之後殺入電視從良。

嘩﹗玉卿嫂喺冰後那張相真係超經典﹗《娛樂插班生》都翻玩咗，笑死我。佢真係搶先一著，先過人脫，又先過從良，又先過人跳入電視界，又入到屋仲唱埋歌(佢啲歌《卿本佳人》、《來尋夢》都係正經得來好聽的﹗實在唔係《赤裸我思緒》可比的…)，真係不得不說…卿姐你好野﹗

35.寫真熱胴體熱浪襲九十年代。天使徐若瑄與舒淇，攞命有李莉莉，嚇人有徐錦江，最認真竟也是他。

李莉莉個冷氣廣告呀…講起寫真我竟然諗起李華月…哈。同埋那水好多半紅不黑的走去一脫求生，不過無幾多個好似玉卿嫂咁成功囉。

36.海潮變態版《長腿叔叔》，海潮溫碧霞無論泰山裝或大領衫，統統變斜膊衫晒香肩附送心形嘴。

《火玫瑰》我睇完係完全無印象，就只有海潮的露膊衫…

37.火車鬧鬼廣告小孩玩火車玩玩吓多咗個，嘴角又多笪血迹。有傳他們拍攝九鐵廣告後失蹤，每聽到火車的響按聲，都會想起他們。

記得吳剛事傅主持的《城追》前身(《零通天地線》？我亂說的…哈，當時應該係依附喺EYT的一個小SESSION而已…)有分析過這個廣告的…嘩…，我當年真係好驚架…有鬼喎﹗我膽小呀

38.黎姿《白恤衫》內藏愛美神飛彈，《你是明日意義》凸顯她的單薄唱功，難怪演戲較易令人接受。

90年代可說是係人都可以出碟，有勁多一碟歌星，有勁多拍開戲的無啦啦出碟，也有勁多出咗陣就無下文的…黎視后之後專心拍戲可說是相當明智的決定。佢啲歌係FLAT到你懷疑自己係讀緊而唔係唱緊，《白恤衫》難唱架啦，試吓唱《不是娃娃》丫﹗

39.林夕VS黃偉文兩大填詞人寫盡90年代男歡女愛。黃偉文當年憑《你沒有好結果》一鳴驚人，越填越勇。

當年我們都是以娛聞樂事為人生最重要事，不論時刻地點都在談論呢啲話題。有次拜年時份講起呢首歌，我們得到長輩們一百萬聲的「大吉利是」…囧…

40.合唱歌《相思風雨中》、《現代愛情故事》、《相逢何必曾相識》──張智霖、許秋怡更傳出緋聞。

我喜歡《長流不息》：「人潮裡跌蕩，未抽空細看…」同埋《只想你會意》…咦，都係寶記喎…

41.《男兒當入樽》別說晴子，單看流川、櫻木對籃球的熱誠，一股熱血正在燃燒，即刻要落街轉身射個三分波！

呢套野我一路都唔明，點解啲人高中仲大隻過四十歲阿叔？點解一場波可以打咁耐？點解？點解？(謎團同《足球小將》…)，記得香港係有套騎呢真人版電影，鄭伊 麵做主角的(係咪都叫《男兒當入樽》？﹗)…女角有麥家琪和郭譪明的…點解我咁記得？因為古天樂有份做架﹗我睇咗好多次…哈…

數住咁多先，下篇再續…

下篇：我們的九十年代~2
我們的九十年代~3