追思會的廠景主持…

一直不明白(也不滿意)何解直/轉播本地頒獎典禮要加個廠景主持，懶係為大家預告、簡報結果呀咁…。至於這一回大神追思會的直播，我明既，加個廠景主持講啲野攝時間，美國那邊假如有乜野delay、訊號甩漏呀咁，camera哥哥可以即刻影番廠，有個主持即刻講野不致deadair又deadair。我明既我明既，但…可唔可以pro少少，做多少少資料搜集呢？

昨晚12時多就坐定定喺電視機前，本來一心睇肥豬台，諗住可以避開匪趣台的主持嘛，你當我崇洋吧…但…一轉過去肥豬台…李浩林先生﹗﹗﹗囧﹗﹗﹗乜又係你呀﹗﹗﹗轉去有記度望吓，MTV台沒直播，逼住睇新記娛樂新聞台，也是一個囧…

點解我咁想睇洋人台呢？尤記得當年梅姐舉行記者會宣佈自己患癌的消息，TBB播唔切嘛，就睇有記娛聞台，個記者會就係delay又delay，喺開始之前親愛的主播們唔知點解好似無料可講咁，為時十幾廿分鐘的等待過程，佢地係不停重覆「今日係有好多朋友來支持梅艷芳的，包括有劉嘉玲、鄭秀文、梁家輝、 xxx、xxx…(我唔記得啲名啦…)」、「係呀，今日個記者會係有很多朋友來支持梅艷芳的」、「無錯，呢啲朋友係包括劉嘉玲、鄭秀文、梁家輝、xxx、 xxx…」、「無錯，咁佢地係會嚟晒酒店現場支持梅艷芳的…」…咁我都知有乜朋友嚟支持梅姐係即時新聞的部份，比讀舊料好，但…都唔使不停repeat 架？﹗睇到我勁驚(一路都覺得呢個台的主播料接料的接駁位，講既對白係勁odd的…)

琴晚我不停轉有記、肥豬台、匪趣台…，三邊的主持都係不停repeat「今次MJ的追思會係有XXXXX萬人喺網上登記，只有XXX萬人可以抽到門票」(有主持講咗戲飛呀吓﹗)、「每個 門票得主都會有手帶和門票兩張」、「MJ的大碟全球銷量賣咗XXX萬張」、「最暢銷的係邊張邊張」。當有記連接上美國的現場片段，片段中CNN的主持拎住追思會的MJ紀念冊，佢正每頁揭著俾觀眾睇內容時，阿主持…我諗佢係有意圖即時翻譯洋主持講乜的，不過佢就爆咗句「紀念冊入面係有好多MJ的圖片」…囧… 唔通有我既圖片麼…無記的李生就不停repeat MJ的家人將會幾點幾點在葬禮完成後由邊度邊度過去追思會現場，佢係不停讀番啲地點名。我諗佢份稿係得那幾句，又不幸美國那邊delay了，於是佢就逼住不停重覆僅有的幾句對白…

我在想係咪應該有啲應變措施呢？live喎，delay都好正常架，平時做show如果 delay咗都會有遊戲同現場觀眾玩吓架…。兩台其實都有既，中間播吓大神的生平片段、MV，同埋和Uncle Ray、黃志淙的訪問，不過唔好彩係唔夠用嚟攝時間…於是我坐咗成個鐘，就係聽咗成個鐘「精彩旁述」。我又在想，MJ本身生平事跡卻除負面新聞都好多野講架，其實係咪有內部指引話呢啲大事直播的主持只可以跟稿讀，唔夠撐就不停repeat頂到美國那邊追思會開始呢？

很累撐不住去睡覺了，開收音機發現rthk2都在直播，唉呀早之開住收音機睇電視啦。兩個DJ梁兆輝和李志剛都有讀上述比較factual的資料，同時也會講吓MJ一些小趣事(當然，都係正面架啦)，又講吓啲會出席或者唔會出席的嘉賓和大神的事…。係咪我又mean咗呢？聽吓呢啲小故事，真係舒服過聽電視台的主持重覆又重覆喎，同埋，啲主持識唔識MJ/洋樂啲野架(rthk的兩個DJ真係主持音樂節目架喎…)？﹗

原由：MJ RIP
MJ