2013/12/20

[韓劇]《來自星星的你》(1-4)

本來都沒怎樣期待的,但見森動小弟和全智賢,豈不是《盜賊們》的組合﹗套戲森動小弟俾人拉咗就唔知去咗邊了…今次做男一可以玩足全程啦~~~

一看故事雖然老梗(as usual),但出乎意料的好看呀…比起追到無晒心機的《繼承者們》和《漂亮男人》,這部可說是繼《聽見你的聲音》後最有動力想等下星期的兩集呀…

30/12/13後按:終於有一套讓我很想ON檔追的了﹗

(某人真係唔好意思…我不是說《漂亮男人》不好看,只是雖然我開始看到看點,但就是沒有動力想再看下去啫…而更不好意思的是…《來自星星的你》頭兩集收視超高,直逼20%收視,不憐《漂》只有3.5%…噢…)

故仔都是熟口熟面的,就是有個來自外星的都敏俊(森動小弟)出現在400年前的朝鮮,救了個少女…呀…那個少女出嫁中正前往夫家路上(不過佢老公已經瓜咗…去守生寡…陰公豬…)…咁因為ufo類物體出現刮大風,於是頂轎差啲飛落街,呢個時候敏俊出手救了個少女…呀…我想話呢一幕啲特技都…幾假的…當然,比tbb的還好一點既。而唔知點解成日都有定鏡…想顯示敏俊等外星人跟地球人的分別吧…好鬼《22世紀殺人網絡》feel…囧。

跟住鏡頭又一轉去了現代,原來敏俊一直留喺地球,活了差不多400年﹗囧﹗而…使唔使一嚟就沖涼show腹肌呢﹗(第二集都要沖涼…雖然我唔明點解沖涼仲圍要條毛巾喺下身…外星人是這樣沖涼的嗎?)((沖涼鏡頭出現的速度,拍得住《繼承者們》了﹗))

一路睇一路諗起《吸血新世紀》,因為不死身所以到現代之後就要每十年換死亡證,之後要再換過個身份去做野吧,但個律師咁樣幫佢做證算唔算做假文件呢?睇劇情介紹話敏俊因而當過好多次兵…哈哈哈﹗

千頌伊(全智賢)是萬千寵愛的女神級明星,但本人無乜common sense,想喺sns同fans親近卻鬧出連連笑話…

睇全智賢的演出…啲眼神動作同撥秀髮啲動作真係好睇似睇緊《盜賊們》…哈哈…
就係呢個張律師同佢們證啦﹗我在諗佢會唔會係幾十年前同敏俊係朋友,又或者當年幫佢做過啲乜咁呢?

常見情節除了沖涼之外,就係男女一通常細細個就會相識而情根深種,原來敏俊曾經喺頌伊15歲時救過佢,頌伊因而鐘意咗佢而無視男二對自己的一往情深,跟住女二就愛著男二…呀﹗好常見呀﹗

最爆的是,少女頌伊跟那朝鮮少女一樣樣,令樣樣事都冷酷無情的敏俊心有掛念咁,嘩﹗有無咁啱呢﹗究竟有無一套劇係男女一本身唔係一早識架?

而原來頌伊當年救過佢既敏俊念念不忘仲當正佢係初戀,但佢又唔記得敏俊個樣既?唔通佢又好似修夏咁受到極大刺激而選擇性失憶了?

真係好老套呀﹗但睇頌伊無腦行為(被人在討論區度話佢個腦打了botox),佢同同行的女藝人鬧大交好有樂趣(雖然我無睇《我的野蠻女友》…演出的方法係咪都係咁上吓呢?)((咦…我係咪應該睇吓《daisy》看看智賢姐的另一面呢?)),而佢風光背後無真心朋友,經理人又一味奉承佢,之後阿媽又靠佢呃飲呃食咁,其實都幾慘,之後除了做藝人啲風光戲和發神經狂叫的戲之餘應該會有多啲內心戲了?﹗噢

至於森動小弟,佢雖然係有神奇超能力,能啤一啤就令東西郁起來…又說因為不能掂人類的口水和血所以400年來都係自己食飯(但佢又哄到埋一埋同頌伊講野喎﹗),又成日講會發生的事總係會發生咁…究竟400年前個少女係咪因為敏俊救佢唔切所以令佢心生有愧…所以先會咁冷漠呢﹗(我又開始估劇情了…)

劇情最爆既係頌伊剛搬到新大廈,以為鄰居敏俊係私生飯所以串完佢一大餐,跟住當無事啦,第二日逼住要喺學校出現時發現佢就然係自己tutor…大囧﹗智賢姐啲極速變臉好好笑…

LAST BUT NOT LEAST,佢兩人住的大廈係乜大廈嚟架?可以鬼咁大又有上下層咁既…巧京京﹗

唔爭在寫多兩句,阿女二世美一開口時把聲勁熟口面…一check,咦,係《秘密花園》個女二劉仁娜喎﹗佢唔係《仁顯皇后的男人》之後勁紅,升咗上女一架啦咩?

睇了兩集還在舖疑團,輕輕鬆鬆的滿不錯,雖然橋段講不上新鮮(網上說有人話係抄漫畫添喎),而森動和全智賢的組合出嚟效果又滿不錯喎…期待之後的集數不要跌watt啦﹗要不無野煲我又要睇第4次《聽見你的聲音》架啦﹗didi呀~~~~~~

(說時遲那時快,我的第3次《聽見》翻煲已睇到第17集,尾2一集了﹗哈哈哈)
*********************************************
30/12/13第3-4集後按:

  • 究竟點解千頌伊話如果自己再見番救過自己的那個叔叔(但那個叔叔是森動小弟…囧)的話一定會認得佢,而敏俊又咁想見番當年自己救的那個妹妹,明明就在眼前但大家又唔認得大家呢﹗謎團呀﹗
  • 男二的大哥李在景個樣勁奸,而佢果然是鄭子誠的朋友﹗有﹗陰﹗謀﹗佢先害了黃經理(定乜POST話?),再害了韓幼羅了(這個譯名是抄WIKI的,好像跟劇中不一樣的說…)謎團二﹗
  • 那位韓幼羅次次見到頌伊都會鬧晒交發晒癲,我仲以為佢會繼續同頌伊鬥氣的時候就然死了﹗劇情也突然變成警匪推理片,啲線索滲啲滲啲咁,令人很緊張的說﹗
  • 泡菜國還真是度度都有CCTV,而犯人犯案的時候總會懂得整壞附近的CCTV…
  • 話說演頌伊弟弟的安宰賢是讓人想起剛出道的卷卷毛或李DIDI的…呃…是嗎?
  • 點解阿頌伊又唔返學又無演技又成日講啲唔經大腦既野,但佢繼續勁紅既呢?一個謎﹗
  • 但就因為個個都以為係頌伊害死阿韓幼羅,於是佢無處可避(至於點解無處可避都是很有笑點的)被逼躲到都敏俊屋企…很娘地…會發現佢的秘密…(但未發現點解佢沖涼係圍住浴巾喎﹗)
  • 第3集阿頌伊半夜盲腸炎發作,仲要扮到行一行(醫院的病人FASHION﹗)先出門…我笑爆了…
  • UM,敏俊跟朝鮮少女的謎團解多了一點…但都未解得晒喎﹗而原來雖然佢換了一身朝鮮書生裝,但佢唔識用當時的食具…我笑了﹗
  • 呀,我睇得很開心的,不過無CAP圖…整住個文字版先啦…

6 則留言:

  1. 請問你FB係?不如我ADD你
    我係https://www.facebook.com/jonah.chan.33
    請俾你果個我,如你ADD我,我驚有人冒認你
    BY無敵

    回覆刪除
    回覆
    1. re:無敵

      我啲二打六無人冒認既…
      fb…我開了個專頁但無人like…哈哈哈

      刪除
    2. 有無網址?
      BY無敵

      刪除
    3. re:無敵

      喺blog度傾得啦,我諗住cut咗個專頁,唔想man太多野…哈

      刪除
  2. 我睇完1-4集, 再睇你d comment真係笑死我啦! 係lor, 唔通外星人沖涼要圍浴巾? 不過呢套野我覺得好好睇, 追看性好高!

    回覆刪除
    回覆
    1. RE:Miu

      哈,幾集以來笑點、推理和人物塑話都很不錯,追看性頗高的說,我應該會追落去同埋會忍不住每看兩集就MARK低啲笑點﹗哈哈哈
      敏俊圍住毛巾沖涼呢吓我真係忍不住大笑了…究竟點解呢﹗
      一齊睇續睇一齊笑(或許之後係正經愛情片…怎麼我總係想睇野笑…)…哈

      刪除

要講幾句嗎?﹗XD